Category: کراچی

کراچی: پاکستان کے معروف فیشن ڈیزائنر دیپک پروانی نے شہر میں بڑھتے جرائم پر شدید تشویش کا اظہار کرتے ہوئے انکشاف کیا ہے کہ وہ گزشتہ تین ماہ کے دوران تین مرتبہ ڈکیتی کا شکار ہو چکے ہیں۔

سوشل میڈیا پلیٹ فارم ایکس پر جاری اپنے بیان میں دیپک پروانی نے بتایا کہ مختلف واقعات میں ان سے اسلحے کے زور پر گاڑی، موٹر سائیکل اور نقدی چھین لی گئی۔ ان کا کہنا تھا کہ یہ صورتحال صرف ان تک محدود نہیں بلکہ ان کے عملے کے افراد بھی جرائم کی لپیٹ میں آ چکے ہیں۔انہوں نے مزید بتایا کہ ان کے ایک ملازم کے گھر میں رواں ماہ دو مرتبہ چوری ہوئی، جبکہ ایک اور ملازم کے بیٹے کو بھتہ نہ دینے پر تشدد کا نشانہ بنایا گیا۔ دیپک پروانی کے مطابق کراچی میں جرائم کی شرح خطرناک حد تک بڑھ چکی ہے، لوگ عدم تحفظ کا شکار ہیں اور مہنگائی نے عوام کی مشکلات میں مزید اضافہ کر دیا ہے۔

اس بیان کے بعد سوشل میڈیا پر صارفین کی بڑی تعداد نے سخت ردِعمل دیتے ہوئے شہر میں امن و امان کی بگڑتی صورتحال پر تشویش ظاہر کی۔ متعدد صارفین نے کراچی کو غیر محفوظ قرار دیتے ہوئے حکام سے فوری اور مؤثر اقدامات کا مطالبہ کیا ہے۔

دادو کے تین افراد کے قتل کے مقدمے میں اہم پیش رفت سامنے آئی ہے، جہاں مدعیہ ام رباب نے اپنے والد، چچا اور دادا کے قتل میں نامزد ملزمان کی بریت کے خلاف سندھ ہائیکورٹ میں اپیل دائر کر دی ہے۔

ام رباب نے چیف جسٹس سندھ ہائیکورٹ کی خصوصی اجازت سے کراچی میں اپیل جمع کرائی۔ درخواست میں مؤقف اختیار کیا گیا ہے کہ دادو کی ماڈل کورٹ نے کیس کے اہم حقائق کو نظر انداز کرتے ہوئے ملزمان کو بری کیا، جو انصاف کے تقاضوں کے منافی ہے۔درخواست گزار نے عدالت کو آگاہ کیا کہ انہیں اپنی جان کو خطرات لاحق ہیں، اسی وجہ سے اپیل کی سماعت دادو کے بجائے کراچی میں کی جائے۔ ام رباب نے استدعا کی کہ عدالت ملزمان کی بریت کا فیصلہ کالعدم قرار دے کر کیس کی دوبارہ سماعت کا حکم دے۔

یاد رہے کہ دادو کی ماڈل کورٹ نے اس مقدمے میں اراکین سندھ اسمبلی سردار چانڈیو اور برہان چانڈیو سمیت آٹھ ملزمان کو بری کر دیا تھا، جس کے بعد متاثرہ خاندان کی جانب سے اس فیصلے کو چیلنج کیا گیا ہے۔

‎امریکا اور ایران کے درمیان مذاکرات کے دوسرے دور کے لیے ایرانی وفد کی پاکستان آمد کی خبر نے پاکستان اسٹاک ایکسچینج میں زبردست بہتری پیدا کر دی ہے۔ منفی رجحان کے بعد مارکیٹ میں اچانک تیزی دیکھی گئی اور ہنڈریڈ انڈیکس نمایاں اضافے کے ساتھ بند ہوا۔
‎تفصیلات کے مطابق پاکستان اسٹاک ایکسچینج کا 100 انڈیکس 1 ہزار 498 پوائنٹس کے اضافے کے بعد ایک لاکھ 70 ہزار 672 پوائنٹس پر بند ہوا۔ اس سے قبل پہلے سیشن میں صورتحال مختلف تھی جہاں انڈیکس 2 ہزار 165 پوائنٹس کی کمی کے ساتھ ایک لاکھ 67 ہزار 7 پوائنٹس تک گر گیا تھا، تاہم سفارتی پیش رفت کی خبر سامنے آتے ہی سرمایہ کاروں کا اعتماد بحال ہوا اور مارکیٹ مثبت زون میں آ گئی۔
‎ماہرین کا کہنا ہے کہ عالمی اور علاقائی سطح پر کشیدگی میں کمی کی امید سرمایہ کاروں کے لیے مثبت اشارہ ہوتی ہے، جس کے باعث مارکیٹ میں خریداری کا رجحان بڑھ جاتا ہے۔ ایران اور امریکا کے درمیان ممکنہ مذاکرات کو خطے میں استحکام کی جانب اہم قدم قرار دیا جا رہا ہے۔
‎دوسری جانب عالمی منڈی میں خام تیل کی قیمتوں میں بھی کمی ریکارڈ کی گئی ہے۔ برینٹ خام تیل کی قیمت 107 ڈالر سے کم ہو کر 104 ڈالر فی بیرل تک آ گئی، جبکہ ویسٹ ٹیکساس انٹرمیڈیٹ کی قیمت میں بھی 2 ڈالر کمی دیکھی گئی اور یہ 95 ڈالر فی بیرل پر ٹریڈ ہوتا رہا۔
‎تجزیہ کاروں کے مطابق تیل کی قیمتوں میں کمی اور سفارتی پیش رفت دونوں عوامل نے مارکیٹ کے اعتماد کو مضبوط کیا ہے۔ سرمایہ کاروں کو توقع ہے کہ اگر مذاکرات کامیاب ہوتے ہیں تو نہ صرف خطے میں امن کی فضا قائم ہوگی بلکہ معاشی سرگرمیوں میں بھی بہتری آئے گی۔

وزیراعلیٰ سندھ مراد علی شاہ کا کہنا ہے کہ سانحہ گل پلازہ سے متعلق جوڈیشل کمیشن کی رپورٹ موصول ہوگئی، جو بھی ذمہ دار ہوگا اس کیخلاف کارروائی کریں گے، شاہراہ بھٹو کا اگلے ماہ افتتاح کریں گے، یونیورسٹی روڈ بھی جلد مکمل ہوگا۔

وزیراعلیٰ سندھ مراد علی شاہ نے کراچی میں تقریب سے خطاب کرتے ہوئے کہا کہ سانحہ گل پلازہ افسوسناک تھا، قیمتی جانیں ضائع ہوئیں، لوگوں کی ساری زندگی کی کمائی ختم ہوگئی، لواحقین کیلئے ایک کروڑ روپے امداد کا اعلان کیا، 63 کیسز میں ادائیگی ہوچکی ہے، ہر دکاندار کو فوری 5 لاکھ روپے دینے کا اعلان کیا متاثرین کیلئے 7 ارب رکھے گئے تھے۔ان کا کہنا ہے کہ متاثرین سانحہ گل پلازہ کا نقصان پورا کیا جائے گا، 200 متاثرین میں 511.7 ملین روپے تقسیم کیے گئے، کے سی سی آئی کے مطابق 1209 دکانیں تھیں، سانحہ گل پلازہ پر کسی کو ناجائز فائدہ اٹھانے نہیں دیں گے، گل پلازہ کی عمارت کو دوبارہ بنایا جائے گا۔وزیراعلیٰ سندھ نے کہا کہ جوڈیشل کمیشن کی رپورٹ کابینہ میں پیش ہوئی، ایک کمیٹی بنائی ہے وہ رپورٹ پر سفارشات پیش کرے گی، رپورٹ میں جس کی غلطی ہوگی اس کیخلاف کارروائی ہوگی۔مراد علی شاہ کا کہنا ہے کہ شاہراہ بھٹو کا اگلے مہینے افتتاح کریں گے، لوگ پوچھتے ہیں یونیورسٹی روڈ کب بنے گی؟، یونیورسٹی روڈ کو جلد مکمل کریں گے۔