Category: کراچی

گل پلازہ سانحے کے تناظر میں فائر سیفٹی قوانین اور عمل درآمد نا کرنے اور ٹاسک فورس نا بنانے کا معاملہ سندھ ہائی کورٹ پہنچ گیا

ندیم شیخ ایڈووکیٹ کی جانب سے توہین عدالت کی درخواست دائر کر دی گئی، درخواست میں کہا گیا کہ سندھ ہائیکورٹ نے 2017 میں فائر سیفٹی قوانین پر سختی سے عملدرآمد کا حکم دیا تھا ،عدالت نے کمشنر کراچی ،ڈپٹی کمشنر اور اسسٹنٹ کمشنر کو ٹاسک فورس تشکیل دینے کا حکم دیا تھا ،عدالت نے ہر ماہ عمارتوں کا معائنہ کرنے اور فائر سیفٹی قوانین پر عملدرآمد کا جائزہ لینے کا حکم دیا تھا ،کمشنر کراچی اور سندھ حکومت عدالتی فیصلے پر عمل درآمد کرنے میں ناکام رہے ہیں ،گل پلازہ میں دس سے زائد افراد ہلاک اور 15 سے زائد زخمی ہیں،سندھ ہائیکورٹ کے فیصلے پر عمل درآمد کرلیا جاتا تو گل پلازہ کا سانحہ نا ہوتا،عدالت سے استدعا ہے کہ ذمہ داروں کے خلاف توہین عدالت کی کارروائی کی جائے ،

کراچی پولیس چیف ایڈیشنل آئی جی آزاد خان نے سانحہ گل پلازہ سے متعلق ابتدائی تحقیقات میں تخریب کاری کے امکان کو مسترد کرتے ہوئے کہا ہے کہ تاحال ایسے کوئی شواہد سامنے نہیں آئے جو اس واقعے کو کسی سازش یا تخریبی کارروائی سے جوڑتے ہوں۔

گل پلازہ کے دورے کے موقع پر میڈیا سے گفتگو کرتے ہوئے انہوں نے بتایا کہ واقعے کی مختلف پہلوؤں سے تحقیقات جاری ہیں اور تمام حقائق سامنے لانے کے لیے تکنیکی اور فرانزک بنیادوں پر جائزہ لیا جا رہا ہے۔ایڈیشنل آئی جی آزاد خان کے مطابق ریسکیو آپریشن کے دوران اب تک 14 افراد کی لاشیں نکالی جاچکی ہیں، تاہم عمارت کے ملبے تلے مزید افراد کے دبے ہونے کا خدشہ ہے، جس کے باعث ہلاکتوں میں اضافے کا امکان بھی موجود ہے۔ انہوں نے کہا کہ ریسکیو ادارے پوری تندہی سے کام کر رہے ہیں اور جب تک ملبہ مکمل طور پر ہٹا نہیں لیا جاتا، حتمی اعداد و شمار دینا ممکن نہیں۔

پولیس حکام کے مطابق ایم اے جناح روڈ پر واقع گل پلازہ میں آگ ہفتے کی رات تقریباً سوا 10 بجے اچانک بھڑک اٹھی۔ آگ کا آغاز گراؤنڈ فلور سے ہوا، جس نے دیکھتے ہی دیکھتے تیسری منزل تک شدت اختیار کرلی۔ شدید حرارت اور دھویں کے باعث عمارت کے کئی حصے کمزور ہوکر منہدم ہوگئے، جس سے اندر موجود افراد کے باہر نکلنے میں شدید مشکلات پیش آئیں۔فائر بریگیڈ کے مطابق آگ پر قابو پانے کے لیے طویل اور مشکل آپریشن کیا گیا۔ فائر فائٹرز نے مسلسل 33 گھنٹے کی جدوجہد کے بعد آگ پر مکمل طور پر قابو پالیا، جس کے بعد کولنگ کا عمل شروع کیا گیا تاکہ دوبارہ آگ بھڑکنے کے امکانات کو ختم کیا جا سکے۔ آپریشن کے دوران درجنوں فائر ٹینڈرز، اسنارکلز اور ہیوی مشینری استعمال کی گئی۔

گل پلازہ واقعے کے بعد انتظامیہ نے لاپتہ افراد کی نئی فہرست جاری کردی ہے، جس میں 49 افراد کے نام اور دیگر تفصیلات شامل ہیں۔ پولیس اور ضلعی انتظامیہ کے مطابق لاپتہ افراد کے لواحقین سے رابطے کیے جا رہے ہیں اور شناخت کے عمل کو تیز کرنے کے لیے ڈی این اے سیمپلز سمیت دیگر طریقۂ کار بھی اپنائے جا رہے ہیں۔

سالِ نو کے آغاز پر ہی کراچی ایک دلخراش سانحے سے دوچار ہوگیا، جہاں شہر کے معروف شاپنگ سینٹر گل پلازہ میں اچانک بھڑکنے والی آگ نے قیمتی انسانی جانیں نگل لیں اور کروڑوں روپے مالیت کا سامان خاکستر ہوگیا۔

چیف فائر آفیسر کے مطابق ہفتے کی شب 10 بج کر 14 منٹ پر گل پلازہ میں واقع آرٹیفیشل گملوں اور پھولوں کی ایک دکان میں آگ بھڑکی۔ آگ کی اطلاع 10 بج کر 38 منٹ پر ریسکیو 1122 کو دی گئی، جس کے بعد 10 بج کر 57 منٹ پر ریسکیو 1122 کے دو فائر ٹینڈر موقع پر پہنچے۔چیف فائر آفیسر نے بتایا کہ گل پلازہ میں اگرچہ 14 سے 16 داخلی اور خارجی راستے موجود ہیں، تاہم ان راستوں کی تنگی کے باعث ریسکیو اور فائر فائٹنگ کے عمل میں شدید مشکلات کا سامنا کرنا پڑا۔ آگ لگنے کے فوری بعد عمارت کے تمام داخلی اور خارجی راستوں میں دھواں بھر گیا، جس سے اندر پھنسے افراد کے انخلا اور آگ بجھانے میں رکاوٹ پیدا ہوئی۔

انہوں نے مزید بتایا کہ آگ بجھانے کے 2 سے 3 گھنٹوں کے دوران پانی کی شدید قلت کا سامنا رہا۔ پانی فراہم کرنے کے لیے آنے والے ٹینکر گرومندر کے قریب جاری تعمیراتی کام میں پھنس گئے، جبکہ ہجوم اور مؤثر ٹریفک مینجمنٹ نہ ہونے کے باعث پانی کی فراہمی میں مزید تاخیر ہوئی۔ تاہم آگ پر قابو پانے کے لیے پہلے ہی دن فوم کا استعمال شروع کردیا گیا تھا۔چیف فائر آفیسر کے مطابق عمارت کے تین مختلف مقامات سے حصے گرچکے ہیں اور گل پلازہ اس وقت مخدوش حالت میں ہے۔ موقع پر اب بھی 12 فائر ٹینڈرز، 6 واٹر باؤزر اور 2 اسنارکل تعینات ہیں۔ ان کے مطابق آگ پر 90 فیصد قابو پالیا گیا ہے، جبکہ عمارت کے اندر موجود سامان میں تقریباً 10 فیصد آگ اب بھی موجود ہے۔ رات گئے تک گراؤنڈ فلور کی تمام دکانوں میں لگی آگ بجھادی گئی تھی۔

فائربریگیڈ حکام نے بتایا کہ گل پلازہ کی چھت پر پارکنگ قائم ہے جہاں متعدد گاڑیاں اور موٹرسائیکلیں کھڑی تھیں۔ خوش قسمتی سے آگ لگنے کے باوجود چھت پر موجود گاڑیوں اور موٹرسائیکلوں کو کوئی نقصان نہیں پہنچا۔

واضح رہے کہ گل پلازہ میں لگی آگ 33 گھنٹے بعد مکمل طور پر بجھادی گئی۔ ریسکیو ٹیموں نے جلی ہوئی عمارت سے مزید 4 لاشیں نکالیں، جس کے بعد آتشزدگی کے نتیجے میں جاں بحق افراد کی تعداد 14 ہوگئی، جبکہ 22 زخمی مختلف اسپتالوں میں زیر علاج ہیں۔چیف فائر آفیسر کے مطابق پلازہ میں اب بھی کولنگ کا عمل جاری ہے۔ کٹر کی مدد سے کھڑکیوں کو کاٹا جارہا ہے اور ہتھوڑوں کے ذریعے دیواریں گرائی جارہی ہیں تاکہ اندر موجود حصوں تک رسائی حاصل کی جاسکے۔ تیسری منزل پر کسی شخص کے پھنسے ہونے کے خدشے کے پیش نظر اتوار کی رات فائر فائٹرز عمارت کے اندر داخل ہونے میں کامیاب ہوئے اور ریسکیو آپریشن جاری رکھا گیا۔

وزیراعلیٰ سندھ مراد علی شاہ نے کہا ہے کہ گل پلازہ میں آگ سے ہونے والے نقصانات کا ازالہ حکومت کرے گی۔

وزیراعلیٰ سندھ نے میڈیا سے گفتگو کرتے ہوئے کہا کہ پہلی کوشش زندگیاں بچانے کی ہے، کوشش ہے جو لاپتا ہیں وہ جلد مل جائیں، کئی منزلہ عمارت کی اجازت بغیر کسی اسٹڈی کے دی گئی، فائر آڈٹ کا کہا جائے تو بلڈرز کہتے ہیں نا انصافی ہورہی ہے،تاجروں کا جو نقصان ہوا ہے اس کا ازالہ کریں گے، جس کی جان گئی ہے اس کا کوئی ازالہ ہو ہی نہیں سکتا، افسوس کی بات ہے کہ کچھ لوگ اس سانحے پر بھی سیاست کر رہے ہیں، پہلا فائر ٹینڈر وقت پر پہنچا تھا، اگر کسی کی کوتاہی ہو گی تو اس کو سزا ملے گی

دوسری جانب گل پلازہ میں لوگوں کی زندگیاں بچاتے ہوئے جان کی بازی ہارنے والے فائر فائٹر شہید فرقان علی کی نمازِ جنازہ ادا کردی گئی،فرقان ایک بچے کا باپ تھا جو گل پلازہ میں لگی آگ بجھاتے ہوئے انتقال کرگیا، فرقان علی کے اہل خانہ نے اپیل کی ہے کہ ان سے سرکاری گھر نہ لیا جائے اور فرقان کی اہلیہ کو ملازمت دی جائے۔

واضح رہے کہ کراچی کےگل پلازہ میں لگی آگ 33 گھنٹے بعد مکمل طورپربجھادی گئی، سرچ آپریشن کے دوران مزید 8 افراد کی لاشیں نکال لی گئیں جس کے بعد جاں بحق افراد کی تعداد 14ہوگئی جب کہ 22 افراد زخمی ہوئے،ایم اے جناح روڈ پر واقع گل پلازہ میں آگ ہفتے کی رات سوا 10 بجے کے قریب لگی، گراؤنڈ فلور پر لگنے والی آگ دیکھتے ہی دیکھتے تیسری منزل تک پہنچی، خوفناک آتشزدگی سے عمارت کے کئی حصے گرگئے۔