Category: ننکانہ

ننکانہ صاحب(باغی ٹی وی،نامہ نگاراحسان اللہ ایاز) گندم کی دوسرے اضلاع میں غیر قانونی منتقلی اور اسمگلنگ کی روک تھام کے لیے ضلعی انتظامیہ نے اپنی کارروائیاں تیز کر دی ہیں، جس کے سلسلے میں ڈپٹی کمشنر محمد تسلیم اختر راؤ نے رات گئے موٹروے انٹرچینج کا ہنگامی دورہ کیا۔ دورے کے دوران ڈپٹی کمشنر نے ناکوں پر تعینات عملے کی حاضری چیک کی اور اپنی نگرانی میں مختلف مشکوک گاڑیوں کی تلاشی کے عمل کا جائزہ لیا۔ انہوں نے شدید سردی اور سخت موسم کے باوجود تندہی سے فرائض سرانجام دینے والے ملازمین کو شاباش دی اور انہیں ہدایت کی کہ گندم کی ہر قسم کی غیر قانونی نقل و حمل پر کڑی نظر رکھی جائے تاکہ ضلع میں گندم کے ذخائر اور عوامی ضرورت کو تحفظ فراہم کیا جا سکے۔

انتظامیہ کے مطابق ضلع بھر میں گندم کی اسمگلنگ کے خلاف دفعہ 144 نافذ العمل ہے اور اس سلسلے میں تمام خارجی و داخلی راستوں پر خصوصی ناکہ جات قائم کر دیے گئے ہیں۔ ڈپٹی کمشنر محمد تسلیم اختر راؤ نے واضح کیا کہ گندم کی اسمگلنگ ایک غیر قانونی عمل ہے جس کی ہرگز اجازت نہیں دی جائے گی اور قانون کی خلاف ورزی کرنے والے عناصر کے خلاف سخت ترین قانونی کارروائی عمل میں لائی جائے گی۔ انہوں نے متعلقہ حکام کو مزید الرٹ رہنے کی ہدایت کرتے ہوئے کہا کہ ضلعی انتظامیہ گندم کی منصفانہ تقسیم اور ذخیرہ اندوزوں کے خاتمے کے لیے ہمہ وقت کوشاں ہے اور اس مشن میں کسی بھی قسم کی کوتاہی برداشت نہیں کی جائے گی۔

واربرٹن (باغی ٹی وی، عبدالغفار چوہدری) واربرٹن کے معروف سیاسی و سماجی رہنما حاجی محمد اکرم آرائیں کے نواسے موحد اویس نے کم عمری میں شاندار کامیابیاں سمیٹ لیں۔ موحد اویس بیکن ہاؤس اسکول لاہور کے پرائمری سیکشن میں دوسری مرتبہ باقاعدہ انتخابی عمل کے ذریعے ہیڈ بوائے منتخب ہو گئے ہیں۔

موحد اویس نے نہ صرف قائدانہ صلاحیتوں کا مظاہرہ کیا بلکہ تعلیمی میدان میں بھی سالانہ بنیادوں پر مثالی کارکردگی کا ثبوت دیا۔ شاندار تعلیمی نتائج پر انہیں چھ گولڈ میڈلز اور متعدد ٹرافیوں سے نوازا گیا۔

تعلیم کے ساتھ ساتھ موحد اویس نے ہم نصابی سرگرمیوں میں بھی نمایاں کامیابیاں حاصل کیں۔ کھیلوں اور موسیقی کے شعبوں میں اعلیٰ کارکردگی کا مظاہرہ کرتے ہوئے انہوں نے کئی میڈلز اپنے نام کیے۔

اہلِ علاقہ، اساتذہ اور معززین نے موحد اویس کی کامیابیوں کو سراہتے ہوئے ان کے روشن مستقبل کیلئے نیک تمناؤں کا اظہار کیا ہے۔

ننکانہ صاحب (باغی ٹی وی، احسان اللہ ایاز): وزیراعلیٰ پنجاب مریم نواز شریف نے ضلع ننکانہ صاحب میں بیوٹیفکیشن کی متعدد ترقیاتی سکیموں کی منظوری دے دی ہے۔ اس حوالے سے ڈپٹی کمشنر ننکانہ صاحب محمد تسلیم اختر راو اور دیگر افسران نے بذریعہ ویڈیو لنک وزیراعلیٰ کی زیر صدارت اجلاس میں شرکت کی۔

اجلاس میں ننکانہ صاحب کے ماڈل بازاروں کی بیوٹیفکیشن کی منظوری دی گئی، جس پر 130 ملین روپے خرچ کیے جائیں گے۔ ترجمان ضلعی انتظامیہ کے مطابق شاہکوٹ سٹی کے ماڈل بازاروں کی بیوٹیفکیشن پلان کی بھی منظوری دی گئی ہے، جس پر 90 ملین روپے لاگت آئے گی۔

اسی طرح تحصیل سانگلہ ہل کے ماڈل بازاروں کی بیوٹیفکیشن کی منظوری دی گئی ہے، جہاں 80 ملین روپے کی لاگت سے کام کیا جائے گا، جبکہ واربرٹن کے ماڈل بازاروں کی بیوٹیفکیشن کیلئے 50 ملین روپے مختص کیے گئے ہیں۔

اجلاس کے دوران ڈپٹی کمشنر ننکانہ صاحب کی بریفنگ پر وزیراعلیٰ پنجاب نے گوردوارہ جنم استھان تک ماڈل روڈ کی تعمیر کی بھی منظوری دے دی۔ ضلع کی پہلی ماڈل روڈ کھیاڑے کلاں انٹرچینج سے گوردوارہ جنم استھان تک تعمیر کی جائے گی۔

ترجمان ضلعی انتظامیہ نے بتایا کہ منظور شدہ بیوٹیفکیشن سمیت تمام ترقیاتی سکیموں پر کام کا باقاعدہ آغاز کر دیا گیا ہے، جن کا مقصد شہری خوبصورتی میں اضافہ اور عوام کو بہتر سہولیات فراہم کرنا ہے۔

ننکانہ صاحب (باغی ٹی وی، نامہ نگاراحسان اللہ ایاز) پروفیسر ڈاکٹر شاہد عمران کو بابا گورو نانک یونیورسٹی ننکانہ صاحب کا مستقل وائس چانسلر تعینات کر دیا گیا ہے۔ اس تقرری کو یونیورسٹی کے علمی وژن کو آگے بڑھانے، تحقیقی سرگرمیوں کو مضبوط کرنے اور ادارہ جاتی ترقی کے فروغ کے لیے ایک اہم قدم قرار دیا جا رہا ہے۔

پروفیسر ڈاکٹر شاہد عمران اعلیٰ تعلیم کے انتظامی شعبے میں وسیع تجربہ رکھتے ہیں اور علمی معیار، جدید تحقیق اور پائیدار ترقی کے فروغ کے لیے پرعزم ہیں۔ انہوں نے اس عزم کا اظہار کیا کہ یونیورسٹی کی مضبوط علمی اور ادارہ جاتی بنیادوں کا قیام اور نئے تعلیمی اداروں کو درپیش چیلنجز کا مؤثر حل تلاش کرنا ان کی اولین ترجیحات میں شامل ہوگا۔

ان کا کہنا تھا کہ بابا گورو نانک یونیورسٹی کو ایک ترقی پسند، مؤثر اور جدید تعلیمی ادارے کے طور پر استوار کرنا ان کے وژن کا محور ہے، جس میں معیاری تدریس، تحقیقی فروغ اور دیرپا ترقی کو بنیادی اہداف کے طور پر اپنایا جائے گا۔

یونیورسٹی حکام، فیکلٹی اراکین اور عملے نے پروفیسر ڈاکٹر شاہد عمران کو اس شایانِ شان تقرری پر مبارکباد پیش کی اور امید ظاہر کی کہ ان کی قیادت میں یونیورسٹی اعلیٰ تعلیمی اور تحقیقی معیار کے حامل ادارے کے طور پر نمایاں مقام حاصل کرے گی۔

ننکانہ صاحب( باغی ٹی وی نامہ نگار احسان اللہ ایاز)ننکانہ صاحب میں چار روزہ قومی انسدادِ پولیو مہم کا باقاعدہ آغاز ہو گیا۔ ڈپٹی کمشنر ننکانہ صاحب محمد تسلیم اختر راو نے ڈی ایچ کیو ہسپتال میں بچوں کو پولیو کے قطرے پلا کر اور فنگر مارکنگ کر کے مہم کا افتتاح کیا۔ انسدادِ پولیو مہم آج سے 18 دسمبر 2025 تک جاری رہے گی۔

اس موقع پر ڈپٹی کمشنر نے بتایا کہ مہم کے دوران پانچ سال تک کی عمر کے دو لاکھ 88 ہزار سے زائد بچوں کو پولیو سے بچاؤ کے قطرے پلائے جائیں گے۔ انہوں نے کہا کہ اس قومی مہم میں مجموعی طور پر 1198 ٹیمیں حصہ لے رہی ہیں، جبکہ ضلع کے داخلی و خارجی راستوں اور بس اسٹینڈز پر بھی پولیو ٹیمیں تعینات کی گئی ہیں۔

ڈپٹی کمشنر محمد تسلیم اختر راو نے والدین سے اپیل کی کہ وہ اپنے بچوں کو پولیو کے قطرے لازمی پلائیں کیونکہ پولیو کے قطرے پلانے سے بچے عمر بھر کی معذوری سے محفوظ رہتے ہیں۔ انہوں نے کہا کہ والدین کو بھی اپنی قومی ذمہ داریاں پوری کرنی ہوں گی۔

انہوں نے ہدایت کی کہ انسدادِ پولیو ٹیمیں محنت، لگن اور جذبے کے ساتھ فرائض انجام دیں اور مہم کے دوران سو فیصد ہدف کے حصول کو یقینی بنایا جائے۔ فیلڈ میں موجود پولیو ورکرز کو ڈیجیٹل ڈیش بورڈ میں درست اندراج کرنے کی بھی تاکید کی گئی، جبکہ تینوں تحصیلوں کے اسسٹنٹ کمشنرز کو اپنی تحصیلوں میں مہم کی خود نگرانی کی ہدایت دی گئی۔

ڈپٹی کمشنر نے واضح کیا کہ پولیو مہم کے دوران فیلڈ اسٹاف کو ہر قسم کی لاجسٹکس اور مکمل سپورٹ فراہم کی جائے گی اور کسی بھی قسم کی غفلت یا کوتاہی برداشت نہیں کی جائے گی۔ انہوں نے کہا کہ ضلعی انتظامیہ نسلِ نو کے محفوظ اور صحت مند مستقبل کے لیے پرعزم ہے اور بچوں کی صحت و حفاظت پر کوئی سمجھوتہ نہیں کیا جائے گا۔

افتتاحی تقریب میں سی ای او ہیلتھ، ڈی ایچ او، ڈی ڈی ایچ او، ایم ایس ڈی ایچ کیو، فوکل پرسن اور میڈیا نمائندگان بھی موجود تھے۔

ننکانہ صاحب (باغی ٹی وی نامہ نگار احسان اللہ ایاز) پاکستان مرکزی مسلم لیگ وسطی پنجاب کے صدر چوہدری حمید الحسن گجر نے تحصیلی صدور سے ضلعی سیکریٹریٹ پاکستان مرکزی مسلم لیگ ننکانہ صاحب میں ضلعی جنرل سیکرٹری ثاقب مجید اور ضلعی رہنما محمد اکرم کے ہمراہ گفتگو کرتے ہوئے کہا کہ انٹرا پارٹی الیکشن میں عوام کا غیر معمولی اعتماد قابلِ ستائش ہے۔

چوہدری حمید الحسن گجر نے کہا کہ یہ اعتماد اس بات کا ثبوت ہے کہ پاکستان مرکزی مسلم لیگ ایسی سیاست پر یقین رکھتی ہے جو خالصتاً خدمت، شفافیت اور عوامی نمائندگی پر مبنی ہے۔ انہوں نے کہا کہ ہمیں سب سے پہلے اللہ تعالیٰ کا شکر ادا کرنا چاہیے کہ اس نے ہمیں عوام کے دلوں میں جگہ دی۔ یہ پذیرائی ہماری توقعات سے زیادہ ہے اور اس انٹرا پارٹی الیکشن میں ہر علاقے کی عوام کا جوش و خروش قابلِ تحسین ہے۔

انہوں نے مزید کہا کہ مختلف علاقوں سے باصلاحیت اور سنجیدہ امیدواروں کا آگے آنا اس بات کی واضح دلیل ہے کہ پاکستان مرکزی مسلم لیگ حقیقی معنوں میں خدمت کی سیاست کر رہی ہے۔ انہوں نے خواتین کی بھرپور شرکت کا ذکر کرتے ہوئے کہا کہ خواتین کا بڑی تعداد میں بطور امیدوار سامنے آنا اور ووٹ کاسٹ کرنا اس بات کی علامت ہے کہ پارٹی کا منشور خواتین کے حقوق، بااختیار بنانے اور سیاسی شمولیت کے لیے عملی جدوجہد کر رہا ہے۔

چوہدری حمید الحسن گجر نے امید ظاہر کی کہ انٹرا پارٹی الیکشن 2025 پارٹی کے اندر جمہوری عمل، شفافیت اور عوامی نمائندہ قیادت کے فروغ میں سنگِ میل ثابت ہوگا۔

ننکانہ صاحب (باغی ٹی وی نامہ نگار احسان اللہ ایاز) ڈپٹی کمشنر ننکانہ صاحب محمد تسلیم اختر راو کی زیرصدارت کرسمس، قائداعظم ڈے اور نئے سال کی تقریبات کے حوالے سے اہم اجلاس منعقد ہوا۔ اجلاس میں ایس پی انویسٹیگیشن حنا نیک بخت، ایڈیشنل ڈپٹی کمشنرز، اسسٹنٹ کمشنرز، ضلعی افسران اور ضلعی امن کمیٹی کے ممبران نے شرکت کی۔ ضلعی اداروں کے سربراہان نے آئندہ تقریبات کے سلسلے میں جاری تیاریاں اور سیکیورٹی پلان پر بریفنگ دی۔

اجلاس میں فیصلہ کیا گیا کہ کرسمس اور نئے سال کے دوران لاوڈ اسپیکر کے غلط استعمال، ون ویلنگ اور سلنسر نکالنے والے موٹر سائیکل سواروں کے خلاف سخت کارروائی کی جائے گی، جبکہ لاہور ویسٹ مینجمنٹ کمپنی کو صفائی ستھرائی کے بہترین انتظامات یقینی بنانے کی ہدایت دے دی گئی۔ ڈپٹی کمشنر نے تمام متعلقہ اداروں کو 20 دسمبر تک اپنے پلان جمع کروانے کا حکم دیتے ہوئے کہا کہ کرسمس کے موقع پر چرچز کے علاقوں میں خصوصی ٹریفک پلان جاری کیا جائے اور متبادل راستے فراہم کیے جائیں۔

ڈپٹی کمشنر نے بتایا کہ تمام چرچز میں ہیلتھ اور ریسکیو کیمپس قائم کیے جائیں گے، جبکہ تینوں تحصیلوں میں سستے بازار بھی لگائے جائیں گے جہاں کرسچن کمیونٹی کو سبسڈائز آٹا اور دیگر ضروری اشیاء فراہم کی جائیں گی۔ انہوں نے ضلع کے تمام وفاقی و صوبائی اداروں کو ہدایت کی کہ 20 دسمبر تک ملازمین کی تنخواہوں کی ادائیگی ہر صورت یقینی بنائی جائے۔ کرسمس کے موقع پر ضلعی کنٹرول روم کے ساتھ تحصیل سطح پر بھی کنٹرول رومز قائم کیے جائیں گے اور چرچز کے اطراف سی سی ٹی وی کیمروں کے ذریعے سخت نگرانی کی جائے گی۔ متعلقہ علاقوں کو لوڈشیڈنگ فری رکھنے کا بھی فیصلہ کیا گیا۔

ڈپٹی کمشنر نے ہدایت کی کہ تقاریب کے دوران چرچز کے اطراف صفائی، پیچ ورک اور دیگر شہری سہولیات کی فراہمی یقینی بنائی جائے۔ قائداعظم ڈے کے موقع پر تمام ضلعی دفاتر، کالجز اور اسکولوں میں تقریبات منعقد کرنے کی بھی ہدایات جاری کی گئیں۔

بعد ازاں کرسمس کے حوالے سے ضلعی امن کمیٹی کا اجلاس بھی ڈپٹی کمشنر کی زیرصدارت ہوا، جہاں کمیٹی ممبران نے ضلع میں امن و امان برقرار رکھنے کی مکمل یقین دہانی کروائی۔ اجلاس کے اختتام پر ملکی سلامتی، امن اور ترقی کے لیے خصوصی دعا بھی کی گئی۔

ننکانہ صاحب (باغی ٹی وی، نامہ نگار احسان اللہ ایاز)ضلعی انتظامیہ نے میونسپل کمیٹیوں کی حدود میں جانور رکھنے پر مکمل پابندی عائد کر دی ہے۔ ڈپٹی کمشنر محمد تسلیم اختر راؤ کی ہدایت پر اس سلسلے میں باضابطہ نوٹیفکیشن بھی جاری کر دیا گیا ہے۔ ضلعی ترجمان کے مطابق پابندی کا اطلاق ضلع کے تمام قصبوں، دیہاتوں کی گلیوں، بازاروں اور رہائشی علاقوں پر ہوگا، جہاں اب کسی بھی قسم کے مویشی باندھنے کی اجازت نہیں ہوگی۔

ترجمان کے مطابق ضلع ننکانہ صاحب کی ریونیو حدود میں سڑکوں کے کنارے جانور باندھنا بھی ممنوع قرار دے دیا گیا ہے۔ انتظامیہ نے تمام مویشی مالکان کو 15 دسمبر 2025 تک اپنے جانوروں کو رہائشی علاقوں سے منتقل کرنے کی ہدایت کی ہے۔

مزید کہا گیا ہے کہ پابندی کی خلاف ورزی کرنے والے افراد کے خلاف میونسپل قوانین کے تحت سخت کارروائی عمل میں لائی جائے گی۔ ڈپٹی کمشنر ننکانہ صاحب نے ضلع کونسل اور میونسپل کمیٹیوں کے افسران کو جاری کردہ نوٹیفکیشن پر سختی سے عملدرآمد یقینی بنانے کی ہدایت بھی جاری کر دی ہے۔

ننکانہ صاحب (باغی ٹی وی نامہ نگار احسان اللہ ایاز) ڈپٹی کمشنر محمد تسلیم اختر راو کی زیرصدارت ضلع ننکانہ صاحب میں ڈسٹرکٹ ڈویلپمنٹ کمیٹی کا اجلاس منعقد ہوا، جس میں ممبران اسمبلی، ڈسٹرکٹ پولیس آفیسر فراز احمد، ایڈیشنل ڈپٹی کمشنرز، اسسٹنٹ کمشنرز اور تمام ضلعی افسران نے شرکت کی۔

اجلاس میں ممبران اسمبلی کو ضلع کے ترقیاتی منصوبوں بشمول سڑکوں، بلڈنگز، بیوٹیفکیشن پروجیکٹس، صحت اور تعلیم کے شعبوں میں جاری کام کی تفصیلی بریفنگ دی گئی۔ شرکاء کو بتایا گیا کہ وزیراعلیٰ پنجاب نے ضلع کی سیوریج، سڑکوں کی بحالی و مرمت اور بیوٹیفکیشن کے لیے اربوں روپے کے فنڈز جاری کر دیے ہیں۔

ممبران اسمبلی نے اجلاس میں ہدایت دی کہ حکومت کی جانب سے منظور شدہ تمام منصوبوں پر فوری کام کا آغاز کیا جائے۔ ضلع کے تمام شہروں کے سیوریج سے متعلق مسائل کو ترجیحی بنیادوں پر حل کیا جائے اور بیوٹیفکیشن و تعمیر و ترقی کے تمام منصوبوں کو جلد از جلد مکمل کیا جائے۔ انہوں نے یہ بھی زور دیا کہ تعمیراتی کاموں میں معیاری میٹریل کا استعمال یقینی بنایا جائے اور ترقیاتی منصوبوں کی رفتار کو تیز کر کے مقررہ مدت میں پایہ تکمیل تک پہنچایا جائے۔

ڈپٹی کمشنر محمد تسلیم اختر راو نے متعلقہ افسران کو واضح ہدایات دیں کہ وہ ممبران اسمبلی کے فیڈ بیک کے مطابق کام کی نگرانی کریں اور ضلع میں ترقیاتی منصوبوں کی شفاف اور بروقت تکمیل کو یقینی بنائیں۔

ننکانہ صاحب (باغی ٹی وی نامہ نگار احسان اللہ ایاز) پاکستان مرکزی مسلم لیگ ضلع ننکانہ صاحب میں انٹرا پارٹی الیکشن کے پہلے مرحلے کا باقاعدہ انعقاد مکمل کر لیا گیا ہے۔ پہلے مرحلے میں ضلع بھر میں رکنیت سازی کا عمل مکمل کیا گیا اور دس یونین کونسلز کی سطح پر صدور کے انتخاب کا عمل شفاف، منظم اور پرامن انداز میں پایہ تکمیل تک پہنچا۔

ضلعی صدر میاں عابد نے اس موقع پر کہا کہ رکنیت سازی اور انٹرا پارٹی الیکشن کا کامیاب انعقاد پارٹی کارکنان کی محنت اور قیادت کی دوراندیشی کا ثبوت ہے۔ انہوں نے کہا کہ یوسی سطح پر منتخب ہونے والی نئی قیادت نہ صرف پارٹی کو گراس روٹ لیول پر مضبوط کرے گی بلکہ مستقبل کے تنظیمی ڈھانچے کی بنیاد بھی رکھے گی۔ میاں عابد نے مزید کہا کہ پاکستان مرکزی مسلم لیگ ہر سطح پر جمہوری اقدار کو فروغ دینے کے عزم کے تحت یہ انتخابی عمل مکمل کیا گیا۔

ضلعی جنرل سیکرٹری ثاقب مجید نے الیکشن کے کامیاب انعقاد پر اطمینان کا اظہار کرتے ہوئے کہا کہ رکنیت سازی سے لے کر پولنگ تک پورا عمل مکمل شفافیت کے ساتھ انجام دیا گیا۔ انہوں نے کہا کہ کارکنان نے بھرپور جوش و خروش کے ساتھ حصہ لیا، جس سے واضح ہوتا ہے کہ ضلع ننکانہ صاحب میں مرکزی مسلم لیگ مضبوط، فعال اور متحد ہے۔ ثاقب مجید نے کہا کہ انٹرا پارٹی الیکشن جماعت کے اندر جمہوری کلچر کو مضبوط کرتے ہیں اور نئے افراد کو قیادت کے مواقع فراہم کرتے ہیں۔

پارٹی کی ضلعی قیادت کے مطابق یوسی سطح پر قیادت کے انتخاب کے بعد دوسرے مرحلے کا شیڈول جلد جاری کیا جائے گا۔ ضلع میں پہلے مرحلے کے کامیاب انعقاد کو سیاسی سرگرمیوں میں نئی روح پھونکنے کے مترادف قرار دیا جا رہا ہے اور اس سے پارٹی میں شفافیت، جمہوری عمل اور تنظیمی مضبوطی کو نئی سمت ملے گی۔