Category: کراچی

تفصیلات کے مطابق اقبال مارکیٹ تھانے کی حدود اورنگی ٹاؤن سیکٹر ساڑھے گیارہ منصور نگر میں خالی پلاٹ سے ایک شخص کی لاش ملی، اطلاع پر پولیس موقع پر پہنچی اور لاش کوعباسی شہید اسپتال منتقل کیا،پولیس کے مطابق متوفی کی شناخت محمد شاہین عرف شاہین بہاری ولد محمد حنیف کے نام سے کی گئی،پولیس کا عوی ہے کہ انتہائی مطلوب ٹارگٹ کلر شاہین بہاری نے گرفتاری کے خوف سے خود کو گولی مار کر خود کشی کی ہے ،پولیس کو جائے وقوعہ سے ایک پستول اورخط بھی ملا ہے،خط میں شاہین بہاری نے لکھا ہے کہ وہ پولیس چھاپوں سے پریشان ہو کر خود کشی کر رہا ہے ، شاہین بہاری نے اپنے ساتھی کے ہمرا 28 اگست کو ہوٹل میں فائرنگ کر کے اے ایس آئی اکرم خان کو شہید کیا تھا،شاہین بہاری نے خط میں لکھا کہ ہے کہ جس پستول سے اس نے اے ایس آئی اکرم خان کو شہید کیا وہ پستول اس نے پھینک دیا تھا اور وہ دوسرے پستول سے خود کشی کر رہا ہے، ملزم اسی علاقے کا رہائشی تھا،پولیس کے مطابق گزشتہ دنوں ملزم کے ساتھی آصف بھایا کو پولیس اور رینجرز نے گرفتار کیا تھا،سی سی ٹی وی فوٹیج میں بھی شاہین بہاری کو دیکھا جاسکتا ہے،ملزم سی ٹی ڈی میں درج ایف آئی آر نمبر 75/21 میں مطلوب تھا۔

ایس ایس پی ایس آئی یو حیدر رضا کے مطابق ایس آئی یو،سی آئی اے کی ٹیم نے منگھوپیر میں خفیہ اطلاع پر کارروائی کرتے ہوئے ایم کیو ایم لندن سے وابستہ محمد شفاعت سمیع کو گرفتار کر کے اسکے قبضے سے غیر قانونی30 بور پستول برآمد کرلیا،پولیس کا دعوی ہے کہ ملزم کراچی آپریشن کے بعد دبئی فرار ہوگیا تھا اور پھر بعد میں واپس آگیا تھا ، ملزم نے دوران تفتیش 12 مئی 2007 کو ایم کیو ایم قیادت کے حکم پر شاہ فیصل کالونی میں ٹھیلے پتھارے جلانے کے علاوہ دیگر وارداتوں کا بھی اعتراف کیا ہے ، ملزم کے خلاف انسدادا دہشت گردی کے تحت مقدمہ درج ہے جس میں وہ مفرور تھا، ملزم نے اعتراف کیا کہ حالیہ دنوں میں وہ اسٹریٹ کرائم کی متعدد وارداتوں میں ملوث رہا ہے،ملزم اپنے دیگر ساتھیوں عامر عرف گوپالی ، اشرف عرف گڈو ، رضوان عرف ملا، عادل عرف کولی ، صمد توتلا سمیت دیگر کے ساتھ ملکر لوٹ مار کی وارداتیں کی ہیں جن کے مقدمات درج ہیں، ملزم سے مزید تفتیش اور اسکے ساتھیوں کی تلاش میں چھاپے مارے جارہے ہیں۔

پاکستان کے لیجنڈ کامیڈین اور سینئر اداکار عمر شریف کی دوران علاج اسپتال سے تصویر وائرل ہونے پر ان کی اہلیہ زرین عمر نے برہمی کا اظہار کیا ہے۔

دل کے عارضے میں مبتلا لیجنڈ اداکار عمر شریف کی سوشل میڈیا پر اسپتال سے علاج کے دوران لی گئی تصویر وائرل ہورہی ہے۔ تصویر میں عمر شریف اسپتال کے بیڈ پر لیٹے ہوئے ہیں اور بہت کمزور لگ رہے ہیں۔ مختلف سوشل میڈیا پلیٹ فارم پر اس تصویر کو شیئر کرواکر عمر شریف کی صحت یابی کے لیے دعا کی درخواست کی جارہی ہے۔

تاہم عمر شریف کی اہلیہ زرین عمر نے اپنے شوہر کی تصویر وائرل ہونے پر برہمی کا اظہار کیا ہے۔ انہوں نے فیس بک پر لکھا ’’لوگوں کو اسپتال سے نجی تصاویر شیئر کرتے دیکھنا بہت افسوسناک ہے‘‘۔ انہوں نے لوگوں سے درخواست کی کہ محض چند لائکس اور شیئر کے لیے بغیر تصدیق کے کچھ بھی شیئر نہ کریں۔
زرین عمر نے ایک اچھی خبر بھی شیئر کرتے ہوئے کہا ڈاکٹرز کے مطابق عمر شریف کی طبیعت میں بہتری آرہی ہے۔ وہ اچھی کارکردگی کا مظاہرہ کررہے ہیں اور وہ ایئر ایمبولینس کے ذریعے سفر کرنے کے قابل ہیں۔

میں زرین عمر ویزا کے جلد عمل کے لیے وفاقی حکومت کا شکریہ ادا کرنا چاہوں گی۔ اس کے علاوہ انہوں نے ایئرایمبولینس کے اخراجات برداشت کرنے پر سندھ حکومت، بلاول بھٹو زرداری، مرتضیٰ وہاب اور سید مراد علی شاہ کا شکریہ ادا کیا۔
زرین عمر نے عمر شریف کی جلد صحت یابی کے لیے دعائیں کرنے اور نیک تمناؤں کا اظہار کرنے والے افراد کا بھی شکریہ اداکیا اور لکھا صرف آپ لوگوں کی دعاؤں کی وجہ سے عمر شریف کی طبیعت میں بہتری آرہی ہے۔

واضح رہے کہ عمر شریف کے بیٹے جواد عمر نے گزشتہ روز بتایا تھا کہ ان کے والد کی طبیعت میں بہتری نہیں آرہی اگر انہیں امریکا نہیں بھیجا گیا تو اوپن ہارٹ سرجری کی طرف جانا ہوگا۔

نامور پاکستانی اداکارہ ریما نے سماجی رابطے کی ویب سائٹ پر لیجنڈری اداکار وکامیڈین عمرشریف کے ہمراہ تصویر شیئر کرتے ہوئے لکھا ’’برصغیر کے بہترین کامیڈین عمرشریف نے اپنی زندگی میں ہمیشہ دوسروں کے چہروں پر مسکراہٹیں بکھیرنے کے لیے کام کیا لیکن مجھے یہ جان کر شدید دکھ اور افسوس ہوا کہ وہ اپنی بیماری کی وجہ سے بہت تکلیف میں ہیں‘‘۔

اداکارہ ریما نے کہا کہ عمر شریف کی بیماری کے حوالے سے میں نے اپنے شوہر ڈاکٹر طارق سے بات کی اور مجھے اپنے شوہر پر فخر ہے کہ انہوں نے نہ صرف عمر شریف کی بیماری کا علاج کرنے کے لیے رضامندی ظاہر کردی بلکہ انہوں نے عمر شریف اور ان کی فیملی کے امریکا روانگی کے لیے انتظامات کرنا بھی شروع کردیے ہیں۔
ریما کا کہنا تھا کہ میں نے اپنے شوہر سے گزارش کی کہ وہ عمرشریف کی صحتیابی کے لیے جتنی ممکن ہو کوشش کریں جس پر انہوں نے مجھے مایوس نہیں کیا اور میں اللہ تعالیٰ سے دعا کرتی ہوں کہ وہ میرے شوہر ڈاکٹر طارق کے ہاتھوں میں عمرشریف کے لیے شفا لکھ دیں۔

دسویں اور بارہویں جماعت کے طلبہ کو پاس کرنے کا معاملہ، حکومت سندھ نے وفاقی وزیر تعلیم شفقت محمود کے فیصلے سے اتفاق نہ کرنے کا اعلان کر دیا- تفصیلات کے مطابق سندھ کے وزیر تعلیم نے امتحانات سے متعلق وفاقی وزیر تعلیم کے فیصلے سے اتفاق نہ کرنے کا اعلان کیا ہے۔ نجی ٹی وی سے گفتگو کرتے ہوئے وزیر تعلیم سندھ سردار شاہ نے کہا کہ شفقت محمود کے اعلانات سے سندھ متفق نہیں، وزرائے تعلیم کے اجلاس میں تمام فیصلوں پر سندھ آمادہ نہیں ہے۔
انہوں نے کہا کہ سندھ میں امتحانات ہوچکے ہیں اور کورونا وبا کے دوران بہترین انداز سے امتحانات منعقد کروائے۔ وزیر تعلیم کا کہنا تھا کہ سال میں دوبار امتحانات کی تجویز کو اسٹیئرنگ کمیٹی کے اجلاس میں لے جائیں گے اور اسٹیئرنگ کمیٹی کے فیصلے کو ہی حتمی فیصلہ تصور کیا جائےگا۔
ذرائع کے مطابق حکومت نے 10 ویں اور12 ویں جماعت کے تمام طلبہ کو پاس کرنے کا فیصلہ کیا۔ ذرائع نے بتایا کہ فیل ہونے والے طلبہ کو رعایتی 33 نمبر دے کر پاس کیا جائے گا۔ ذرائع کے مطابق وزرائے تعلیم نےفیصلہ کیا کہ کورونا کے باعث دوبارہ فوری امتحانات ممکن نہیں لہٰذا میٹرک اور انٹرمیڈیٹ کے امتحانات سال میں دوبارہوں گے۔
ذرائع نے بتایا کہ وزرائے تعلیم نے فیصلہ کیا کہ امتحانات کو سپلیمنٹری امتحانات کا نام نہیں دیا جائے گا۔ ذرائع کے مطابق کانفرنس میں یہ بھی فیصلہ کیا گیا کہ آئندہ سال میٹرک امتحانات مئی اور جون میں ہوں گے جبکہ نیا سیشن اگست سے شروع ہوگا۔ دوسری جانب وفاقی وزیر برائے تعلیم و فنی تربیت شفقت محمود نے ٹوئٹ میں کہا کہ بورڈ کے امتحانات مئی اور جون میں ہوں گے اور ساتھ ہی آئندہ تعلیمی سال 22 اگست سے شروع ہوگا۔ ان کا کہنا تھاکہ او اور اے لیول کے امتحانات شیڈول کے مطابق ہوں گے جبکہ جامعات امتحانات کا اپنا شیڈول بنائیں گی۔

کراچی تاجر الانئس کے چیئر مین ایاز میمن موتی والا نے کہا ہے کہ عمر شریف پاکستان کے لیجنڈری اداکار ہیں اور پاکستانی شو بز انڈسٹری کا سرمایہ ہے پوری قوم ان کی صحت و تندرستی کے لیئے دعائوں کاسلسلہ جاری رکھیںاور حکومت جلد از جلد عمر شریف کے علاج کے لیے بیرون ملک جانے کے لیئے تعاون کرے اس سے قبل بھی ہم نے بیشتر فنکار وسائل اور حکومتی تعاون نہ ملنے کی وجہ سے ہم نے گنوا دیئے ہیں فنکار قوم کا سرمایہ ہیں ذاتی طورپر عمر شریف کے ساتھ ہر طرح کے تعاون کے لیئے حاضر ہوں، ان خیالات کا اظہار انہوں نے اپنی رہائش گاہ سے جاری کردہ بیان میں کیا، ایاز میمن موتی والا نے کہا کہ فنکار کسی بھی ملک کی پہچان اور سفیر ہوتے ہیں عمر شریف نے دنیا کے مختلف ممالک میں اپنی فنکاری سے پاکستان کا نام روشن کیا، عمر شریف نے مزاح کی دنیا میں اپنی فنکاری سے جان بھری اسٹیج ڈرامے جب شدید مشکلات میںتھے اس وقت میں عمرشریف نے اسٹیج ڈراموں میں انٹری دیکر اپنی اداکاری سے اسٹیج ڈراموں کو نیا ٹرینڈ دیا، انہوں نے کہا کہ ہمارے فنکاروں کی بدقسمتی ہے کہ حکومتی سطح پر ان کو وہ سرپرستی کبھی نہیں مل سکی جو مختلف ممالک میں فنکاروں کو دی جاتی ہے شوبز انڈسٹری ایک منافع بخش انڈسٹری ہے اور اگر حکومت فن و فنکار کے ساتھ تعاون کرے تو نہ صرف بہت سارا نیا ٹیلنٹ سامنے آئے گا بلکہ بیروزگاری کو ختم کرنے میں کافی مدد ملے گی، انہوں نے کہا کہ موجودہ حکومت کی ذمہ داری ہے کہ وہ لیجنڈ اداکار عمر شریف کے علاج معالجے کے لیئے جلد از جلد ضروری اقدامات کرے اور ان کو علاج معالجے کے لیئے بیرون ممالک جانے کے لیئے ویزا اور دیگر اخراجات برداشت کرے عمر شریف نے پاکستان کو اپنے فن اور اداکاری سے جو عزت اور مقام بین الاقوامی شوبز انڈسٹر ی میں دلوایا ہے وہ کوئی آسان کام نہیں ہے آج جب اس فنکار کو پاکستان کی حکومت کی جانب سے مدد کی ضرورت ہے تو وزیراعظم پاکستان کو چاہیے کہ وہ عمر شریف کی مدد کریں اور ان کے ساتھ مکمل تعاون کریں، انہوں نے مزید کہا کہ حکومت پاکستان سے مطالبہ کرتے ہیں کہ فنکاروں کی فلاح کے لیئے کوئی جامع منصوبہ بندی اور حکمت عملی مرتب کی جائے جس کے ذریعے مشکل وقت میںا ن کے علاج معالجے سمیت دیگر اخراجات کیلئے ان کو پریشانی نہ ہو۔

پاکستان تحریک انصاف کے رہنما و سربراہ بیت المال سندھ حنید لاکھانی نے گزشتہ روز کراچی میں دو سرکاری ہسپتالوں کی آپس کی لڑائی میں لیاقت آباد کے ٹریفک حادثے کا شکار زخمی شہری کی ہلاکت پر تشویش کا اظہار کرتے ہوئے کہا ہے کہ سرکاری ہسپتالوں کی انتظامیہ کی بے حسی ایک جیتی جاگتی زندگی کو نگل گئی بتایا جائے کہ ایک سرکاری ہسپتال نے دوسرے سرکاری ہسپتال کا کیس لینے سے کیوں انکار کیا جبکہ قانون کے مطابق ایمرجنسی کے کیس کو فوری طبی امداد دی جاتی ہے اور اس کے اخراجات بھی حکومت برداشت کرتی ہے، ان خیالات کاا ظہار انہو ںنے حنید لاکھانی سیکرٹریٹ سے جاری کردہ بیان میں کیا، حنید لاکھانی نے کہا کہ ہسپتال انتظامیہ کی بے حسی اور غیر ذمہ دارانہ رویے سے پیش آنے والے واقعے نے ہمارے سر شرم سے جھکا دیئے ہیں سرکاری فنڈز سے چلنے والی سرکاری ہسپتالوں میں علاج معالجے کے لیئے آنے والے غریب مریضوں اور ان کے لواحقین کے ساتھ بھیڑ بکریوں جیسا سلوک ہوتا ہے ،غریب شہری پرائیویٹ ہسپتالوں کے اخراجات نہیں برداشت کر سکتے مجبورا وہ لوگ علاج معالجے کے لیئے سرکاری ہسپتالوں کا رخ کرتے ہیں لیکن کراچی کے سرکاری ہسپتال بنیادی سہولیات سے محروم ہیں اور افسوس کی بات تویہ ہے کہ سرکاری ہسپتالوں میں غفلت کے باعث مریضوں کے علاج کا کوئی ضابطہ اخلاق اور طریقہ کار ہی نہیں ہے اس وقت کراچی کے سرکاری ہسپتالوں میں صرف چند سستی ادویات ہی میسر ہیں جبکہ مہنگی اور جان بچانے والی تمام ادویات باہر کے میڈیکل اسٹورز سے لانے کا کہہ دیا جاتا ہے سرکاری ہسپتال میں داخل مریضوں کو پہلے ادویات کے حصول کے لیئے دربدر کیا جاتا ہے اور اس کے بعد باہر سے لانے کا کہہ دیا جاتا ہے، سندھ کی عوام کی بدقسمتی ہے کہ سندھ کا اربوں روپے کا بجٹ سندھ حکومت کے چور اور ڈاکوئوں کی عیاشیوں کی نظر ہوجاتا ہے محکمہ صحت سندھ کے مطابق صوبے بھر میں 669سرکاری ایمبولینسز موجود ہیں جن میں سی168خراب ہیں اور یوں سندھ کے 96ہزار افراد کے لیئے محض ایک ایمبولینس دستیاب ہے ، انہوں نے کہا کہ اندرون سندھ کے دور دراز کے علاقوں میں لوگ گدھا گاڑی، بیل گاڑی، چنچکی رکشہ، موٹر سائیکل ، ٹریکٹر ٹرالی جیسی سواریوں پر مریضوں کو لانے پر مجبور ہیں کیونکہ ایمبولینس اور ان کے لیئے دیا جانے والا پٹرول کو سارا بجٹ ہسپتال انتظامیہ یا پھر سندھ حکومت کے چور کھا جاتے ہیں، انہوں مزید کہا کہ بے شرم اور بے حس لوگ ہیں جو اس طرح غریبوں کے علاج معالجے کا فنڈ بھی کھاجاتے ہیں نہ جانے کتنے غریب لوگ بروقت اور صحیح طبی سہولیات نہ ملنے پر جان کی بازی ہار جاتے ہیں جن کے ذمہ دار یہی لوگ ہیں جو فنڈز کھاتے ہیں اور سرکاری ادویات بیچ دیتے ہیں ۔