شمالی وزیرستان میں گاڑی پر فائرنگ سے 6 افراد جاں بحق ہوگئے۔
ڈسٹرکٹ پولیس آفیسر کے مطابق فائرنگ کا واقعہ شمالی وزیرستان کے علاقے میرعلی میں پیش آیا جہاں مسلح افراد نے ایک گاڑی کو نشانہ بنایا،ڈی پی او نے بتایا کہ مسلح افراد کی فائرنگ کے نتیجے میں 6 افراد جاں بحق ہوگئے جب کہ فائرنگ کی وجہ سے گاڑی میں آگ لگ گئی،ڈی پی او کا کہنا ہےکہ واقعے کے بعد ملزمان فرار ہوگئے جب کہ مقتولین کی لاشوں کو شناخت کے لیے میر علی اسپتال منتقل کردیا گیا ہے۔
سیکیورٹی فورسز کی باجوڑ کے علاقے میں خوارجین کیخلاف کامیاب کارروائیاں جاری ہیں
سیکیورٹی فورسز نے شاہی تنگی جنگل میں موجود خوارجین کے ٹھکانوں اور سرنگوں کا مکمل طور پر صفایا کردیا، خفیہ اطلاعات کی بنیاد پر شاہی تنگی کے جنگل میں موجود ایک غار پر گھات لگا کر سیکیورٹی فورسز نے بھرپور کارروائی کی ، کارروائی کے دوران خوارجیوں اور فورسز کے درمیان شدید فائرنگ کا تبادلہ بھی ہوا، فائرنگ کے نتیجے میں ایک خوارجی جہنم واصل جبکہ دیگر زخمی خوارجی علاقے سے فرار ہو گئے،سیکیورٹی فورسز نے علاقے میں موجود سرنگوں اور قریبی مقامات کو بھی کلئیر کر دیا ،کارروائی کے دوران خوارجیوں کے زیر استعمال اسلحہ، بارودی مواد اور مواصلاتی آلات بھی برآمد کر لیے گئے، پاک فوج اور سیکیورٹی ادارے ملک سے دہشتگردی کے ناسور کو ختم کرنے کیلئے پرعزم ہیں
وادی تیراہ میں خوارج سے مقامی لوگوں پر مشتمل خیبر گرینڈ جرگہ کے مذاکرات کا دوسرا دور مکمل ہوگیا۔ مذاکرات میں خوارج کے دو گروپوں سے مقامی عمائدین کی بات چیت ہوئی جس میں علاقہ خالی کرنے پر غور اور مذاکراتی عمل جاری رکھنے پر اتفاق کیا گیا۔
مذاکرات کا انعقاد وادی تیراہ باغ میں ہوا۔ جرگہ میں تحصیل لنڈی کوتل سے ملک تاج الدین، مفتی محمد اعجاز، ملک رزاق ذخہ خیل، ملک طاہر خان، ملک زیر احمد شاہ، ملک خالد خان اور ملک پرویز، تحصیل جمرود سے ملک صلاح الدین، چیئرمین عبدالمنان مدوخیل، ملک سید غا جان کے علاوہ باڑہ سیاسی اتحاد کے قائدین نے شرکت کی۔جرگہ ذرائع کے مطابق ارکان نے خوارج کے دو مختلف گروپوں سے علیحدہ علیحدہ ملاقاتیں کیں۔ پہلا گروپ حافظ گل بہادر، لشکرِ اسلام اور جماعت الاحرار کے نمائندوں پر مشتمل تھا، جبکہ دوسرا گروپ کالعدم تحریکِ طالبان پاکستان (ٹی ٹی پی) سے وابستہ تھا۔
ذرائع کا کہنا ہے کہ جرگہ ممبران نے دونوں گروپوں کو واضح پیغام دیا کہ اگر انہوں نے علاقہ خالی نہ کیا تو سیکیورٹی فورسز کی جانب سے آپریشن ناگزیر ہوگا، جس سے مقامی آبادی کو نقل مکانی اور جانی و مالی نقصانات کا سامنا کرنا پڑ سکتا ہے۔خوارج گروپوں نے جرگہ کو بتایا کہ وہ مقامی آبادی کو نقصان سے بچانے کے لیے علاقے سے انخلا پر غور کر رہے ہیں اور اس سلسلے میں مذاکرات جاری رکھنا چاہتے ہیں۔ دونوں گروپوں نے اتفاق کیا کہ وہ اپنے اعلیٰ قیادت سے مشاورت کے بعد حتمی فیصلہ کریں گے۔ذرائع کے مطابق جرگہ نے امید ظاہر کی ہے کہ آئندہ ملاقاتوں میں فریقین کسی نتیجے پر پہنچ جائیں گے تاکہ خطے میں پائیدار امن قائم کیا جا سکے۔
فتنہ الخوارج کے خلاف پاکستان کی افواج کی کارروائی کے بارے میں خیبر پختونخوا کے عوام نے اپنی آراء کا اظہار کرتے ہوئے پاک فوج کی مکمل حمایت کا اعلان کیا ہے۔
ایک شہری نے کہا کہ پاکستانی فوج نے افغانستان میں جو کارروائی کی ہے یہ ایک بہت اچھا اقدام ہے۔ دوسرے شہری کا کہنا تھا کہ اگر افغان طالبان فتنہ خوارج کو ختم نہیں کرتے تو پھر ہماری فوج کی یہ مجبوری ہے کہ وہ ختم کرے۔ایک اور شہری نے کہا کہ پاکستان آرمی نے جو حملہ افغانستان میں کیا، جتنا جلدی یہ دہشتگردی کا گند صاف کیا جائے گا اتنا اچھا ہوگا۔ ایک اور شہری نے بتایا کہ ہم پاک فوج کے ساتھ ہر قسم کے تعاون کے لیے تیار ہیں۔باجوڑ سے تعلق رکھنے والے ایک شہری نے افغانیوں کو مکمل طور پر پاکستان سے نکال دینے کا مطالبہ کیا۔
خیبر پختونخوا کابینہ کی تشکیل کا عمل تاخیر کا شکار ہو گیا ہے۔
سرکاری ذرائع کے مطابق وزیراعلیٰ کے حلف اٹھانے کے باوجود صوبہ گزشتہ 6 دنوں سے بغیر کابینہ کے چل رہا ہے، جس کے باعث اہم پالیسی فیصلے اور منصوبوں کی منظوری التوا کا شکار ہیں۔ذرائع کے مطابق وزیراعلیٰ سہیل آفریدی کابینہ میں کچھ نئے چہرے شامل کرنا چاہتے ہیں، اسی لیے مشاورت کا عمل طول پکڑ گیا ہے۔
سابق مشیر خزانہ خیبر پختونخوا مزمل اسلم نے نجی نیوز چینل سے گفتگو میں کہا کہ کابینہ نہ ہونے کے باعث صوبائی انتظامیہ کو مشکلات درپیش ہیں۔ ان کے مطابق امید ہے کہ وزیراعلیٰ رواں ہفتے بانی پی ٹی آئی سے ملاقات کریں گے، تاہم اگر ملاقات نہ ہوئی تو مختصر کابینہ تشکیل دینے کی ہدایات پہلے ہی موجود ہیں۔مزمل اسلم نے بتایا کہ ترقیاتی منصوبوں کے لیے دوسرے سہ ماہی کے فنڈز جاری کر دیے گئے ہیں تاکہ ترقیاتی عمل متاثر نہ ہو.
صوبہ خیبرپختونخوا کے وزیراعلیٰ سہیل آفریدی نے کہا ہے کہ افغانستان سمیت جو بھی حملہ کرے گا اس کو بھرپور جواب ملے گا۔
پشاور میں صحافیوں سے غیر رسمی گفتگو میں سہیل آفریدی کا کہنا تھاکہ مجھے کسی کے خلاف نہیں لایا گیا، آئین اورقانون کی بالادستی کے لیے آیا ہوں، ہمارا ہر قدم قانون اور آئین کے مطابق ہوگا، پرامن احتجاج کرینگے، یہ صوبہ ہم سب کا ہے، گزشتہ حکومت میں ہم تھوڑے کمزور تھے، ہم عدالتوں میں جنگ لڑرہے ہیں، انصاف نہ ملاتواحتجاج ہی کرینگے،افغانستان سمیت جو بھی حملہ کرے گا اس کو بھرپور جواب ملے گا، پاکستان کے خلاف کوئی بھی جارحیت کرے تو ہم فوج کے ساتھ کھڑے ہونگے، یہاں سے 8 لاکھ افغان مہاجرین واپس گئے، 12لاکھ اب بھی ہیں، باعزت طورپربھجوائیں گے، افغان مہاجرین نے اتناوقت یہاں گزارا تو باعزت واپس جائیں،میں حکومت چلانے نہیں تبدیلی کے لیے آیا ہوں، بانی پی ٹی آئی سے ملاقات کا وقت نہ ملاتو کابینہ سے متعلق مشاورت کے لیے پارٹی سے بات کروں گا۔
سہیل آفریدی کا کہنا تھاکہ پہلے مجھے ٹارگٹ کیا گیاپھر آئینی عمل روکا گیا کیا، یہ طریقہ ہے؟ میں نے چیف جسٹس کو خط لکھا اور ہائیکورٹ میں درخواست دائر کی جو اعتراضات دور کرکے پیرکو دوبارہ دائرکرینگے، جسے بانی پی ٹی آئی کہیں گے وہی کابینہ میں ہوگا ورنہ نہیں، کابینہ کے اہل اور نااہل ارکان کے بارے میں بانی کوبتاؤں گا، بانی نے صرف مزمل اسلم کو کابینہ میں شامل کرنے کا کہا ہے، ایڈوائزری کونسل کی بات پارٹی میں ہوئی نہ کسی نے بات کی، بحیثیت ورکرپارٹی تنظیم اور وزیراعلیٰ کے طورپر صرف عمران خان کوجوابدہ ہوں،صنم جاوید کے حوالے سے خاص نہیں، عام ہدایات تھیں اور یہ ہدایت تمام سیاسی ورکروں کے لیے تھیں کہ کسی سیاسی ورکرکو گرفتارنہ کیاجائے، صنم جاوید کی رپورٹ ملی لیکن مطمئن نہیں دوبارہ لوں گا۔
لنڈی کوتل (باغی ٹی وی رپورٹ)طورخم مزدور یونین کے چیئرمین ذاکر عمر شینواری اور پریس سیکرٹری علی رحمان شینواری نے ڈسٹرکٹ پریس کلب لنڈی کوتل (رجسٹرڈ) میں پریس کانفرنس کرتے ہوئے کہا کہ پاک افغان طورخم بارڈر کی بندش سے تاجروں، ٹرانسپورٹرز اور مزدوروں کو سخت مشکلات کا سامنا ہے۔
انہوں نے کہا کہ بارڈر سے وابستہ ہزاروں افراد، خصوصاً مزدور اور ٹرانسپورٹرز، اپنی روزی روٹی سے محروم ہوچکے ہیں جبکہ امپورٹ و ایکسپورٹ کے عمل کی بندش سے مقامی معیشت بری طرح متاثر ہوئی ہے۔ مسافروں اور مریضوں کو بھی دونوں جانب آمد و رفت میں شدید دشواریوں کا سامنا ہے۔
ذاکر عمر شینواری نے بتایا کہ طورخم میں پندرہ سو مزدور رجسٹرڈ ہیں جو مکمل طور پر بارڈر پر محنت مزدوری کے ذریعے اپنے خاندانوں کا گزر بسر کرتے ہیں۔ انہوں نے کہا کہ ہم امن کے خواہاں ہیں اور پاک افغان حکام سے مطالبہ کرتے ہیں کہ تمام مسائل کو جنگ کے بجائے مذاکرات کے ذریعے حل کیا جائے کیونکہ جنگ کسی مسئلے کا حل نہیں بلکہ تباہی اور نقصان کا سبب بنتی ہے۔
انہوں نے مزید کہا کہ طورخم سمیت تمام پاک افغان بارڈرز کو فوری طور پر کھولا جائے تاکہ مزدوروں، تاجروں اور عوام کی مشکلات میں کمی آسکے۔ آخر میں انہوں نے اسلام آباد اور کابل کی حکومتوں سے اپیل کی کہ تمام حل طلب امور کو سفارتی سطح پر بات چیت کے ذریعے حل کیا جائے تاکہ دونوں ممالک کے عوام امن، روزگار اور خوشحالی کی راہ پر گامزن ہوسکیں۔
کوہستان کرپشن اسکینڈل کیس میں اہم پیشرفت، نیب نے مرکزی ملزم قیصر اقبال کو اہلیہ سمیت گرفتار کرلیا۔
کوہستان کرپشن اسکینڈل کیس میں اہم پیشرفت ہوگئی، نیب نے ملزم قیصراقبال کو اہلیہ سمیت گرفتار کرلیا، وہ کافی عرصہ سے ایبٹ آباد میڈیکل کمپلیکس میں زیر علاج تھا۔نیب ذرائع کے مطابق ملزم کو اسپتال سے ڈسچارج ہوتے ہی گرفتار کرلیا گیا، ملزم نے اپنی اہلیہ اور ٹھیکیدار کے اکاؤنٹ میں اربوں روپے منتقل کیے تھے،نیب ذرائع کا کہنا ہے کہ کوہستان کرپشن اسکینڈل کے مرکزی ملزم نے اپنی اہلیہ اور بھانجے کے نام پر کروڑوں روپے کی جائیدادیں بنائیں۔نیب ذرائع کے مطابق ملزمان قیصر اقبال کو احتساب عدالت میں جسمانی ریمانڈ کیلئے پیش کیا جائے گا۔
عمران خان کے احکامات پر صوبہ بھر میں ہونے والے احتجاجی مظاہروں کی تفصیل
* پشاور- پشاور پریس کلب سہ پہر 3بجے،
* مانسہرہ- ختم نبوت چوک دن 2بجے،
* نوشہرہ- شوبرا چوک سہ پہر چوک 4بجے،
* بونیر- پی کے 25 ڈگر چوک نیشنل بینک کے سامنے بعد نماز جمعہ 2 بجے،
* مہمند- میاں منڈی بازار، صبح 10بجے،
* کرک: تحصیل چوک تا صدام چوک بوقت 3 بجے
* ملاکنڈ : تحصیل درگئی میں چوک درگئی بازار 3 بجے
* مردان- مردان پریس کلب، سہ پہر 3بجے،
* مردان- تحصیل کاٹلنگ مین بازار، سہ پہر 3بجے
* مردان- تحصیل رستم، رستم بازار، سہ پہر 3بجے،
* مردان- تحصیل گھڑی کپورہ دن 2:30بجے
* مردان- تحصیل تخت بھائی، شیرگڑھ بازار، سہ پہر 3بجے
۰ ایبٹ آباد: کالج روڈ منڈیاں نزد نواز اسٹیٹ آفس، 2بجے،
* مالاکنڈ تحصیل بٹ خیلہ بازار بائی پاس پل، دن 2بجے،
•بٹگرام – ختم نبوت چوک بٹگرام بعد نماز جمعہ 2 بجے
* ٹانک- جامع مسجد پیر سلیم شاہ ٹانک سٹی بوقت 2بجے
* بنوں- پی کے102 بنوں پریس کلب، 1بجے،
* بونیر- پی کے26 شہیدی سر چغرزئی، دن 2بجے،
•بٹگرام- ختم نبوت چوک، دن 2بجے
پشاور ہائیکورٹ نے وزیراعلیٰ خیبر پختونخوا کے انتخاب کے خلاف جے یو آئی ف کی درخواست خارج کر دی۔
وزیر اعلیٰ خیبر پختوںخوا کے انتخاب کے خلاف جے یو آئی ف کی درخواست پر سماعت پر پشاور ہائیکورٹ نے کہا آپ کے پاس دو راستے ہیں یا تو درخواست واپس لیں یا ہم فیصلہ کرتے ہیں،جے یو آئی کے وکیل نے کہا آپ میرٹ پر فیصلہ کریں، جس پر عدالت نے درخواست پر فیصلہ محفوظ کر لیا،بعد ازاں عدالت نے نو منتخب وزیر اعلیٰ کے انتخاب کے عمل کے خلاف جے یو آئی ف کی درخواست پر فیصلہ سناتے ہوئے درخواست خارج کر دی۔
دوران سماعت عدالت میں پی ٹی آئی کے وکیل سلمان اکرم راجا نے کہا صوبہ بغیر وزیراعلیٰ کے چل رہا ہے، چیف جسٹس کے احکامات نظر انداز نہیں کر سکتے، جب تک چیف جسٹس کے احکامات کالعدم قرار نہ دیے جائیں، اس پر عملدرآمد کیا جائے گا۔
یاد رہے کہ گزشتہ روز پشاور ہائیکورٹ کے چیف جسٹس نے پی ٹی آئی کی درخواست پر گورنر کے پی فیصل کریم کنڈی کو احکامات جاری کیے تھے کہ نو منتخب وزیراعلیٰ کے پی سہیل آفریدی سے عہدے کا حلف لیں،عدالت کا کہنا تھا اگر گورنر کے پی، سہیل آفریدی سے حلف نہیں لیتے تو پھر اسپیکر کے پی ان سے عہدے کا حلف لیں۔