Category: ملتان

ملک کے مختلف حصوں میں دریاؤں کے سیلابی ریلوں نے تباہی مچا دی ہے، کئی علاقے آج بھی زیرِ آب ہیں جبکہ متاثرہ آبادی نقل مکانی پر مجبور ہے۔

تفصیلات کے مطابق جلال پور پیر والا شہر سمیت اس کے گرد و نواح کی درجنوں بستیاں اب بھی پانی میں ڈوبی ہوئی ہیں۔ نوراجہ بھٹہ کے مقام پر شگاف بند کرنے کا کام ہنگامی بنیادوں پر جاری ہے تاکہ مزید آبادی کو سیلاب سے بچایا جا سکے۔موٹر وے پولیس کا کہنا ہے کہ ایم 5 موٹر وے کا ملتان سے جھانگڑا انٹرچینج تک 13ویں روز بھی ٹریفک کے لیے بند ہونا عوامی مشکلات میں اضافے کا سبب بن رہا ہے۔ حکام کے مطابق سڑک کی بحالی پانی اترنے کے بعد ہی ممکن ہوگی۔

پاک پتن میں دریائے ستلج کے کنارے کٹاؤ کا عمل تیز ہوگیا ہے۔ گاؤں سوڈا مکمل طور پر دریا میں بہہ گیا جبکہ چک باقر کے 50 سے زائد گھر کٹاؤ کی زد میں آگئے ہیں۔ مقامی افراد اپنے گھروں اور زمینوں کے نقصان پر شدید پریشان ہیں۔

دوسری جانب دریائے سندھ میں کوٹری بیراج پر درمیانے درجے کی سیلابی کیفیت بدستور موجود ہے۔ ٹھٹہ اور سجاول کے علاقوں میں پانی کی سطح میں اضافے کے باعث کچے کے 10 سے زائد دیہات زیرِ آب آگئے ہیں۔ زرعی زمینوں پر کھڑی فصلیں بھی تباہ ہوگئی ہیں جس کے بعد مقامی مکین حفاظتی بند پر پناہ لینے پر مجبور ہیں۔مٹیاری اور سعید آباد کے کچے کے علاقے بھی متاثر ہوئے ہیں، جہاں مکین اپنی مدد آپ کے تحت کشتیوں کے ذریعے نقل مکانی کر رہے ہیں۔ زرعی فصلوں کو بھی بڑے پیمانے پر نقصان پہنچا ہے جس سے کسانوں کو شدید مالی نقصان کا سامنا ہے۔محکمہ موسمیات اور آبپاشی حکام کے مطابق آنے والے دنوں میں پانی کی سطح میں مزید اضافے کا خدشہ موجود ہے، جس پر نظر رکھتے ہوئے متعلقہ اداروں کو الرٹ رہنے کی ہدایت کر دی گئی ہے۔

ملتان کے قریب جلال پور پیروالا پر موٹروے ایم 5 کا ایک اور حصہ سیلابی پانی میں بہہ گیا۔

چیف پولیس آفیسر ملتان کے مطابق موٹروے ایم فائیو کا مشرقی حصہ شگاف پڑنے سے سیلاب میں بہہ گیا۔سی پی او ملتان نے بتایا کہ اس سے پہلے ایم فائیو کا مغربی حصہ سیلاب میں بہہ گیا تھا، موٹروے پولیس اور این ایچ اے کا عملہ مشینری کے ساتھ موقع پر موجود ہے۔انہوں نے بتایا کہ موٹر وے پر دریائے ستلج کا پانی شدید بہاؤ کے ساتھ دریائے چناب کی جانب بہہ رہا ہے، پانی کا بہاؤ کم کرنے کے لیے شگاف میں پتھر ڈالے جا رہے ہیں، ملتان سے جھانگڑہ تک 8 ویں روز بھی موٹروے بند ہے۔

ترجمان موٹر وے پولیس کا اس حوالے سے بتانا ہے کہ موٹروے ایم 5 سیلاب کی وجہ سے بند ہیں، ملتان سے سکھر جانے والےمتبادل راستے سے سفر کر سکتے ہیں،موٹر وے پولیس کے مطابق ٹریفک شاہ شمس انٹر چینج سے قومی شاہراہ کی طرف جا سکتی ہے، اوچ شریف انٹرچینج سے دوبارہ موٹروے ایم 5 پر سفر کیا جا سکتا ہے.ترجمان موٹر وے پولیس کا کہنا ہے کہ سکھر سے ملتان ایم 5 اوچ شریف انٹرچینج قومی شاہراہ پر سفر کیا جا سکتا ہے، شیر شاہ انٹرچینج سے دوبارہ موٹر وے ایم 5 کو جوائن کر سکتے ہیں۔

ڈپٹی سپرنٹنڈنٹ پولیس (ڈی ایس پی) پنجاب پولیس، ہرشر قیوم نے عوام کو ایک اہم اعلان کے ذریعے خبردار کیا ہے کہ سطلج اور چناب کے پانی کا بہاؤ تیزی سے بڑھتے ہوئے کوٹلا چاکر کی طرف بڑھ رہا ہے۔

ڈی ایس پی نے کہا کہ عوام اپنی اور اپنے بچوں کی جانیں بچانے کے لیے فوری طور پر اپنے گھروں کو چھوڑ کر محفوظ مقامات پر منتقل ہو جائیں۔ انہوں نے مزید ہدایت کی کہ حکومت کی جانب سے قائم کیے گئے ریلیف کیمپس میں پہنچیں اور افواہوں یا غلط اطلاعات پر یقین نہ کریں۔انہوں نے زور دیا کہ ایک دوسرے کی باتوں میں آ کر گھروں میں بیٹھے رہنے سے نقصان کا اندیشہ ہے، اس لیے بروقت انخلا ہی محفوظ راستہ ہے۔ڈی ایس پی نے عوام کو متنبہ کیا کہ اپنے بچوں اور اپنی جانوں کو بچائیں، کیونکہ پانی کا بہاؤ بہت تیزی سے آپ کی طرف بڑھ رہا ہے.

ایشیا کپ 2025: پاکستان نے بھارت کو 128 رنز کا ہدف دے دیا

جلال پور پیر والا میں تباہ کن سیلاب نے مرکزی مسلم لیگ سندھ کی جانب سے قائم ماڈل خیمہ سٹی کو بھی اپنی لپیٹ میں لے لیا

سینکڑوں خیموں پر مشتمل یہ ماڈل خیمہ بستی، جس میں مسجد، اسکول، بچوں کے کھیل کا میدان اور خواتین و مردوں کے لیے علیحدہ باتھ رومز بھی تعمیر کیے گئے تھے۔ مکمل طور پر پانی میں ڈوب گئی۔تمام شہریوں کو باحفاظت بروقت نکال لیا گیا ۔ اور خیمہ بستی کو متبادل جگہ منتقلی کی تیاریاں کی جارہی ہیں ، ماڈل خیمہ بستی مرکزی مسلم لیگ سندھ کے صدر فیصل ندیم کی نگرانی میں قائم کی گئی تھی، جہاں ہزاروں متاثرین کو عارضی پناہ دی گئی تھی۔ خطرناک صورتحال کے پیشِ نظر رضاکار متاثرین کو فوری طور پر محفوظ مقامات پر منتقل کررہے ہیں۔

جلالپور پیروالا میں نجی کشتی ڈوبنے کے افسوسناک واقعے میں مزید 2 لاشیں برآمد کرلی گئی ہیں، جس کے بعد مجموعی طور پر جاں بحق افراد کی تعداد 7 ہوگئی ہے۔

تفصیلات کے مطابق یہ حادثہ دو روز قبل بدھ اور جمعرات کی درمیانی رات پیش آیا تھا جب ایک نجی کشتی میں 28 افراد سوار تھے۔ کشتی اچانک الٹنے کے بعد ریسکیو اہلکاروں نے بروقت کارروائی کرتے ہوئے 19 افراد کو زندہ بچالیا تھا، جبکہ ابتدائی طور پر 5 افراد کی لاشیں نکالی گئی تھیں۔ریسکیو ذرائع کے مطابق سرچ آپریشن کے دوران مزید 2 افراد کی لاشیں نکالی گئیں۔ اس کے ساتھ ہی حادثے میں ہلاک ہونے والوں کی تعداد 7 تک جا پہنچی ہے۔ حکام کا کہنا ہے کہ زندہ بچ جانے والے 2 افراد نے قریبی درختوں پر چڑھ کر اپنی جان بچائی تھی، جنہیں ریسکیو ٹیموں نے محفوظ مقام پر منتقل کردیا ہے۔

یاد رہے کہ پنجاب کے مختلف اضلاع میں حالیہ دنوں سیلابی صورتحال کے باعث کشتیوں کے الٹنے کے متعدد واقعات رپورٹ ہوچکے ہیں۔ اسی تناظر میں بہاولپور انتظامیہ نے فیصلہ کیا ہے کہ نجی کشتیوں کو تحویل میں لے کر انہیں سرکاری ریسکیو آپریشن کا حصہ بنایا جائے تاکہ آئندہ اس طرح کے المناک واقعات سے بچا جاسکے۔