رینجرز کے ترجمان نے واضح طور پر کہا ہے کہ کسی بھی فردیاادارے کوزبردستی فطرانہ اکٹھاکرنےکی اجازت نہیں ہے
باغی ٹی وی کی رپورٹ کے مطابق ترجمان نے کہاکہ عید الفطر کے موقع پر مساجد،امام بارگاہوں اورجماعت خانوں کےباہر رینجرزجوان تعینات رہیں گے. چاندرات پراسنیپ چیکنگ، موبائل اورموٹرسائیکل گشت کو مزید بڑھا دیا گیا ہے. لائسنس یافتہ یاغیرقانونی اسلحہ لےکرچلنے اور ہوائی فائرنگ کی اجازت نہیں ہوگی.
ترجمان رینجرز نے کہاکہ قانون کی خلاف ورزی کرنےوالوں کیخلاف کارروائی کی جائےگی.
مرکزی رویت ہلال کمیٹی کے چیئرمین مفتی منیب الرحمن نے مفتی شہاب الدین پوپلزئی کو مرکزی رویت ہلال کمیٹی کا چیئرمین بنانے کی تجویز پر کہا ہے کہ حکومت ہی ان کے ہاتھوں میں دے دینی چاہیے.
باغی ٹی وی کی رپورٹ کے مطابق صوبائی وزیر اطلاعات خیبر پختونخواہ شوکت یوسفزئی کی جانب سے بیان دیا گیا تھا کہ مفتی منیب الرحمن کو آرام دینا چاہیے اور مفتی شہاب الدین پوپلزئی کو چیئرمین مرکزی رویت ہلال کمیٹی بنا دینا چاہیے جس پر مفتی منیب الرحمن بھی میدان میں آگئے اور کہا ہے کہ آپ حکومت ہی مفتی پوپلزئی کے کنٹرول میں دے دیں تاکہ تمام کام چوبیس گھنٹے پہلے ہو جایا کریں. انہوں نے کہاکہ بلکہ آپ کو چاہیے کہ پشاور بی آر ٹی بھی ان کے حوالے کر دیں شاید جلدی مکمل ہو جائے.
ادھر وفاقی وزیر سائنس وٹیکنالوجی فواد چودھری نے رویت کے مسئلے کے حل کیلئے قمری کیلنڈر اور ایپلی کیشن کو وزارت کی ویب سائٹ پر اپ لوڈ کر دیا اور کہا ہے کہ مفتی منیب الرحمان اور مفتی شہاب الدین پوپلزئی ہمارے بزرگ ہیں، میں ان کا احترام کرتا ہوں۔
یاد رہے کہ مرکزی رویت ہلال کمیٹی کا اجلاس آج ہو گا جس میںعید کا چاند نظر آنے کا اعلان کیا جائے گا.
شوال کا چاند دیکھنے کیلئے مرکزی رویت ہلال کمیٹی کا اجلاس آج مرکزی رویت ہلال کمیٹ کے چیئرمین مفتی منیب الرحمن کی زیر صدارت ہوگا.
باغی ٹی وی کی رپورٹ کے مطابق مرکزی رویت ہلال کمیٹی کا اجلاس بعد نماز عصر کراچی میں محکمہ موسمیات کے دفتر میں ہو گا۔ کراچی کی طرح ملک کے دیگر شہروں میں بھی زونل ہلال کمیٹیوں کے اجلاس ہوں گے جن میں چاند نظر سے متعلق شہادتیں اکٹھی کی جائیں گی. زونل کمیٹیاں اپنی رویت کی شہادت سے مرکزی کمیٹی کو مطلع کریں گے جس کے بعد سرکاری طور پر عید بدھ کو ہونے کا اعلان کیا جائے گا۔
لاہور میں اجلاس کی صدارت ڈائریکٹر جنرل وزارت مذہبی امور ڈاکٹر طاہر رضا بخاری اور سیکرٹری اوقاف ذوالفقار گھمن کریں گے۔ محکمہ موسمیات کے مطابق آج کراچی میں غروب آفتاب کے وقت چاند کی عمر 28 گھنٹے اور 16 منٹ ہوگی۔ چاند غروب آفتاب کے ایک گھنٹے بعد تک افق پر موجود رہے گا، محکمہ موسمیات نے آج شوال کا چاند نظر آنے کا قوی امکان ظاہر کیا ہے۔ وزیر سائنس و ٹیکنالوجی فواد چوہدری بھی واضح طور پر اعلان کر چکے ہیںکہ قمری کیلنڈر کے مطابق عید الفطر 5 جون بدن کے دن ہی ہو گی.
پنجاب کے بعد سندھ کے وزیراعلیٰ بھی نیب کے ریڈار پر آ گئے، نیب نے وزیراعلیٰ سندھ کے خلاف تحقیقات کی منظوری دے دی
باغی ٹی وی کی رپورٹ کے مطابق جعلی اکاؤنٹس کیس کی تحقیقات کے دوران دادو اور ٹھٹھہ شوگرملز کی کم قیمت میں فروخت کے حوالے سے نیب کو مراد علی شاہ اور قائم علی شاہ کے خلاف ٹھوس شواہد مل گئے۔ چیئرمین نیب نے ٹھٹہ اور دادو شوگر ملز انکوائری کو انوسٹی گیشن میں بدلنے کی منظوری دے دی ، اس حوالہ سے گرفتاریوں کا بھی امکان ہے۔ چئیرمین نیب نے تفتیش کی منظوری دے دی ہے. اومنی گروپ کے تمام عہدیداروں سے نیب تفتیش مکمل کر چکی ہے،. دادو اور ٹھٹھہ شوگر ملز اومنی گروپ کو فروخت کی گئ تھی.
سپریم کورٹ کے احکامات پر ایف آئی اے نے پی آئی اے کے چھ ایئربس 310 طیاروں کی خریداری سے متعلق بد عنوانی کی تحقیقات کا آغاز کر دیا اور اس حوالہ سے چیف ٹیکنیکل افسر سمیت دیگر متعلقہ افسران کو ریکارڈ سمیت طلب کیا ہے.
باغی ٹی وی کی رپورٹ کے مطابق ایف آئی اے کی جانب سے یہ تحقیقات 2004 میں ڈرائی لیز پر حاصل کردہ چھ ایئر بس300 طیاروں کے حوالے سے کی جارہی ہیں. کہا گیا ہے کہ پی آئی اے کی جانب سے 2012 میں لیز کے خاتمے پر مینٹینس کی مد میں ادا شدہ 57 ملین ڈالرزکی واپسی کا کلیم کیا جس پر ایئر بس نے کلیم کی ادائیگی کے بجائے پی آئی اے کو مذکورہ طیاروں کی ملکیت جاری کر دی. طیاروں کی یہ ملکیت مبینہ معاہدے کے تحت 32 ملین ڈالرز کے عوض جاری کی گئی ہے.
رپورٹ میں بتایا گیا ہے کہ ایئر بس نے پی آئی اے کے نام 15 ملین ڈالرز اد اکرنے کیلئے کریڈٹ نوٹ جاری کیا اور اس کریڈٹ نوٹ کی ادائیگی بھی ابھی تک پی آئی اے کو نہیں کی گئی ہے. یہ بھی کہا گیا ہے کہ تحقیقات میں سابق ایم ڈی کیپٹن ندیم یوسف زئی جو 2012 میں تعینات تھے، ان کا بیان ریکارڈ کر لیا گیا ہے جبکہ سابق ایم ڈی کا کہنا ہے کہ اس معاملہ کے ذمہ دار مبینہ طور پر اس وقت کے چیئرمین پی آئی اے ہیں.
واضح رہے کہ پی آئی اے کے چھ ائربس 310 طیاروں کی خریداری کے حوالے سے سپریم کورٹ آف پاکستان نے تحقیقات کا حکم دیا تھا جس پر پی آئی اے کے چیف ٹیکنیکل آفیسر اور دیگر عہدیداران کو طلب کر کے تحقیقات کی جارہی ہیں. ایف آئی اے کی طرف سے 2004سے2012 کے دوران تعینات سی ٹی او اور چیف انجینئرز کی تفصیلات بھی طلب کی گئی ہیں. اسی طرح چیف ٹیکنیکل افسرسے طیاروں کے مرمتی کام کے حوالے سے ریکارڈ بھی طلب کر لیا گیاہے۔ یاد رہے کہ پی آئی اے میں اس سے قبل بھی بے ضابطگیوںکے کئی واقعات سامنے آتے رہے ہیں اور قومی ایئر لائن کو کرپشن کے واقعات کے سبب شدید خسارے کا سامنا رہا ہے.
کراچی میں ہاکس بے روڈ پر ٹرک اور رکشے میں ٹکر سے خوفناک حادثہ پیش آیا ہے.
باٹی ٹی وی کی رپورٹ کے مطابق اس افسوسناک حادثہ میں ایک بچی جاں بحق او ر پانچ افراد زخمی ہوئے ہیں. ریسکیو ذرائع کا کہنا ہے کہ اس افسوسناک حادثہ کے بعد علاقہ میں دکھ اور رنج و غم کی فضا ہے.
یاد رہے کہ ڈرائیورز کی غلطی کے پیش نظر شہر میں ایسے حادثات پیش آتے رہتے ہیں.
وزارت کامرس حکومت پاکستان کی جانب سے بنائی گئی امپورٹ پالیسی 2016 سندھ ہائیکورٹ میں چیلنج کر دی گئی
باغی ٹی وی کی رپورٹ کے مطابق وزارت کامرس کی جانب سے بنائی گئی امپورٹ پالیسی 2016 کو ایک شہری نے عدالت میں چینلج کیا ہے. شہری کی استدعا پر سندھ ہائیکورٹ کے ایک رکنی بینچ نے وفاقی حکومت کونوٹس جاری کرتے ہوئے 17 جون تک جواب طلب کر لیا ہے. شہری نے سید شایان احمد کے توسط سے عدالت میں درخواست دائر کی تھی. درخواست میں عدالت سے استدعا کی گئی تھی کہ حکومت نے استعمال شدہ گاڑیوں کی امپورٹ بند کر دی ہے. جو کہ ہر شہری کے بنیادی حقوق کی خلاف ورزی ہے. وکیل نے سیکشن 5 سیریل نمبر 10 اپینڈک سی،2016 کو عدالت میں چیلنج کیا ہے. دائر درخواست میں مزید استدعا کی گئی ہے کہ یہ پالیسی مقامی آٹو موبائل مینو فیکچرر کو فائدہ پہنچانے کے لئے بنائی گئی .اس پالیسی سے مقامی کاروبار زیادہ ہوا ہے. اور عوام کی مشکلات میں اضافہ ہوا ہے.
مقامی آٹو موبائل انڈسٹری ایک سال میں ایک لاکھ 84 ہزار گاڑیاں تیار کرتے ہیں. جبکہ پیسے وہ تین لاکھ گاڑیوں کے وصول کرتے ہیں
پاکستان نیوی کے جہاز پی این ایس خیبر نے بحرین کی بندرگاہ کا دورہ کیا ہے
باغی ٹی وی کی رپورٹ کے مطابق ترجمان پاک بحریہ نے کہا ہے کہ ریجنل میری ٹائم سیکیورٹی پیٹرول کے ضمن میں شمالی بحیرہ عرب میں تعینات پی این ایس خیبرنے بحرین کی بندرگاہ مینا سلمان کا دورہ کیا،بندر گاہ پہنچنے پر رائل بحرین نیول فورسز کے آفیسرز اور جوانوں نے پی این ایس خیبر جہاز کا پرتپاک استقبال کیا۔جہاز کے کمانڈنگ آفیسر نے کمانڈر بحرین کوسٹ گارڈ اور ڈپٹی کمانڈر رائل بحرین نیول فورسز سے ملاقاتیں بھی کیں،ملاقاتوں کے دوران باہمی دلچسپی کے امور پر تبادلہ خیال کیا گیا۔ترجمان پاک بحریہ کا مزید کہنا تھا کہ دورے کے اختتام پر پی این ایس خیبر نے شمالی بحیرہ عرب میں ریجنل میری ٹائم سکیورٹی پیٹرول کا دوبارہ آغاز کیا۔ پی این ایس خیبر کی تعیناتی کا مقصد شمالی بحیرہ عرب میں میری ٹائم سیکیورٹی آپریشنز انجام دینا ہے تاکہ سمندری علاقے کو عالمی تجارت کیلئے محفوظ اور پُرامن بنایا جاسکے .
پی آئی اے کے تربیتی طیارے میں فنی خرابی کی وجہ سے کیٹی بندر کے قریب ایمرجنسی لینڈنگ کی گئی ہے.
باغی ٹی وی کی رپورٹ کے مطابق پی آئی اے کے ترجمان نے کہا ہے کہ کیٹی بندر صوبہ سندھ کے ضلع ٹھٹہ میں واقع ہے۔ وہاں پی آئی اے کے تربیتی طیارے کی ایمرجنسی لینڈنگ کی گئی ہے پی آئی اے ترجمان کے مطابق سیسنا 172 کی ہنگامی لینڈنگ تکنیکی خرابی کے باعث کی گئی ،طیارے میں سوار پائلٹ اور اسٹوڈنٹ دونوں خیریت سے ہیں،طیارے نے کراچی سے صبح 9 بجے اڑان بھری تھی ،تقریباً9بجکر40منٹ پر طیارے میں تکنیکی خرابی پیدا ہوئی،پائلٹ نے مہارت سے طیارے کوکیٹی بندرکے قریب اتار لیا، ترجمان کا کہنا ہے کہ طیارے کے نقصانات کا تخمینہ لگایا جا رہا ہے ،پی آئی اے نے واقعے کی انکوائری شروع کردی ہے.
کراچی میں کالعدم تنظیم کا نام استعمال کر کے بھتہ مانگنے والے دو ملزمان کو گرفتار کر لیا گیا ہے.
باغی ٹی وی کی رپورٹ کے مطابق ایس ایس پی کورنگی کا کہنا ہے کہ ملزمان اپنےہی مالک سے 25ہزار روپےوصول کرنے آئے تھے.رقم نہ دینے پر ملزمان نے قتل کی دھمکی دی. دونو ں ملازم پراپرٹی آفس میں کام کرتے تھے. ایس ایس پی اورنگی نے کہا ہے کہ ملزمان سے بھتہ کی رقم 25 ہزار روپے بھی برآمد کر لی گئی ہے.
رپورٹ کے مطابق ملزمان کی جانب سے ملزمان نےکالعدم تنظیم کےنام سے 10 لاکھ روپے بھتےکی پرچی بھیجی تھی تاہم پولیس نے انہیں گرفتار کر لیا. واضح رہے کہ کراچی میں بھتہ خوری کے واقعات پر پولیس تاحال مکمل طور پر قابو پانے میں ناکام ہے.