Category: کراچی

کراچی کے علاقے ڈیفنس میں قتل کئے گئے مصطفیٰ عامر کیس میں مرکزی ملزم ارمغان کو جسمانی ریمانڈ مکمل ہونے پر عدالت میں پیش کر دیا گیا۔

انسداد دہشت گردی کی منتظم عدالت میں کیس کی سماعت ہوئی، جہاں پولیس نے ملزم کے جسمانی ریمانڈ میں مزید توسیع کی درخواست کی۔سماعت شروع ہوئی تو عدالت نے استفسار کیا کہ ملزم کو کہاں رکھا گیا ہے، جس پر تفتیشی افسر نے بتایا کہ ملزم کو پیش کر دیا گیا ہے۔ عدالت نے مزید پوچھا کہ کیس کی پیشرفت کیا ہے، جس پر تفتیشی افسر نے بتایا کہ آلۂ قتل اور ڈی وی آر برآمد کر لی گئی ہے۔ تاہم، وکیل صفائی عابد زمان نے مؤقف اختیار کیا کہ آلۂ قتل (ڈنڈا) اور ڈی وی آر پہلے ہی برآمد ہو چکی ہے اور میڈیا پر بھی یہ تمام شواہد دکھائے جا چکے ہیں۔عدالت نے کہا کہ میرے علم میں یہ چیزیں نہیں ہیں اور نہ ہی میں میڈیا دیکھتا ہوں۔ جو چیزیں برآمد کی گئی ہیں، کیا انہیں سیل کیا گیا ہے؟ جس پر تفتیشی افسر نے جواب دیا کہ تمام برآمد شدہ اشیا کو سیل کر دیا گیا ہے۔

عدالت نے ملزم ارمغان سے استفسار کیا کہ کیا پولیس نے اسے تشدد کا نشانہ تو نہیں بنایا؟ جس پر ملزم نے جواب دیا کہ ’میں سر نہیں ہلا سکتا‘۔ ملزم نے کہا کہ وہ مزید پولیس حراست میں نہیں رہنا چاہتا۔پراسیکیوٹر نے عدالت سے استدعا کی کہ لیپ ٹاپ اور موبائل فون کا ڈیٹا ریکور کرنا باقی ہے، اس لیے مزید جسمانی ریمانڈ دیا جائے۔ وکلا صفائی نے اعتراض کیا کہ پولیس کی تفتیش مکمل ہو چکی ہے اور مزید جسمانی ریمانڈ کی ضرورت نہیں۔
عدالت نے دلائل سننے کے بعد ملزم ارمغان کے جسمانی ریمانڈ میں مزید 7 روز کی توسیع کر دی اور پولیس کو ہدایت کی کہ آئندہ سماعت پر کیس کی پیشرفت رپورٹ پیش کی جائے۔

علاوہ ازیں، عدالت نے وکیل عابد زمان اور سارہ عاصم خان کی جانب سے مقدمے کا عبوری چالان پیش کرنے کی درخواست پر نوٹس جاری کر دیے۔ مزید برآں، عدالت نے ملزم کے والدین کو 5 منٹ کے لیے ملاقات کی اجازت بھی دے دی۔

بعدازاں انسداد دہشتگردی عدالت میں مصطفی عامر قتل کیس میں عدالت نے سماعت کا تحریری حکم نامہ جاری کردیا۔تحریری حکم نامے کے مطابق ارمغان کے جسمانی ریمانڈ میں7 دن کی توسیع کی استدعا کی گئی، تفتیشی افسر کے مطابق ملزم نے قتل کے بعد والد کو آگاہ کیا، ملزم کے والد نے ملزم کو روپوش ہونے کا مشورہ دیا۔تحریری حکم نامہ میں کہا گیا کہ پراسیکیوٹر نے ریمانڈ میں توسیع کی استدعا کی، وکلا صفائی نے جسمانی ریمانڈ میں توسیع کی مخالفت کی، عدالت نے ملزم ارمغان سے پوچھا کیا آپ پرتشدد کیا گیا؟ ملزم نے عدالتی استفسار پر پر مثبت جواب نہیں دیا۔تحریری حکم نامہ کے مطابق پولیس کسٹڈی کے دوران مزید شواہد ملنے کا بھی امکان ہے، ملزم کے جسمانی ریمانڈ میں 7 دن کی توسیع کی جاتی ہے، وکیل صفائی کی چالان پیش کرنے کی درخواست دائر کی گئی، وکیل صفائی کی چالان پیش کرنے کی درخواست کی سماعت 18 مارچ کو ہوگی۔تحریری حکم نامہ یہ بھی کہا گیا کہ وکیل صفائی کی والدین سے ملزم کی ملاقات کی درخواست پر کمرہ عدالت میں پانچ منٹ کی ملاقات کی اجازت دی گئی۔

روہڑی: کراچی سے راولپنڈی جانے والی تیز گام ایکسپریس روہڑی اسٹیشن پر حادثے کا شکار ہوگئی، جس کے نتیجے میں ٹرین کی ایک بوگی پٹری سے اتر گئی۔

ریلوے ذرائع کے مطابق حادثہ روہڑی اسٹیشن پر پیش آیا، جہاں ٹرین کی ایک بوگی پٹری سے اترنے کے بعد امدادی کارروائیاں فوری طور پر شروع کردی گئیں۔ حادثے کے نتیجے میں اپ ٹریک بلاک ہوگئی اور پٹری کو بھی نقصان پہنچا۔ریلوے حکام کے مطابق خوش قسمتی سے حادثے میں کوئی جانی نقصان نہیں ہوا۔ تاہم، مسافروں کو مشکلات کا سامنا کرنا پڑا اور ٹریک کی بحالی کے لیے تیزی سے کام جاری ہے۔حادثے کے بعد ریلوے نظام متاثر ہوا، جس کے باعث کئی ٹرینوں کو مختلف اسٹیشنز پر روکنا پڑا۔ ریلوے ذرائع کے مطابق،بہاؤالدین زکریا ایکسپریس کو بیگماجی اسٹیشن پر روک دیا گیا۔شاہ حسین ایکسپریس، گرین لائن ایکسپریس اور فرید ایکسپریس کو بھی مختلف اسٹیشنز پر روک دیا گیا۔

ریلوے حکام نے متاثرہ ٹریک کی بحالی کے لیے ہنگامی بنیادوں پر کام شروع کردیا ہے اور جلد از جلد ٹرین سروس کو بحال کرنے کی کوششیں جاری ہیں۔

حادثے کے باعث ٹرینوں میں سوار مسافر مشکلات کا شکار ہوگئے۔ کئی مسافروں کو گھنٹوں انتظار کرنا پڑا، جبکہ دیگر متبادل سفری ذرائع کی تلاش میں نظر آئے۔ریلوے انتظامیہ نے مسافروں سے معذرت کرتے ہوئے یقین دہانی کرائی ہے کہ حادثے کی وجوہات جاننے کے لیے تحقیقات جاری ہیں اور جلد از جلد سفری سہولیات بحال کردی جائیں گی۔ریلوے حکام نے حادثے کی مکمل تحقیقات کا عندیہ دیا ہے تاکہ مستقبل میں ایسے واقعات سے بچا جا سکے۔ مزید برآں، ٹریک کی بحالی اور مسافروں کی سہولت کے لیے اضافی اقدامات کیے جارہے ہیں۔

قابل اعتماد حلقوں میں مصطفیٰ قتل کیس سے منسلک تمام باتیں زیر بحث ہیں کہ کس کی مداخلت پر ارمغان نے جس لڑکی پر بیہمانہ تشدد کیا اس کی ایف آئی آر نہ درج ہونے دی جب کہ اس لڑکی کا شدید زخمی حالت میں ڈیفنس کے اسپتال میں علاج ہوا۔

اس کے خلاف درج متعدد لڑائی جھگڑا، دنگا فساد اور منشیات کی ایف آئی آرز کی کارروائیاں اپنے منطقی انجام تک کیوں نہ پہنچ سکیں؟یہ بات بھی حیران کن رہی کہ پولیس چھاپے کے وقت ارمغان اکیلا 4 گھنٹے تک فائرنگ کرتا رہا اور ایک ڈی ایس پی سمیت دوسرے اہلکار کو زخمی بھی کیا مگر 4 گھنٹے تک پولیس اہلکار اس کو گرفتار نہ کرسکے جب تک کہ اس نے اپنے لیپ ٹاپ اور تیسرے آئی فون کا ڈیٹا ڈیلیٹ نہیں کردیا (پولیس کہتی ہے کہ تیسرا فون ان کو نہیں ملا)۔

4 گھنٹے تک پولیس کو اندر جانے سے کس کی ہدایت پر روکے رکھا گیا؟ کس کے کہنے پر ملزم کا باپ جارحانہ رویہ اختیار کیے ہوئے ہے؟ان تمام اور دیگر سوالات کا صرف ایک جواب ایک افسر نے دیا جس نے کہا کہ ’ملزم 29 برس کا ہے، اس کا ایک دوست 33 برس کا ہے، مذکورہ دوست ایک سیاسی پارٹی کے سینئر رہنما کا چھوٹا بیٹا ہے‘۔افسر کے مطابق ارمغان کے اس دوست کے باپ، اس کے دونوں بیٹے اور ساتھ ہی ان کی پارٹی کی اعلیٰ قیادت بھی اس کیس میں اثر انداز ہے اور یہی وجہ ہے کہ ملزم ارمغان کو ہر جگہ سہولت مل رہی ہے اور وہ اپنی مرضی سے بیان دیتا ہے جو اسے بتایا جاتا ہے۔

یہ کیس کئی سوالات کو جنم دیتا ہے جن کے جوابات تاحال غیر واضح ہیں۔ کیا قانون سب کے لیے برابر ہے یا پھر اثر و رسوخ رکھنے والے ہمیشہ بچ نکلتے ہیں؟ کیا انصاف کا نظام اتنا کمزور ہو چکا ہے کہ ایک بااثر شخص کے بیٹے کو پکڑنے میں بھی ریاست بے بس نظر آتی ہے؟