کراچی: پاک سرزمین پارٹی نے ایم کیو ایم میں شمولیت کے معاملے پر آج جنرل ورکرز اجلاس طلب کرلیا۔
باغی ٹی وی : پی ایس پی ذرائع کے مطابق پارٹی کا جنرل ورکرز اجلاس شام 7 بجے پاکستان ہاؤس میں ہوگا جس میں ایم کیو ایم کے احتجاج میں شرکت اور پارٹی میں شمولیت پر کارکنان کی رائے لیے جانے کا امکان ہے۔
گزشتہ روز ایم کیو ایم کا وفد پاک سرزمین پارٹی کے مرکز پاکستان ہاؤس آیا تھا جہاں وفد نے مصطفیٰ کمال کو 9 جنوری کو احتجاج میں شرکت اور پارٹی میں شمولیت کی دعوت دی تھی۔
واضح رہے کہ ایم کیو ایم کے جنرل ورکرز اجلاس سے قبل رابطہ کمیٹی کی اہم بیٹھک ہوئی تھی جس میں حلقہ بندیوں اور ووٹر لسٹوں کے حوالے سے مختلف سیاسی جماعتوں کے ساتھ رابطے بڑھانے اور مل کر جدوجہد کرنے پر اتفاق کیا گیا۔
ایم کیو ایم نے حلقہ بندیوں اور ووٹر لسٹوں کو مسترد کردیا جبکہ بلدیاتی انتخابات کے حوالے سے سڑکوں پر آنے کا فیصلہ کیا ہے۔ رابطہ کمیٹی کے اجلاس میں حکومت سے علیحدگی کے حوالے سے فی الحال کوئی فیصلہ نہٰں کیا گیا۔
خالد مقبول صدیقی کی سربراہی میں ایم کیو ایم پاکستان کا وفد پاک سرزمین پارٹی کے قائدین سے ملاقات کے لیے پاکستان ہاؤس پہنچا، جہاں اُن کا پرتپاک استقبال کیا گیا۔ مہمانوں کے پہنچنے پر انیس قائم خانی نے ایم کیو ایم رہنماؤں کو خوش آمدید کہا۔
خالد مقبول صدیقی نے پاک سرزمین پارٹی کے سربراہ کو 9 جنوری کی ریلی میں شرکت اور ماضی بھلا کر مستقبل کی جدوجہد ساتھ کرنے کی دعوت دی، دونوں جماعتوں نے کراچی کے معاملے پر ساتھ چلنے پر اتفاق کیا۔
میڈیا سے گفتگو کرتے ہوئے خالد مقبول صدیقی نے کہا کہ ہم دعوت دینے آئے ہیں جس پر مصطفیٰ کمال نے کہا کہ ہم خالد مقبول صدیقی کی کوشش کا مثبت جواب دیں گے، کارکنان کا اجلاس بلا کر جلد جواب دیں گے سب اچھی خبریں آئے گی۔ خالد مقبول صدیقی نے کہا کہ ہر کام کا ایک وقت ہوتا ہے یہ متحد ہونے کا وقت ہے۔
ان کا کہنا تھا کہ بلدیاتی انتخابات آرہے ہیں، سب چاہتے ہیں انتخابات ہوں، اس وقت ملک میں بنیادی جمہوریت کیلئےبلدیاتی انتخابات ضروری ہیں، جب تک ملک میں بنیادی جمہوریت نہیں ہوگی انتخابات کا فائدہ نہیں ہوگا،ایسی قانون سازی ہونی چاہیےکہ عام انتخابات سےپہلے بلدیاتی انتخابات ہوں۔
خالد مقبول صدیقی کا کہنا تھا کہ سب کو الیکشن لڑنے اور جیتنے کا حق ہے، کسی کو الیکشن چھیننے نہیں دیں گے، جعلی مردم شماری اور جعلی حلقہ بندیوں کے ذریعے انتخابی نتائج کوئی نہیں مانے گا، مصطفی کمال اور انیس کی ٹیم نے جس طرح استقبال کیا وہ قابل ستائش ہے ،کراچی کی معیشت سے پاکستان کی معیشت جڑی ہوئی ہے ،مختلف سیاسی جماعتوں سے رابط کریں گے، میں امید کرتا ہوں آواز سے آواز ملے گی۔
اس موقع پر ایس پی سربراہ مصطفیٰ کمال نے کہا کہ کراچی میں رہنے والے تمام لوگ متاثر ہو رہے ہیں، کراچی بدحالی کی طرف جائے گا تو ملک ترقی نہیں کرسکتا۔ان کا کہنا تھا کہ کوئی ایک جماعت بھی ملک کے حالات کو ٹھیک نہیں کرسکتی، ملک کو معاشی بحران سے آئی ایم ایف نہیں صرف کراچی نکال سکتا ہے، کراچی ، حیدرآباد میں نوکریاں نہیں ہےاس شہر میں رہنے والے تمام زبان کے لوگ متاثر ہو رہے ہیں، ایک یونین کونسل 30 ہزار اور ایک یونین کونسل 80ہزار پر ہے،کیا مذاق ہےکراچی کے لیے جو آواز اٹھائے گا۔
انہوں نے کہا کہ ہماری سپورٹ ہر اُس شخص اور جماعت کے لیے ہے جو کراچی اور یہاں کے لوگوں کے لیے بات کرتا ہے،ایم کیو ایم ہمارے پاس آئی ہے ہم مثبت جواب دیں گےہم قومی مفاد کے لئے مشکل فیصلہ بھی کریں گے،ہم سب ایک ہیں، ہم اجتماعی فائدے کی بات کریں گےہم نے پہلے بھی ذاتی مفاد کے لیے کوئی کام نہیں کیا ہم جلد کارکنان کا اجلاس بلاکر فیصلہ کریں گے، انشاء اللہ ساری اچھی خبریں ہی آئیں گی۔
اُدھر ایم کیو ایم کے سینئر ڈپٹی کنونیئر وسیم اختر کا جماعت اسلامی کراچی کے امیر حافظ نعیم الرحمان سے رابطہ ہوا، جس میں موجودہ سیاسی صورت حال اور حلقہ بندیوں کے حوالے سے گفتگو کی گئی ایم کیو ایم کا وفد آج جماعت اسلامی کے مرکز ادارہ نور حق کا دورہ کرے گا۔
علاوہ ازیں ایم کیو ایم پاکستان کا وفد خالد مقبول کی سربراہی میں آج مسلم لیگ ن کے صوبائی دفتر کا دورہ کرے گا اور سابق گورنر سندھ محمد زبیر اور ن لیگی صدر سندھ سلمان خان سے ملاقات کرے گا۔ ایم کیو ایم ترجمان کے مطابق مسلم لیگ ن کو متنازع حلقہ بندیوں کے خلاف احتجاج میں شرکت کی دعوت دی جائے گی۔
