اوکاڑہ(نامہ نگارملک ظفر)شعور ویلفیئر آرگنائزیشن کے زیر اہتمام ایک پروقار تقریب کا انعقاد کیا گیا جس کی صدارت تنظیم کے چیئرمین ڈاکٹر احمد طارق سالوترہ نے کی۔
تقریب میں سماجی خدمات کے اعتراف کے طور پر علی حسن سیال چینوٹی کو تعریفی سرٹیفکیٹ پیش کیا گیا۔ اس موقع پر تنظیم کی ڈائریکٹر محترمہ خان سمیت دیگر عہدیداران اور ٹیم کے ارکان بھی موجود تھے۔
شرکاء نے علی حسن سیال چینوٹی کی خدمات کو سراہا اور کہا کہ نوجوانوں کی حوصلہ افزائی اور ان کی خدمات کو تسلیم کرنا معاشرے میں مثبت رویوں کو فروغ دیتا ہے۔
اوکاڑہ(نامہ نگار ملک ظفر) دریائے ستلج میں اونچے درجے کے سیلاب کے خدشہ کے پیش نظر اوکاڑہ کی ضلعی انتظامیہ نے انخلا اور ریسکیو آپریشن کا عمل تیز کر دیا ہے۔ ڈپٹی کمشنر احمد عثمان جاوید کی ہدایات پر دریائے ستلج سے ملحقہ دیہات سے لوگوں کو محفوظ مقامات پر منتقل کیا جا رہا ہے۔
ایڈیشنل ڈپٹی کمشنر ریونیو محمد شجعین وسطرو نے ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر کے ہمراہ اٹاری کے مقام پر جاری ریسکیو اور ریلیف آپریشن کا جائزہ لیا۔ اس موقع پر ریسکیو 1122 کے اہلکاروں نے پانی میں گھرے کئی افراد کو کشتیوں کے ذریعے نکالا۔ ڈسٹرکٹ ایمرجنسی آفیسر چوہدری ظفر اقبال بھی موقع پر موجود تھے اور خود آپریشن کی نگرانی کر رہے تھے۔
محمد شجعین وسطرو نے ریسکیو اہلکاروں کی کوششوں کو سراہتے ہوئے کہا کہ کسی بھی جانی نقصان سے بچنے کے لیے ریسکیو اور ریلیف سرگرمیوں کو مزید تیز کیا جائے۔ انہوں نے کہا کہ سیلابی صورتحال میں شہریوں کی جان و مال کا تحفظ اولین ترجیح ہے اور متاثرہ دیہات سے تمام لوگوں کے انخلا تک آپریشن بلا تعطل جاری رہے گا۔
انتظامیہ نے شہریوں سے اپیل کی ہے کہ وہ احتیاطی تدابیر اختیار کریں اور کسی بھی ہنگامی صورتحال میں مدد کے لیے فوری طور پر ریسکیو 1122 سے رابطہ کریں۔
اوکاڑہ (نامہ نگار) ایڈیشنل ڈپٹی کمشنر جنرل اوکاڑہ علیزہ ریحان نے ڈی ایچ کیو (ڈسٹرکٹ ہیڈکوارٹر) سٹی ہسپتال کا اچانک دورہ کیا اور وہاں فراہم کی جانے والی طبی سہولیات کا تفصیلی جائزہ لیا۔ اس دورے کا مقصد مریضوں کو دی جانے والی سہولیات اور ہسپتال کی مجموعی کارکردگی کا مشاہدہ کرنا تھا۔
انہوں نے ہسپتال کے مختلف وارڈز کا معائنہ کیا اور مریضوں سے براہِ راست ان کے علاج، تشخیص اور مفت ادویات کی فراہمی کے بارے میں دریافت کیا۔ اس موقع پر انہوں نے ڈسپنسری میں موجود ادویات کے اسٹاک کا بھی جائزہ لیا تاکہ اس بات کو یقینی بنایا جا سکے کہ مریضوں کو ادویات کی کمی کا سامنا نہ ہو۔
دورے کے دوران، علیزہ ریحان نے ہسپتال کے عملے سے کہا کہ وہ عوام کی خدمت کے جذبے کے تحت اپنی ذمہ داریاں ادا کریں۔ انہوں نے ڈاکٹروں اور پیرا میڈیکل سٹاف پر زور دیا کہ وہ مریضوں کی دیکھ بھال اور علاج کے لیے مزید مؤثر اقدامات جاری رکھیں۔ ان کا کہنا تھا کہ ہسپتال میں آنے والے ہر مریض کو بہتر سے بہتر طبی سہولیات فراہم کرنا اولین ترجیح ہونی چاہیے۔
اوکاڑہ (نامہ نگار): سیکرٹری سکول ایجوکیشن پنجاب، خالد نذیر وٹو، نے ضلع اوکاڑہ کا دورہ کیا اور تعلیمی اداروں میں جاری ترقیاتی منصوبوں (ADP schemes) پر پیش رفت کا جائزہ لیا۔ اس سلسلے میں انہوں نے سی ای او ایجوکیشن کے دفتر میں ساہیوال ڈویژن کے اضلاع اوکاڑہ، ساہیوال اور پاکپتن کے چیف ایگزیکٹو افسران (CEOs) کے ساتھ ایک اہم اجلاس کی صدارت کی۔
اجلاس میں وزیراعلیٰ پنجاب کی ایڈوائزر مزمل احمد اور سپیشل ایڈوائزر ایجوکیشن شکیل احمد بھٹی بھی شریک تھے۔ اس موقع پر سی ای او ایجوکیشن اوکاڑہ محمد یوسف کاہلوں، سی ای او ایجوکیشن ساہیوال تنویر احمد غزالی اور سی ای او ایجوکیشن پاکپتن شازیہ رفیق نے مالی سال 2025-26 کے لیے سکولوں میں جاری ترقیاتی سکیموں کے بارے میں تفصیلی بریفنگ دی۔ انہوں نے وزیراعلیٰ پنجاب مریم نواز شریف کا سکولوں کی ترقی کے لیے فنڈز فراہم کرنے پر شکریہ بھی ادا کیا۔
اجلاس کے بعد سیکرٹری سکول ایجوکیشن نے مختلف سکولوں کا دورہ کیا۔ انہوں نے گورنمنٹ سی ایم آر ہائی سکول، گورنمنٹ ماڈل گرلز ہائی سکول اوکاڑہ اور گورنمنٹ گرلز ہائی سکول 1/4 ایل میں عمارتوں کی تعمیر اور مرمت کے کاموں کا معائنہ کیا۔ انہوں نے سکول کونسلز کو ہدایت جاری کیں کہ ترقیاتی کاموں میں مکمل شفافیت کو یقینی بنایا جائے تاکہ ان منصوبوں کو بہترین انداز میں مکمل کیا جا سکے۔
اوکاڑہ (نامہ نگار): ڈی پی او محمد راشد ہدایت کے احکامات پر اوکاڑہ پولیس نے ایک بڑی کارروائی کرتے ہوئے چوری اور ڈکیتی کی وارداتوں میں چھینے گئے 92 موبائل فونز برآمد کر لیے۔ ان موبائل فونز کی مجموعی مالیت 35 لاکھ روپے سے زائد بتائی جاتی ہے۔
پولیس ترجمان کے مطابق، ان موبائل فونز کو ای گیجٹ ایپ کے ذریعے ٹریس کیا گیا۔ برآمد شدہ موبائل فونز کو ڈی پی او آفس کمیونٹی لائنز سینٹر میں منعقدہ ایک تقریب کے دوران ان کے اصل مالکان کے حوالے کر دیا گیا۔
اس موقع پر پولیس کا کہنا تھا کہ نئی ٹیکنالوجی کے استعمال سے شہریوں کی قیمتی اشیاء کی ریکوری ممکن بنائی گئی ہے اور آئندہ بھی شہریوں کے مال و اسباب کی حفاظت کو یقینی بنایا جائے گا۔
اوکاڑہ (نامہ نگار)دیپالپور میں دریائے ستلج میں درمیانے درجے کی سیلابی صورتحال پیدا ہو گئی ہے۔ ہیڈ گنڈا سنگھ کے مقام پر پانی کا بہاؤ 1 لاکھ 11 ہزار کیوسک سے تجاوز کر گیا ہے، جبکہ ہیڈ سلیمانکی کے مقام پر بھی درمیانے درجے کے سیلاب کا خدشہ ہے۔
ڈپٹی کمشنر احمد عثمان جاوید کی ہدایت پر ضلع میں ریسکیو اور ریلیف آپریشنز کو تیز کر دیا گیا ہے۔ ریسکیو 1122 کے اہلکار گذشتہ رات سے دریائی علاقوں کے لوگوں کو محفوظ مقامات پر منتقل کرنے میں مصروف ہیں۔
ترجمان ضلعی انتظامیہ کے مطابق، سیلاب سے متاثرہ علاقوں میں فلڈ ریلیف کیمپس کو مکمل طور پر فعال کر دیا گیا ہے اور متاثرین کو تمام ضروری سہولیات فراہم کرنے کے لیے ہر ممکن کوشش کی جا رہی ہے۔
عوام سے اپیل کی گئی ہے کہ وہ اپنی اور اپنے مال مویشی کی حفاظت کو یقینی بنانے کے لیے دریائے ستلج سے ملحقہ علاقوں سے فوری انخلاء کے لیے انتظامیہ اور ریسکیو اہلکاروں کے ساتھ تعاون کریں۔
اوکاڑہ (نامہ نگار) اسسٹنٹ کمشنر چوہدری رب نواز نے نواحی علاقوں میں متعدد بھٹوں کی اچانک چیکنگ کی۔ اس دوران انہوں نے فضائی آلودگی کے ایس او پیز کی خلاف ورزی کرنے والے ایک بھٹہ مالک پر جرمانہ عائد کیا۔
چوہدری رب نواز نے اس موقع پر کہا کہ فضائی آلودگی کا باعث بننے والے بھٹہ مالکان کو اپنی ذمہ داری کا احساس کرنا چاہیے۔ انہوں نے زور دیا کہ بھٹوں میں ‘زگ زیگ ٹیکنالوجی’ کا استعمال کیا جائے اور ماحول دوست مٹیریل کو ایندھن کے طور پر استعمال کیا جائے۔
انہوں نے واضح کیا کہ ایس او پیز کی خلاف ورزی کرنے والے بھٹہ مالکان کو بھاری جرمانوں کے ساتھ ساتھ قانونی کارروائی اور مقدمات کا بھی سامنا کرنا پڑے گا۔
اوکاڑہ (نامہ نگارملک ظفر) ڈپٹی کمشنر احمد عثمان جاوید کی ہدایت پر سیکرٹری ڈی آر ٹی اے اقصیٰ ریاض نے شہر کے مختلف پرائیویٹ اڈہ جات کا دورہ کیا اور کرایوں کی صورتحال کا جائزہ لیا۔ اس دوران انہوں نے مسافروں سے براہ راست فیڈ بیک بھی حاصل کیا۔
اقصیٰ ریاض نے کہا کہ پٹرولیم مصنوعات کی قیمتوں میں کمی کا فائدہ براہ راست مسافروں تک پہنچنا چاہیے۔ انہوں نے اڈہ مالکان کو ہدایت کی کہ وہ نئے کرایہ نامے نمایاں جگہوں پر آویزاں کریں اور ان پر مکمل عمل درآمد کو یقینی بنائیں۔
انہوں نے خبردار کیا کہ نئے کرایہ ناموں پر عمل نہ کرنے والے اڈہ مالکان کے خلاف سخت کارروائی کی جائے گی اور ان پر بھاری جرمانے بھی عائد کیے جائیں گے۔
اوکاڑہ (نامہ نگار،ملک ظفر )اوکاڑہ میں ڈپٹی کمشنر احمد عثمان جاوید کی ہدایت پر قبضہ مافیا کے خلاف ایک بڑا آپریشن کیا گیا ہے جس میں 51 ایکڑ سرکاری زرعی اراضی واگزار کروا لی گئی۔
یہ آپریشن ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر کی نگرانی میں ریونیو فیلڈ سٹاف اور پیرا فورس کے تعاون سے دیپالپور کے تین نواحی علاقوں میں کیا گیا۔ آپریشن کے دوران واگزار کروائی گئی زمین پر کاشت کی گئی فصلوں پر ٹریکٹر چلا دیا گیا۔
چوہدری عبدالجبار گجر نے بتایا کہ یہ زمین عرصہ دراز سے قبضہ مافیا کے زیر استعمال تھی، جس کی مالیت تقریباً 21 کروڑ روپے ہے۔ انہوں نے واضح کیا کہ سرکاری زمین پر ناجائز قبضہ ہرگز برداشت نہیں کیا جائے گا اور حکومتی ہدایات کے مطابق قبضہ مافیا کے خلاف سخت کارروائیوں کا سلسلہ جاری رہے گا۔
اوکاڑہ ( نامہ نگارملک ظفر)ڈپٹی کمشنر احمد عثمان جاوید کی ہدایت پر ڈی ایچ کیو سٹی ہسپتال کی پارکنگ میں زائد فیس وصول کرنے والوں کے خلاف کارروائی کی گئی ہے۔ اسسٹنٹ کمشنر چوہدری رب نواز نے خود موقع پر پہنچ کر ایکشن لیا۔
کارروائی کے دوران پارکنگ سٹینڈ پر لوگوں سے زیادہ پیسے وصول کرنے والا ایک اہلکار گرفتار کر لیا گیا اور اس کے خلاف مقدمہ درج کیا گیا۔
اسسٹنٹ کمشنر چوہدری رب نواز نے کہا کہ ہسپتالوں کی پارکنگ فیس میں اوور چارجنگ کرنے والے کسی رعایت کے مستحق نہیں ہیں۔ انہوں نے خبردار کیا کہ سرکاری ہسپتالوں کے پارکنگ سٹینڈ کے مالکان قواعد و ضوابط کی پابندی کو یقینی بنائیں، بصورت دیگر ان کے خلاف سخت کارروائی کی جائے گی۔ انہوں نے مزید کہا کہ ناجائز منافع خوری کرنے والوں کے ساتھ آہنی ہاتھوں سے نمٹا جائے گا۔