Category: مظفرگڑھ

اوچ شریف(باغی ٹی وی، نامہ نگار حبیب خان) تھانہ صدر علی پور کی حدود میں مبینہ پولیس مقابلے کے دوران قتل، ڈکیتی اور راہزنی کے مقدمات میں مطلوب ڈاکو کالو عرف کالی ڈاہا ہلاک ہو گیا۔ پولیس کے مطابق ملزم اپنے ہی ساتھیوں کی فائرنگ سے زخمی ہوا اور ہسپتال منتقل کرتے وقت دم توڑ گیا۔

پولیس کے مطابق گزشتہ رات تھانہ سیت پور کی حدود میں ڈاکوؤں کے ساتھ فائرنگ کا تبادلہ ہوا۔ ملزمان اندھیرے کا فائدہ اٹھا کر فرار ہو گئے، لیکن تعاقب کے دوران تھانہ صدر علی پور میں دوبارہ مقابلہ ہوا۔ پولیس کا کہنا ہے کہ ڈاکوؤں کی فائرنگ کے جواب میں حفاظتی جوابی کارروائی کی گئی، جس میں کالو زخمی ہوا۔ پولیس کے مطابق کالو سکنہ سلطان پور کے خلاف تھانہ سیت پور اور خیرپور سادات میں درجن سے زائد مقدمات درج تھے۔

دوسری جانب، ہلاک ہونے والے کے لواحقین نے پولیس پر ماورائے عدالت قتل کا الزام عائد کیا ہے۔ ان کا کہنا ہے کہ کالو کو گھر سے حراست میں لیا گیا اور مقابلے کا "ڈرامہ” رچایا گیا۔ مقامی سماجی حلقوں اور انسانی حقوق کی تنظیموں نے واقعے کی شفاف تحقیقات کا مطالبہ کیا ہے۔

مظفرگڑھ: (باغی ٹی وی) مظفرگڑھ میں چائلڈ پورنوگرافی کا ایک سنگین کیس منظر عام پر آیا ہے، جہاں پولیس نے ملزم فرید گبول کو گرفتار کر لیا۔ تھانہ صدر پولیس کے مطابق ملزم نے موضع سردار آباد میں متعدد بچوں کو جنسی زیادتی کا نشانہ بنایا اور ان کی نازیبا ویڈیوز بنائیں، جنہیں بلیک میلنگ اور سوشل میڈیا پر پھیلانے کے لیے استعمال کیا گیا۔

ایک متاثرہ بچے کی شکایت پر پولیس نے کارروائی شروع کی، جس نے ملزم کے خلاف نازیبا ویڈیوز سمیت دیگر ثبوت فراہم کیے۔ متاثرہ بچے نے انکشاف کیا کہ ملزم نے اسے اور دیگر بچوں کو مسلسل بلیک میل کیا۔ پولیس نے ملزم کے موبائل سے مزید ویڈیوز برآمد کیں، جن سے ایک اور متاثرہ بچے کی شناخت ہوئی، جسے قانونی کارروائی کے لیے تھانے طلب کیا گیا ہے۔

پولیس ترجمان کے مطابق ملزم نے اپنے جرائم کا اعتراف کر لیا ہے۔ مقدمہ تعزیرات پاکستان اور پیکا ایکٹ 2016 کی متعلقہ دفعات کے تحت درج کیا گیا ہے، جبکہ کیس کی نگرانی کے لیے ڈی ایس پی سٹی کو ذمہ داری سونپی گئی ہے۔ پولیس دیگر متاثرین سے رابطے کر رہی ہے تاکہ مزید انکشافات اور قانونی کارروائی کو یقینی بنایا جا سکے۔

واضح رہے کہ حال ہی میں دائرہ دین پناہ میں بھی چائلڈ پورنوگرافی کا ایک بین الاقوامی گینگ پکڑا گیا تھا، جو بچوں کی نازیبا ویڈیوز بناکر ڈارک ویب پر غیر ملکیوں کو فروخت کرتا تھا۔

علی پور (باغی ٹی وی,حبیب خان کی رپورٹ) تھانہ سٹی علی پور کی رہائشی فرسٹ ایئر کی طالبہ حجاب زہرہ نے اپنے خاوند حامد اور نند دعا کے خلاف پولیس میں مقدمہ درج کرایا ہے۔ حجاب زہرہ نے بتایا کہ ڈیڑھ سال قبل حامد سے شادی ہوئی تھی، شروع میں اس کا رویہ ٹھیک تھا لیکن بعد میں اس نے اور اس کی بہن ( نند )نے مسلسل تشدد شروع کر دیا۔ دونوں ملزمان اسے کھانا نہیں دیتے اور کمرے میں قید کر رکھا تھا۔

گذشتہ روز ملزمان نے اسے کہا کہ اپنے والد سے میکے سے رقم منگواؤ، جس پر اس نے انکار کیا تو ملزمان نے اس پر مار پیٹ شروع کر دی۔ تشدد کے دوران حجاب کے کان سے چالیس ہزار روپے کی بالی گر گئی جو اس کی نند نے اٹھا لی۔ شور شرابہ سن کر حجاب کے والد اور برادری کے افراد موقع پر پہنچے اور اس کی جان بچائی۔

اطلاع ملنے پر پولیس تھانہ سٹی علی پور موقع پر پہنچی اور مقدمہ درج کر کے ملزمان کیخلاف تفتیش شروع کر دی۔ ملزمان نے پولیس کو بھی قتل کی دھمکیاں دی ہیں۔

مظفرگڑھ (باغی ٹی وی رپورٹ) تھانہ روہیلانوالی کی حدود ماہڑہ میں غیرت کے نام پر لرزہ خیز واقعہ، سگے بھائی نے ناجائز تعلقات کے شبہ میں بہن پر درانتی اور کلہاڑیوں سے حملہ کر دیا، شدید زخمی لڑکی کو پولیس نے بروقت کارروائی کرتے ہوئے اسپتال منتقل کیا اور زندگی بچالی۔ ورثا کی خاموشی پر پولیس نے از خود مقدمہ درج کر کے ملزم کو گرفتار کر لیا۔

تفصیلات کے مطابق ماہڑہ کے رہائشی سجاد نامی شخص نے اپنی سگی بہن اقرا بی بی پر غیرت کے نام پر حملہ کرتے ہوئے اسے قتل کرنے کی کوشش کی۔ ملزم نے درانتی اور کلہاڑیوں کے وار سے لڑکی کو شدید زخمی کر دیا اور موقع سے فرار ہو گیا۔ اطلاع ملنے پر تھانہ روہیلانوالی پولیس موقع پر پہنچی، جہاں زندگی اور موت کی کشمکش میں مبتلا اقرا بی بی کو فوری طور پر اسپتال منتقل کر کے اس کی جان بچا لی گئی۔

پولیس کے مطابق ورثا نے بیٹی کو بچانے اور ملزم کے خلاف کارروائی سے انکار کر دیا، جس پر پولیس نے اپنی مدعیت میں سنگین دفعات کے تحت مقدمہ درج کر لیا اور فرار ہونے والے ملزم سجاد کو گرفتار کر کے تفتیش شروع کر دی ہے۔ ڈی ایس پی صدر سرکل مرزا محمد صدیق کے مطابق لڑکی کی حالت اب بہتر ہے، اور ملزم کے خلاف ٹھوس شواہد اکٹھے کیے جا رہے ہیں، تاکہ عدالت سے اسے سخت سے سخت سزا دلوائی جا سکے۔

یہ واقعہ ایک بار پھر معاشرتی بے حسی اور غیرت کے نام پر تشدد کے بھیانک چہرے کو بے نقاب کرتا ہے، جہاں پولیس نے بروقت کارروائی کر کے ایک معصوم جان کو بچا لیا۔

اوچ شریف (باغی ٹی وی، نامہ نگار حبیب خان)ضلع مظفرگڑھ کی تحصیل علی پور میں محکمہ زراعت پنجاب کی مبینہ غفلت یانااہلی اور مقامی بیج ڈیلر کی ملی بھگت سے درجنوں کسان کروڑوں روپے کے نقصان سے دوچار ہو گئے۔ غیر معیاری مونگ کے بیج کی فروخت سے فصلیں زرد پڑ گئیں اور کاشتکاروں کو روٹر پھیر کر فصل تباہ کرنا پڑی۔ احتجاج کرنے والے کسانوں کو ازالے کی بجائے ڈیلر کی طرف سے دھمکیاں دی جا رہی ہیں، جبکہ محکمہ زراعت محض درخواستیں جمع کر کے ہاتھ پر ہاتھ دھرے بیٹھا ہے۔

موضع بیٹ برڑہ کے کاشتکار محمد اعجاز سندھا نے ڈپٹی ڈسٹرکٹ آفیسر زراعت علی پور رانا اعجاز کو تحریری درخواست میں بتایا کہ اس نے الحافظ ٹریڈر علی پور کے مالک چوہدری بشیر ارائیں سے مونگ کا بیج خریدا تھا جو انتہائی ناقص نکلا۔ بیج سے اُگنے والی فصل کے پتے پیلے پڑ گئے جبکہ آس پاس کے کسانوں کی فصلیں بہتر حالت میں ہیں۔ اعجاز کے مطابق جب اس نے ڈیلر سے بیج کی واپسی یا نقصان کے ازالے کا مطالبہ کیا تو اسے سنگین نتائج کی دھمکیاں دی گئیں۔

اعجاز نے میڈیا سے گفتگو میں کہا کہ اس کی چار لاکھ روپے کی فصل تباہ ہو گئی ہے جبکہ درجنوں دیگر متاثرہ کسان جن میں پرویز گوپانگ، محمد یامین سندھا، رانا دلشاد نمبردار، دلاور نقلی، فرید نقلی، مختیار ماچھی، مداح شاہ، سلیم شاہ نمبردار اور رجب کبوتری شامل ہیں، سب کو الحافظ ٹریڈر سے خریدے گئے بیج کی وجہ سے نقصان اٹھانا پڑا ہے۔

کسانوں کا کہنا ہے کہ اگر جلد از جلد انصاف نہ ملا تو وہ بھرپور احتجاج کریں گے۔ دوسری جانب ڈپٹی ڈسٹرکٹ آفیسر زراعت علی پور رانا اعجاز نے تصدیق کی ہے کہ اعجاز سندھا کی درخواست موصول ہوئی ہے اور دیگر متاثرہ کسانوں کو بھی تحریری درخواست دینے کی ہدایت کی گئی ہے۔ ان کا کہنا تھا کہ وہ جلد ڈیلر اور کسانوں کو بلا کر انکوائری کریں گے، تاہم ان کے اختیارات محدود ہیں اور چھاپہ مار کارروائی فیڈرل سیڈ ڈیپارٹمنٹ کے دائرہ اختیار میں آتی ہے۔

کسانوں نے اعلیٰ حکام خاص طورپر ڈپٹی کمشنر مظفرگڑھ اور کمشنر ڈیرہ غازیخان سے نوٹس لیکر معاملے کی فوری شفاف تحقیقات کا مطالبہ کیا اور غفلت کے مرتکب افسران و ڈیلر کے خلاف سخت قانونی کارروائی کی جائے۔

مظفرگڑھ (باغی ٹی وی،نامہ نگار) تھانہ سٹی مظفرگڑھ پولیس نے ایک بڑی کارروائی کے دوران چور گینگ کے تین ملزمان کو گرفتار کر لیا ہے، جن کے قبضے سے پانچ عدد چوری شدہ موٹرسائیکلیں، اسلحہ اور نقد رقم برآمد ہوئی ہے۔ اس کارروائی کا آغاز ڈسٹرکٹ پولیس آفیسر مظفرگڑھ ڈاکٹر رضوان احمد خان کی خصوصی ہدایت پر کیا گیا۔

ایس ایچ او تھانہ سٹی مظفرگڑھ افتخار ملکانی نے اپنی ٹیم کے ہمراہ اس کامیاب کارروائی کو انجام دیا، جس میں ملزمان طیب، شہباز آصف اور سرفراز کو گرفتار کیا گیا۔ ان کے قبضے سے تین عدد پسٹل اور بھاری مقدار میں گولیاں بھی برآمد ہوئیں۔ اس کے علاوہ، پولیس ٹیم نے ملزمان کے قبضے سے پانچ عدد چوری شدہ موٹرسائیکلیں مالیتی تقریباً 8 لاکھ روپے اور ایک لاکھ روپے نقد رقم بھی برآمد کی۔

ایس ایچ او افتخار ملکانی نے اس موقع پر بتایا کہ ملزمان شہر میں موٹرسائیکل چوری کی وارداتوں میں ملوث تھے، اور ان سے مزید تفتیش جاری ہے۔ انہوں نے کہا کہ پیشہ ورانہ جرائم میں ملوث افراد کے خلاف بلاامتیاز کارروائیاں جاری رہیں گی اور انہیں کیفرکردار تک پہنچایا جائے گا۔ ان کا کہنا تھا کہ عوام کی جان و مال کی حفاظت اور بھلائی پولیس کی اولین ترجیح ہے۔

یہ کارروائی پولیس کی جانب سے شہر میں بڑھتے ہوئے جرائم کے خلاف اٹھائے گئے اہم قدم کی عکاسی کرتی ہے، اور پولیس کے عزم کو مزید تقویت دیتی ہے کہ شہر میں جرائم کی روک تھام کے لیے موثر اقدامات کیے جا رہے ہیں۔

جتوئی (باغی ٹی وی) مظفرگڑھ کی تحصیل جتوئی کے نواحی علاقے بستی عارف میں ایک وحشیانہ واقعے نے انسانیت کو شرمسار کر دیا ہے۔ آٹھ ماہ کی حاملہ خاتون کو اس کے اپنے شوہر،بیٹے اور سسرالیوں نے بے دردی سے تشدد کا نشانہ بنایا۔ کلہاڑی، لوہے کے راڈ اور ڈنڈوں کے پے در پے وار سے خاتون کی دونوں ٹانگیں اور بازو بری طرح ٹوٹ گئے، جس کے بعد سفاک ملزمان نے اسے تشویشناک حالت میں گھر سے باہر گلی میں پھینک دیا۔

اہل علاقہ کی بروقت اطلاع پر ریسکیو ٹیم نے فوری طور پر موقع پر پہنچ کر خاتون کو تحصیل ہیڈ کوارٹر (ٹی ایچ کیو) ہسپتال منتقل کیا۔ جہاں وہ زندگی اور موت کی کشمکش میں مبتلا ہے۔

متاثرہ خاتون نے پولیس کو اپنے بیان میں بتایا کہ اسے کردار پر شک کی بنیاد پر اس وحشیانہ تشدد کا نشانہ بنایا گیا۔

خاتون کے اہل خانہ کی جانب سے قانونی کارروائی سے انکار کے بعدپولیس کی مدعیت میں خاتون کے شوہر ،سسر ،دیور اور بیٹے سمیت 5 افراد کےخلاف تھانہ جتوئی میں مقدمہ درج کیا گیا ہے۔ پولیس کا کہنا ہے کہ ملزمان کی گرفتاری کے لیے چھاپے مارے جا رہے ہیں اور انہیں جلد انصاف کے کٹہرے میں لایا جائے گا۔

اس اندوہناک واقعے نے علاقے میں غم و غصے کی لہر دوڑا دی ہے اور خواتین کے خلاف تشدد کے بڑھتے ہوئے واقعات پر تشویش کا اظہار کیا جا رہا ہے۔

علی پور (نامہ نگار) علی پور میں ایک دلخراش واقعہ پیش آیا ہے جہاں ایک اوباش نے 12 سالہ لڑکے کو اپنی حیوانی ہوس کا نشانہ بنا ڈالا۔ واقعے کی اطلاع ملتے ہی پولیس نے فوری کارروائی کرتے ہوئے ملزم کو گرفتار کر لیا ہے۔

تفصیلات کے مطابق ٹیچر کالونی کے رہائشی افضل کورائی کا 12 سالہ بھتیجا جمشید گھر سے فلٹر شدہ پانی لینے کے لیے اپنے محلے دار بشیر چوہان کے پاس گیا۔ جب تین گھنٹے گزرنے کے باوجود جمشید واپس نہ لوٹا تو اس کے اہل خانہ پریشان ہو گئے اور رشتہ داروں کے ساتھ مل کر اس کی تلاش شروع کر دی۔

تلاش کے دوران جب وہ فتح پور روڈ پر پہنچے تو انہوں نے کھیت کی جانب سے جمشید کے چیخنے کی آواز سنی۔ جب وہ قریب پہنچے تو انہوں نے ایک خوفناک منظر دیکھا۔ اوباش بشیر چوہان فصل کے اندر جمشید کے ساتھ زیادتی کر رہا تھا۔

لڑکے کے چچا اور دیگر رشتہ داروں نے جب بشیر چوہان کو للکارا تو وہ جمشید کو برہنہ حالت میں چھوڑ کر موقع سے فرار ہو گیا۔ فوری طور پر 15 پر کال کی گئی جس کے بعد تھانہ سٹی پولیس موقع پر پہنچ گئی۔

متاثرہ لڑکے کو فوری طور پر تحصیل ہیڈ کوارٹر ہسپتال علی پور منتقل کیا گیا جہاں اس کا طبی معائنہ کرایا گیا۔ پولیس نے متاثرہ لڑکے کے چچا کی مدعیت میں ملزم بشیر چوہان کے خلاف مقدمہ درج کر لیا ہے اور اسے گرفتار کر کے علاقہ مجسٹریٹ علی پور سے دو روزہ جسمانی ریمانڈ حاصل کر لیا ہے۔ پولیس اس گھناؤنے جرم کی مزید تفتیش کر رہی ہے۔