Category: پشاور

سوشل میڈیا پر ایک کمسن بچی طفلکہ فاطفہ گل پر تشدد کی ویڈیو وائرل ہونے کے بعد عوامی سطح پر شدید غم و غصے کا اظہار کیا گیا اور واقعے کو نہایت افسوسناک اور دل خراش قرار دیا گیا۔

ترجمان پولیس کے مطابق افسران بالا کی ہدایت پر پشاور پولیس نے فوری ایکشن لیتے ہوئے ویڈیو میں ملوث خاتون کا سراغ لگا لیا۔ایس ایچ او تھانہ شاہ پور عمران خان نے تفتیشی طریقہ کار اور علاقائی معلومات کی بنیاد پر خاتون مسماۃ (ص) زوجہ عدنان کا سراغ لگا لیا جو کہ شاہ پور کے علاقے وڈپگہ میں والد کے گھر میں رہائش پذیر ہے۔ ابتدائی تفتیش کے دوران معلوم ہوا کہ ویڈیو میں بچی پر تشدد کرنے والی خاتون دراصل بچی کی سگی والدہ ہے۔ملوث خاتون نے پولیس کو بیان دیتے ہوئے اعتراف کیا کہ ویڈیو اس نے اپنے شوہر عدنان کے گھر واقع ہشتنگری کچی محلہ میں گھریلو ناچاقی کے دوران بنائی تھی۔ خاتون نے مزید بتایا کہ وہ میکے علاقہ شاہ پور آئی ہوئی ہے اور ویڈیو سوشل میڈیا پر اس کی دیورانی نے اپ لوڈ کی۔خاتون نے اپنے کیے پر ندامت کا اظہار کرتے ہوئے پولیس اور عوام سے معافی مانگی اور یقین دہانی کرائی کہ مستقبل میں ایسا کوئی اقدام نہیں دہرایا جائے گا۔

گورنر خیبرپختونخوا فیصل کریم کنڈی نے وزیراعلیٰ سہیل آفریدی کو چھوٹی کابینہ تشکیل دینے کا مشورہ دے دیا۔

پشاور میں میڈیا سے گفتگوکرتے ہوئےگورنر کے پی نے کہا کہ وزیراعلیٰ سہیل آفریدی کو عمران خان سے ملاقات تک چھوٹی کابینہ تشکیل دینی چاہیے کیونکہ کابینہ نہ ہونے کے باعث بہت سے اہم فیصلے اور فائلیں رکی ہیں،وزیراعلیٰ صاحب نے بانی سے ملاقات کرکے صرف منتیں کرنی ہیں، سہیل آفریدی کو عمران خان سے ملاقات ہونے تک بڑوں کی مشاورت سے چھوٹی کابینہ تشکیل دینی چاہیے، وزیراعلیٰ کو وزیراعظم کے اجلاس میں شرکت کرنی چاہیے تھی، ایسے فورمزکو خالی نہیں چھوڑنا چاہیے۔

افغان خارجی دہشت گرد سطورے کا اعترافی بیان سوشل میڈیا پر سامنے آگیا۔

افغان خارجی دہشت گرد سطورے ننگرہار کے علاقے خوگیانہ کا رہائشی ہے جس کا کہنا ہے کہ اس نے گورنمنٹ کالج حضرت خان ننگرہار سے انٹرمیڈیٹ مکمل کیا اور غزنی یونیورسٹی سے فقہ میں بیچلرز مکمل کیا، کابل کے مدرسے عبداللّٰہ ابن زبیر میں درس و تدریس سے بھی منسلک رہا۔ ننگرہار میں ادویات کی ڈیلیوری کے کام میں ملازمت کی،مجھے کابل میں ٹی ٹی پی کمانڈر قاری محمد سے ملوایا گیا، میں نے قاری محمد کے ہاتھ پر بیعت کی، وہ علاج کے لیے پشاور آیا اور علاج کے بعد کمانڈر قاری محمد نے پشاور کے ایک مدرسے میں داخلہ لینے کا حکم دیا، کمانڈر قاری محمد نے قانون نافذ کرنے والے اداروں پر حملوں اور ٹارگٹ کلنگ کی منصوبہ بندی کا بھی حکم دیا. کابل سے کمانڈر قاری محمد نے ایک عالم دین کو نشانہ بنانے کا حکم دیا، ٹارگٹ کلنگ کا منصوبہ بنا رہا تھا کہ گرفتار ہوگیا۔

بنوں میں شادی کی تقریب میں موسیقی کے دوران 2 گروپوں میں فائرنگ سے 3 افراد جاں بحق اور 8 زخمی ہوگئے۔

پولیس کے مطابق بنوں کے علاقے نار جعفر میں رات گئے شادی کی تقریب میں موسیقی جاری تھی اور ڈی جے میوزک پر خواجہ سرا رقص کر رہے تھے کہ اس دوران خواجہ سرا کو چھیڑنے پر دونوں گروپوں میں جھگڑا ہوگیا ،اس دوران دونوں گروپ جو اسلحے سے لیس تھے ، ایک دوسرے پر فائرنگ شروع کردی جس کے نتیجے میں 3 افراد جاں حق اور 8 زخمی ہوگئے،پولیس کا کہنا ہے کہ جاں بحق اور زخمیوں کو ڈسٹرکٹ ہیڈ کوارٹر اسپتال منتقل کردیا گیا ہے ،جن میں 3 افراد کی حالت تشویشناک ہے۔

گورنر پنجاب سلیم حیدر کا کا کہنا ہے کہ حکومت سے الائنس محبت کا نہیں مجبوری کا ہے، دونوں جماعتوں کے کارکن ایک دوسرے کو قبول کرنے کو تیار نہیں، کوشش کررہے ہیں پنجاب میں معاملات بہتر ہوں، وزیراعظم نے پیپلزپارٹی کے تحفظات دور کرنے کی یقین دہانی کرائی۔

گورنر پنجاب سلیم حیدر نے پشاور میں میڈیا سے گفتگو کرتے ہوئے کہا کہ سیاسی لوگوں کو سیاسی طور پر ہی ڈیل کرنا چاہیے، ملک کی بہتری اسی میں ہے کہ موجودہ حکومت چلتی رہے، سسٹم ڈی ریل ہوجائے تو دوسرا کوئی راستہ نہیں۔ان کا کہنا ہے کہ سہیل آفریدی کو بانی سے ملنے کی اجازت دینی چاہئے، ملاقات سے قیامت تو نہیں آجائےگی، 26ویں آئینی ترمیم کو تسلیم کرتے ہیں۔گورنر پنجاب سلیم حیدر نے گندم کی نقل و حرکت پر پابندی کیخلاف وزیر اعلیٰ مریم نواز سے بات کرنے کا اعلان کردیا۔

خیبر پختونخوا کے ضلع ٹانک میں رات گئے نامعلوم افراد نے ایک گرلز پرائمری اسکول کو دھماکے سے تباہ کردیا۔ پولیس کے مطابق واقعہ ٹانک کے علاقے گرہ بڈھا میں پیش آیا جہاں شرپسند عناصر نے اسکول کی عمارت میں نصب دھماکا خیز مواد کو ریموٹ کنٹرول کے ذریعے اڑا دیا۔

ڈی پی او ٹانک شبیر حسین شاہ نے تصدیق کی کہ دھماکے کے نتیجے میں گرلز پرائمری اسکول کی عمارت مکمل طور پر منہدم ہوگئی، تاہم خوش قسمتی سے واقعے میں کسی قسم کا جانی نقصان نہیں ہوا کیونکہ اسکول اس وقت بند تھا۔پولیس کے مطابق، دھماکے کی آواز دور دور تک سنی گئی جس سے علاقے میں خوف و ہراس پھیل گیا۔ مقامی رہائشیوں کا کہنا ہے کہ اسکول تباہ ہونے سے علاقے کی بچیوں کی تعلیم شدید متاثر ہوگی، کیونکہ وہی واحد تعلیمی ادارہ تھا جہاں درجنوں طالبات زیرِ تعلیم تھیں۔ڈی پی او نے مزید بتایا کہ ملزمان کی گرفتاری کے لیے علاقے کی ناکہ بندی کر دی گئی ہے اور سرچ آپریشن جاری ہے۔ پولیس اور سیکیورٹی اداروں نے شواہد اکٹھے کرکے تحقیقات کا آغاز کردیا ہے۔