Category: اوکاڑہ

اوکاڑہ (نامہ نگار) اسسٹنٹ کمشنر چوہدری رب نواز نے نواحی علاقوں میں متعدد بھٹوں کی اچانک چیکنگ کی۔ اس دوران انہوں نے فضائی آلودگی کے ایس او پیز کی خلاف ورزی کرنے والے ایک بھٹہ مالک پر جرمانہ عائد کیا۔

چوہدری رب نواز نے اس موقع پر کہا کہ فضائی آلودگی کا باعث بننے والے بھٹہ مالکان کو اپنی ذمہ داری کا احساس کرنا چاہیے۔ انہوں نے زور دیا کہ بھٹوں میں ‘زگ زیگ ٹیکنالوجی’ کا استعمال کیا جائے اور ماحول دوست مٹیریل کو ایندھن کے طور پر استعمال کیا جائے۔

انہوں نے واضح کیا کہ ایس او پیز کی خلاف ورزی کرنے والے بھٹہ مالکان کو بھاری جرمانوں کے ساتھ ساتھ قانونی کارروائی اور مقدمات کا بھی سامنا کرنا پڑے گا۔

اوکاڑہ (نامہ نگار،ملک ظفر )اوکاڑہ میں ڈپٹی کمشنر احمد عثمان جاوید کی ہدایت پر قبضہ مافیا کے خلاف ایک بڑا آپریشن کیا گیا ہے جس میں 51 ایکڑ سرکاری زرعی اراضی واگزار کروا لی گئی۔

یہ آپریشن ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر کی نگرانی میں ریونیو فیلڈ سٹاف اور پیرا فورس کے تعاون سے دیپالپور کے تین نواحی علاقوں میں کیا گیا۔ آپریشن کے دوران واگزار کروائی گئی زمین پر کاشت کی گئی فصلوں پر ٹریکٹر چلا دیا گیا۔

چوہدری عبدالجبار گجر نے بتایا کہ یہ زمین عرصہ دراز سے قبضہ مافیا کے زیر استعمال تھی، جس کی مالیت تقریباً 21 کروڑ روپے ہے۔ انہوں نے واضح کیا کہ سرکاری زمین پر ناجائز قبضہ ہرگز برداشت نہیں کیا جائے گا اور حکومتی ہدایات کے مطابق قبضہ مافیا کے خلاف سخت کارروائیوں کا سلسلہ جاری رہے گا۔

اوکاڑہ ( نامہ نگارملک ظفر)ڈپٹی کمشنر احمد عثمان جاوید کی ہدایت پر ڈی ایچ کیو سٹی ہسپتال کی پارکنگ میں زائد فیس وصول کرنے والوں کے خلاف کارروائی کی گئی ہے۔ اسسٹنٹ کمشنر چوہدری رب نواز نے خود موقع پر پہنچ کر ایکشن لیا۔

کارروائی کے دوران پارکنگ سٹینڈ پر لوگوں سے زیادہ پیسے وصول کرنے والا ایک اہلکار گرفتار کر لیا گیا اور اس کے خلاف مقدمہ درج کیا گیا۔

اسسٹنٹ کمشنر چوہدری رب نواز نے کہا کہ ہسپتالوں کی پارکنگ فیس میں اوور چارجنگ کرنے والے کسی رعایت کے مستحق نہیں ہیں۔ انہوں نے خبردار کیا کہ سرکاری ہسپتالوں کے پارکنگ سٹینڈ کے مالکان قواعد و ضوابط کی پابندی کو یقینی بنائیں، بصورت دیگر ان کے خلاف سخت کارروائی کی جائے گی۔ انہوں نے مزید کہا کہ ناجائز منافع خوری کرنے والوں کے ساتھ آہنی ہاتھوں سے نمٹا جائے گا۔

اوکاڑہ (نامہ نگار ملک ظفر): دریائے ستلج میں نچلے درجے کے سیلاب کے پیش نظر ڈپٹی کمشنر احمد عثمان جاوید کی ہدایت پر ریسکیو 1122 کی جانب سے سیلاب سے متاثرہ افراد کو محفوظ مقامات پر منتقل کرنے کا عمل جاری ہے۔

ریسکیو 1122 کے 45 اہلکار 6 مختلف ریسکیو پوسٹوں پر امدادی سرگرمیوں میں مصروف ہیں اور اب تک 468 سیلاب متاثرین کو بحفاظت منتقل کر چکے ہیں۔ اس کے علاوہ، 29 مویشیوں کو بھی ریسکیو کیا گیا ہے۔

ضلعی انتظامیہ کے ترجمان نے کہا ہے کہ سیلاب متاثرین کی جان و مال کے تحفظ کو یقینی بنانے کے لیے تمام ممکنہ اقدامات کیے جا رہے ہیں۔ انہوں نے متاثرہ علاقوں کے لوگوں سے غیر ضروری نقل و حرکت سے گریز کرنے اور گہرے پانی میں نہ جانے کی اپیل کی ہے۔

ترجمان نے کہا کہ عوام پی ڈی ایم اے (PDMA) کی ہدایات پر مکمل عمل درآمد کریں اور اپنی جانوں کی حفاظت کو یقینی بنائیں۔ انہوں نے ریسکیو اہلکاروں کے ساتھ بھرپور تعاون کرنے کی بھی درخواست کی۔

اوکاڑہ (نامہ نگار ملک ظفر) کمشنر ساہیوال ڈویژن ڈاکٹر آصف طفیل نے اوکاڑہ کے علاقے اٹاری میں دریائے ستلج میں نچلے درجے کی سیلابی صورتحال کا جائزہ لینے کے لیے دورہ کیا۔ اس موقع پر انہوں نے ضلعی انتظامیہ کے سیلاب سے نمٹنے کے اقدامات کا جائزہ لیا اور متاثرین کی منتقلی اور ریلیف کیمپوں میں فراہم کی جانے والی سہولیات کا معائنہ کیا۔

ڈپٹی کمشنر احمد عثمان جاوید نے کمشنر کو سیلابی صورتحال اور ضلعی انتظامیہ کی تیاریوں کے بارے میں بریفنگ دی۔ محکمہ انہار کے افسران نے پانی کے بہاؤ کے بارے میں تفصیلی معلومات فراہم کیں۔ حکام نے بتایا کہ ہیڈ گنڈا سنگھ پر پانی کا اخراج ایک ہزار کیوسک ہے، جبکہ ہیڈ سلیمانکی پر پانی کی آمد 69 ہزار کیوسک اور اخراج 58 ہزار کیوسک ہے۔

کمشنر نے فلڈ ریلیف کیمپس میں متاثرین کو فراہم کی جانے والی سہولیات کا معائنہ کیا اور ہدایت کی کہ ان کیمپوں میں متاثرین کو بہترین سہولیات فراہم کی جائیں۔ انہوں نے ریسکیو، ہیلتھ، لائیو سٹاک اور سول ڈیفنس سمیت تمام متعلقہ محکموں کو الرٹ رہنے اور ہنگامی صورتحال سے نمٹنے کے لیے تیار رہنے کی ہدایت کی۔ کمشنر نے کہا کہ سیلاب متاثرین کو محفوظ مقامات پر منتقل کرنے کا عمل مسلسل جاری ہے۔

انہوں نے عوام سے اپیل کی کہ وہ سیلابی صورتحال کے دوران گہرے پانی میں جانے سے گریز کریں۔ کمشنر نے یہ بھی بتایا کہ سیلاب متاثرین کی سہولت کے لیے 12 فلڈ ریلیف کیمپس قائم کیے گئے ہیں اور پانی کا بہاؤ معمول پر آنے تک امدادی کارروائیاں جاری رہیں گی۔ انہوں نے ضلعی انتظامیہ کی کاوشوں پر اطمینان کا اظہار بھی کیا۔

اوکاڑہ (نامہ نگار) ڈپٹی کمشنر احمد عثمان جاوید کی ہدایت پر انتظامیہ نے تجاوزات کے خلاف بڑا آپریشن کرتے ہوئے خان کالونی اور حسین کالونی میں متعدد پختہ تجاوزات مسمار کر دیں۔

سب ڈویژنل انفورسمنٹ آفیسر وسیم جاوید کی زیر نگرانی ٹیموں نے عوامی شکایات پر یہ کارروائی کی۔ آپریشن کے دوران ایسی تمام پختہ تجاوزات کو ختم کر دیا گیا جو شہریوں کی آمد و رفت میں دشواری کا باعث بن رہی تھیں۔

اس موقع پر وسیم جاوید نے کہا کہ تجاوزات کے خلاف کارروائیاں حکومتی ہدایات کے مطابق جاری رہیں گی۔ انہوں نے واضح کیا کہ کسی بھی قسم کا دباؤ قبول نہیں کیا جائے گا اور تجاوزات کرنے والوں کے خلاف بلا امتیاز کارروائی عمل میں لائی جائے گی۔ ان کا کہنا تھا کہ اس مہم کا مقصد شہریوں کے لیے راستے ہموار کرنا اور تجاوزات کو ختم کرنا ہے۔