Category: ننکانہ

ننکانہ صاحب (باغی ٹی وی،نامہ نگاراحسان اللہ) ننکانہ صاحب میں متروکہ وقف املاک کی زمینوں پر غیر قانونی طور پر قبضہ کرنے والوں کے خلاف بڑا آپریشن شروع کرنے کی تیاریاں مکمل کر لی گئی ہیں۔

ڈپٹی کمشنر محمد تسلیم اختر راؤ کی زیر صدارت ایک اجلاس میں اس حوالے سے فیصلہ کیا گیا۔ اس اجلاس میں سیکرٹری متروکہ وقف املاک غلام فرید بھی خصوصی طور پر شریک ہوئے۔

اجلاس میں بتایا گیا کہ واربرٹن روڈ اور ننکانہ بائی پاس پر موجود متروکہ وقف املاک کی زمینوں پر بنائی گئی غیر قانونی تعمیرات کو ہٹانے کے لیے بڑے پیمانے پر آپریشن کیا جائے گا۔ اس آپریشن میں ضلعی انتظامیہ کے ساتھ ساتھ پولیس کی بھی بڑی تعداد شریک ہوگی۔

سیکرٹری متروکہ وقف املاک غلام فرید نے کہا کہ اسٹیٹ لینڈ پر غیر قانونی تعمیرات کے خلاف آپریشن کے لیے تمام متعلقہ ادارے پوری تیاری کے ساتھ ہیں۔ انہوں نے کہا کہ چند روز کے اندر اندر یہ آپریشن شروع کر دیا جائے گا۔

ڈپٹی کمشنر محمد تسلیم اختر راؤ نے کہا کہ اس آپریشن میں کسی بھی قسم کی رعایت نہیں برتی جائے گی اور جو بھی اس آپریشن میں خلل ڈالنے کی کوشش کرے گا اس کے خلاف سخت کارروائی کی جائے گی۔

ننکانہ صاحب (باغی ٹی وی،نامہ نگاراحسان اللہ ایاز) ڈسٹرکٹ ہیڈ کوارٹرز ہسپتال میں ادویات کی شدید قلت کے باعث مریضوں کو شدید مشکلات کا سامنا ہے۔ گزشتہ روز وزیر اعلیٰ پنجاب کی مانیٹرنگ ٹیم کے دورے کے دوران بھی یہ مسئلہ سامنے آیا۔

مریضوں کے لواحقین نے بتایا کہ انہیں ہسپتال میں داخل مریضوں کے لیے سرنجوں، پائیوڈین، برینولا، ٹیپ، گاز اور نارمل سلائن واٹر تک باہر سے خرید کر لانا پڑ رہا ہے۔ اس پر مانیٹرنگ آفیسر مہر کاشف پڈھیار نے ہسپتال کے ایم ایس کو سخت ڈانٹا اور ادویات کی فوری فراہمی کا حکم دیا۔

ڈاکٹروں نے بھی ادویات کی کمی کے باعث پیش آنے والی مشکلات پر روشنی ڈالی۔ انہوں نے بتایا کہ ادویات نہ ہونے کی وجہ سے مریضوں کو مناسب علاج نہیں مل پا رہا ہے۔

ڈاکٹر عدنان اقبال، چیئرمین وائی ڈی اے، اور سنیئر ڈاکٹر راحیل رضا نے بھی مانیٹرنگ آفیسر کو ہسپتال میں ڈاکٹروں کی کمی اور دیگر مسائل سے آگاہ کیا۔ مہر کاشف پڈھیار نے ان تمام مسائل کے فوری حل کی یقین دہانی کروائی ہے۔

ننکانہ صاحب(باغی ٹی وی نامہ نگاراحسان اللہ ایاز)بارش،افسران کی غفلت ، گٹرابل پڑے،سڑکیں پانی میں ڈوب گئیں،شہریوں کاسکون غارت

تفصیل کے مطابق ضلع ننکانہ صاحب میں بارش کے باعث شہر کے متعدد مقامات گٹروں کے پانی میں ڈوب گئے ہیں۔ افسران کی بے حسی کے باعث شہر کی صورتحال انتہائی ابتر ہو چکی ہے۔

شہر کے مختلف علاقوں بشمول افسر کالونی، بھٹہ بازار، کینیڈا کالونی، کیارہ صاحب آبادی والے کوارٹر، ڈاکٹر بازار ہاؤسنگ کالونی اور میونسپل کمیٹی والی گلی سمیت دیگر علاقے گندے پانی سے لبریز ہیں۔ میونسپل کمیٹی کے ذرائع کا کہنا ہے کہ سیوریج کی یہ ابتر صورتحال غیر ذمہ داروں کی بطور سپروائزر چیف آفیسر میونسپل کمیٹی کی طرف سے تعینات کیے جانے کی وجہ سے ہے۔ اگر یہی صورتحال رہی تو بہت ساری جگہوں سے مین لائن بیٹھ جائے گی اور پورا شہر گندے پانی میں ڈوب جائے گا۔

شہر کی سڑکیں، بازار اور اندرونی گلیاں سیوریج کے گندے پانی سے بھری ہوئی ہیں جس کی وجہ سے شہری سخت اذیت میں مبتلا ہیں۔ شہریوں نے وزیراعلیٰ پنجاب مریم نواز سے شہر ننکانہ کی ابتر صورتحال پر نوٹس لینے اور نااہل افسران کے خلاف کاروائی کرنے کا مطالبہ کیا ہے۔

ننکانہ صاحب،باغی ٹی وی (نامہ نگاراحسان اللہ ایاز)اپناگھر خواب بن گیا ،شہریوں کی جیبیں خالی، غیرقانونی ہاؤسنگ سکیموں کے پیچھے کون؟

تفصیلات کے مطابق چیف آفیسر اور ڈسٹرکٹ آفیسر پلاننگ کی ملی بھگت سے ننکانہ صاحب میں غیر قانونی ہاؤسنگ اسکیموں کا سیلاب آگیا ہے
جس کی وجہ سے شہری شدید مشکلات کا شکار ہیں۔ غیر قانونی اور غیر منظور شدہ ہاؤسنگ اسکیموں کی بھرمار کے سبب شہریوں کو اپنے رہائشی مسائل کے حل کے لیے ان اسکیموں کے مالکان کے ہاتھوں لٹنا پڑ رہا ہے۔

ذرائع کے مطابق ڈسٹرکٹ کونسل کی پلاننگ برانچ اور ریگولیشن برانچ اس صورتحال پر کوئی مؤثر کارروائی کرنے سے گریزاں ہیں۔ چیف آفیسر اور ڈسٹرکٹ آفیسر پلاننگ، جو ریگولیشن برانچ کے بھی انچارج ہیں، اس صورتحال پر خاموش تماشا دیکھ رہے ہیں۔

محکمہ پلاننگ اور ریگولیشن کی ناکامی کے باعث، ننکانہ شاہ کوٹ روڈ، بچیکی، بڑا گھر، سیدوالا، موڑکھنڈا، مانگٹانوالہ، منڈی فیض آباد، منڈی واربرٹن، ننکانہ صاحب روڈ، اور مانگٹانوالہ روڈ سمیت متعدد علاقوں میں ہاؤسنگ اسکیموں کی تعداد میں اضافہ ہوتا جا رہا ہے۔ ضلع بھر میں صرف ایک یا دو ہاؤسنگ اسکیمیں ہیں جو ڈسٹرکٹ کونسل سے منظور شدہ ہیں، جبکہ باقی تمام اسکیمیں غیر قانونی ہیں اور شہریوں کو دھوکہ دے رہی ہیں۔

سماجی حلقے اور شہری ڈپٹی کمشنر محمد تسلیم اختر راؤ اور صوبائی محتسب پنجاب سے فوری نوٹس لینے اور کارروائی کرنے کا مطالبہ کر رہے ہیں۔ ان حلقوں کا کہنا ہے کہ اگر فوری اقدامات نہ کیے گئے تو شہریوں کی مشکلات میں مزید اضافہ ہو گا اور غیر قانونی ہاؤسنگ اسکیموں کا سیلاب مزید وسیع ہو جائے گا۔

ننکانہ صاحب (باغی ٹی وی نامہ نگاراحسان اللہ ایاز): ننکانہ صاحب کے شاہ کوٹ روڈ پر ینگسن آباد سٹاپ کے قریب تیز رفتار دو موٹر سائیکلوں کی ٹکر میں بھیانک حادثہ پیش آیا ہے۔ اطلاع ملتے ہی ریسکیو 1122 کا عملہ فوری طور پر موقع پر پہنچا۔

حادثے میں 2 خواتین سمیت 4 افراد شدید زخمی ہوئے جبکہ ایک شخص موقع پر ہی دم توڑ گیا۔ ریسکیو اہلکاروں نے زخمیوں کو فوری طبی امداد فراہم کرنے کے بعد ڈسٹرکٹ ہیڈکوارٹر ہسپتال منتقل کیا۔

پولیس کے مطابق حادثے میں جاں بحق ہونے والے شخص کی شناخت 28 سالہ پرویز کے طور پر ہوئی ہے۔ ان کی لاش قانونی کارروائی کے بعد لواحقین کے حوالے کردی گئی۔

زخمیوں میں 24 سالہ صباء، 4 سالہ عثمان، 27 سالہ وسیم اور 18 سالہ آمنہ شامل ہیں۔