ریڈی میڈ گارمنٹ، ایشیا میں خواتین کارکنوں کو روزگار فراہم کرنے کا سب سے بڑا ذریعہ
ایمپلائرز فیڈریشن آف پاکستان (ای ایف پی) کے سابق صدر مجید عزیز نے کہا ہے کہ ریڈی میڈ گارمنٹ انڈسٹری محنت کشوں کی صنعت ہے اور ایشیا میں خواتین کارکنوں کو روزگار فراہم کرنے کا سب سے بڑا ذریعہ ہے لہٰذا غیر ملکی خریداروں اور برانڈز کو موجودہ صلاحیتوں کی طویل مدتی اور پیشگی بکنگ کر کے فیکٹریوں کو سپورٹ اور مستقبل کی پیداواری منصوبہ بندی میں گارمنٹس فیکٹریوں کے ساتھ تعاون کرنا چاہیے۔ان خیالات کا اظہار انہوں نے آئی ایل او سیڈا کے زیراہتمام بنکاک میں منعقدہ ”ڈیسنٹ ورک اِن گارمنٹس سپلائی چین ایشیا“ کے افتتاحی سیشن میں تمام آجروں کی طرف سے خطاب کرتے ہوئے کیا۔
مجید عزیز نے افتتاحی سیشن میں تمام ایشیائی آجروں کی ترجمانی کرتے ہوئے کہا کہ یورپ اور شمالی امریکا کے صارفین گارمنٹس کے لیے اضافی رقم ادا کرنے کے لیے بہتر پوزیشن میں ہیں۔بدقسمتی سے زیادہ تر مغربی خریدار اپنے منافع کے مارجن کو زیادہ سے زیادہ کرنے کے لیے ناقص فروخت کا دعویٰ کرتے ہوئے بلاجواز دعوؤں اور آرڈرز کی من مانی منسوخی کا مطالبہ کرتے ہیں۔وہ فیکٹری مالکان کواپنے آرڈرز کو دوسری فیکٹریوں میں منتقل کرنے کی دھمکی دیتے ہیں جس کے نتیجے میں اکثر فیکٹری بند ہو جاتی ہے اور مزدور بے روزگار ہو جاتے ہیں۔گارمنٹس ورکرز کی فلاح و بہبود کا انحصار غیر ملکی خریداروں کے وعدوں کی منصوبہ بندی کے تخمینوں اور اخلاقیات پر بھی ہے۔یہ ضروری ہے کہ تمام اسٹیک ہولڈرز جیت کے نقطہ نظر پر کام کریں کہ اگر ایک فیکٹری آرڈر کھو دیتی ہے تو مزدور بھی ہار جاتے ہیں۔
مجید عزیز کا کہنا تھا کہ ایشیا میں گارمنٹس سپلائی چینز میں اچھے کام کی ماحولیاتی پائیداری اور صنفی مساوات کو فروغ دینے کے ایجنڈے پر بحث و مباحثہ ضروری ہے۔بہت سے چیلنجز اور کمزوریوں کے باوجود باالخصوص گارمنٹس کے شعبے میں صنعت کے لحاظ سے صنفی تبدیلی خاص طور پر مل کر کام کرنے پر توجہ مرکوز کرنے کی ضرورت ہے تاکہ خواتین اعلیٰ ہنر مند اور زیادہ معاوضہ والی ملازمتوں اور کاموں میں ابھرتے ہوئے مواقع تک رسائی حاصل کر سکیں۔خواتین کی تنظیموں کو سماجی مکالمے اور ملٹی اسٹیک ہولڈر میٹنگز کے ذریعے اسے ایک ترجیح کے طور پر لینا چاہیے تاکہ کام کی جگہ پر خواتین کو تشدد اور ہراساں کرنے کی روک تھام کو اجاگر کیا جا سکے۔انہیں کام پر ہراساں کرنے اور تشدد سے متعلق آئی ایل او کنونشن 190 کی پارلیمنٹ سے توثیق کے لیے حمایت اور لابنگ کرنی چاہیے۔
مجید عزیز نے پاکستان کا کیس پیش کرتے ہوئے کہا کہ ماضی قریب میں پاکستان کو تین گنا نقصان اٹھانا پڑا۔ دیگر ممالک کی طرح پاکستان بھی وبائی بحران سے بہت زیادہ متاثر ہوا۔اس کے بعد تباہ کن سیلاب آیا جس کے نتیجے میں 1500 سے زیادہ اموات ہوئیں، 33 ملین لوگ بے گھر ہوئے، 800 سے زیادہ صحت کی سہولیات تباہ ہو گئیں، بڑی تعداد میں مویشی ہلاک ہوئے،25-30 ارب ڈالر سے زیادہ کا نقصان گھروں کے انفرااسٹرکچر، فارمز اور مارکیٹوں وغیرہ کو ہوا۔جی ڈی پی کے نقصان کا تخمینہ 2 فیصد ہے،9 ملین سے زیادہ لوگ غربت میں دھکیل جائیں گے جب کہ 70 لاکھ سے زیادہ پیچھے رہ جائیں گے، 40 لاکھ ملازمتیں کھو دیں گے یا ملازمتوں میں خلل پڑے گا اور 8 سے 10 ملین کو خوراک کی حفاظت کے مسائل کا سامنا کرنا پڑے گا۔مزید برآں عالمی سطح پر تیل کی قیمتوں، کرنسی کی قدر میں کمی اور آئی ایم ایف سے سخت مشروط شرائط نے معیشت کو نقصان پہنچایا ہے۔
انہوں نے تقریب کے مندوبین کی توجہ کے لیے تجویز پیش کی کہ بین الاضلاع مسابقت اور عالمی مارکیٹ شیئر کے تحفظ کے باوجود خاص طور پر امریکا اور یورپ میں یہ ضروری ہے کہ نئے اور سخت مشروط شرائط کے نفاذ جیسے حفاظتی اور ریگولیٹری امپورٹ ڈیوٹیز جو انٹلیکچوئل پراپرٹی رائٹس کے تحفظ کے لیے ہوں، علاقائی گارمنٹ ایکسپورٹرز کے درمیان اتفاق رائے ہونا چاہیے۔آسیان اور سارک ممالک میں اس قدر واضح طور پر سامنے آنے والے اہم پہلوؤں کو مدنظر رکھتے ہوئے منصوبے کو فروغ دینے اور مشترکہ اور باہمی مفادات کے تحفظ کے لیے ایک مشترکہ پلیٹ فارم قائم کرنے کی ضرورت ہے۔
مجید عزیز نے گارمنٹس صنعت کے مستقبل کے بارے میں کہا کہ اب پیداوار اور لاجسٹکس کے عمل کے آٹومیشن کے ذریعے ڈیجیٹلائزیشن کی تبدیلی آ رہی ہے۔انہوں نے بتایا کہ ای ایف پی کی کامیاب اور بھرپور وکالت اور لابنگ کے بعد آئی ایل او بیٹر ورک پروگرام شروع ہوا ہے اور 180 سے زائد فیکٹریوں نے رجسٹریشن کے لیے درخواستیں دی ہیں جبکہ ابتدائی طور پر کراچی لاہور اور فیصل آباد میں دو درجن فیکٹریاں پہلے ہی اس پروگرام میں شامل ہیں
