Category: لاہور

لاہور ہائیکورٹ نے کمسن بچے سے بدفعلی کے بعد کرنٹ لگا کر قتل کرنے کے مجرم ندیم اسلم کی سزائے موت کے خلاف اپیل مسترد کر دی۔

چیف جسٹس لاہور ہائیکورٹ جسٹس عالیہ نیلم کی سربراہی میں دو رکنی بنچ نے محفوظ شدہ فیصلہ سناتے ہوئے قرار دیا کہ ایسے سنگین جرائم میں ملوث افراد کسی رعایت کے مستحق نہیں،مجرم ندیم اسلم کے خلاف مقدمہ تھانہ ہنجروال لاہور میں درج کیا گیا تھا جس میں اس پر الزام تھا کہ اس نے ساڑھے 3 سالہ بچے کو جنسی زیادتی کا نشانہ بنانے کے بعد کرنٹ لگا کر بے دردی سے قتل کیا،سیشن عدالت لاہور نے 2022 میں مجرم کو جرم ثابت ہونے پر سزائے موت کا حکم سنایا تھا۔

مجرم نے اس فیصلے کے خلاف لاہور ہائیکورٹ میں اپیل دائر کی تھی جسے عدالت نے شواہد اور دلائل کی روشنی میں خارج کر دیا، مقتول بچے کی جانب سے مقدمے میں ایڈووکیٹ امتیاز پاہٹ نے پیروی کی،لاہور ہائیکورٹ کی چیف جسٹس عالیہ نیلم نے اپنے ریمارکس میں کہا کہ ایسے گھناؤنے جرائم سے معاشرہ لرز اٹھتا ہے اور مجرم کسی بھی قسم کی نرمی یا رعایت کے مستحق نہیں ہوتے۔

قرضوں کے خاتمے کیلیے جامع منصوبہ بندی، آئی ایم ایف کو خیرباد،سودی نظام کا خاتمہ کیا جائے،خالد مسعود سندھو

پاکستان مرکزی مسلم لیگ کے صدر خالد مسعود سندھو نے کہا ہے کہ وفاقی بجٹ میں سرکاری ملازمین کی تنخواہوں میں چھ فیصد ممکنہ اضافہ انتہائی کم، تنخواہوں میں مہنگائی کے تناسب سے اضافہ کیا جائے،بجلی کے بلوں میں ٹیکسز ختم،اشرافیہ کی مراعات بند کی جائیں، بجٹ عوام دوست نہ ہوا تو مرکزی مسلم لیگ عوام کی آواز بنے گی

خالد مسعود سندھو کا کہنا تھاکہ بجٹ ہمیشہ عوام کی فلاح وبہبود کے لئے ہوتا ہے، ملک میں مہنگائی میں اضافہ ہوا،شیائے خورونوش کی قیمتیں بڑھیں،یوٹیلٹی بلز کی وجہ سے شہری پریشان ہیں،وفاقی حکومت بجٹ میں تنخواہ دار طبقے کو فوری ریلیف دے، تنخواہوں میں چھ فیصد اضافہ کو مسترد کرتے ہیں ،کم از کم تیس فیصد اضافہ کیا جائے، بجلی کے بلوں میں تمام ٹیکس ختم کیے جائیں اور ایک ہی ریٹ مقرر کیا جائے،بجلی کے بلوں کی وجہ سے شہری خود کشیاں کرنے پر مجبور ہو چکے ہیں،سرکاری افسران کو مفت بجلی کی فراہمی کا سلسلہ فوری بند کیا جائے، اشرافیہ کی مفت بجلی، پٹرول سمیت دیگرمراعات ختم کر کے عوام کو ریلیف دیا جائے

خالد مسعود سندھو کا مزید کہنا تھا کہ ترقیاتی فنڈز پر سیاسی جماعتوں کے نام لکھنا بند کیا جائے، بڑے زمینداروں پر زرعی ٹیکس نافذ کیا جائے تاکہ محصولات میں اضافہ ہو،چھوٹے کسانوں کو ریلیف دیا جائے، پیٹرول پر 77 روپے کی لیوی سمیت تمام ٹیکس ختم کیے جائیں تاکہ عوام کو پیٹرولیم مصنوعات کی بڑھتی ہوئی قیمتوں سے چھٹکارا مل سکے، ساڑھے 3 ہزار ارب روپے کا خسارہ عوام پر نہ ڈالا جائے،بلکہ حکمران طبقہ کی لاکھوں کی تنخواہیں اور مراعات کم کی جائیں. پاکستان کے قدرتی وسائل ایگری کلچر، کوئلہ اور مائنز انڈسٹری کو بہتر طریقے سے استعمال میں لایا جائے تاکہ قرضوں کو اتارا جا سکے اور ملک خود کفیل ہو سکے،پاکستان پر 130 ارب ڈالر کا قرض ہے، اس سے نجات کے لیے ایک سنجیدہ اور جامع منصوبہ بندی کی اشد ضرورت ہے،آئی ایم ایف ،ورلڈ بینک سمیت دیگر عالمی اداروں سے جان چھڑائی جائے، سودی نظام کا خاتمہ کیا جائے،اس سے معیشت مستحکم ہو گی.

انسداددہشتگردی عدالت نے بانی پی ٹی آئی عمران خان کا پولی گراف اورفوٹو گرامیٹک ٹیسٹ کرانے کیلئے پولیس کی مزید مہلت کی استدعا پر فیصلہ محفوظ کرلیا

انسداد دہشتگردی عدالت لاہور میں بانی پی ٹی آئی کا پولی گراف اور فوٹو گرامیٹک ٹیسٹ کرانے کے معاملے پر سماعت ہوئی،لاہور پولیس کی جانب سے انسداد دہشتگردی عدالت میں رپورٹ جمع کرا دی گئی،پولیس نے بانی پی ٹی آئی کے پولی گراف اور فوٹو گرامیٹک ٹیسٹ کیلئے مزید مہلت کی استدعا کردی،ڈی ایس پی جاوید آصف نے کہاکہ بانی پی ٹی آئی نے پولی گراف اور فوٹو گرامیٹک ٹیسٹ کرانے انکار کردیا، نہ تفتیش مکمل ہوئی نہ ٹیسٹ ہوئے،بانی پی ٹی آئی پولیس کے ساتھ تعاون نہیں کررہے ،ہمیں تفتیش کیلئے فوٹو گرامیٹک اورپولی گراف ٹیسٹ کروانا ہے۔

وکیل بانی پی ٹی آئی نے کہاکہ عدالت پولیس کو 26دن کی مہلت دے چکی ہے،وکیل نے استدعا کی کہ پولیس ٹیسٹ نہیں کرسکتی مزید مہلت نہ دی جائے،عدالت نے کہاکہ عام ملزم ہوتا تو اب تک ٹیسٹ ہو چکا ہوتا، اس کیس میں ملزم اڈیالہ جیل میں ہے، پولیس کی حراست میں نہیں،ملزم انکار کرتا ہے ، پولیس کچھ نہیں کرسکتی،عدالت نے دلائل سننے کے بعد پولیس کی درخواست پر فیصلہ محفوظ کرلیا۔

مسئلہ کشمیر حل طلب،پانی پر جنگ ہوئی توقوم تیار،اہل غزہ کی مدد کی ضرورت ہے،خالد مسعود سندھو،قاری یعقوب شیخ

پاکستان مرکزی مسلم لیگ کے زیر اہتمام ملک کے تمام چھوٹے بڑے شہروں میں نماز عید الاضحیٰ کے اجتماعات منعقد ہوئے،نماز عید کی ادائیگی کے بعد وطن عزیز پاکستان کی سلامتی، کشمیری وفلسطینی مظلوم مسلمانوں کے لئے خصوصی دعائیں کی گئیں،لاہور میں نماز عید کا سب سےبڑا اجتماع قذافی سٹیڈیم میں ہوا،اسلام آباد،کراچی،ملتان،پشاور،کوئٹہ،فیصل آباد، بہاولپور،راولپنڈی،مردان،سوات، لاڑکانہ،سکھر،حیدرآباد،سیالکوٹ،قصور،شیخوپورہ،گوجرانوالہ،جہلم،میانوالی،رحیم یارخان سمیت دیگر شہروں میں نماز عید کے اجتماعات میں ہزاروں افراد شریک ہوئے اور نماز عید ادا کی

مرکزی مسلم لیگ کے رہنماؤں صدر خالد مسعود سندھو، جوائنٹ سیکرٹری قاری محمد یعقوب شیخ،ڈپٹی سیکرٹری جنرل حافظ خالد نیک،انجینئر حارث ڈار،مرکزی ترجمان تابش قیوم،محمد سرور چوہدری،شیخ محمد فیاض،فیصل ندیم،عارف اللہ خٹک و دیگر نے مختلف شہروں میں عید کے اجتماعات و بعد ازاں کارکنان سے عید ملن پارٹی کے موقع پر گفتگو کی،خالد مسعود سندھو کا کہنا تھا کہ "آپریشن بنیان مرصوص” کی کامیابی دشمن کے خلاف پاکستان کی پیشہ ورانہ صلاحیتوں کا منہ بولتا ثبوت ہے، اگر بھارت نے آبی جارحیت کی کوشش کی تو پوری قوم اس کے خلاف ایک سیسہ پلائی دیوار بن کر کھڑی ہوگی، پاکستان اپنے دریا خشک نہیں ہونے دے گا، اور اگر پانی پر جنگ مسلط کی گئی تو قوم ہر قربانی کے لیے تیار ہے،مرکزی مسلم لیگ کا ہر کارکن عوام میں شعور بیدار کرے، کیونکہ پاکستان کی حفاظت صرف افواج پاکستان نہیں بلکہ پوری قوم کی مشترکہ ذمہ داری ہے،نوجوان سوشل میڈیا کے ذریعے پاکستان مخالف پراپیگنڈے کا مؤثر جواب دیں،

مرکزی مسلم لیگ کے رہنماؤں قاری محمد یعقوب شیخ، حافظ خالد نیک،انجینئر حارث ڈار، تابش قیوم،محمد سرور چوہدری،شیخ محمد فیاض،فیصل ندیم،عارف اللہ خٹک و دیگر کا کہنا تھا کہ سات دہائیوں سے مسئلہ کشمیر حل طلب ہے اورہم ہرتقریر میں کشمیر کی بات کرتے ہیں ،وہاں آج بھی خون بہہ رہا ہے۔عید کے ایام میں کرفیو نافذ اور مساجد و عید گاہیں بند تھیں،غزہ میں بھی یہی صورتحال ہے، اہل غزہ پر اسرائیلی بربریت عید کے ایام میں بھی جاری رہی، کشمیری مسلمان اپنے سینوں پر گولیاں کھانے کے باوجودپاکستانی پرچم لہرا رہے ہیں اور الحاق پاکستان کے نعرے بلند کر رہے ہیں، ضرورت اس امر کی ہے کہ پاکستان بھی اقوام متحدہ کی قراردادوں کے مطابق مسئلہ کشمیر کے حل کے دوٹوک و اصولی موقف پر کاربند رہے اور کسی قسم کے بیرونی دباؤ کو خاطر میں نہ لاتے ہوئے کشمیریوں کے جذبات کی صحیح معنوں میں ترجمانی کی جائے۔

عید الاضحیٰ کے تیسری روز شہر میں بسیار خوری کے باعث گیسٹرو انٹیسٹائنل بیماریوں میں اضافہ دیکھا گیا ہے۔

محکمہ صحت پنجاب کے ترجمان کے مطابق، گزشتہ دو روز کے دوران لاہور کے چھ بڑے سرکاری ہسپتالوں میں گیسٹرو اور دیگر متعدی بیماریوں کے شکار مریضوں کی تعداد میں بے پناہ اضافہ ہوا ہے۔ترجمان نے بتایا کہ میو ہسپتال میں گزشتہ دو دنوں میں پانچ ہزار سے زائد مریض گیسٹرو کے مختلف علامات کے ساتھ ہسپتال پہنچے، جبکہ جناح ہسپتال میں تین ہزار سات سو سے زائد مریض رپورٹ ہوئے۔ سروسز ہسپتال میں بھی تین ہزار سے زائد افراد نے طبی امداد حاصل کی۔مزید برآں، جنرل ہسپتال اور گنگا رام ہسپتال میں بھی دو ہزار سے زائد مریض مختلف گیسٹرو سے متعلقہ بیماریوں کی وجہ سے داخل ہوئے۔ محکمہ صحت کی جانب سے شہریوں کو مشورہ دیا گیا ہے کہ وہ عید کی خوشیوں میں اعتدال سے کھانے پینے کا خاص خیال رکھیں تاکہ اس طرح کی بیماریاں لاحق نہ ہوں۔

ترجمان محکمہ صحت نے عوام کو ہدایت کی ہے کہ زیادہ مصالحہ دار، تلی ہوئی اور زیادہ میٹھی غذاؤں سے پرہیز کریں اور صفائی کا خاص خیال رکھیں تاکہ صحت کو نقصان نہ پہنچے۔