Category: کراچی

سندھ حکومت نے موٹر سائیکل چلانے والے شہریوں پرایک اور جرمانہ لگانے کی تیاری کرلی ہے،موٹرسائیکل میں سائیڈمررنہ لگانے پر چالان کا فیصلہ کیاگیاہے ۔تفصیلات کے مطابق محکمہ ٹرانسپورٹ سندھ موٹروہیکل رولز میں ترامیم کریگی،موٹر سائیکل میں سائیڈ مرر نہ لگانے پر چالان کیاجائیگا،ٹریفک پولیس کو موٹر سائیکل سواروں کیخلاف ایک اور مد میں چالان کا اختیار دیاجائیگا۔
سندھ حکومت کے اعلی حکام نے بتایاکہ موٹر سائیکلز میں سائیڈ مررحادثات کی روک تھام کیلئے لگوائے جارہے ہیں۔کراچی سمیت سندھ بھر میں 60لاکھ سے زائد موٹرسائیکلز موجود ہیں،لازمی سائیڈ مرر قانون کی عملداری سے ٹریفک پولیس کو ماہانہ لاکھوں روپے چالان کی مدمیں ملنے کا امکان ہے۔موٹرسائیکلز میں لازمی سائیڈ گلاسز سے متعلق ترامیم کا مسودہ سندھ کابینہ میں پیش کیاجائیگا،سندھ کابینہ کی منظوری کی صورت میں موٹر سائیکلز میں سائیڈ گلاسز لگانے کا قانون نافذ العمل ہوگا۔

پاکستان پیپلز پارٹی شعبہ خواتین کراچی ڈویژن کی سربراہ شاہدہ رحمانی نے کہا ہے کہ سندھ پی پی پی کا مضبوط و مستحکم قلعہ ہے ۔ کنٹونمنٹ بورڈ سمیت یہاں کا ہر الیکشن جیالوں کا ہے ۔ اجلاس میں ڈویژنل عہدیداران و ضلعی صدور کو ان کے زیر نگرانی حلقہ انتخاب کے حوالے سے خصوصی ہدایات دی گئیں اور تنظیم سازی کی تکمیل کے سلسلے میں رپورٹ طلب کی گئی ۔
شرکاء نے 12ستمبر کو منعقدہ کنٹونمنٹ بورڈ کے مجموعی طور پر تمام حلقوں میں اپنی امیدواروں کی پوزیشن کا جائزہ لیا اور رہنمائوں کی جانب سے سخت مقابلے والے حلقوں میں زیادہ تندہی کے ساتھ محنت پر زور دیا ۔ اس موقع پر پی پی پی شعبہ خواتین کراچی ڈویژن کی جنرل سیکریٹری شاہینہ شیر علی و دیگر نے بھی اپنے خیالات کا اظہار کیا۔
شاہدہ رحمانی نے کہا کہ سیاسی قوتیں اپنی کارکردگی کی بنیاد پر عوام میں ووٹ کیلئے جاتی ہیں ، ہمیں سندھ کے عوام کی طویل مدت سے خدمت کرنے پر فخر ہے ۔

شاہینہ شیر علی نے کہا کہ وزیر اعلیٰ سندھ سید مراد علی شاہ کی شاندار کارکردگی اور پارٹی کی جانب سے ان کی مکمل معاونت کے ذریعے صوبہ بھر میں پارٹی کا امیج مزید بلند ہوا ہے ۔انہوںنے کہا کہ ہماری جماعت ملک گیر سطح پر منظم ہے ۔ ہم آگاہ ہیں کہ کس مرحلے پر کون سی حکمت عملی کارگر ہوتی ہے ۔ ہماری انفرادیت یہ ہے کہ ہر انتخابی معرکے میں ہماری پلاننگ مختلف اور دیگر سیاسی قوتوں کی فکر سے بالکل ہٹ کر ہوتی ہے ، نیز ہمیں اپنے کارکنوں کی جانباز فورس پر بھی ناز ہے جو رہنمائوں کی ہدایت کو عملی شکل دینے میں کسی قربانی سے دریغ نہیں کرتے ۔انہوںنے توقع ظاہر کی کہ کنٹونمنٹ بورڈ کے الیکشن میں 12ستمبر کو پیپلز پارٹی واضح اکثریت سے کامیابی حاصل کرے گی۔

)فلم و ٹی وی انڈسٹری کی صفِ اول اداکارہ ماہرہ خان نے ملک میں بڑھتے ہوئے جنسی ہراسانی کے واقعات پر برہمی کا اظہار کرتے ہوئے کہا ہے کہ دبئی میں عورت پر بٴْری نظر ڈالنے والے کو بھی فوری جیل ہوجاتی ہے۔تفصیلات کے مطابق حال ہی میں پاکستان کی معروف خاتون صحافی نے ملک میں بڑھتے جنسی ہراسانی کے واقعات پر اپنے خیالات کا اظہار کرتے ہوئے دبئی کے قانون کا تذکرہ کیا۔
خاتون صحافی نے سوال کیا کہ کیا دبئی میں خواتین مغربی لباس میں نہیں گھومتیں اور وہاں موجود کسی پاکستان مرد کی ہمت نہیں ہوتی کہ وہ اس خاتون کو گندی نظر سے دیکھے کیونکہ وہاں قانون پر فوری عملدرآمد ہوتا ہے۔صحافی نے کہا کہ ہمارے یہاں 400 مردوں نے دن دہاڑے لڑکی کو جنسی ہراساں کیا، ویڈیو بنائی لیکن کسی نے نہیں روکا۔
خاتون صحافی کے اس بیان کو صفِ اول اداکارہ ماہرہ خان کی جانب سے خوب سراہا گیا اور اٴْن کی حمایت بھی کی گئی۔

ماہرہ خان کے ردّعمل پر ایک صارف نے جواباًً کہا کہ میڈم جی! دبئی، دبئی ہے اور پاکستان، پاکستان ہے۔اداکارہ نے صارف کے جواب پر ردّعمل دیتے ہوئے کہا کہ فرق صرف اتنا ہے کہ دبئی میں ایسا جرم کرنے والے کو فوری جیل ہوگی لیکن یہاں نہیں۔اٴْنہوں نے کہا کہ دبئی میں عورت کو میلی نظر سے دیکھنے کی کسی کی جرات نہیں اور یہاں لوگ اپنی اصلیت پر اٴْتر آتے ہیں۔

کراچی کے علاقے بلدیہ ٹائون سعید آباد میں بیوی پر تیزاب پھینکے والے ملزم کوپولیس نے گرفتار کر لیا ہے۔پولیس کے مطابق ملزم ذیشان کو پولیس نے سعید آباد سیکٹر 9 سی سے گرفتار کیا ہے، ذیشان کو گزشتہ روز اپنی اہلیہ پر تیزاب پھینکنے کے الزام میں گرفتار کیا گیا ہے۔
واضح رہے کہ بلدیہ ٹائون سعید آباد نمبر9 میں صبح تقریبا 8 بجے 19 سالہ رمشا پر اس کے سابق شوہر ذیشان عرف شانی نے تیزاب پھینک دیا تھا، واقعہ اس وقت پیش آیا جب رمشا گھر سے دفتر کے لیے جا رہی تھی۔متاثرہ خاتون کے چہرے اور جسم کے مختلف حصے متاثر ہوئے ہیں۔رمشا کے والد کے مطابق تیزاب سے میری بیٹی کے جسم کا 39 فیصد حصہ جھلس گیا ہے۔

چین نے پاکستان کے ساحلی شہر گوادر میں جمعے کو چینی شہریوں کو لے جانے والی ایک گاڑی پر خودکش حملے کی شدید مذمت کرتے ہوئے اسلام آباد سے مطالبہ کیا ہے کہ وہ اس کے شہریوں کی حفاظت یقینی بنائے۔

پولیس اور صوبائی حکومت کے مطابق اس خودکش حملے کے نتیجے میں دو بچے ہلاک جبکہ ایک چینی شہری سمیت تین افراد زخمی ہوئے ہیں۔

خبر رساں ادارے روئٹرز نے پولیس کے حوالے سے بتایا کہ دھماکہ شام سات بجے کے قریب گوادر کے ایسٹ بے روڈ پر فشرمین کالونی کے قریب ہوا۔

صوبائی وزیر داخلہ ضیا اللہ لانگو نے ایک بیان میں بتایا کہ ’جب چینی شہریوں کو لے جانے والی گاڑی کالونی کے قریب پہنچی تو ایک نوعمر لڑکا بھاگتا ہوا آیا۔

’تاہم خوش قسمتی سے سادہ کپڑوں میں ملبوس پاکستانی فوج کے اہلکاروں نے اسے روکا، جس پر اس نے چینی شہریوں کے قافلے سے 15 سے 20 میٹر کے فاصلے پر خود کو دھماکے سے اڑا لیا۔‘

بیان کے مطابق: ’دھماکے میں ایک چینی شہری زخمی ہوا، جس کی حالت مستحکم ہے۔ تاہم قریب ہی کھیلنے والے دو مقامی بچے ہلاک جبکہ دو زخمی ہو گئے، جنہیں ہسپتال منتقل کردیا گیا۔‘

چینی سفارت خانے نے حملے پر جاری ایک بیان میں کہا کہ پاکستان میں چینی سفارت خانہ دونوں ممالک سے تعلق رکھنے والے زخمیوں کے ساتھ ہمدردی اور بے گناہ مارے جانے والے بچوں کی ہلاکت پر گہری تعزیت کا اظہار کرتا ہے۔

بیان میں پاکستان سے مطالبہ کیا گیا کہ وہ زخمیوں کا مناسب علاج، حملے کی مکمل تحقیقات اور واقعے میں ملوث قصور واروں کو سخت سزا دے۔

بیان کے مطابق: ’پاکستان میں تمام سطح پر متعلقہ محکموں کو لازمی طور پر مضبوط حفاظتی اقدامات اور اپ گریڈ شدہ سیکورٹی میں تعاون کے میکانزم کو نافذ کرنے کے لیے عملی اور مؤثر اقدامات کرنا ہوں گے تاکہ اس بات کو یقینی بنایا جا سکے کہ اس طرح کے واقعات دوبارہ نہ ہوں۔‘

بیان میں مزید کہا گیا کہ ’حالیہ ہفتوں میں پاکستان میں سکیورٹی کی صورتحال انتہائی خراب رہی ہے۔ پے در پے کئی دہشت گرد حملوں میں متعدد چینی شہریوں کی ہلاکتیں ہوئیں۔

’پاکستان میں چینی سفارت خانہ پاکستان میں موجود چینی شہریوں کو محتاط رہنے، حفاظتی احتیاطی تدابیر اپنانے اور غیر ضروری طور پر باہر نہ نکلنے کی یاد دہانی کراتا ہے۔‘

بلوچستان کے وزیر داخلہ ضیا اللہ لانگو نے انڈپینڈنٹ اردو کو بتایا کہ واقعے میں ہلاک ہونے والے دو مقامی بچوں کی عمریں نو سے 10 سال کے درمیان ہیں۔

اس سے قبل بلوچستان حکومت کے ترجمان لیاقت شاہوانی نے واقعے کی تفصیلات ٹوئٹر پر شیئر کرتے ہوئے گوادر میں چینی شہریوں کو لے جانے والی گاڑی پر حملے کی مذمت کی تھی۔

لیاقت شاہوانی نے بتایا تھا کہ پولیس اور سی ٹی ڈی کی ٹیموں نے جائے وقوعہ پر پہنچ کر مزید کارروائی شروع کردی ہے اور واقعہ کی تحقیقات کا آغاز ہو چکا ہے۔

چین گوادر سمیت پاکستان کے مختلف علاقوں میں چائنا پاکستان اقتصادی راہداری (سی پیک) کے تحت مختلف پروجیکٹس پر کام کر رہا ہے۔

گذشتہ ماہ 14 جولائی کی صبح خیبرپختونخوا میں برسین کے مقام پر داسو ہائیڈرو پاور پروجیکٹ کے قریب ہونے والے ایک دھماکے میں نو چینی شہریوں اور دو ایف سی اہلکاروں سمیت 12 افراد ہلاک جبکہ 26 سے زیادہ زخمی ہوئے تھے۔

رواں ماہ بلوچستان میں ہونے والا یہ دوسرا دھماکہ ہے۔ اس سے قبل آٹھ اگست کو سرینا ہوٹل کے قریب ہالی چوک پر ہونے والے دھماکے میں دو پولیس اہلکار چل بسے تھے، جبکہ متعدد زخمی ہوئے تھے۔

سول ایوی ایشن اتھارٹی(سی اے ای)نے اندرون ملک فضائی سفر کے لیے مسافروں پر کورونا ویکسینیشن کی لازمی شرط عائد کردی ہے۔سول ایوی ایشن اتھارٹی نے اندرون ملک فضائی سفر کے لیے نیا سفری ہدایت نامہ جاری کردیا ہے۔ 10ستمبر 2021 سے اندرون ملک ویکسین کے بغیر سفر نہیں کیا جا سکے گا۔
ایئرلائنز کو اندرون ملک سفر کے لیے ویکسی نیشن سرٹیفکیٹ چیک کرنے کی ہدایت کردی گئی۔

18سال سے زائد عمر والے ویکسی نیشن کرانے پر ہی اندرون ملک فضائی سفر کرسکیں گے۔خیال رہے کہ کوروناوائرس کے پیش نظر سفر کے دوران ایس او پیز پر عمل درآمد بھی کروایا جارہا ہے۔ایئرپورٹس اور طیاروں میں فیس ماسک کا استعمال لازمی ہے۔ مسافروں اور عملے کو بھی احتیاطی تدابیر پر ہرممکن عمل کرنے کی ہدایت کی گئی ہے۔

نادرا کے ڈی ایچ اے میگا سینٹر آنے والے شہری پریشان، رات گئے بھی شہریوں کو کئی کئی گھنٹے انتظار کرنا پڑتا ہے، کھڑے رہنے سے کئی بیمار خواتین کی حالت خراب ہو گئی۔رات میں صرف ایک کائونٹر سے کام چلایا جارہا ہے،شہریوں نے وفاقی وزیر داخلہ سے مشکلات کا نوٹس لینے اور متعلقہ افسران کے خلاف کارروائی کرنے کا مطالبہ کیا ہے۔
تفصیلات کے مطابق نادرا کی جانب سے ڈی ایچ اے کراچی میں شہریوں کو 24 گھنٹے سہولت فراہم کرنے کے لیے میگا سینٹر قائم کیا گیا ہے۔ تاہم میگا سینٹر پرخصوصاً رات کے اوقات میں زیادہ تر کائونٹرزکو بند کر کے صرف ایک کائونٹر سے کام چلایا جارہا ہے، جس ہے باعث رات کے پچھلے پہر بھی مردوخواتین کی طویل قطاریں لگی رہتی ہیں۔
شہری رات کے اوقات میں اس امید کے ساتھ آتے ہیں کہ ان کا نمبر تھوڑی دیر میں آجائے گا لیکن انہیں رات بھر بھی کئی کئی گھنٹے لائن میں کھڑے ہونا پڑتا ہے۔

دو سے تین گھنٹے کا انتظار تو معمول کی بات ہے۔ اس صورتحال کے باعث شہریوں کو شناختی کارڈ بنانے میں مشکلات کا سامنا ہے۔ انتظار میں کھڑی خواتین نے بتایاکہ وہ بیمار ہیں، یہاں بیٹھنے کا بھی کوئی انتظام نہیں ہے، افسران آرام سے اندر ٹھنڈے کمروں میں بیٹھے ہیں اور صارفین کی سننے والا کوئی نہیں ہے۔ اس صورتحال کے حوالے سے میڈیا نمائندوں نے نادرا میگا سینٹر انچارج سے بات کرنے کی کوشش کی تاہم انہیں گارڈز نے اندر جانے سے روک دیا اور رات کی ڈیوٹی پر موجود انچارج فہیم نے ملاقات کرنے سے بھی انکار کر دیا۔ شہریوں نے وفاقی وزیر داخلہ سے مشکلات کا نوٹس لینے اور متعلقہ افسران کے خلاف کارروائی کرنے کا مطالبہ کیا ہے۔

پی پی پی چیئرمین بلاول بھٹو زرداری کا بلوچستان میں سکیورٹی فورسز پر دہشتگرد حملے کی شدید مذمت.

پی پی پی چیئرمین کا سکیورٹی فورسز کی گاڑی بارودی سرنگ سے ٹکرانے کے نتیجے میں پاک فوج کے کیپٹن کی شہادت پر افسوس کا اظہار

وطن کی خاطر جامِ شہادت نوش کرنے والے شہید کیپٹن کاشف کو سلام پیش کرتا ہوں.شہداء کی قربانیاں رنگ لائیں گی، پاکستان کو امن، استحکام اور ترقی کا گہوارہ بنائیں گے.

بلاول بھٹو زرداری نے شہید افسر کے اہلخانہ سے تعزیت اور یکجہتی کا اظہار کیا ہے پی پی پی چیئرمین نے زخمی اہلکاروں کی جلد صحتیابی کے لیئے دعا کی ہے.

بلاول بھٹو زرداری کا ملک میں دہشتگردی کے واقعات میں اضافے پر تشویش کا اظہار.نیشنل ایکشن پلان پر عدم عملدرآمد کا خمیازہ آئے روز قوم کو بھگتنا پڑ رہا ہے.

پاکستان پیپلز پارٹی ڈسٹرکٹ کورنگی کے صدر جاوید شیخ نے کہاکہ پیپلز پارٹی نہ صرف کراچی بلکہ پورے ملک کے کنٹونمنٹ بورڈ کے الیکشن میں بھاری اکثریت سے کامیابی حاصل کرے گی ،کارکنان عام انتخابات اور بلدیاتی الیکشن کی تیاری کا آغاز کردیں انشا اللہ پی پی پی چیئر مین بلاول بھٹو کی قیادت میں پورے ملک میں عوامی اعتماد و تائید کے ساتھ حکومت بنائے گی .
ان خیالات کا اظہار انہوں نے پی پی پی ڈسٹرکٹ کورنگی کے تحت کنٹو نمنٹ بورڈ الیکشن کے حوالے سے منعقدہ اعلیٰ سطحی اجلاس سے خطاب کرتے ہوئے کیا اجلاس میں پیپلز پارٹی ضلع کورنگی کے عہدیداروں کے علاوہ سٹی ایریاز کے صدور ،جنرل سیکریٹریز ،سیکریٹری اطلاعات اور ذیلی تنظیموں پی ایس ایف ،پیپلز یوتھ ،شعبہ خواتین کے ضلع عہدیداروں نے بھی شرکت کی اس موقع پر اجلاس میں سابق رکن قومی اسمبلی اورپی پی پی رہنماء علی راشد ،چیئر مین زکواة و عشر کمیٹی ڈسٹرکٹ کورنگی عمران احمد صدیقی ،پی پی پی ڈسٹرکٹ کورنگی الیکشن سیل انچارج سید وقار شاہ نے خصوصی شرکت کی جبکہ ضلعی جنرل سیکریٹری چوہدری اصغر آرائیں اور سیکریٹری اطلاعات جانی میمن بھی موجود تھے ،جاوید شیخ نے اجلاس سے اپنے خطاب میں مزید کہاکہ کنٹو نمنٹ بورڈ میں رہائش پذیر عوام اپنے ووٹوں سے چیئر مین بلاول بھٹو کے نامزد پی پی پی اُمیدواروں کو بھاری اکثریت سے کامیاب کرائیںعوام کو درپیش مسائل سے نجات پیپلز پارٹی ہی دلائے گی جاوید شیخ نے رہنمائوں اور کارکنان سے کہاکہ وہ کنٹو نمنٹ بورڈ کے الیکشن میں پی پی پی اُمیدواروں کے انتخابی مہم میں بڑھ چڑھ کر حصہ لیں اور گھر گھر رابطہ مہم کے ذریعے چیئر مین بلاول بھٹو کا پیغام عوام تک پہنچا ئیں جاوید شیخ نے کہاکہ انشا اللہ کارکنان کی محنت رنگ لائے گی اور پیپلز پارٹی کنٹو نمنٹ بورڈ کے الیکشن میں بھاری اکثریت سے کامیاب ہوگی ۔

پاکستان کی عورت کسی سے کم نہیں،شہر قائد کی جمیلہ خاتون نے ثابت کردیا۔کراچی کے علاقے رنچھوڑ لائن کی رہائشی جمیلہ خاتون کے شوہر کا 35سال قبل انتقال ہوگیاتاہم جمیلہ خاتون نے اپنے اہل خانہ کی کفالت کے لیے ہمت نہ ہاری اور چھوٹے سے کیبن پر جوانی میں کاروں اور موٹر سائیکلوں کے آئل تبدیل کرنے کاکام شروع کیا لیکن اب وہ عمر کے اس حصے میں ہیں کہ وہ صرف موٹرسائیکلوں کا ہی آئل تبدیل کرتی ہے۔
جمیلہ بی بی نے خصوصی گفتگو میں بتایا کہ لوگوں نے میرے کام کرنے پر تنقید کا نشانہ بنایا لیکن میں نے پیچھے مڑکر نہیں دیکھا، اہل خانہ کے ساتھ ساتھ اپنے مرحوم بیٹے کے بچوں کی بھی کفالت کرتی ہوں اور ان کو پڑھابھی رہی ہوں۔جمیلہ بی بی کے پوتے نے گفتگوکرتے ہوئے بتایا کہ میں اپنی دادی کو بچپن سے کام کرتے دیکھ رہا ہوں، اپنی تعلیم کے بعد ان کا ہاتھ بٹاتا ہوں، بزرگ خاتون سے کام کرانے والے افراد نے بتایاکہ ہم عرصہ دراز سے ان سے ہی آئل تبدیل کراتے ہیں وجہ یہ ہے کہ ان کے ریٹ مناسب ہیں۔عزم وہمت کا پیکر جمیلہ خاتون نے وزیراعظم عمران خان، وزیر اعلی سندھ سید مراد علی شاہ سے اپیل کی ہے کہ انہیں ایک چھوٹی سی ایک دکان بنا کردی جائے تاکہ وہ اپنا کام جاری رکھ سکے۔