Category: لاہور

کرونا وائرس کی بے چینی میں بانی دعو ت اسلامی مولانا محمد الیاس عطار قادری کا بڑا اعلان

باغی ٹی وی کی رپورٹ کے مطابق دعوت اسلامی کے بانی و امیراہلسنت مولانا الیاس عطار قادری نے دنیا بھر میں پھیلی کرونا وائرس کی بےچینی میں بڑا اعلان کرتے ہوئے کہا کہ پاکستان سمیت دنیا بھرکے لوگوں کی دعوت اسلامی امداد کرے گی۔ دعوت اسلامی ایک عالم گیر تحریک ہے اس کا وسیع اورمنظم نیٹ ورک دنیا بھر میں قائم ہےجہاں سے غریبوں ، ضرورت مند لوگوں کی امداد کی جائے گی۔ اس کار خیر میں دعوت اسلامی کے ہزاروں کارکن حصہ لیں گے، امدادی پیکچ میں کھانا اور راشن تقسیم کیا جائے گا، یہ امدادی پروگرام موجودہ حالات میں اور آئیندہ بھی غریب و نادار مسلمانوں کی مدد کرتا رہے گا۔

مولانا محمد الیاس عطار قادری کا کہنا تھا کہ غریبوں ،ضرورت مندوں کی مدد اور تعاون کے لیے اپنی سابقہ روایات کے مطابق الحمدللہ دعوت اسلامی پھر اپنی خدمات ادا کرنے کے لیے میدان عمل میں آگئی ۔دنیا بھر کے مخیر حضرات سے اپیل ہے کہ اس مشکل وقت میں دعوت اسلامی کے ساتھ مل کر امت کی خیر خواہی کریں اپنی زکوٰۃ و صدقات سے دعوت اسلامی کے ساتھ تعاون فرمائیں،تاکہ دعوت اسلامی اپنے دنیا بھر میں پھیلے نہایت وسیع نیٹ ورک کے ذریعے بہت بڑے پیمانے پر بطور خاص موجودہ حالات میں اور عمومی طور پر بھی غریب ،حاجت مند علم ا ور دین کے خادموں کی شرعی احکام کی روشنی میں مددکر سکے ،

اس موقع پر شرعی طریقہ کار بیان کرتے ہوئے ان کا کہنا تھا کہ یہ ذہن میں رکھیں کہ حاجت مندوں سے مراد صرف شرعی فقیر نہیں بلکہ بشمول ان کٍے جہاں بھی وقتی یا طویل دورانیے کی حاجت پائی جائے،وہاں اس امداد کو خرچ کیا جائے گا،دعوت اسلامی کی مجلس شوریٰ اس بات کو یقینی بناتی ہے کہ دعوت اسلامی کو جو چندہ جس مد میں ملے اس میں شریعت کے مطابق خرچ کیا جائے ۔

قصور:کرونا وائرس چین ،ایران،پشاور،لاہورسے ہوتا ہوا قصورکے سرحدی علاقے میں پہنچ گیا،قصور کے سرحدی علاقے میں پہلے مشتبہ شخص کی خبرسے علاقے میں خوف کی فضا پیدا،باغی ٹی وی کےمطابق کرونا وائرس انسانوں سے انسانوں میں پھیلنے والا دنیا کا خطرنا ک وائرس بن گیا ،

باغی ٹی وی کے مطابق کنگن پورکے نواحی گاوں بستی چھیمبیاں والی کا ایک باسی پشاورکام کے سلسلہ میں تھا ،تاہم تب وہ واپس گاوں آیا تو اس نے طبیعت خراب ہونے کی شکایت کی جس پرڈاکٹرز کو بلایا گیا تو ڈاکٹرز نے علامات کو سامنے رکھتے ہوئے اسے مشتبہ قراردیا

ذرائع کے مطابق اس مریض کے سیمپل ٹیسٹ کے لیے بھیج دیئے گئے ہیں اوراس شخص کو قرنطینہ کردیا گیا ہے اوراس کے گرد رہنے والے دیگرافراد کو ہدایت کی گئی ہے کہ وہ اس سے ملنے سے پرہیز کریں

لاہور:محکمہ داخلہ پنجاب نے صوبے میں کرائسس مینجمنٹ سیل فعال کردیا۔ باغی ٹی وی کےمطابق محکمہ داخلہ پنجاب نے کرونا وائرس سے بچاو کے لیے کئے گئے اقدامات کی مانیٹرنگ کےلیے ایک باقاعدہ ونگ قائم کردیا ہے ،

باغی ٹی وی کےمطابق محکمہ داخلہ پنجاب کی طرف سے قائم یہ سیل کرونا وائرس کے پھیلاو اور اقدامات کی مانیٹرنگ کرے گا، اس حوالے سے باقاعدہ ایک میکنزم قائم کرکے سیل کو فی الفور کام کرنے کا حکم جاری کردیا ہے تاکہ کرونا کی تباہ کاریوں سے محفوظ رہا جاسکے

سیل ایران کے زائرین کا ڈیٹا،مشتبہ مریضوں اور قرنطینہ سینٹرز میں سہولیات کا روزانہ کی بنیاد پر ڈیٹا اکٹھا کرے گا۔ کرائسس مینجمنٹ سیل دفعہ 144کے موثر نفاذ کا بھی جائزہ لے گا۔

شہبازشریف لندن سے واپسی کے بعد قرنطینہ میں چلے گئے

باغی ٹی وی :مسلم لیگ (ن)کے مرکزی ڈپٹی سیکرٹری جنرل عطاء اللہ تارڑ نے بتایاکہ مسلم لیگ ن کے صدر شہبازشریف لندن سے واپسی کے بعد قرنطینہ میں چلے گئے، ماڈل ٹاؤن لاہور میں گھر کے کمرے تک خود کو محدود کر لیا، چار سے پانچ دن تک کسی سے نہیں ملیں گے،سیاسی رہنماؤں اور کارکنوں کو ملاقات سے روک دیا.

شہباز شریف پرواز پی کے سیون ایٹ سکس کےذریعے اسلام آباد پہنچے، وطن واپسی کے بعد ٹویٹر پر پیغام میں انہوں نے کہا کہ اسلام آباد پہنچ گیا ہوں۔ان کا مزید کہنا تھا کہ نوازشریف کےعلاج کی وجہ سے لندن گیا تھا، عوام سے پرزور اپیل ہے کہ ایک دوسرے سے فاصلہ رکھیں اور اپنے گھروں میں ہی قیام کری.
خیال رہے کہ شہباز شریف اپنے بڑے بھائی نواز شریف کے علاج کے لیے ان کے ہمراہ 19 نومبر کو لاہور سے لندن روانہ ہوئے تھے.

پنجاب میں کورونا وائرس کے مریضوں میں اضافہ

باغی ٹی وی : ترجمان پرائمری اینڈ سکینڈری ہیلتھ کئیر نے کہا ہے کہ پنجاب میں کورونا وائرس کے مریضوں کی تعداد 152 ہوگئی۔120 زائرین ہیں.لاہور میں تعداد 21 ہوگئی.1 ملتان، 1 راولپنڈی اور 3 گجرات، 2 جہلم اور گوجرانوالہ میں 4 مریضوں میں وائرس کی تصدیق۔تمام کنفرم مریض آئسولیشن وارڈز میں داخل ہیں۔ کنفرم مریضوں کو دیگر افراد سے الگ آئسولیشن وارڈز میں رکھا گیا ہے۔مریضوں کو مکمل طبی سہولیات فراہم کی جا رہی ہے۔ عوام سے گزارش ہے کہ حفاظتی تدابیر اختیار کرکے خود کو محفوظ بنائیں۔
ترجمان پرائمری اینڈ سکینڈری ہیلتھ کئیر نے کہا کہ گزشتہ 14 روز میں متاثرہ ممالک سے آئے افراد گھر میں آئسولیشن اختیار کریں۔دوسری طرف حکومت پاکستان کی طرف سے جاری کی گئی ویب سائٹ‌ پر اعداد وشمار بہت دیر بعد اپ ڈیٹ کیے جاتے ہیں. اور یہ بھی شکوہ کیا جارہا ہے کہ پنجاب کے اعدادو شمار کم کر کے بتائے جاتے ہیں .

واضح رہے کہ ملک میں بڑھتے ہوئے کورونا وائرس کے پیش نظر پنجاب حکومت کی جانب سے کل رات 9 بجے سے لے کر منگل صبح 9 بجے تک تمام شاپنگ مالز اور ریسٹورنٹس بند کرنے کا حکم جاری کردیا ہے حکومت پنجاب کے جاری کردہ نوٹیفکیشن کے مطابق فارمیسی،کلینک،گراسری شاپس،کریانہ سٹور،آٹے کی چکیاں،تندور،ملک شاپس،ورکشاپس،پٹرول پمپس،سبزی اور فروٹ کی دوکانیں معمول کے مطابق کھلی رہیں گی جبکہ خلاف ورزی کی صورت میں سخت کارروائی عمل میں لائی جائے گی

قرنطینہ سے بھاگنے کے لیے سیاسی اثرورسوخ بھی استعمال کیا جانے لگا

باغی ٹی وی کی رپورٹ کے مطابق قرنطینہ سے فرار ہونے والی مریضہ دانیہ علی کے معاملے پر پنجاب حکومت نے اپنا رد عمل دیتے ہوئے کہا کہ دانیہ کی ماں کا اکاؤنٹ درست نہیں ہے جس سے انہوں نے یہ الزامات لگائے ہیں ۔ انہوں نے ہیلتھ پروٹوکول سے بچنے کے لئے ایجنسیوں اور سیاستدانوں کے توسط سے اپنا اثرورسوخ استعمال کرنے کی کوشش کی۔ والدین نے صحت کے شعبے پر اثر و رسوخ استعمال کرنے کے بعد انہیں میو سے پی کے ایل آئی منتقل کردیا۔

باغی ٹی وی کو پنجاب گورنمنٹ کے آفیشلز کی طرف سے بتایا گیا کہ PKLI پاکستان کڈنی اینڈ لیور انسٹیٹیوٹ میں انہوں نے اصرار کیا اور اسپتال انتظامیہ پر دباؤ ڈالنے کی کوشش کی کہ اس کا کھانا گھر سے پہنچایا جائے گا۔PKLI پروٹوکول یہ ہے کہ انفیکشن سے بچنے کے لئے صرف اسپتال میں کھانا پیش کیا جائے گا۔ دانیہ PKLI سے قوم کے نجات دہندگان اور حفاظت کرنے والوں کے ذریعہ گھر چلی گئیں اور پھر جب یہ معاملہ اٹھا تو وہ اسے دوبارہ واپس لائیں۔بچی کے والدین نے اپنے رابطوں کااستعمال کرتے ہوئے ہر پروٹوکول کو توڑنے کی کوشش کی ہے۔

واضح رہے کہ دانیہ علی 13 مارچ کو لندن سے واپس آئئیں اور ان کو کورونا کی علامات ظاہر ہوئیں.جنہیں PKLI میں قرنطینہ کر دیا گیا .ان کی والدہ نے الزام لگایا کہ PKLI ہسپتال میں انکی بیٹی کرونا وائرس کی مریضہ ہے۔اسے 24 گھنتوں تک حکومت نےبھوکا پیاسارکھا۔کمبل تک نہیں دیا۔کہتی ہیں اس حکومت کےآسرےپر نہ رہیں۔اس سےزیادہ نااہل حکومت نہیں دیکھی۔
واضح‌رہے کہ پاکستان میں اس تاثر کو تقویت مل رہی ہے کہ قرنطینہ یا آئسولیشن سینٹرز میں انتظامات ناقص ہونے کی وجہ سے لوگ وہاں رہنے سے کترا رہے ہیں، تفتان میں قائم کیے گئے سینٹرز کے حوالے سے سوشل میڈیا پر گردش کرنے والی ویڈیوز میں وہاں رکھے گئے افراد کی بے چینی کو دیکھا جا سکتا ہے، لوگ وہاں سے اپنے رشتہ داروں کی فوتگی کا بتا کر نکلنے کی درخواست کر رہے ہیں۔

اسی طرح ڈیرہ غازی خان کے قرطینہ سینٹر میں داخلے سے قبل فرار ہو کر میاں چنوں کے ایک نواحی گاؤں میں آنے والے نذر نامی ایک زائر کے لیے جب اس کے آبائی گھر میں چھاپا مارا گیا تووہ پولیس کے آنے کی اطلاع پا کر لاہور چلا آیا۔ اسی طرح لاہور میں پی کے ایل آئی میں قائم قرنطینہ سے بھی گذشتہ رات ایک بچی کے باہر چلے جانے کی اطلاعات مل رہی ہیں۔