Category: ملتان

مرکزی مسلم لیگ کے صدر خالد مسعود سندھو نے کہا ہے کہ دہشتگردی، انتشار،فتنۃ الخوارج و فتنۃ الہندوستان کے خاتمے کے لئے قوم متحد ہے، قائد کے پاکستان کو مضبوط و مستحکم کریں گے، حکمرانوں کی ترجیحات انکی عیاشیاں لیکن مرکزی مسلم لیگ خدمت کی سیاست کر رہی ہے، ملک بھر میں یونین کونسل سطح پرانٹرا پارٹی انتخابات کروائے، عید کے بعد بلدیاتی نظام کی بحالی و فعالی کے لئے متحرک ہوں گے،

ان خیالات کا اظہار انہوں نے ملتان کے مقامی ہوٹل میں سینئر صحافیوں کے اعزاز میں منعقدہ افطار ڈنر کی تقریب سے خطاب کرتے ہوئے کیا، اس موقع پر مرکزی مسلم لیگ کے ترجمان تابش قیوم،مرکزی مسلم لیگ ملتان کے ضلعی سیکرٹری جنرل رانا عبدالرحمان،ترجمان مرکزی مسلم لیگ پنجاب احمد اجمل نے بھی خطاب کیا، خالد مسعود سندھو کا کہنا تھا کہ امتِ مسلمہ اس وقت تین بڑے چیلنجز سے دوچار ہے،اسلاموفوبیا، صیہونیت اور ہندوتوا، ایک جانب مسلمانوں پر مظالم کا سلسلہ جاری ہے اور دوسری جانب اسلام کے خلاف منظم انداز میں نفرت پھیلائی جا رہی ہے، حالانکہ اسلام امن، رواداری اور انسانیت کا دین ہے۔ بالخصوص ماہِ رمضان ہمیں صبر، برداشت، تحمل اور اتحاد کا درس دیتا ہے، اور مسلمانوں کو اجتماعی جدوجہد کے لیے مجتمع ہونے کی تلقین کرتا ہے،پاکستان کلمۂ طیبہ کی بنیاد پر حاصل کیا گیا ملک ہے، ہمارا عزم ہونا چاہیے کہ پاکستان کو حقیقی معنوں میں اسلام کا مضبوط قلعہ بنایا جائے۔ پاکستان کی بقا دراصل اُمت کی بقا سے وابستہ ہے، اس لیے اسے محفوظ، مستحکم اور متحد رکھنا ہم سب کی مشترکہ ذمہ داری ہے،

خالد مسعود سندھو کا کہنا تھا کہ پاکستان کے دشمن عناصر ملک میں دہشت گردی پھیلا کر اسے عدم استحکام کا شکار کرنا چاہتے ہیں۔ وہ قومیت، صوبائیت اور لسانیت کو ہوا دے کر قومی وحدت کو نقصان پہنچانے کی کوشش کر رہے ہیں۔ تشدد، تکفیر اور خارجی فتنے سر اٹھا چکے ہیں، جن کا سدباب ناگزیر ہے۔ دہشت گردی اور فتنۂ خوارج و فتنۂ ہند کا مقابلہ محض سیکیورٹی اداروں کی ذمہ داری نہیں بلکہ پوری قوم کی مشترکہ ذمہ داری ہے۔عوام معاشی مشکلات کا شکار ہیں، جبکہ حکمرانوں کی ترجیحات کچھ اور ہیں۔ عوامی مسائل کے حل کے بجائے اگر قومی خزانے سے اربوں روپے خرچ کر کے لگژری طیارے خریدے جائیں تو یہ قابلِ قبول نہیں۔ ہم حکمرانوں کی عیاشیوں اور قومی وسائل کے بے جا استعمال کو مسترد کرتے ہیں، اور اس حوالے سے قوم کو متحد اور بیدار کریں گے،عید کے بعد بلدیاتی نظام کی بحالی کے لیے بھرپور جدوجہد کی جائے گی۔

ملتان میں پاکستان پیپلز پارٹی کے رکن قومی اسمبلی علی موسیٰ گیلانی کا موبائل فون چوری کرنے والے ملزم کو پولیس نے بروقت کارروائی کرتے ہوئے گرفتار کرلیا۔

پولیس کے مطابق واقعہ بدھلہ سنت کے علاقے میں پیش آیا جہاں علی موسیٰ گیلانی ایک کبڈی میچ کے موقع پر مہمانِ خصوصی کی حیثیت سے شریک تھے۔پولیس کا کہنا ہے کہ میچ کے دوران رش کا فائدہ اٹھاتے ہوئے ایک نامعلوم شخص نے ایم این اے علی موسیٰ گیلانی کا موبائل فون چوری کرلیا۔ واقعے کی اطلاع ملتے ہی پولیس نے فوری طور پر مقدمہ درج کرکے تفتیش شروع کردی۔ترجمان پولیس کے مطابق جدید ٹیکنالوجی، موبائل ٹریکنگ اور خفیہ معلومات کی مدد سے صرف 12 گھنٹوں کے اندر ملزم کو گرفتار کرلیا گیا۔ کارروائی کے دوران ایم این اے کا چوری شدہ موبائل فون بھی ملزم کے قبضے سے برآمد کرلیا گیا۔

پولیس حکام نے بتایا کہ ملزم سے مزید تفتیش جاری ہے تاکہ معلوم کیا جا سکے کہ آیا وہ کسی منظم چوری کے گروہ کا حصہ ہے یا ماضی میں بھی ایسی وارداتوں میں ملوث رہا ہے۔ پولیس کا کہنا ہے کہ عوامی نمائندوں سمیت شہریوں کے تحفظ کو یقینی بنانا پولیس کی اولین ترجیح ہے اور جرائم پیشہ عناصر کے خلاف زیرو ٹالرنس پالیسی کے تحت کارروائیاں جاری رہیں گی۔

ملتان کی بہاء الدین زکریا یونیورسٹی کے ہوسٹل سے ایک طالب علم کی لاش ملنے کا افسوسناک واقعہ پیش آیا ہے۔

ابتدائی معلومات کے مطابق جاں بحق نوجوان بی ایس سائیکالوجی کے تیسرے سمسٹر کا طالب علم تھا، جو یونیورسٹی کے مرکزی ہوسٹل میں مقیم تھا۔پولیس کے مطابق جائے وقوعہ سے حاصل شواہد اور حالات و واقعات کی روشنی میں واقعہ بظاہر خودکشی کا نتیجہ معلوم ہوتا ہے، تاہم حتمی رائے پوسٹ مارٹم رپورٹ اور مزید شواہد کے بعد ہی قائم کی جائے گی۔ اطلاع ملتے ہی ٹیم جائے وقوعہ پر پہنچ گئی اور فورنزک ماہرین نے شواہد جمع کر لیے ہیں۔ کمرے کو سیل کرکے مختلف پہلوؤں سے تفتیش جاری ہے، جبکہ طالب علم کے موبائل فون، کمرے میں موجود اشیا اور دیگر ممکنہ مواد کا بھی جائزہ لیا جا رہا ہے۔پولیس حکام کے مطابق مرحوم کے اہلِ خانہ سے رابطہ کر لیا گیا ہے اور انہیں واقعے کی مکمل تفصیلات سے آگاہ کیا جا رہا ہے۔ابتدائی رپورٹ میں یہ بات سامنے آئی ہے کہ واقعہ کے وقت طالب علم کمرے میں اکیلا تھا۔ یونیورسٹی انتظامیہ نے بھی واقعے کی تصدیق کر دی ہے اور کہا ہے کہ پولیس اور اہلخانہ کے ساتھ مکمل تعاون کیا جا رہا ہے۔

کوکلیئر امپلانٹ ایکٹیویشن سینٹر ملتان، قوتِ سماعت سے محروم بچوں کے لیے امید کی نئی کرن ہے

سی ایم ایچ ملتان میں قوتِ سماعت سے محروم بچوں کے کوکلیئر امپلانٹس کی ایکٹیویشن کے لیے تقریب کا انعقاد کیا گیا،پروقار تقریب میں مہمانِ خصوصی کور کمانڈر ملتان تھے،تقریب میں مختلف شعبہ جات سے تعلق رکھنے والے افراد نے بھی شرکت کی ،پاکستان میں پہلا کوکلیئر امپلانٹ سینٹر سی ایم ایچ راولپنڈی میں مئی 2017 میں قائم کیا گیا ،ملتان میں دوسرا کوکلیئر امپلانٹ سینٹر سی ایم ایچ میں اگست 2023ء میں قائم ہوا،سی ایم ایچ ملتان میں ستمبر 2023 سے اب تک 100 بچوں کے کوکلیئر امپلانٹس کامیابی سے مکمل اور فعال کیے گئے

جدید آلات کے ذریعے بچوں کو سننے اور بولنے کے قابل بنا کر معاشرتی زندگی میں اعتماد کی فراہمی کا سفر جاری ہے،پاک فوج اور النور اسپیشل چلڈرن اسکول بچوں کے امپلانٹس کے اخراجات میں مکمل معاونت فراہم کر رہے ہیں،سینٹر تربیت یافتہ سرجنز، اسپیشل تھراپسٹس اور جدید طبی آلات کے ساتھ خدمات فراہم کر رہا ہے

کور کمانڈر ملتان نے کوکلیئر امپلانٹ پروگرام کو خصوصی بچوں کی زندگیوں میں ایک “مثبت انقلاب” قرار دیا ، کور کمانڈر ملتان نے کوکلیئر پروگرام جیسے مثبت اقدام کو مزید توسیع دینے کے عزم کا اظہار کیا ،مہنگی لاگت کے باوجود جنوبی پنجاب میں یہ نایاب سہولت انسانیت اور خدمتِ خلق کے جذبے کی روشن مثال ہے

جلالپور پیروالا کے نواحی علاقے "اینام پور” کے قریب سیلابی پانی سے ایک شخص کی لاش برآمد ہوئی ہے۔ مذکورہ لاش 30 سالہ عامر ولد غلام حسین کی ہے، جو گزشتہ 20 روز سے لاپتہ تھا۔

ریسکیو 1122 کے مطابق عامر کی گمشدگی کی اطلاع بیس روز قبل موصول ہوئی تھی، جس کے بعد مسلسل تلاش جاری تھی۔ آج بدھ کے روز اینام پور کے قریب بہتے سیلابی پانی میں ایک لاش کی موجودگی کی اطلاع ملی، جس پر فوری کارروائی کرتے ہوئے ریسکیو 1122 کی ٹیم موقع پر پہنچی اور لاش کو پانی سے نکالا۔متوفی عامر کی شناخت اہلِ خانہ نے کر لی ہے۔ ریسکیو ذرائع کے مطابق ابتدائی طور پر بظاہر ایسا لگتا ہے کہ عامر سیلابی ریلے کی نذر ہو گیا تھا، تاہم پوسٹ مارٹم کے بعد ہی موت کی اصل وجہ معلوم ہو سکے گی۔

مقامی افراد کا کہنا ہے کہ حالیہ بارشوں کے بعد سیلابی پانی کے باعث علاقہ شدید متاثر ہوا ہے، اور اس قسم کے حادثات میں اضافہ ہو رہا ہے۔ عوام سے اپیل کی گئی ہے کہ وہ سیلابی علاقوں سے دور رہیں اور کسی بھی ہنگامی صورتحال میں فوراً ریسکیو 1122 سے رابطہ کریں۔واضح رہےکہ جلالپور پیروالا کے سیلابی پانی سے آج دوسری لاش برآمد ہوئی ہے،

ملتان کی تحصیل جلالپور پیروالا کی درجنوں بستیاں گزشتہ انیس روز سے سیلابی پانی میں ڈوبی ہوئی ہیں، جہاں پانی کی نکاسی نہ ہونے کے باعث مکین شدید مشکلات کا شکار ہیں۔ مسلسل کھڑے پانی نے مقامی افراد کی املاک، گھر اور کھڑی فصلیں تباہ کر دی ہیں، جس کے باعث متاثرہ خاندان کھلے آسمان تلے کسمپرسی کی زندگی گزارنے پر مجبور ہیں۔

مقامی افراد کا کہنا ہے کہ بار بار متعلقہ اداروں کو آگاہ کرنے کے باوجود اب تک خاطر خواہ اقدامات نہیں کیے گئے۔ انہوں نے مطالبہ کیا ہے کہ پانی کی فوری نکاسی اور متاثرین کی بحالی کے لیے ہنگامی بنیادوں پر اقدامات کیے جائیں۔ادھر انتظامیہ نے دعویٰ کیا ہے کہ نوراجہ بھٹہ بند میں پڑنے والے شگاف کو پُر کر لیا گیا ہے، جس کے بعد دریائے ستلج کا پانی جلالپور پیروالا کی بستیوں میں داخل ہونا رک گیا ہے۔ اس اقدام کے بعد علاقے میں ریلیف اور ٹرانسپورٹ آپریشن جاری ہے، تاہم پانی کی سطح کم نہ ہونے کے باعث صورتحال تاحال سنگین ہے۔

سیلاب کی وجہ سے ایم 5 موٹر وے بھی 18 روز سے ملتان سے جھانگڑا انٹرچینج تک بند ہے، اور حکام کے مطابق جیسے ہی پانی کی سطح میں کمی آئے گی، بحالی کا آپریشن شروع کر دیا جائے گا۔دریں اثنا، ملتان کے قریب موضع ہمروٹ بھی زیرِ آب آگیا ہے۔ مقامی افراد نے خدشہ ظاہر کیا ہے کہ علاقے میں مسلسل کھڑے پانی کے باعث بخار، جلدی امراض اور دیگر وبائی بیماریاں پھیل رہی ہیں۔

دوسری جانب دریائے سندھ میں کوٹری بیراج پر سیلابی صورتحال دم توڑ گئی ہے، اور وہاں بہاؤ درمیانے درجے سے کم ہو کر دو لاکھ 90 ہزار کیوسک رہ گیا ہے۔ ملک کے دیگر دریا معمول کے مطابق بہہ رہے ہیں۔ادھر منگلا ڈیم 99 فی صد اور تربیلا ڈیم 100 فی صد تک بھر چکے ہیں، جس سے پانی کے مزید دباؤ کا اندیشہ ہے اور ماہرین نے صورتحال پر کڑی نظر رکھنے کی ہدایت دی ہے۔

ملک کے مختلف حصوں میں دریاؤں کے سیلابی ریلوں نے تباہی مچا دی ہے، کئی علاقے آج بھی زیرِ آب ہیں جبکہ متاثرہ آبادی نقل مکانی پر مجبور ہے۔

تفصیلات کے مطابق جلال پور پیر والا شہر سمیت اس کے گرد و نواح کی درجنوں بستیاں اب بھی پانی میں ڈوبی ہوئی ہیں۔ نوراجہ بھٹہ کے مقام پر شگاف بند کرنے کا کام ہنگامی بنیادوں پر جاری ہے تاکہ مزید آبادی کو سیلاب سے بچایا جا سکے۔موٹر وے پولیس کا کہنا ہے کہ ایم 5 موٹر وے کا ملتان سے جھانگڑا انٹرچینج تک 13ویں روز بھی ٹریفک کے لیے بند ہونا عوامی مشکلات میں اضافے کا سبب بن رہا ہے۔ حکام کے مطابق سڑک کی بحالی پانی اترنے کے بعد ہی ممکن ہوگی۔

پاک پتن میں دریائے ستلج کے کنارے کٹاؤ کا عمل تیز ہوگیا ہے۔ گاؤں سوڈا مکمل طور پر دریا میں بہہ گیا جبکہ چک باقر کے 50 سے زائد گھر کٹاؤ کی زد میں آگئے ہیں۔ مقامی افراد اپنے گھروں اور زمینوں کے نقصان پر شدید پریشان ہیں۔

دوسری جانب دریائے سندھ میں کوٹری بیراج پر درمیانے درجے کی سیلابی کیفیت بدستور موجود ہے۔ ٹھٹہ اور سجاول کے علاقوں میں پانی کی سطح میں اضافے کے باعث کچے کے 10 سے زائد دیہات زیرِ آب آگئے ہیں۔ زرعی زمینوں پر کھڑی فصلیں بھی تباہ ہوگئی ہیں جس کے بعد مقامی مکین حفاظتی بند پر پناہ لینے پر مجبور ہیں۔مٹیاری اور سعید آباد کے کچے کے علاقے بھی متاثر ہوئے ہیں، جہاں مکین اپنی مدد آپ کے تحت کشتیوں کے ذریعے نقل مکانی کر رہے ہیں۔ زرعی فصلوں کو بھی بڑے پیمانے پر نقصان پہنچا ہے جس سے کسانوں کو شدید مالی نقصان کا سامنا ہے۔محکمہ موسمیات اور آبپاشی حکام کے مطابق آنے والے دنوں میں پانی کی سطح میں مزید اضافے کا خدشہ موجود ہے، جس پر نظر رکھتے ہوئے متعلقہ اداروں کو الرٹ رہنے کی ہدایت کر دی گئی ہے۔