Category: ملتان

ملتان(باغی ٹی وی رپورٹ)رواں سال جنوری میں انڈسٹریل اسٹیٹ میں ہونے والے المناک ایل پی جی باؤزر دھماکے کے سلسلے میں اہم پیش رفت ہوئی ہے۔ لاہور ہائی کورٹ کے ملتان بینچ نے واقعے میں ملوث 12 ملزمان کی درخواست ضمانت مسترد کر دی، جس کے فوری بعد پولیس نے کارروائی کرتے ہوئے تمام ملزمان کو گرفتار کر لیا ہے۔

پولیس کے مطابق گرفتار کیے گئے ملزمان غیر قانونی گیس فلنگ کے کاروبار میں ملوث تھے، جو اس افسوسناک واقعے کا سبب بنا۔ واضح رہے کہ اس دھماکے کے نتیجے میں 26 قیمتی جانیں ضائع ہوئیں اور 14 افراد شدید زخمی ہوئے تھے۔ واقعے کی سنگینی کا اندازہ اس بات سے لگایا جا سکتا ہے کہ قریبی آبادیوں کے 20 گھر مکمل طور پر تباہ ہو گئے تھے جبکہ 70 دیگر جزوی طور پر متاثر ہوئے تھے۔ اس دلخراش حادثے میں کئی بے زبان جانور بھی جھلس کر ہلاک ہو گئے تھے۔

تحقیقات کے حوالے سے اہم انکشافات سامنے آئے ہیں۔ ذرائع کے مطابق ایل پی جی گیس باؤزر سے غیر محفوظ طریقے سے گیس نکال کر اس میں خطرناک حد تک کاربن ڈائی آکسائیڈ کی ملاوٹ کرنا حادثات کا بڑا سبب بنتا ہے۔ کم قیمت اور زیادہ پریشر کے باعث کاربن ڈائی آکسائیڈ کو ایل پی جی میں ملایا جاتا ہے، جس سے پریشر غیر معمولی طور پر بڑھ جاتا ہے اور دھماکے کا خطرہ بڑھ جاتا ہے۔

پولیس کا کہنا ہے کہ واقعے کے مرکزی ملزمان، گیس باؤزر کا ڈرائیور اور گودام کا مالک، پہلے ہی گرفتار کیے جا چکے ہیں۔ اب 12 مزید ملزمان کی گرفتاری سے اس المناک واقعے کی تحقیقات میں مزید پیش رفت متوقع ہے۔ یہ گرفتاری قانون کی حکمرانی اور انصاف کی فراہمی کی جانب ایک اہم قدم ہے۔

ملتان (باغی ٹی وی) ملتان کے نواحی علاقے ٹاٹے پور میں ایک خوفناک حادثہ پیش آیا، جہاں پتھروں سے بھرا ایک بے قابو ٹرک ایک گھر میں گھس گیا، حادثے کے نتیجے میں والد، بیٹا اور بیٹی جاں بحق ہو گئے۔

ریسکیو 1122 کے مطابق حادثے کے وقت تینوں افراد گھر کے ایک کمرے میں سو رہے تھے، جب اچانک بے قابو ٹرک گھر کی دیوار توڑتا ہوا اندر جا گھسا۔ دوسری جانب گھر میں موجود دو افراد معجزانہ طور پر محفوظ رہے۔

پولیس کے مطابق ٹرک ڈرائیور موقع سے فرار ہو گیا ہے اور اس کی تلاش جاری ہے۔ واقعے کے بعد مقامی افراد موقع پر پہنچ گئے اور ریسکیو کارروائیوں میں مدد فراہم کی۔

پولیس اور متعلقہ ادارے حادثے کی وجوہات کی تحقیقات کر رہے ہیں۔

ملتان (باغی ٹی وی) یوسف رضا گیلانی کے بیٹوں سمیت پیپلز پارٹی کے 4 ارکان اسمبلی کے وارنٹ گرفتاری جاری

تفیل کے مطابق ملتان میں جوڈیشل مجسٹریٹ شاہد حسن مغل کی عدالت نے کورونا آرڈیننس کی خلاف ورزی اور کارِ سرکار میں مداخلت کے کیس میں پیپلز پارٹی کے 4 ممبران اسمبلی اور متعدد وکلا کے وارنٹ گرفتاری جاری کر دیے۔

تھانہ چہلیک پولیس کو حکم دیا گیا ہے کہ ملزمان کو گرفتار کرکے عدالت میں پیش کیا جائے۔ وارنٹ گرفتاری جاری ہونے والوں میں عبدالقادر گیلانی، علی موسیٰ گیلانی، علی قاسم گیلانی اور علی حیدر گیلانی شامل ہیں، جبکہ سابق ایم پی اے عثمان بھٹی اور کئی ضلعی عہدیداروں کے بھی وارنٹ جاری کیے گئے ہیں۔

ملزمان پر سرکاری معاملات میں مداخلت کا مقدمہ درج تھا، تاہم وہ بارہا عدالتی طلبی کے باوجود پیش نہیں ہو رہے تھے۔