Category: کراچی

سندھ حکومت نے بغیر رجسٹریشن کے گاڑیوں کو سڑکوں پر لانے پر پابندی عائد کر دی ہے۔ اس حوالے سے سینئر صوبائی وزیر، شرجیل میمن نے کراچی میں ایک پریس کانفرنس کے دوران تفصیلات فراہم کیں۔

شرجیل میمن نے کہا کہ لوگوں کی شکایات تھیں کہ محکمہ ایکسائز کی جانب سے نمبر پلیٹس جاری نہیں کی جا رہیں، تاہم ان کا کہنا تھا کہ ایکسائز ڈپارٹمنٹ کے پاس 80 ہزار نمبر پلیٹس موجود ہیں، لیکن لوگوں نے انہیں اٹھایا نہیں۔ انہوں نے مزید کہا کہ ان نمبر پلیٹس کی تقسیم کو ترجیحی بنیادوں پر کیا جائے گا۔سندھ حکومت کی جانب سے ایک اور اہم اعلان کیا گیا، جس کے مطابق واٹر بورڈ نے واٹر ٹینکرز کے لیے بار کوڈز جاری کر دیے ہیں۔ ان بار کوڈز کی مدد سے گاڑی کی فٹنس چیک کی جا سکے گی۔ ایسے ٹینکرز جو رجسٹرڈ نہیں ہوں گے اور جن پر بار کوڈ نہیں ہوگا، انہیں سڑکوں پر چلنے کی اجازت نہیں دی جائے گی۔

شرجیل میمن نے مزید بتایا کہ ہیوی ٹریفک کے لیے بھی سندھ حکومت نے فٹنس سرٹیفکیٹ کا اجرا لازمی قرار دیا ہے۔ اس سرٹیفکیٹ کے حصول کے لیے ہیوی ٹریفک کو وقت دیا جائے گا، اور جو ٹریفک دوسرے صوبوں سے آتی ہے، ان کے لیے بھی سندھ میں فٹنس سرٹیفکیٹ لینا ضروری ہوگا۔انہوں نے یہ بھی بتایا کہ قانون کے مطابق کوئی بھی گاڑی جب تک رجسٹر نہیں ہوگی، وہ شو روم سے باہر نہیں آ سکتی۔ پیر تک، اگر کوئی غیر رجسٹرڈ گاڑی شو روم سے باہر نکلی تو اس شوروم کو سیل کر دیا جائے گا اور گاڑی ضبط کر لی جائے گی۔ اسی طرح، دوسرے صوبوں سے آنے والی امپورٹڈ گاڑیاں بھی کیریئر میں ہی منتقل کی جائیں گی۔

شرجیل میمن نے یہ بھی اعلان کیا کہ شہر میں ڈمپرز کے لیے مخصوص وقت میں تبدیلی کی گئی ہے۔ اب ڈمپرز رات 10 بجے سے صبح 6 بجے تک سڑکوں پر چلیں گے، جو پہلے رات 11 بجے سے شام 6 بجے تک تھے۔ یہ فیصلہ عوامی سہولت اور ٹرانسپورٹرز کی آسانی کے لیے کیا گیا ہے۔

یہ اقدامات کراچی میں حالیہ ہفتوں میں ٹریفک حادثات میں اضافے اور خاص طور پر ڈمپرز اور واٹر ٹینکرز کے حادثات میں شہریوں کی ہلاکتوں کے تناظر میں کیے گئے ہیں۔ ان حادثات کے پیش نظر حکومت نے سڑکوں پر امن و سکون کے لیے سخت اقدامات اٹھانے کا فیصلہ کیا ہے۔

کراچی میں وفاقی وزیرداخلہ محسن نقوی نے نادرا میگا سنٹر ناظم آباد میں قائم ہونے والے نئے پاسپورٹ آفس کا افتتاح کر دیا، جس کا مقصد شہریوں کو مزید سہولتیں فراہم کرنا ہے۔ نیا پاسپورٹ آفس تین شفٹوں میں 24 گھنٹے کام کرے گا، جس سے شہریوں کو پاسپورٹ بنوانے میں کسی قسم کی مشکلات کا سامنا نہیں ہوگا۔

وزیرداخلہ محسن نقوی نے پاسپورٹ آفس میں موجود کاونٹرز کا معائنہ کیا اور عملے سے ملاقات کی۔ اس دوران انہوں نے نادرا میگا سنٹر میں شناختی کارڈز اور پاسپورٹ بنوانے کے لیے آنے والے شہریوں سے ملاقات کی اور پراسیس کے بارے میں معلومات حاصل کیں۔ اس موقع پر شہریوں نے وزیر داخلہ کے اس اقدام پر اطمینان کا اظہار کیا اور انہیں بہترین سہولت فراہم کرنے پر شکریہ ادا کیا۔ شہریوں کا کہنا تھا کہ "یہ بہت زبردست سہولت ہے، آپ نے ہمارے لئے بہت آسانیاں پیدا کر دی ہیں۔”

وزیر داخلہ محسن نقوی نے نادرا سنٹر میں خواتین کے مسائل پر بھی توجہ دی اور بے نظیر انکم سپورٹ پروگرام کے تحت بائیو میٹرک کرانے کے لیے خواتین کی شکایات سنی۔ اس موقع پر انہوں نے متعلقہ حکام کو فوری طور پر مسائل کے حل کی ہدایات دیں۔ بزرگ خواتین نے وزیر داخلہ کے فوری احکامات پر شکریہ ادا کیا۔وزیرداخلہ محسن نقوی نے اس بات کا اعادہ کیا کہ "آپ کے مسائل حل کرنا ہماری ذمہ داری ہے، اور ہم ہمیشہ شہریوں کی سہولت کے لئے اقدامات کریں گے۔”

اس موقع پر ڈی جی پاسپورٹ مصطفی جمال قاضی اور نادرا کے دیگر اعلی حکام بھی موجود تھے، جنہوں نے پاسپورٹ آفس کی ورکنگ کے بارے میں وزیر داخلہ کو بریفنگ دی۔یہ نیا پاسپورٹ آفس شہریوں کے لیے ایک بڑی سہولت ہے، جو انہیں کسی بھی وقت پاسپورٹ بنانے کے لئے مدد فراہم کرے گا۔