Category: ننکانہ

ننکانہ صاحب (باغی ٹی وی ،نامہ نگاراحسان اللہ ایاز) وزیراعلیٰ پنجاب مریم نواز شریف کی ہدایت پر ننکانہ صاحب میں پنجاب انفورسمنٹ اینڈ ریگولیٹری اتھارٹی (پیرا فورس) کو مکمل طور پر فعال کر دیا گیا۔ اس سلسلے میں ڈپٹی کمشنر کمپلیکس میں پیرا فورس کی شاندار فارمل کمانڈ سلامی پریڈ کا انعقاد کیا گیا، جس میں جوانوں نے مارچ پاسٹ کرتے ہوئے ڈپٹی کمشنر محمد تسلیم اختر راو کو سلامی پیش کی۔ اس موقع پر قومی ترانہ بھی پیش کیا گیا۔

ڈپٹی کمشنر نے پریڈ کا معائنہ کرتے ہوئے کہا کہ پیرا فورس تجاوزات، گراں فروشی اور ذخیرہ اندوزی کے خلاف مؤثر کارروائیاں کر رہی ہے۔ ضلعی انتظامیہ کی جانب سے مکمل تعاون فراہم کیا جائے گا۔ انہوں نے ہدایت کی کہ دوران کارروائی شہریوں سے خوش اخلاقی سے پیش آیا جائے، بدتمیزی کسی صورت برداشت نہیں کی جائے گی۔

پیرا فورس کو عوام کے لیے ایک مؤثر اور قابل اعتماد ادارہ قرار دیتے ہوئے کہا گیا کہ یہ فورس شہری مسائل کے حل میں اہم کردار ادا کرے گی۔

ننکانہ صاحب (باغی ٹی وی،نامہ نگاراحسان اللہ ایاز) ڈپٹی کمشنر محمد تسلیم اختر راو کی زیرصدارت ڈسٹرکٹ ویجلنس کمیٹی کا اجلاس منعقد ہوا جس میں ایڈیشنل ڈپٹی کمشنر جنرل، محکمہ لیبر، سوشل ویلفیئر، ماحولیات و دیگر متعلقہ افسران نے شرکت کی۔

اجلاس میں بتایا گیا کہ محکمہ لیبر ویلفیئر مزدوروں کی کم از کم تنخواہ 40 ہزار روپے پر عملدرآمد یقینی بنانے کے لیے سرگرم ہے۔ رواں ماہ 160 سے زائد اداروں کی چیکنگ کی گئی، خلاف ورزی پر 35 ہزار روپے جرمانہ اور 102 چالان عدالتوں میں بھجوائے گئے۔ چائلڈ لیبر کے خلاف 5 ایف آئی آرز درج کی گئیں جبکہ بانڈڈ لیبر کا کوئی کیس رپورٹ نہیں ہوا۔

اجلاس میں فیصلہ کیا گیا کہ تمام محکمے بانڈڈ لیبر کے خلاف سخت کارروائی کریں، چائلڈ لیبر کے خاتمے کے لیے مارکیٹوں اور بازاروں کی سطح پر نگرانی بڑھائی جائے، کم اجرت دینے والوں کو قانون کے مطابق سزا دی جائے، اور صنعتوں میں کام کرنے والے مزدوروں کے لیے حفاظتی اقدامات یقینی بنائے جائیں۔ حفاظتی اقدامات نہ کرنے والے صنعتی یونٹس کو سیل کرنے کی ہدایت بھی دی گئی۔

ننکانہ صاحب (باغی ٹی وی، احسان اللہ ایاز) پاکستان مرکزی مسلم لیگ ضلع ننکانہ صاحب کے زیراہتمام ضلعی سیکرٹریٹ میں علمائے کرام کا ایک اہم تنظیمی اجلاس منعقد ہوا۔ اجلاس کے مہمانِ خصوصی شعبہ دعوت و اصلاح پاکستان کے مدیر حافظ عبدالروف تھے جبکہ جنرل سیکرٹری محمد ثاقب مجید اور مدیر شعبہ دعوت و اصلاح ضلع امیر حمزہ سمیت ضلع بھر سے علمائے کرام کی بڑی تعداد نے شرکت کی۔

اجلاس میں موجودہ سیلابی صورتحال اور شعبہ خدمتِ خلق کے تحت جاری امدادی سرگرمیوں پر تبادلہ خیال کیا گیا۔ اس موقع پر حافظ عبدالروف نے خطاب کرتے ہوئے کہا کہ علمائے کرام معاشرے اور خصوصاً نوجوان نسل کی اصلاح اور تربیت میں مرکزی کردار ادا کر سکتے ہیں۔ ان کا کہنا تھا کہ آج کے دور میں نوجوان مختلف چیلنجز سے دوچار ہیں، ایسے میں علماء کی ذمہ داری ہے کہ وہ قرآن و سنت کی روشنی میں رہنمائی کریں۔

انہوں نے کہا کہ منبر و محراب سے اصلاحی پیغام عام کرنا وقت کی سب سے بڑی ضرورت ہے، کیونکہ اگر نوجوان نسل کو دینی و اخلاقی اقدار سے جوڑ دیا جائے تو پورا معاشرہ مثبت تبدیلی کی طرف گامزن ہو سکتا ہے۔ حافظ عبدالروف نے مزید کہا کہ پاکستان مرکزی مسلم لیگ نہ صرف دعوت و اصلاح کے میدان میں سرگرم ہے بلکہ خدمتِ خلق کے جذبے کے تحت مصیبت زدہ افراد کی عملی مدد کو بھی اپنا شعار بنائے ہوئے ہے۔ انہوں نے علمائے کرام پر زور دیا کہ وہ اس جدوجہد میں تنظیم کا ساتھ دیں اور اپنی صلاحیتیں قوم و ملت کی بھلائی کے لیے وقف کریں۔

ننکانہ صاحب (باغی ٹی وی نامہ نگار، احسان اللہ ایاز) پنجاب حکومت کے فلاحی منصوبے کلینک آن وہیلز میں ڈرائیورز اجرت کے سنگین مسئلے سے دوچار ہیں۔ ضلع بھر میں تعینات 12 ڈرائیورز کو صرف 25 ہزار روپے ماہانہ تنخواہ دی جا رہی ہے، حالانکہ حکومت پنجاب کے نوٹیفکیشن کے مطابق کم از کم اجرت 40 ہزار روپے مقرر ہے۔

ضلعی ذرائع کے مطابق ان میں سے 6 ڈرائیور ننکانہ صاحب، 3 شاہ کوٹ اور 3 سانگلہ ہل میں ڈیوٹی سرانجام دے رہے ہیں۔ ڈرائیورز نے میڈیا سے گفتگو میں شکوہ کیا کہ مہنگائی کے دور میں 25 ہزار روپے پر گزارا ناممکن ہے اور سرکاری فلاحی منصوبے میں اتنی بڑی ناانصافی سمجھ سے بالاتر ہے۔

ڈرائیورز نے کہا کہ اگر حکومت خود اپنے جاری کردہ نوٹیفکیشن پر عمل درآمد نہیں کرتی تو دیگر اداروں سے کیا توقع رکھی جا سکتی ہے؟ ان کے مطابق کم از کم اجرت کے برخلاف تنخواہیں دینا نہ صرف قانونی خلاف ورزی ہے بلکہ کھلا استحصال ہے۔

انہوں نے وزیراعلیٰ پنجاب مریم نواز شریف، صوبائی وزیر صحت خواجہ عمران نذیر اور سیکرٹری ہیلتھ پنجاب نادیہ ثاقب سے فوری نوٹس لینے اور سرکاری نوٹیفکیشن کے مطابق تنخواہیں دلوانے کا مطالبہ کیا ہے۔

ننکانہ صاحب( احسان اللہ ایاز کی رپورٹ) ضلع ننکانہ صاحب میں ایچ پی وی ویکسین مہم کا باقاعدہ افتتاح کر دیا گیا۔ ڈپٹی کمشنر محمد تسلیم اختر راؤ نے گورنمنٹ ایم سی گرلز ہائی سکول میں بچیوں کو ویکسین لگوا کر مہم کا آغاز کیا۔ اس موقع پر ای او ہیلتھ ڈاکٹر محمد روحیل اختر، سی او ایجوکیشن شازیہ بانو اور دیگر افسران بھی موجود تھے۔

حکومت پنجاب کی سرپرستی میں عالمی ادارہ صحت (WHO) اور یونیسف کے تعاون سے یہ مہم 27 ستمبر تک جاری رہے گی۔ پاکستان میں پہلی بار سروائیکل کینسر سے بچاؤ کے لیے قومی ویکسینیشن مہم شروع کی گئی ہے جس کے تحت 9 سے 14 سال کی بچیوں کو ایچ پی وی ویکسین فراہم کی جا رہی ہے۔

ضلعی انتظامیہ کے مطابق بروقت ویکسین بچیوں کی صحت کی ضامن ہے اور یہ اقدام آئندہ نسلوں، خصوصاً خواتین کو کینسر جیسے موذی مرض سے محفوظ رکھنے میں کلیدی کردار ادا کرے گا۔ حکام نے شہریوں کو افواہوں پر کان نہ دھرنے کی اپیل کرتے ہوئے کہا کہ ویکسین محفوظ ہے اور اس کے کوئی سائیڈ ایفیکٹس نہیں ہیں۔

ضلع بھر میں 90 ٹیمیں یونین کونسل کی سطح پر اسکولوں، مدارس، ہسپتالوں اور کمیونٹی مراکز پر بچیوں کو ویکسین فراہم کر رہی ہیں۔

ننکانہ صاحب (باغی ٹی وی نامہ نگار احسان اللہ ایاز)سیکرٹری ہیلتھ پنجاب کے حکم کو 50 روز اور سی ای او ہیلتھ کے حکم کو 20 روز گزرنے کے باوجود ننکانہ صاحب میں فیس اسکینر مشینیں تاحال نصب نہ ہو سکیں۔ محکمہ صحت کے احکامات تاحال ہوا میں معلق ہیں جبکہ ڈسٹرکٹ ہیلتھ آفیسرز اور دیگر دفاتر نے فیس اسکینر حاضری کے نظام کو مکمل طور پر نظر انداز کر دیا ہے۔

ذرائع کے مطابق سی ای او ہیلتھ ڈاکٹر روحیل اختر کی جانب سے متعدد غیر حاضر ملازمین کو شوکاز نوٹسز جاری کیے گئے ہیں۔ ان نوٹسز کے بعد دفاتر میں بروقت حاضری کا عمل کسی حد تک یقینی ہونا شروع ہو گیا ہے۔

محکمہ ہیلتھ اینڈ پاپولیشن پنجاب کی جانب سے حاضری کو شفاف بنانے کے لیے فیس اسکینر سسٹم کی ہدایات پر سیکرٹری ہیلتھ پنجاب نے حکم نمبر SO(G)/P&SHD)1-36/2016 مورخہ 16 جولائی 2025 کو جاری کیا تھا۔ ان احکامات کو جاری ہوئے 50 روز گزر گئے ہیں لیکن ڈسٹرکٹ ہیلتھ اتھارٹی ننکانہ صاحب کے دفاتر میں تاحال فیس اسکینرز نصب نہیں ہو سکے۔

بعد ازاں چیف ایگزیکٹو آفیسر ڈسٹرکٹ ہیلتھ اتھارٹی ننکانہ صاحب ڈاکٹر روحیل اختر نے بھی خط نمبر 18,360–65 IG مورخہ 20 اگست 2025 کے ذریعے ڈسٹرکٹ ہیلتھ آفیسرز، ڈپٹی ڈسٹرکٹ ہیلتھ آفیسرز، IRMNCH آفس اور دیگر دفاتر کو فوری طور پر فیس اسکینر مشینوں کی تنصیب کا حکم دیا تھا۔ تاہم اس خط کو بھی 20 دن گزرنے کے باوجود کسی دفتر میں عملدرآمد نہ ہو سکا۔

محکمہ صحت اور سی ای او ہیلتھ کے واضح احکامات اور متعدد ہدایات کے باوجود ضلعی سطح پر اس سنگین غفلت نے محکمانہ کارکردگی پر سوالیہ نشان کھڑا کر دیا ہے۔ اب دیکھنا یہ ہے کہ اس حکم پر عملدرآمد کون کروائے گا۔

ننکانہ صاحب (باغی ٹی وی،نامہ نگاراحسان اللہ ایاز) ننکانہ صاحب میں ضلعی انتظامیہ کی جانب سے سیلاب سے متاثرہ افراد میں راشن تقسیم کرنے کی ایک تقریب منعقد ہوئی۔ اس موقع پر ڈپٹی کمشنر محمد تسلیم اختر راؤ، ممبر صوبائی اسمبلی مہر کاشف پڈھیار، اور ڈی ڈی سوشل ویلفیئر محمد شبیر نے متاثرہ خاندانوں میں راشن بیگز تقسیم کیے۔

فارمز ڈویلپمنٹ آرگنائزیشن کے تعاون سے 100 سے زائد سیلاب متاثرہ خاندانوں کو امدادی سامان فراہم کیا گیا۔ ہر راشن بیگ میں آٹا، چینی، دالیں، گھی، صابن سمیت 21 ضروری اشیاء شامل تھیں۔ ضلعی انتظامیہ کے مطابق، دریائی حدود میں سیلابی پانی سے 121 دیہات اور 36 ہزار سے زائد افراد متاثر ہوئے ہیں۔ اس کے علاوہ، 40 ہزار ایکڑ سے زائد رقبے پر کھڑی فصلیں بھی تباہ ہو چکی ہیں۔

ریسکیو آپریشن کے دوران اب تک 11 ہزار سے زائد افراد کو محفوظ مقامات پر منتقل کیا جا چکا ہے۔ سیلاب متاثرین کی مدد کے لیے 9 مقامات پر فلڈ ریلیف کیمپ اور 30 مقامات پر میڈیکل کیمپ قائم کیے گئے ہیں۔ اس موقع پر ممبر صوبائی اسمبلی مہر کاشف پڈھیار نے کہا کہ حکومت پنجاب سیلاب متاثرین کے جان و مال کے تحفظ کو اولین ترجیح دے رہی ہے اور ان کے نقصانات کا مکمل ازالہ کیا جائے گا۔