Category: پشاور

وزیراعلیٰ خیبر پختونخوا علی امین گنڈا پور نے کہا ہے کہ دہشت گردی پر بانی پی ٹی آئی کی پالیسی ہے کہ مذاکرات واحد حل ہیں،

پریس کانفرنس کرتے ہوئے علی امین گنڈا پور کا کہنا تھا کہ پی ٹی آئی دور حکومت میں ملک سے دہشت گردی ختم ہو چکی تھی، تحریک انصاف کو ختم کرنے کے لئے ریاست پورا زور لگا رہی ہے، نتیجہ یہ نکلا کہ دہشت گردی نے دوبارہ جنم لے لیا، عوام اور اداروں کے درمیان ایک خلا آ گیا ہے ایسے حالات میں دہشت گردی کے خلاف جنگ نہیں ہو سکتی، بانی پی ٹی آئی کی حکومت جس طرح ہٹائی گئی اس پر تحفظات ہیں ،وفاقی حکومت اور اداروں نے افغانستان حکومت کے ساتھ مذاکرات کی حامی بھری تھی، ابھی تک مذاکرات کے لئے ٹی او آر نہیں بنائے جا سکے، مذاکرات کے لئے وفاقی حکومت ہمارا ساتھ نہیں دے رہی،وفاقی حکومت کے پاس دہشت گردی کے خلاف جنگ کے لئے استطاعت نہیں ہے، ہماری ذمہ داری ہے کہ ہم نے شہریوں کو تحفظ دینا ہے، صوبائی ایکشن پلان پرکام شروع ہو چکا ہے، صوبائی ایکشن پلان ماضی کے تجربات کو مدنظر رکھ کر بنایا گیا ہے،دہشت گردی کے خلاف جنگ کے لئے عوام کی حمایت بہت ضروری ہے،حکومت افغانستان کے ساتھ مذاکرات کے لئے ہمارا ساتھ دے،قوم اپنی افواج، قانون نافذ کرنےو الے اداروں ، پولیس کیساتھ ہے ،
علی امین گنڈا پور کا مزید کہنا تھا کہ ہمیں دیکھنا چاہیے کہ ہمارے لوگوں نے ہتھیار کیوں اٹھائے، ہوسکتا ہے، ہماری ہی غلطیوں ہوں ، ہوسکتا ہے پالیسی کے مسائل ہوں ، اب ہمارے لوگوں نے ہتھیار اٹھالیے ہیں تو ان سے بات کرنی چاہیے ، افغانستان کیساتھ تعلقات خراب ہوتے جا رہے ہیں ، ہمارے دور حکومت میں دہشتگردی ختم ہوئی اور پھر حکومت ختم کردی گئی، اس وقت جو ملک میں دہشت گردی کے واقعات ہیں اس کا حل ہمارے پاس ہے، افغانستان کے ساتھ مذاکرات کے بغیر مثبت نتائج نہیں ملیں گے افغان مہاجرین کی واپسی پر بھی حکومت کی پالیسی غلط ہے،وفاقی حکومت کی جانب سے افغان مہاجرین کے ساتھ سلوک پر انسانی حقوق کی خلاف ورزی کی گئی، صوبے کی انتظامیہ کسی کو زبردستی خیبرپختونخوا سے نہیں نکالے گی،اپریل میں این ایف سی ایوارڈ کے حوالے سے حتمی فیصلہ ہونا ہے، اگر حق نہ ملا تو دکھاؤں گا کہ ہمارے صوبے کی عوام اتنی لاچار نہیں ہے،پارا چنار کا مسلئہ بہت پرانا اور دیرینہ ہے، ہم نے پاراچنار کے مسلئے کا مستقل حل نکالا ہے،پاراچنار میں ہمارے لوگوں نے شہادتیں دی ہیں، مسلئے کا مکمل حل نکال لیا ہے، پاراچنار کے مسلئے کو ہمیشہ کے لئے حل کریں گے،

پیسے کمانے کے لئے یوٹیوبرز جھوٹی خبریں اور شرلیاں چھوڑتے ہیں، علی امین گنڈا پور
بانی پی ٹی آئی کے ساتھ اسٹیبلشمنٹ کے ساتھ مذاکرات کے حوالے سے کوئی بات نہیں ہوئی، بجلی چوری ہم سب کا مسلئہ ہے، بجلی چوری روکنے کے لئے وفاقی حکومت کے ساتھ بھرپور تعاون کیاہے، خیبرپختونخوا کا خسارہ 128 ارب ہے، پورے ملک کی چوری ہمارے صوبے کے پلے نہ ڈالی جائے، جنہوں نے اکاؤنٹ مانیٹائز کیے ہیں وہ کاروبار کر رہے ہیں، جو پیسے کما رہے ہیں وہ نظریے کی بات نہیں کر سکتے، پیسے کمانے کے لئے یوٹیوبرز جھوٹی خبریں اور شرلیاں چھوڑتے ہیں،

تحریک انصاف کی احتساب کمیٹی نے گزشتہ دور حکومت کی بھی چھان بین شروع کرتے ہوئے سابق وزیر خزانہ تیمور جھگڑا سے 13 الزامات پر جواب طلب کر لیا۔

پی ٹی آئی کی احتساب کمیٹی نے تیمور جھگڑا کو سوال نامہ بھیجا ہے جس میں کہا گیا ہے کہ آپ کے دور حکومت میں صوبہ کئی بار ڈیفالٹ ہوا، پنشن اور گریجویٹی اکاؤنٹ سے 36 بلین نکالے گئے تھے جو واپس نہیں کیے گئے، آپ وزیر صحت بھی تھے محکمہ صحت کی جانب سے بھیجی گئی تمام سمریز مبینہ طور پر وزیر خزانہ ہونے کی وجہ سے بغیر کسی معقول جانچ پڑتال کے گزر جاتی تھیں،محکمہ صحت کی سمریز کو منظور کرنا کیا یہ مفادات کا ٹکراؤ نہیں تھا؟ کیا آپ نے کبھی بیڈ گورننس کے اس پہلو کو محسوس کیا، آپ کے دور حکومت میں خزانہ قرض میں ڈوبا رہا، اس صورتحال کو بہتر بنانے کی کوئی بھی کوشش یا منصوبہ بندی آپ نے خود کی،بینک آف خیبر کے پاس بے شمار اور دھوکا دہی والے قرضے تھے کیا اس پر کوئی کارروائی کی گئی۔ صحت انصاف کارڈ میں کئی خرابیاں تھیں جنہیں ٹھیک کرنے کی کوشش نہیں کی گئی، پولیو وائرس روکنے کے لیے کوئی ٹھوس اقدامات نہیں کیے گئے 2020 میں 20 اور 2022 میں 22 نئے کیسز آئے، آپ پر الزام ہے کہ علاقی صحت ڈئریکٹریٹ ڈاکٹروں کے مخصوص گروپ کو نوازنے کے لیے قائم کیے گئے جو کہ فعال نہ ہو سکے۔

سابق صوبائی وزیر تیمور جھگڑا نے 35 صفحات پر مشتمل جواب احتساب کمیٹی کو بھیج دیا ہے،تیمور جھگڑا نے جواب دیا کہ عمران خان کی مجھے خیبر پختونخوا کابینہ میں شامل کرنے کی افواہیں شروع ہوئیں تو مجھے فوراً اطلاع دی گئی کہ مجھ پر اچانک کرپشن کی تحقیقات کی جائیں گی، میں نے کبھی کابینہ میں شامل ہونے کا نہیں کہا، خون کے آخری قطرے تک عمران خان اور پاکستان کے لیے لڑوں گا،سچ کبھی چھپ نہیں سکتا اور میرے پاس چھپانے کے لیے کچھ نہیں ہے، افسوس کی بات ہے کہ عمران خان کی رہائی پر توجہ مرکوز کرنے والے اتنے غیر محفوظ ہیں کہ وہ اپنے اندر کے عدم تحفظ کو ہی نشانہ بنا سکتے ہیں۔

نوشہرہ: نوشہرہ کے علاقے کاہی نظامپور میں فائرنگ کے ایک افسوسناک واقعے میں ایک خواجہ سرا جاں بحق ہوگیا۔

پولیس کے مطابق، مقتول خواجہ سرا شگفتہ ایک تقریب سے صبح کے وقت واپس آرہی تھی جب دو موٹرسائیکلوں پر سوار چار نامعلوم مسلح افراد نے اسے نشانہ بنایا۔ حملہ آوروں نے اچانک شگفتہ پر فائرنگ کردی، جس کے نتیجے میں وہ موقع پر ہی دم توڑ گئی۔واقعے کے فوراً بعد پولیس موقع پر پہنچ گئی اور مقتول کی لاش کو قانونی کارروائی کے لیے قاضی حسین احمد میڈیکل کمپلیکس منتقل کردیا گیا۔ پولیس نے جائے وقوعہ سے شواہد اکٹھے کرکے تحقیقات کا آغاز کردیا ہے۔ مقتول خواجہ سرا کے ساتھی کی مدعیت میں نامعلوم ملزمان کے خلاف مقدمہ درج کرلیا گیا ہے۔ پولیس کا کہنا ہے کہ وہ جلد از جلد ملزمان کا سراغ لگانے کے لیے تمام ممکنہ وسائل بروئے کار لائے گی۔

وزیراعلیٰ خیبر پختونخوا کے معاون خصوصی جیل خانہ جات کے گھر پر نامعلوم افراد نے فائرنگ کر دی۔ یہ واقعہ گزشتہ رات پیش آیا، جس میں سیکیورٹی اہلکاروں کی بروقت کارروائی سے کوئی جانی نقصان نہیں ہوا۔

خیبر پختونخوا کے معاون خصوصی جیل خانہ جات ہمایون خان کے گھر پر نامعلوم افراد نے اچانک فائرنگ شروع کر دی۔ گھر میں تعینات سیکیورٹی اہلکاروں نے فوری طور پر جوابی فائرنگ کی، جس کے نتیجے میں حملہ آور فرار ہو گئے۔پولیس نے فوری طور پر موقع پر پہنچ کر علاقے کو گھیرے میں لے لیا اور حملہ آوروں کی تلاش کے لیے سرچ آپریشن شروع کر دیا۔ پولیس حکام کے مطابق، واقعے کے بعد علاقے میں بھاری نفری تعینات کی گئی ہے تاکہ حملہ آوروں کو جلد گرفتار کیا جا سکے۔سیکیورٹی اداروں نے فائرنگ کے مقام سے شواہد اکٹھے کیے ہیں اور تحقیقات کا آغاز کر دیا ہے۔ اس حملے کے بعد سے علاقے میں سیکیورٹی مزید سخت کر دی گئی ہے۔

پاکستان کے پختون علاقے تختی خیل، لکی مروت میں افغان باشندے ارشد علی نے پاکستانی پرچم کی بے حرمتی کی اور اسے جلانے کی کوشش کی۔ اس عمل کی شدت سے مخالفت کرتے ہوئے پاکستانی پختونوں نے فوراً مداخلت کی اور اس شخص کو ایسی سزا دی جو وہ زندگی بھر یاد رکھے گا۔

ارشد علی جو کہ افغانستان سے تعلق رکھتا ہے، نے علاقے میں پاکستانی پرچم کو دھاگوں میں الجھایا اور اسے جلانے کی کوشش کی۔ یہ عمل پختونوں کی غیرت اور وطن پرستی کے خلاف تھا، جس پر مقامی لوگ برہم ہو گئے۔ فوراً ہی علاقے کے نوجوانوں اور بزرگوں نے اکٹھا ہو کر اس شخص کا محاصرہ کیا اور اسے روکا۔پختونوں نے اس افغان باشندے کو نہ صرف روکا بلکہ اس کی ایسی سبق آموز دھلائی کی جس سے وہ دوبارہ ایسی حرکت کرنے کا سوچے گا بھی نہیں۔ اس واقعے کے بعد، مقامی لوگوں کا کہنا تھا کہ کسی کو بھی پاکستان کے قومی اعزازات اور پرچم کی بے حرمتی کی اجازت نہیں دی جا سکتی۔

یہ واقعہ ایک بار پھر ثابت کرتا ہے کہ پختون قوم ہمیشہ اپنی غیرت اور وطن پرستی کا دفاع کرنے کے لیے تیار رہتی ہے۔ اس کے علاوہ، مقامی حکام نے اس واقعے کی تفتیش شروع کردی ہے اور افغان باشندے کے خلاف قانونی کارروائی کا آغاز کر دیا ہے۔پختونوں کا یہ اقدام اس بات کی علامت ہے کہ کوئی بھی شخص پاکستانی سرزمین پر آئین و قانون سے بالاتر نہیں اور اس قسم کے غیرقانونی اور توہین آمیز عمل کو سختی سے روکا جائے گا۔

صوبہ خیبر پختونخوا کے شہر ٹانک کے نواحی علاقے اماخیل میں فائرنگ کے ایک افسوسناک واقعے میں تین افراد جاں بحق ہو گئے۔

پولیس کے مطابق، واقعہ کی تحقیقات جاری ہیں اور ابھی تک یہ معلوم نہیں ہو سکا کہ فائرنگ کرنے کی وجوہات کیا تھیں۔ٹانک میں فائرنگ کے واقعات میں اضافہ دیکھا جا رہا ہے، پولیس ذرائع نے بتایا کہ تفتیشی عمل مکمل ہونے کے بعد واقعے کی مزید تفصیلات سامنے آئیں گی۔

یاد رہے کہ گزشتہ ماہ 22 تاریخ کو بھی ٹانک میں پرانا مال منڈی کے قریب فائرنگ کے ایک اور واقعے میں ایک شخص کی جان گئی تھی۔ پولیس کے مطابق یہ واقعہ تھانہ سٹی کی حدود میں پیش آیا تھا۔ جاں بحق ہونے والے شخص کی شناخت قیضار کے نام سے ہوئی تھی، اور اس واقعے کی وجہ ذاتی دشمنی بتائی گئی تھی۔

ٹانک میں فائرنگ کے بڑھتے ہوئے واقعات شہریوں میں خوف و ہراس پھیلا رہے ہیں، اور لوگوں کی جانب سے فوری طور پر ان واقعات کی روک تھام کے لیے پولیس سے مزید اقدامات کی درخواست کی جا رہی ہے۔ پولیس حکام کا کہنا ہے کہ وہ ملزمان کی گرفتاری کے لیے سرگرم ہیں اور علاقے میں امن و امان کی صورتحال کو بہتر بنانے کے لیے سخت اقدامات اٹھا رہے ہیں۔