Category: قصور

قصور (طارق نوید سندھوسے)وزیر اعلیٰ پنجاب مریم نوازشریف، چیف سیکرٹری پنجاب اور کمشنر لاہور ڈویژن کی ہدایت پر ڈپٹی کمشنر محمدآصف رضا نے بابابلھے شاہ ڈسٹرکٹ ہسپتال کا اچانک دورہ کیا۔

اس موقع پر ڈی سی نے ہسپتال کی صفائی، مریضوں کو دی جانے والی سہولیات، میڈیکل اسٹاف کی حاضری، مفت ادویات کی دستیابی، ایمرجنسی اور او پی ڈی سمیت دیگر وارڈز کا تفصیلی جائزہ لیا۔ انہوں نے ہسپتال انتظامیہ کو ہدایت کی کہ مریضوں کے لیے انتظار گاہوں میں صاف ستھرا اور آرام دہ ماحول یقینی بنایا جائے اور ادویات کی فراہمی اور ڈاکٹروں کی حاضری کو روزانہ کی بنیاد پر مانیٹر کیا جائے۔

ڈپٹی کمشنر نے زور دیتے ہوئے کہا کہ صحت کا شعبہ حکومت کی اولین ترجیح ہے اور اس شعبے میں بہتری کے لیے ایسے اچانک دورے جاری رہیں گے۔ انہوں نے عملے کو تنبیہ کی کہ فرائض میں غفلت کی کوئی گنجائش نہیں، اور غفلت یا لاپرواہی کی صورت میں سخت کارروائی سے گریز نہیں کیا جائے گا۔

قصور (طارق نوید سندھوسے)وزیر اعلیٰ پنجاب مریم نواز شریف کی خصوصی ہدایت پر ڈپٹی کمشنر محمدآصف رضا کی زیر صدارت ڈسٹرکٹ کوآرڈینیشن کمیٹی کا جائزہ اجلاس منعقد ہوا، جس میں تمام متعلقہ محکموں کے افسران نے شرکت کی۔

اجلاس میں غیرقانونی پٹرول پمپس اور ایل پی جی ری فلنگ کے حوالے سے سول ڈیفنس آفیسر نے بریفنگ دی اور بتایا کہ ٹیمیں روزانہ کی بنیاد پر آپریشن کر رہی ہیں۔ ڈپٹی کمشنر نے شہری علاقوں میں غیرقانونی ایل پی جی ری فلنگ کرنے والوں کے خلاف کریک ڈاؤن مزید تیز کرنے کا حکم دیا۔

ڈپٹی کمشنر نے تمام اسسٹنٹ کمشنرز کو ہدایت کی کہ شہر سمیت ضلع بھر میں تجاوزات اور وال چاکنگ کے مکمل خاتمے کی رفتار تیز کی جائے۔ ٹریفک کے نظام کو بہتر بنانے کے لیے بھی اجلاس میں بریفنگ دی گئی اور اسسٹنٹ کمشنرز، میونسپل کمیٹیز اور سیکریٹری آر ٹی اے کو ہدایت کی گئی کہ وہ مل کر ٹریفک کے نظام کو مؤثر بنانے کے لیے اقدامات کریں۔

اس کے علاوہ ایس ای لیسکو نے بجلی چوری کی روک تھام اور ریکوری کے حوالے سے بھی بریفنگ دی، اور ڈپٹی کمشنر نے افسران کو ہدایت کی کہ قانون کے نفاذ میں کوئی رعایت نہ برتی جائے اور عوامی سہولت اور قانون کی بالادستی کو یقینی بنایا جائے۔

قصور (بیورو چیف: طارق نوید سندھو)الظفرہ ہائی سکول اینڈ گرلز کالج چک نمبر 17، تحصیل چونیاں، ضلع قصور میں سالانہ رزلٹ کی ایک پروقار اور شاندار تقریب منعقد ہوئی، جس میں لاہور سے چائنیز یونیورسٹی کے کنسلٹنٹ سر عمر بشیر اور ان کی ٹیم، میڈم کائنات، میڈم عروج اور میڈم ثمرہ نے خصوصی شرکت کی۔

تقریب سے خطاب کرتے ہوئے معزز مہمانوں نے پرنسپل و ڈائریکٹر الظفرہ ہائی سکول اینڈ گرلز کالج سر کاشف ندیم کی تعلیمی خدمات کو سراہتے ہوئے کہا کہ جس انداز میں اس ادارے میں جدید دور کے تقاضوں کے مطابق آرٹیفیشل انٹیلیجنس اور انفارمیشن ٹیکنالوجی کی تعلیم دی جا رہی ہے، وہ قابلِ تحسین ہے۔ انہوں نے کہا کہ الظفرہ ہائی سکول کے تمام طلبہ کو کمپیوٹر کی تعلیم بالکل مفت فراہم کی جا رہی ہے، جو اس علاقے کے لیے ایک بڑی تعلیمی سہولت ہے۔

اس موقع پر علاقے کے چیئرمین ہارون خان، علاقہ معززین، والدین اور دیگر معزز شخصیات نے بھی شرکت کی اور اس بات پر اتفاق کیا کہ الظفرہ ہائی سکول اینڈ گرلز کالج علاقے کا نہ صرف خوبصورت بلکہ اعلیٰ معیار کا تعلیمی ادارہ ہے، جہاں بچوں کو بہترین تعلیمی ماحول میسر ہے۔

تقریب سے خطاب کرتے ہوئے سر تصور ارشد نے کہا کہ ہم پرنسپل و ڈائریکٹر سر کاشف ندیم کی بیٹیوں کی تعلیم کے لیے کی جانے والی کاوشوں کو خراجِ تحسین پیش کرتے ہیں۔ انہوں نے کہا کہ الظفرہ ہائی سکول اینڈ گرلز کالج علاقے اور گردونواح کی بچیوں کے لیے ایک مکمل، محفوظ اور معیاری تعلیمی ادارہ ہے، جہاں اعلیٰ تعلیم یافتہ فی میل اسٹاف بچیوں کی تعلیمی و اخلاقی تربیت میں اہم کردار ادا کر رہا ہے۔

تقریب کے اختتام پر نمایاں کارکردگی کا مظاہرہ کرنے والی طالبات میں انعامات تقسیم کیے گئے، جبکہ شرکاء نے ادارے کی تعلیمی خدمات کو سراہتے ہوئے اس کی مزید کامیابیوں کے لیے نیک تمناؤں کا اظہار کیا۔

قصور (باغی ٹی وی،بیوروچیف طارق نویدسندھو)کمشنر لاہور ڈویژن مریم خان نے ڈپٹی کمشنر قصور محمد آصف رضا کے ہمراہ ضلع قصور کا دورہ کیا، جہاں انہوں نے ستھرا پنجاب پروگرام کے تحت صفائی کے انتظامات اور صحت کی سہولیات کا تفصیلی جائزہ لیا۔

کمشنر لاہور ڈویژن نے رسول پورہ، مصطفیٰ آباد اور مان گاؤں گنڈا سنگھ کے مختلف علاقوں کا دورہ کیا اور رورل ایریاز میں صفائی ستھرائی، نالیوں کی ڈی سلٹنگ اور کوڑا کرکٹ کی بروقت نکاسی کے اقدامات کا معائنہ کیا۔ انہوں نے ہدایت کی کہ دیہی علاقوں میں صفائی اور نالیوں کی ڈی سلٹنگ مقررہ شیڈول کے مطابق باقاعدگی سے کی جائے اور دیہات کے اطراف کوڑے کے ڈھیر لگنے سے ہر صورت روکا جائے۔ ون ٹائم کلیئرنس کے بعد صفائی کی صورتحال کو مستقل بنیادوں پر برقرار رکھا جائے اور عوامی رائے کو بھی ضرور شامل کیا جائے۔

کمشنر لاہور ڈویژن مریم خان نے ستھرا پنجاب پروگرام کے تحت ہیلتھ فسیلیٹیز کی جامع صفائی کے سلسلے میں مریم نواز آر ایچ سی گنڈا سنگھ اور مریم نواز ہیلتھ کلینک گنڈا سنگھ کا بھی دورہ کیا، جہاں انہوں نے طبی نگہداشت کے پروٹوکولز، وارڈز، ادویات کی دستیابی، ایمرجنسی سہولیات، واش رومز کی صفائی اور عملے کی حاضری کا تفصیلی جائزہ لیا۔

انہوں نے مریضوں اور ان کے لواحقین سے مفت ادویات کی فراہمی اور طبی سہولیات سے متعلق دریافت کیا، جس پر مریضوں نے اطمینان کا اظہار کیا۔ اس موقع پر مریم نواز ہیلتھ کلینک کے انچارج ڈاکٹر نے کمشنر لاہور کو سہولیات اور جاری اقدامات سے متعلق بریفنگ دی۔ دورے کے دوران ڈپٹی کمشنر قصور محمد آصف رضا اور سی ای او ہیلتھ قصور بھی ہمراہ تھے۔

کمشنر لاہور ڈویژن مریم خان نے اس موقع پر واضح کیا کہ ہسپتالوں کی روٹین صفائی ہسپتال اوقات شروع ہونے سے قبل مکمل ہونی چاہیے، جبکہ ہیلتھ فسیلیٹیز کی ڈیپ کلیننگ کے بعد صفائی کی صورتحال کو تسلسل کے ساتھ برقرار رکھا جائے۔ انہوں نے متعلقہ افسران کو ہدایت کی کہ صفائی اور صحت کی سہولیات میں کسی قسم کی غفلت برداشت نہیں کی جائے گی اور عوام کو بہتر اور معیاری سہولیات کی فراہمی کو یقینی بنایا جائے۔