Category: ننکانہ

ننکانہ صاحب (باغی ٹی وی،نامہ نگار احسان اللہ ایاز) بابا گورونانک یونیورسٹی ننکانہ صاحب میں تین روزہ دوسری انٹرنیشنل کانفرنس برائے اپلائیڈ سائنسز اینڈ ٹیکنالوجی (ICAST-2025) کا باقاعدہ افتتاح ہو گیا۔ کانفرنس کا عنوان "علمی ہم آہنگی سے مستقبل کی تعمیر: پائیدار ترقی میں مصنوعی ذہانت کا کردار” رکھا گیا۔ یہ کانفرنس فیکلٹی آف نیچرل سائنسز اینڈ ٹیکنالوجی کے زیر اہتمام منعقد کی جا رہی ہے جس کا مقصد بین الشعبہ جاتی تحقیق کو فروغ دینا، سائنسی اختراعات کی حوصلہ افزائی کرنا اور مصنوعی ذہانت کے ذریعے پائیدار ترقی کے امکانات کو اجاگر کرنا ہے۔

کانفرنس میں پانچ ممالک کے سات بین الاقوامی ماہرین بشمول پروفیسر ڈاکٹر یوسف توتر، پروفیسر ڈاکٹر وولکان ایوپوگلو (ترکی)، ڈاکٹر اولکار ابراہیمووا (آذربائیجان)، پروفیسر ڈاکٹر لائی نگت شن (ملائیشیا)، ڈاکٹر شوکی آدم (ترکی)، ڈاکٹر سیماب کنول (تھائی لینڈ) اور ڈاکٹر محمد اصغر (سویڈن) نے کلیدی خطابات پیش کیے۔ اس کے علاوہ 12 سے زائد ممالک کے محققین نے آن لائن شرکت کی جبکہ پاکستان کی 31 جامعات سے 200 سے زائد محققین و طلبہ نے ذاتی طور پر شرکت کی۔

افتتاحی اجلاس میں رجسٹرار بابا گورونانک یونیورسٹی و پیٹرن آف ICAST-2025 جناب مبشر طارق نے استقبالیہ کلمات پیش کرتے ہوئے کہا کہ یونیورسٹی عالمی سطح پر تحقیق و تعاون کے فروغ کے لیے کوشاں ہے۔ انہوں نے منتظمین اور فیکلٹی اراکین کی کاوشوں کو سراہتے ہوئے کہا کہ اس نوعیت کے علمی اجتماعات پاکستان کے تحقیقی منظرنامے کو مضبوط بناتے ہیں۔

پرنسپل آرگنائزر اور ڈین فیکلٹی آف نیچرل سائنسز اینڈ ٹیکنالوجی پروفیسر ڈاکٹر کفیل احمد نے کہا کہ تحقیق اور جدت ہی ایک سائنسی و پائیدار مستقبل کی بنیاد ہیں۔ پروفیسر ڈاکٹر اظہر رسول، چیئرمین ڈیپارٹمنٹ آف زوالوجی و ڈائریکٹر آفس آف ریسرچ اینڈ انوویشن نے کانفرنس کے مختلف سیشنز اور تحقیقی موضوعات کا تعارف پیش کیا اور ملکی و غیر ملکی محققین کی شرکت کو خوش آئند قرار دیا۔

پروفیسر ڈاکٹر محمد افضل، سابق و بانی وائس چانسلر بابا گورونانک یونیورسٹی نے کہا کہ اس نوعیت کی عالمی کانفرنسز سے پاکستان میں سائنسی تحقیق اور علمی روابط کو فروغ ملتا ہے۔ انہوں نے کہا کہ مصنوعی ذہانت اور اپلائیڈ سائنسز کا امتزاج موسمیاتی تبدیلی، صحت عامہ اور صنعتی ترقی جیسے عالمی چیلنجز کے حل میں کلیدی کردار ادا کر سکتا ہے۔

پروفیسر ڈاکٹر ریاض الحق طارق، سابق وائس چانسلر یونیورسٹی آف سرگودھا نے کہا کہ مختلف علوم کے درمیان تعلق پیدا کرنا وقت کی ضرورت ہے تاکہ تحقیق کے بہتر نتائج حاصل کیے جا سکیں۔

رکن صوبائی اسمبلی مہر کاشف پڈھیار نے اپنے خطاب میں کہا کہ بابا گورونانک یونیورسٹی سائنسی و تعلیمی ترقی میں نمایاں کردار ادا کر رہی ہے اور اس طرح کی بین الاقوامی کانفرنسز پاکستان کے علمی تشخص کو اجاگر کر رہی ہیں۔

کانفرنس کے آئندہ دو روز میں مختلف تحقیقی مقالے پیش کیے جائیں گے، موضوعاتی سیشنز منعقد ہوں گے اور شرکاء اپلائیڈ سائنسز و مصنوعی ذہانت کے ذریعے پائیدار ترقی کے لیے نئے امکانات تلاش کریں گے۔

ننکانہ (باغی ٹی وی،نامہ نگار احسان اللہ ایاز کی رپورٹ) گورنمنٹ ہائیر سیکنڈری اسکول چک نمبر 6 رام نگر میں دو نئے کمروں کا افتتاح کر دیا گیا۔ افتتاحی تقریب میں ڈپٹی کمشنر محمد تسلیم اختر راؤ اور سی ای او تعلیم شازیہ بانو نے شرکت کی۔ 11 لاکھ 92 ہزار روپے سے زائد لاگت سے مکمل ہونے والا یہ منصوبہ اپنی مدد آپ کے تحت مکمل کیا گیا۔ مقامی افراد، سکول سٹاف اور المنائی نے بھرپور تعاون فراہم کیا۔ نئے کمروں کی تعمیر سے 80 طلباء کے بیٹھنے کی اضافی گنجائش پیدا ہو گئی ہے۔

اس موقع پر سکول میں پنجابی کلچرل ڈے بھی منایا گیا۔ طالبات نے رنگا رنگ اسٹالز لگائے، ثقافتی لباس زیب تن کیا اور ہاتھوں پر مہندی لگائی۔ بچیوں نے اپنے ہاتھوں سے تیار کردہ اشیاء سے پنجاب کی روایات کو اجاگر کیا۔

افسران نے کلاسز کا دورہ کر کے تعلیمی ماحول، تدریسی معیار اور طلبہ کی کارکردگی کا جائزہ لیا۔ افسران کا کہنا تھا کہ وسائل کی کمی تعلیم کے فروغ میں رکاوٹ نہیں بن سکتی۔

ننکانہ صاحب (باغی ٹی وی ،نامہ نگار احسان اللہ ایاز) بابا گورو نانک یونیورسٹی ننکانہ صاحب گزشتہ سات ماہ سے مستقل وائس چانسلر سے محروم ہے، جس کے باعث ادارے کے تدریسی، تحقیقی اور انتظامی امور شدید متاثر ہو رہے ہیں۔ ذرائع کے مطابق سابق وائس چانسلر پروفیسر ڈاکٹر محمد افضل کی مدتِ ملازمت مارچ 2025ء میں مکمل ہونے کے بعد یونیورسٹی قیادت سے محروم ہو گئی تھی۔ بعد ازاں چار ماہ کے لیے یونیورسٹی آف اوکاڑہ کے وائس چانسلر پروفیسر ڈاکٹر سجاد مبین کو اضافی چارج دیا گیا تھا، تاہم ان کی مدت بھی ختم ہو چکی ہے۔

مستقل وائس چانسلر کی عدم تعیناتی کے باعث یونیورسٹی میں کئی اہم تعلیمی و ترقیاتی منصوبے تعطل کا شکار ہیں، فیکلٹی تقرریاں رکی ہوئی ہیں، تحقیقی سرگرمیاں سست روی کا شکار ہیں جبکہ بجٹ منظوری اور پالیسی سازی کے معاملات بھی غیر یقینی کی صورتحال سے دوچار ہیں۔ اساتذہ اور طلباء نے خدشہ ظاہر کیا ہے کہ اگر معاملے کا فوری نوٹس نہ لیا گیا تو یونیورسٹی کا تعلیمی معیار اور طلباء کا مستقبل بری طرح متاثر ہو سکتا ہے۔

اساتذہ و طلباء نے وزیرِ اعلیٰ پنجاب مریم نواز شریف، صوبائی وزیر ہائر ایجوکیشن رانا سکندر حیات اور سیکرٹری ہائر ایجوکیشن غلام فرید سے مطالبہ کیا ہے کہ بابا گورو نانک یونیورسٹی میں مستقل وائس چانسلر کی فوری تعیناتی عمل میں لائی جائے تاکہ انتظامی و تدریسی امور میں تسلسل اور استحکام پیدا ہو سکے۔ تعلیمی حلقوں نے کہا ہے کہ سات ماہ گزرنے کے باوجود وائس چانسلر کا تقرر نہ ہونا متعلقہ محکمہ کی کارکردگی پر سنجیدہ سوالیہ نشان ہے۔

ننکانہ صاحب (باغی ٹی وی ،نامہ نگار احسان اللہ ایاز)ڈپٹی کمشنر ننکانہ صاحب محمد تسلیم اختر راؤ نے ڈی ایچ کیو ہسپتال میں چار روزہ قومی انسدادِ پولیو مہم کا باقاعدہ افتتاح کیا۔ اس موقع پر انہوں نے بچوں کو پولیو سے بچاؤ کے قطرے پلائے اور فنگر مارکنگ بھی کی۔ ڈپٹی کمشنر نے بچوں کو وٹامن اے کے قطرے بھی پلائے۔

انسدادِ پولیو مہم 13 تا 16 اکتوبر 2025 تک جاری رہے گی، جس کے دوران ضلع بھر میں دو لاکھ اٹھاسی ہزار آٹھ سو اٹھانوے (288,898) بچوں کو پولیو کے قطرے پلائے جائیں گے۔ مہم کے دوران 1198 ٹیمیں گھر گھر جا کر، داخلی و خارجی راستوں اور بس اسٹینڈز پر بچوں کو پولیو سے بچاؤ کے قطرے پلائیں گی۔

ڈپٹی کمشنر محمد تسلیم اختر راؤ نے کہا کہ ہر بچے کو معذوری سے آزاد زندگی جینے کا حق حاصل ہے، اور حکومتِ پاکستان کے عزم، فرنٹ لائن ورکرز کی محنت اور عوام کے اعتماد سے ضلع ننکانہ کو پولیو فری رکھنا ہے۔ انہوں نے والدین سے اپیل کی کہ وہ مہم کے دوران اپنے بچوں کو پولیو سے بچاؤ کے قطرے ضرور پلائیں۔

مہم کے دوران بچوں کو وٹامن اے کیپسول بھی دیے جائیں گے۔ ویکسین کی کولڈ چین برقرار رکھنے کے لیے مکمل حفاظتی انتظامات کیے گئے ہیں۔

اس موقع پر سی ای او ہیلتھ ڈاکٹر روحیل اختر، ڈی ڈی ایچ او ڈاکٹر ذیشان شبیر، ایم ایس ڈاکٹر اطہر فرید سمیت دیگر افسران بھی موجود تھے۔

ننکانہ صاحب (باغی ٹی وی،نامہ نگار احسان اللہ ایاز)ڈپٹی کمشنر محمد تسلیم اختر راؤ کی زیر صدارت ڈسٹرکٹ ڈیزاسٹر مینجمنٹ کمیٹی کا اہم اجلاس منعقد ہوا، جس میں ایڈیشنل ڈپٹی کمشنرز، اسسٹنٹ کمشنر، ریسکیو 1122، محکمہ انہار اور دیگر اداروں کے نمائندوں نے شرکت کی۔

اجلاس میں دریائی کٹاؤ سے موضع وڑائچ کو محفوظ بنانے کے لیے فوری طور پر بند باندھنے کا فیصلہ کیا گیا۔ ڈپٹی کمشنر نے ہدایت دی کہ محکمہ انہار سمیت متعلقہ ادارے ہنگامی بنیادوں پر حفاظتی بند کی تعمیر کا آغاز کریں۔

ضلعی انتظامیہ کے مطابق موضع وڑائچ اور ٹھٹھ مادن کے علاقوں میں دریائی حدود کے قریب پولیس اور ریسکیو 1122 کی ٹیمیں تعینات کر دی گئی ہیں۔ دریائی کٹاؤ کے باعث دو آبادیوں کو شدید خطرہ لاحق ہے، جبکہ ممکنہ متاثرہ پانچ بستیوں کے مکینوں کے انخلا کی تیاری جاری ہے۔

ڈپٹی کمشنر ننکانہ نے بتایا کہ حکومت پنجاب اور پی ڈی ایم اے کو بند کی تعمیر پر آنے والی لاگت سے آگاہ کر دیا گیا ہے، اور جلد از جلد بند باندھنے کا کام شروع کر دیا جائے گا تاکہ کسی بڑے نقصان سے بچا جا سکے۔

ننکانہ صاحب (باغی ٹی وی ،نامہ نگاراحسان اللہ ایاز) ڈپٹی کمشنر ننکانہ صاحب محمد تسلیم اختر راو کی زیرصدارت ڈسٹرکٹ کوآرڈینیشن کمیٹی کا آٹھواں اجلاس منعقد ہوا جس میں برگیڈئیر فرقان شبیر اور ضلعی اداروں کے تمام سربراہان نے شرکت کی۔

اجلاس میں فیصلہ کیا گیا کہ ایرانی پیٹرول فروخت کرنے والے پٹرول پمپس اور سمگل شدہ اشیاء فروخت کرنے والوں کے خلاف سخت کارروائی کی جائے گی اور گیس کی ری فلنگ اور پٹرول ایجنسیز کے خلاف زیرو ٹالرنس پالیسی اپنائی جائے گی۔

غیر قانونی تجاوزات کے خلاف آپریشن تیز کرنے اور اسٹیٹ لینڈ کو واگزار کروانے کے اقدامات کو ترجیح دی جائے گی۔ اجلاس میں بتایا گیا کہ 179 مدارس کی رجسٹریشن کا عمل مکمل کیا جا چکا ہے جبکہ اوورسیز پاکستانیوں کے مسائل کو ترجیحی بنیادوں پر حل کیا جائے گا۔

ماحولیاتی آلودگی پیدا کرنے والوں کو کیفرِ کردار تک پہنچانے پر زور دیا گیا اور شجرکاری مہم کی کامیابی پر اطمینان کا اظہار کیا گیا۔ محلہ سطح پر امن و امان اور خاص طور پر چائنیز باشندوں کی سکیورٹی کے لیے خصوصی اقدامات یقینی بنانے، بھکاریوں کے خلاف سخت کاروائی کرنے اور انہیں حوالات میں بند کرنے کی ہدایات بھی اجلاس میں دی گئیں۔

ٹریفک قوانین پر عملدرآمد کو یقینی بنانے اور ہیلمٹ کے استعمال کو لازم قرار دینے کے ساتھ ساتھ صحت، تعلیم اور انصاف کی سہولیات کو عام آدمی تک پہنچانے پر بھی زور دیا گیا۔

آخر میں بابا گرو نانک کے جنم دن کی تقریبات کے دوران سکیورٹی اور انتظامات کو موثر طور پر یقینی بنانے کی ہدایات جاری کی گئیں۔

ننکانہ صاحب (باغی ٹی وی،نامہ نگار احسان اللہ ایاز) بابا گورونانک دیو جی کے 556ویں جنم دن کی تقریبات کے سلسلے میں کمشنر لاہور مریم خان کی زیر صدارت اہم اجلاس منعقد ہوا، جس میں انتظامات کا تفصیلی جائزہ لیا گیا۔ تقریبات کا آغاز 3 نومبر سے ہوگا جو 5 نومبر تک جاری رہیں گی۔ دنیا بھر سے ہزاروں سکھ یاتری اس مذہبی تقریب میں شرکت کے لیے ننکانہ صاحب پہنچیں گے، جن کی خدمت و سیکیورٹی کے لیے 5 ہزار سے زائد افسران و ملازمین ڈیوٹی سرانجام دیں گے۔

اجلاس میں بتایا گیا کہ گوردوارہ جنم استھان، ڈپٹی کمشنر اور ڈی پی او دفاتر میں کنٹرول رومز قائم کیے جائیں گے تاکہ تمام امور کی نگرانی مؤثر طریقے سے کی جا سکے۔ کمشنر لاہور نے ہدایت کی کہ تقریبات کے دوران سوئی گیس اور بجلی کی لوڈشیڈنگ نہ کی جائے اور کسی بھی قسم کی مذہبی منافرت یا اشتعال انگیزی کی کوشش کرنے والوں کے خلاف سخت کارروائی عمل میں لائی جائے۔

کمشنر مریم خان نے کہا کہ دنیا بھر سے آنے والے سکھ یاتری ہمارے معزز مہمان ہیں، ان کا پرتپاک استقبال کیا جائے گا۔ سکھ رہنماؤں اور دربار انتظامیہ نے انتظامات پر مکمل اطمینان کا اظہار کرتے ہوئے کہا کہ ننکانہ صاحب امن، بھائی چارے اور بین المذاہب ہم آہنگی کا گہوارہ ہے۔

کمشنر لاہور مریم خان نے جنم استھان گوردوارہ کا دورہ بھی کیا، حاضری دی اور تیاریوں کا جائزہ لیا۔ اجلاس میں دربار منتظمین، سکھ رہنما، ڈپٹی کمشنر ننکانہ محمد تسلیم اختر، ڈی پی او فراز احمد سمیت متعلقہ اداروں کے افسران نے شرکت کی۔

ننکانہ صاحب (باغی ٹی وی،نامہ نگار احسان اللہ ایاز) وزیراعلیٰ پنجاب کی ہدایات پر ہفت مدر ننکانہ میں کھلی کچہری منعقد ہوئی، جس میں کمشنر لاہور ڈویژن مریم خان نے سروے ٹیموں کی کارکردگی کا تفصیلی جائزہ لیا۔ کمشنر نے غلط ڈیتھ سرٹیفکیٹ کے اجراء پر یونین کونسل سیکرٹری کو فوری طور پر معطل کردیا۔ اس موقع پر مریم خان نے کہا کہ وزیراعلیٰ پنجاب کی ہدایت کے مطابق سیلاب متاثرین کی امداد و بحالی میں معمولی کوتاہی بھی برداشت نہیں کی جائے گی۔ انہوں نے تحصیلدار ہفت مدر کو ہدایت دی کہ دو دن کے اندر تمام وراثتی کیسز نمٹا کر رپورٹ جمع کرائی جائے۔

کمشنر لاہور نے ہدایت دی کہ نادرا اور ریونیو کے خصوصی کاونٹرز آج ہی قائم کیے جائیں، جو ہفتہ اور اتوار کو بھی فعال رہیں گے تاکہ عوام کو فوری سہولت فراہم ہو۔ مریم خان نے فلڈ نقصانات کے تخمینے کے لیے فیلڈ میں مصروف سروے ٹیموں کا خود آن فیلڈ معائنہ کیا اور سیلاب متاثرہ علاقوں جگداچک اور ننکانہ میں گھروں پر جا کر متاثرین سے ان کے نقصانات اور سروے ٹیموں کی کارکردگی کے بارے میں دریافت کیا۔ انہوں نے کہا کہ مالک اور غیر مالک دونوں طرح کے زمین داروں کو نقصان کے ازالے کا حق دیا جائے گا تاکہ کسی متاثرہ خاندان کے ساتھ ناانصافی نہ ہو۔

ننکانہ صاحب (باغی ٹی وی، عبدالغفار چوہدری کی رپورٹ)موڑ کھنڈا میں کرمانی ویلفئیر فاؤنڈیشن کے زیرِاہتمام 13ویں کرمانی ٹیلنٹ ایوارڈ کی رنگا رنگ تقریب منعقد ہوئی۔ تقریب میں ڈپٹی کمشنر محمد تسلیم اختر راؤ، صدارتی ایوارڈ یافتہ کالم نگار و مصنف سجاد جہانیہ، معروف ادبی شخصیت عابد گل، سی ای او ڈسٹرکٹ ایجوکیشن اتھارٹی شازیہ بانو سمیت مختلف تعلیمی اداروں کے سربراہان، اساتذہ اور طلبہ و طالبات نے بڑی تعداد میں شرکت کی۔

تقریب کے دوران میٹرک اور انٹرمیڈیٹ امتحانات 2025 میں نمایاں پوزیشن حاصل کرنے والے طلبہ و طالبات، نیز قرات، نعت اور تقریری مقابلوں کے کامیاب شرکاء میں کرمانی ٹیلنٹ ایوارڈ تقسیم کیے گئے، جب کہ مختلف شعبہ ہائے زندگی سے تعلق رکھنے والی ممتاز شخصیات کو یادگاری شیلڈز پیش کی گئیں۔

شرکاء نے پرجوش انداز میں اساتذہ کی خدمات کو خراجِ تحسین پیش کیا اور انہیں پھول پیش کیے۔ مقررین نے اپنے خطاب میں کہا کہ اساتذہ قوم کے معمار ہیں جو نسلوں کو سنوارتے ہیں، جبکہ مرحوم محمد اکرم کرمانی کی تعلیمی خدمات آنے والی نسلوں کے لیے مشعلِ راہ ہیں۔

مقررین نے کرمانی ویلفئیر فاؤنڈیشن کی تعلیم، ادب، صحت اور فلاحی میدان میں خدمات کو خراجِ تحسین پیش کرتے ہوئے کہا کہ ادارہ جس طرح مستحق اور باصلاحیت طلبہ کی معاونت و رہنمائی کر رہا ہے وہ قابلِ تقلید مثال ہے۔

ننکانہ صاحب (باغی ٹی وی،نامہ نگار احسان اللہ ایاز)ڈسٹرکٹ ایجوکیشن اتھارٹی ننکانہ صاحب کی جانب سے یومِ اساتذہ کے موقع پر اساتذہ کرام کو خراجِ تحسین پیش کرنے کے لیے “ہیرو ایوارڈ” تقریب کا اہتمام کیا گیا۔ تقریب میں ڈپٹی کمشنر محمد تسلیم اختر راؤ نے بطورِ مہمانِ خصوصی شرکت کی، جب کہ سی ای او ایجوکیشن شازیہ بانو، سی ای او ضلع کونسل عامر اختر سمیت دیگر افسران بھی موجود تھے۔

ڈپٹی کمشنر محمد تسلیم اختر راؤ نے ضلع بھر کے 63 قابل و محنتی اساتذہ کو “ہیرو ایوارڈ” سے نوازا۔ انہوں نے خطاب کرتے ہوئے کہا کہ اساتذہ قوم کے معمار ہیں، انہیں عزت و توقیر دینا وقت کی اہم ضرورت ہے۔ اساتذہ کی محنت، لگن اور خلوص کی بدولت ہی پاکستان دنیا بھر میں تعلیمی میدان میں اپنا نام روشن کر رہا ہے۔

انہوں نے مزید کہا کہ پاکستانی قوم زندہ دل قوم ہے جو اپنے اساتذہ کو سلام پیش کرتی ہے۔ اساتذہ حقیقی والدین کی طرح اپنے شاگردوں کو ترقی کی بلندیوں پر دیکھنا چاہتے ہیں۔ ان کی رہنمائی، تعلیم و تربیت اور کاوشوں کے باعث طلبہ اپنے مستقبل کو محفوظ اور روشن بنا رہے ہیں۔