Category: قصور

قصور(باغی ٹی وی بیوروچیف غنی محمود) تھانہ گنڈا سنگھ والا کے علاقے کٹی کلنجر میں محمد عارف اور محمد سلیم گروپوں کے درمیان تقریباً پانچ سے چھ سال سے جاری تنازعے کو قصور پولیس نے اپنی کوششوں سے ختم کروا دیا ہے۔

تفصیلات کے مطابق دونوں گروپوں کے درمیان کافی عرصے سے تنازعہ چلا آ رہا تھا اور اس دوران دونوں فریقین کے درمیان فائرنگ کا تبادلہ بھی ہو چکا تھا۔ اس تنازعے کی وجہ سے دونوں فریقین کے درمیان مقدمات بھی زیر سماعت تھے۔

تھانہ گنڈا سنگھ والا کے ایس ایچ او زاہد جمیل، اے ایس آئی محمد نعیم، اور محمد رضا (سپیشل برانچ) نے دونوں فریقین کو سمجھایا اور انہیں اپنی پرانی دشمنی کو بھول کر ایک دوسرے کے ساتھ صلح کرنے پر آمادہ کیا۔ پولیس کی ان کوششوں سے دونوں فریقین نے ایک دوسرے کو معاف کر دیا اور تنازعے کا خاتمہ ہو گیا۔

اس پر علاقے کے لوگوں نے قصور پولیس کا شکریہ ادا کیا اور ان کی اس کوشش کو سراہا۔

قصور(باغی ٹی وی بیوروچیف غنی محمود)اورلوڈ ٹرکوں کی وجہ سے دیپالپور روڈ پر حادثات میں اضافہ،ٹریفک پولیس کی بے حسی ،شہریوں کی زندگی اجیرن، طویل عرصے سے زیر تعمیر اس روڈ پر اوور لوڈڈ ٹرکوں اور ٹرالیوں کا مسلسل آنا جانا شہریوں کے لیے جان کا خطرہ بن چکا ہے۔

تفصیلات کے مطابق، دیپالپور روڈ پر تعمیراتی کاموں کی وجہ سے سڑک کی حالت انتہائی خراب ہے۔ اس کے علاوہ، اوور لوڈڈ ٹرکوں کا سائز سڑک کے برابر ہونے کی وجہ سے انہیں اوور ٹیک کرنا انتہائی خطرناک ہو گیا ہے۔ سڑک کے کئی حصے ون وے ہونے کی وجہ سے یہ خطرہ مزید بڑھ گیا ہے۔

گزشتہ دن نور پور کے قریب ایک اوور لوڈڈ ٹرالی کے الٹنے سے سڑک کا ایک حصہ بند ہو گیا، جس سے شہریوں کو مزید مشکلات کا سامنا کرنا پڑ رہا ہے۔

شہریوں کا کہنا ہے کہ ٹریفک پولیس اور ہائی وے پیٹرولنگ پولیس اس صورتحال پر نظر انداز کیے ہوئے ہیں۔ انہوں نے ڈی پی او قصور سے اپیل کی ہے کہ وہ خود نوٹس لے کر اس مسئلے کا حل نکالیں۔

قصور،باغی ٹی وی (بیوروچیف غنی محمود) پنجاب حکومت نے خواتین کو وراثت سے محروم کرنے کے خلاف سخت کارروائی کا فیصلہ کیا ہے۔ اس حوالے سے ایک نئی مہم شروع کی گئی ہے جس کا نام "violation against women never again” رکھا گیا ہے۔

تفصیلات کے مطابق جن خواتین کو وراثت میں ان کا حق نہیں دیا گیا، وہ پاکستان پینل کوڈ کی دفعہ 498 اے کے تحت مقدمہ درج کروا سکتی ہیں۔ اس دفعہ کے تحت مجرم کو 10 سال قید یا 10 لاکھ روپے جرمانہ یا دونوں سزائیں ہو سکتی ہیں۔

پنجاب حکومت کی اس اقدام پر عوام خاص طور پر خواتین نے خوشی کا اظہار کیا ہے۔ اس فیصلے کو خواتین کے حقوق کے لیے ایک اہم قدم قرار دیا جا رہا ہے۔

قصور،باغی ٹی وی (بیوروچیف غنی محمود) ڈی پی او محمد عیسیٰ خان کی ہدایت پر پولیس نے تھانہ کوٹرادھاکشن کے علاقے چک 65 میں ایک بڑے پیمانے پر سرچ آپریشن کیا۔ اس آپریشن میں پولیس نے 7 ملزمان کو گرفتار کیا ہے جن کے قبضے سے ایک کلوگرام آئس اور تقریباً 5 کلوگرام چرس برآمد ہوئی ہے۔

گرفتار ملزمان میں سنگین مقدمات میں مطلوب ایک اے کیٹگری کا خطرناک مجرم بھی شامل ہے۔ اس آپریشن میں ڈی ایس پی خالد اسلم، ایس ایچ او راؤ دلشاد علی اور تھانہ کی نفری نے حصہ لیا۔ پولیس نے تقریباً 40 گھروں کی تلاشی لی اور 160 سے زائد افراد سے پوچھ گچھ کی۔

ڈی پی او کا کہنا ہے کہ اس سرچ آپریشن کا مقصد سنگین جرائم میں ملوث ملزمان کی گرفتاری اور علاقے میں امن و امان قائم کرنا ہے۔ انہوں نے کہا کہ ضلعی پولیس شہریوں کی جان و مال کی حفاظت کے لیے دن رات کوشاں ہے۔

قصور،باغی ٹی وی (بیوروچیف غنی محمود) فیروزپور روڈ پر تیز رفتار بس نے موٹر سائیکل سوار ماں بیٹے کو ٹکر ماری جس کے نتیجے میں دونوں شدید زخمی ہوگئے۔ ریسکیو 1122 نے زخمیوں کو ہسپتال منتقل کردیا۔

تفصیلات کے مطابق منیر اپنی ماں صغراں بی بی کو موٹر سائیکل پر لے کر جا رہا تھا کہ کالی پل کے قریب ایک تیز رفتار مسافر بس نے انہیں پیچھے سے ٹکر ماری۔ حادثے کی اطلاع پر ریسکیو عملہ فوری طور پر موقع پر پہنچا اور زخمیوں کو ابتدائی طبی امداد دے کر بلھے شاہ ڈسٹرکٹ ہسپتال منتقل کردیا۔

مقامی لوگوں کا کہنا ہے کہ ٹریفک پولیس ٹریفک قوانین پر عمل درآمد کروانے میں مکمل طور پر ناکام ہے۔ شہر میں روزانہ حادثات ہوتے ہیں لیکن پولیس کوئی اہم اقدامات نہیں اٹھا رہی۔ لوگوں نے ڈی پی او قصور سے ازخود نوٹس لے کر ٹریفک پولیس کے خلاف کارروائی کرنے کا مطالبہ کیا ہے۔

واضح رہے کہ دو دن قبل فقیرئیے والا روڈ پر ایک جوان لڑکا ٹریفک حادثے میں جاں بحق ہوگیا تھا۔ اس کے باوجود ٹریفک پولیس سڑکوں پر نظر نہیں آتی اور اگر نظر آتی ہے تو صرف موٹر سائیکل سواروں کے کاغذات چیک کرنے تک محدود رہتی ہے۔

قصور ،باغی ٹی وی(ڈسٹرکٹ رپورٹرطارق نوید سندھو): تھانہ صدر قصور کے علاقے بائی پاس بھٹی ہسپتال کے قریب پولیس اور ڈاکوؤں کے درمیان ایک شدید مقابلہ ہوا جس کے نتیجے میں ایک ڈاکو ہلاک اور ایک کو زخمی حالت میں گرفتار کر لیا گیا۔

ملنے والی اطلاعات کے مطابق، دو موٹر سائیکلوں پر سوار چار ڈاکو کسی واردات کو انجام دے رہے تھے کہ پولیس کو اطلاع ملنے پر ایگل اسکواڈ اور تھانہ صدر قصور کی موبائل ٹیمیں فوری طور پر موقع پر پہنچ گئیں۔ ڈاکوؤں نے پولیس کو دیکھ کر فائرنگ شروع کر دی جس کا پولیس نے جواب دیا۔ اس فائرنگ کے تبادلے میں ایک ڈاکو ہلاک ہو گیا جبکہ اس کا ساتھی زخمی حالت میں گرفتار کر لیا گیا۔

ہلاک ہونے والے ڈاکو کی شناخت عدیل عرف عدیلو اور زخمی ڈاکو کی ندیم عرف دیمی کے نام سے ہوئی ہے۔ دونوں ڈاکو ڈکیتی اور راہزنی کے متعدد مقدمات میں ملوث تھے اور قصور پولیس کے لیے انتہائی مطلوب تھے۔ پولیس نے ڈاکوؤں کے قبضے سے دو پستول اور ایک موٹر سائیکل برآمد کی ہے۔ فرار ہونے والے دو ڈاکوؤں کی گرفتاری کے لیے پولیس نے خصوصی ٹیمیں تشکیل دے دی ہیں۔

قصور (باغی ٹی وی ڈسٹرکٹ رپورٹرطارق نوید سندھو): قصور کے علاقے جماعت پورہ سے ایک مسخ شدہ اور نامعلوم لاش برآمد ہوئی ہے۔

تفصیلات کے مطابق، لاش کو سڑک پر ٹکڑوں کی شکل میں بکھرا ہوا پایا گیا ہے۔ملزم نے نہ صرف قتل کیا بلکہ بے رحمی سے لاش کے جسمانی اعضاء جیسے بازو، ٹانگیں اور دیگر حصے کاٹ کر الگ الگ پھینک دیے۔ اب تک لاش کی شناخت نہیں ہو سکی ہے۔

واقعے کی اطلاع ملتے ہی تھانہ بی ڈویژن اور ریسکیو کی ٹیمیں موقع پر پہنچی اور لاش کو قبضے میں لے کر مزید تحقیقات کے لیے ہسپتال منتقل کر دیا گیا ہے۔ پولیس تھانہ بی ڈویژن اس معاملے کی تفتیش میں مصروف ہے۔