Category: پشاور

پشاور: ایف سی ہیڈکوارٹرز پر ہونے والے خودکش حملے میں ملوث دہشت گرد نیٹ ورک کی نشاندہی کر لی گئی ہے۔

تفتیشی حکام کے مطابق حملے میں شامل خودکش حملہ آوروں کا تعلق ایک کالعدم دہشت گرد تنظیم سے تھا، جنہوں نے واردات سے قبل پشاور میں چند روز قیام کیا اور شہر کے مختلف راستوں سے مکمل واقفیت حاصل کی۔تحقیقات میں انکشاف ہوا ہے کہ خودکش حملہ آوروں کو نہ صرف رہائش فراہم کی گئی بلکہ خودکش جیکٹس کی تیاری اور دیگر لاجسٹک سہولتیں بھی فراہم کی گئیں۔ تفتیشی ذرائع کے مطابق حملہ آوروں نے شہر میں قیام کے دوران حساس مقامات کا جائزہ لیا اور ایف سی ہیڈکوارٹرز تک رسائی کے ممکنہ راستوں کی نشاندہی کی، جس کے بعد حملے کی منصوبہ بندی کو حتمی شکل دی گئی۔

حکام کا کہنا ہے کہ اس کیس کے سلسلے میں اب تک 150 سے زائد افراد سے تفتیش کی جا چکی ہے، جن میں مختلف علاقوں سے تعلق رکھنے والے مشتبہ افراد، سہولت کار اور رابطہ کار شامل ہیں۔ تفتیشی عمل کے دوران اہم شواہد اکٹھے کیے گئے ہیں، جن کی بنیاد پر مزید گرفتاریوں اور کارروائیوں کا امکان ظاہر کیا جا رہا ہے۔

یاد رہے کہ گزشتہ ماہ ایف سی ہیڈکوارٹرز پر ہونے والے خودکش حملے میں سیکیورٹی فورسز کے تین اہلکار شہید جبکہ پانچ زخمی ہوئے تھے۔ حملے کے دوران خودکش بمبار سمیت تین حملہ آور بھی سیکیورٹی اہلکاروں کی جوابی کارروائی میں مارے گئے تھے۔

سیکیورٹی ذرائع کا کہنا ہے کہ دہشت گرد نیٹ ورکس کے خلاف کارروائیاں مزید تیز کی جائیں گی اور حملے میں ملوث تمام عناصر کو قانون کے کٹہرے میں لایا جائے گا۔ عوام سے بھی اپیل کی گئی ہے کہ وہ مشتبہ سرگرمیوں کی فوری اطلاع قانون نافذ کرنے والے اداروں کو دیں تاکہ مستقبل میں ایسے واقعات کی روک تھام ممکن بنائی جا سکے۔

گورنر خیبرپختونخوا فیصل کریم کنڈی نے کہا ہے کہ جنرل فیض کی سزا سے پاکستان کی سیاست پر اچھا اثر پڑے گا، چائے کی پیالی نے بہت زیادہ نقصان پہنچایا،فیض حمید کے ساتھ کوئی اور ملوث ہوگا تو ان کو بھی سزا ملے گی

پشاور میں میڈیا سے گفتگو کرتے ہوئے گورنر خیبر پختونخوا فیصل کریم کنڈی کا کہنا تھا کہ بانی پی ٹی آئی کوئی آسمان سے نہیں اترے کہ انہیں سزا نہ ہو۔ پنجاب حکومت کو کہوں گا بانی پی ٹی آئی کو کہیں اور شفٹ کریں، اڈیالہ سے صوبہ چلایا جارہا ہے، سیکریٹریٹ اڈیالہ منتقل ہوگیا ہے۔ سیکریٹری پریشان ہیں کہ کس کی بات مانیں اور کس کی نہیں، خیبرپختونخوا حساس صوبہ ہے، وفاق اور صوبےکو ایک پیج پر ہونا چاہیے، ڈی پی او کو وزیراعلیٰ انگلی دکھائیں تو پولیس کا مورال کہاں ہوگا،افغانستان کی سرزمین پاکستان کے خلاف استعمال ہو رہی ہے۔ امن اور ترقی کے لیے پہلے لاارڈرز پر توجہ ضروری ہے۔ پولیس اور فوج کے جوان شہید ہو رہے ہیں، حملے بڑھ رہے ہیں، اور سرمایہ کار خوفزدہ ہیں۔

چیف خطیب خیبر پختونخوا اور تاریخی مسجد مہابت خان کے امام و خطیب، مہتمم جامعہ اشرفیہ پشاور مولانا محمد طیب قریشی نے افغانستان کے ایک ہزار سے زائد علماء کرام کی جانب سے جاری کردہ اس بیان کا خیرمقدم کیا ہے جس میں افغان سرزمین کو پاکستان میں دہشت گردی کے لیے استعمال کرنا حرام قرار دیا گیا ہے۔

افغان علماء نے اپنے مشترکہ اعلامیے میں امیرالمؤمنین سے سفارش کی ہے کہ وہ عناصر جو افغانستان کی سرزمین سے پاکستان کے خلاف دہشت گرد کارروائیاں کرتے ہیں، انہیں ریاستی سطح پر باغی قرار دیا جائے۔مولانا طیب قریشی نے اپنے بیان میں کہا کہ اس نوعیت کے اعلانات دونوں برادر مسلم ممالک کو قریب لانے اور باہمی اعتماد کی فضا قائم کرنے میں اہم کردار ادا کریں گے۔ان کے مطابق پاکستان کا دیرینہ مطالبہ رہا ہے کہ افغان حکومت اس بات کو یقینی بنائے کہ اس کی سرزمین پاکستان مخالف سرگرمیوں کے لیے استعمال نہ ہو۔چیف خطیب نے کہا کہ پاکستان ہمیشہ افغانستان کے ساتھ بہتر تعلقات کا خواہاں رہا ہے۔انہوں نے کہا "تاریخ گواہ ہے کہ پاکستان نے افغان بھائیوں کے لیے بے شمار قربانیاں دیں۔ ماضی میں پاکستانی حکومت اور دینی مدارس نے طالبان کی ہر طرح سے مدد کی، جس کے نتیجے میں پاکستان کو سنگین نتائج کا سامنا بھی کرنا پڑا، لیکن طالبان کی حکومت کے بعد جو توقعات تھیں، وہ پوری نہ ہو سکیں۔”ان کا کہنا تھا کہ افغانستان کی موجودہ پالیسیوں سے سب سے زیادہ نقصان افغان حکومت کو ہی ہوگا، جبکہ اس کا فائدہ ان گروہوں کو پہنچے گا جو افغانستان میں عدم استحکام کے منتظر ہیں۔

مولانا طیب قریشی نے افغانستان کے بھارت کے ساتھ بڑھتے معاشی و سفارتی تعلقات پر اظہارِ تشویش کرتے ہوئے کہا کہ یہ اقدام خطے کے مسلمانوں کے جذبات کو مجروح کر رہا ہے۔انہوں نے کہا "جب افغان وزیر تجارت بھارت کے دورے پر تھے، انہی دنوں وزیر اعظم نریندر مودی نے بابری مسجد کی جگہ تعمیر ہونے والے مندر کا افتتاح کیا، جس پر دنیا بھر کے مسلمان احتجاج کر رہے تھے۔ یہ صورتحال مقبوضہ کشمیر اور گجرات کے مظلوم مسلمانوں کے زخموں پر نمک پاشی کے مترادف ہے۔”انہوں نے سوال اٹھایا کہ کیا تجارت کے لیے افغانستان کو 57 اسلامی ممالک میں سے کوئی دوست ملک نہیں ملا؟چیف خطیب نے دونوں ممالک کی قیادت پر زور دیا کہ وہ کشیدگی، غلط فہمیوں اور دوریوں کے خاتمے کے لیے کردار ادا کریں اور خطے کو امن، ترقی اور خوشحالی کی جانب لے جائیں انہوں نے کہا "وقت آگیا ہے کہ ہم سب اپنی ذمہ داریوں کا احساس کریں، اچھے ہمسایوں کی طرح زندگی گزاریں اور ایک دوسرے کے مفادات کا احترام کریں۔ غربت اور بے روزگاری کے خاتمے کے لیے مشترکہ کوششیں کرنا ہوں گی تاکہ آنے والی نسلوں کو وہ مشکلات نہ دیکھنی پڑیں جن کا سامنا آج خصوصاً افغانستان کر رہا ہے۔”

شمالی وزیرستان کی تحصیل میر علی میں گزشتہ رات شدت پسند خوارج نے ایک اور بزدلانہ کارروائی کرتے ہوئے گورنمنٹ پرائمری اسکول ایاز کوٹ خوشخالی کو بم دھماکوں سے تباہ کر دیا۔

دہشت گردوں کی جانب سے نصب کیے گئے دھماکہ خیز مواد کے پھٹنے سے اسکول کی پوری عمارت منہدم ہوگئی، تاہم خوش قسمتی سے کوئی جانی نقصان پیش نہیں آیا۔عینی شاہدین اور مقامی ذرائع کے مطابق دھماکے اتنے شدید تھے کہ دور دور تک آواز سنی گئی، جبکہ اسکول کی عمارت کا بیشتر حصہ ملبے کا ڈھیر بن گیا۔ واقعے کے بعد علاقے میں خوف و ہراس پھیل گیا، اور سیکیورٹی فورسز نے جائے وقوعہ کا محاصرہ کرکے شواہد اکٹھے کرنا شروع کر دیے ہیں۔

علاقہ مکینوں نے اس واقعے کی شدید مذمت کرتے ہوئے کہا ہے کہ تعلیم دشمن عناصر ایک بار پھر ثابت کر رہے ہیں کہ وہ بچوں کے مستقبل سے خوفزدہ ہیں۔ مقامی افراد کا کہنا تھا کہ تعلیمی اداروں کو نشانہ بنانا نہ صرف بزدلی کی علامت ہے بلکہ ترقی کے سفر کو روکنے کی ایک ناکام کوشش بھی ہے۔شہریوں نے حکومت اور سیکیورٹی اداروں سے مطالبہ کیا ہے کہ اس طرح کے واقعات کی روک تھام کے لیے مؤثر اقدامات کیے جائیں اور علاقے میں تعلیمی سرگرمیوں کو بحال رکھنے کے لیے سخت سیکیورٹی فراہم کی جائے۔

سیکیورٹی ذرائع کے مطابق دھماکے کی نوعیت اور استعمال ہونے والے مواد کے بارے میں تحقیقات جاری ہیں، جبکہ ذمہ دار عناصر کی تلاش کے لیے سرچ آپریشن بھی شروع کر دیا گیا ہے۔مقامی آبادی نے عزم ظاہر کیا ہے کہ دھماکوں اور تخریب کاری کے باوجود وہ اپنے بچوں کو تعلیم سے دور نہیں ہونے دیں گے اور ترقی کا سفر ہر صورت جاری رکھیں گے۔