Category: سرگودھا

سرگودھا ،باغی ٹی وی( ادریس نواز چدھڑ سے ) ستھرا پنجاب پروگرام کے احکامات کو سیکرٹری یونین کونسل لڈیوالہ و حیدرآباد نے ہوا میں اڑا دیا ، جگہ جگہ گندگی کے ڈھیر ، صفائی عملہ غائب، انتظامیہ خاموش ?

تفصیلات کے مطابق وزیراعلیٰ پنجاب مریم نواز شریف کی ہدایت پر شروع کیا جانیوالا سرگودھا میں ستھرا پنجاب پروگرام بری طرح ناکام ہو گیا ۔ یونین کونسل لڈیوالہ اور یونین کونسل حیدرآبا میں صفائی ستھرائی فوٹو سیشن کی حد تک جاری ہے ، سیکرٹری یونین کونسل لڈیوالہ و حیدرآباد نے حکومتی احکامات کو ہوا میں اڑا دیا اور افسران کو رپورٹ دینے کیلئے صرف فوٹو سیشن کی حد تک ہی کام کیا جا رہا ہے جو متعلقہ ضلعی انتظامی افسران کی کارکردگی کا منہ بولتا ثبوت ہے ۔

یونین کونسل لڈیوالہ و حیدرآباد میں جگہ جگہ گندگی کے ڈھیر ہیں ،گلیوں و نالیوں کی صفائی ستھرائی کا کام بھی فوٹو سیشن کی حد تک جاری ہے جبکہ شہریوں کا کہنا تھا کہ صفائی عملہ حیدرآباد سے فی گھر 200 سے 250 روپے لے رہا ہے اور لڈیوالہ میں صفائی عملہ فی گھر 50 روپے سے زائد وصول کر رہا ہے ۔ اسکے باوجود بھی صفائی عملہ کہیں دکھائی نہیں دے رہا ۔

شہریوں کابتانا ہے کہ متعدد دفعہ سیکرٹری سےگذارش کی کہ صفائی ستھرائی کے احکامات صادر فرمائے جائیں لیکن سیکرٹری بادشاہ ٹس سے مس نہیں ہورہے ،شہری بدبو اور تعفن زدہ ماحول میں سانس لینے پر مجبور ہو چکے ہیں، جس کی وجہ سے مختلف بیماریاں پھیل رہی ہیں اور سیکرٹری یونین کونسل لڈیوالہ و حیدرآباد نے اپنی اپنی یونین کونسل میں صفائی کے کام سے منہ پھیر رکھا ہے ۔ جبکہ انتظامی افسران نے بھی مکمل طورمجرمانہ خاموشی اختیار کر رکھی ہے ۔

شہریوں کا کہنا ہے کہ ایک طرف تو وزیراعلیٰ پنجاب و کمشنر سرگودھا بڑے بڑے صفائی کے دعوے تو کرتے ہیں ۔ لیکن یونین کونسلز عملہ نے تمام دعوؤں اور کیئے گئے وعدوں کو جوتوں کی نوک پر رکھ لیا۔ سیکرٹری یونین کونسل لڈیوالہ سلطان نے تو اب علاقہ میں صفائی عملہ کو کھلی چھوٹ دے رکھی ہے اور صفائی کے کام کی بجائے ان سے دوسرے کام کروائے جا رہے ہیں ۔ شہریوں نے کمشنر سرگودھا سے فوری نوٹس لیتے ہوئے سیکرٹری یونین کونسل لڈیوالہ و حیدرآباد کو علاقہ میں صفائی ستھرائی کے نظام کو بہتر بنانے اور صفائی عملہ کو متحرک کرنے کا مطالبہ کر دیا

سرگودھا ،باغی ٹی وی (سٹی رپورٹر ادریس نواز چدھڑ سے ) آئی ایل ایم کالج میں طلباء سے فیئر ویل کے نام پر ایک ماہ میں 2 مرتبہ بھاری رقوم کی وصولی کا انکشاف ہوا ہے ڈائریکٹر کالجز ، ڈپٹی کمشنر اور کمشنر سرگودھا کی بے خبری میں آئی ایل ایم کالج نے اندھیر نگری مچا دی ۔

سیکنڈ ائیر کی کلاسسز شروع ہونے سے 3 ماہ قبل جبری طور پر فیس بٹوری جانے لگی ، فیس نہ دینے والے طلباء کو فرسٹ ایئر بورڈ امتحانات کی رول نمبر سلپ نہیں دی جاِئے گی ، کالج ذمہ داران کی بلیک میلنگ ، طلباء و والدین پریشان، کالج ذمہ داران، ڈائریکٹر کالجز اور ضلعی انتظامیہ کیخلاف بھرپور احتجاج ، مقامی انتظامیہ کی حالات پر کمزور گرفت اور غفلت و لاپرواہی کا خمیازہ سرگودھا کے باسیوں کو بھگتنا پڑ رہا ہے ۔

سرگودھا میں مبینہ طور پر ڈائریکٹر کالجز کی سرپرستی میں نجی کالج مالکان و ذمہ داران لوٹ مار کا بازار گرم کئے ہوئے ہیں اور زیر تعلیم طلباء سے مختلف فنڈز و پارٹیوں کے نام پر بھاری رقوم بٹوری جا رہی ہیں ۔ یہاں آئی ایل ایم کالج سرفہرست ہے کہ جہاں گذشتہ ماہ طلباء سے فیئر ویل پارٹی کے نام پر 11 سو روپے فی طالب علم وصول کیئے گئے اور بعد ازاں چند دن بعد ہی سیکنڈ ایئر کی فیس کیلئے جاری کردہ چالان فارم میں دوبارہ فیئر ویل کے نام پر مزید 11 سو روپے شامل کر دیئے گئے اور اس کو فیس کا حصہ قرار دیتے ہوئے وصولی لازمی قرار دے دی گئی ۔

یہاں یہ امر قابل ذکر ہے کہ سرگودھا بورڈ کے تحت فرسٹ ائیر کے امتحانات 8 مئی کو شروع ہو رہے ہیں ۔ امتحانات مکمل ہونے اور رزلٹ آنے کے بعد سیکنڈ ایئر فیس وصولی ہونا تھی جب کہ کالج ہذا نے ماہ مارچ میں ہی سیکنڈ ایئر کی فیس وصول کا جبری سلسلہ شروع کر دیا اور فیس ادا نہ کرنے والے طلباء کو فرسٹ ائیر بورڈ امتحانات کی رول نمبر سلپ نہ دیئے جانے کی دھمکی دے کر بلیک میل کیا جا رہا ہے ۔

آئی ایل ایم کالج کی اس اندھیر نگری اور غنڈہ گردی پر طلباء اور والدین نے شدید احتجاج کرتے ہوئے وزیراعلیٰ پنجاب محترمہ مریم نواز شریف سے مطالبہ کیا ہے کہ وہ اس سنگین صورت حال کا نوٹس و ایکشن لیں اور مقامی انتظامیہ کو خواب غفلت سے بیدار کرتے ہوئے اس مہنگائی کے دور میں عوام کو لوٹنے والے اس نام نہاد تعلیمی ادارہ کی انتظامیہ کو نکیل ڈالیں ورنہ نجی تعلیمی اداروں کی لوٹ مار کا یہ سلسلہ عوام سے جینے کی سکت چھین لے گا ۔

سرگودھا ،باغی ٹی وی( ادریس نواز چدھڑ سے ) بنیادی ہیلتھ مرکزصحت لڈیوالہ میں سہولیات کا فقدان، میڈیسن و دیگر عملہ کی کمی ، مریض ذلیل و خوار ہونے لگے ، سی ای او ہیلتھ کیلئے چیلنج ?

تفصیلات کے مطابق سرگودھا میں بی ایچ یو لڈیوالہ میں سہولیات کا فقدان ھے،جس کے باعث مریض روزانہ کی بنیاد پر ذلیل و خوار ہو رہےہیں ۔ جس پر سی ای او ہیلتھ نے بھی چپ سادھ لےرکھی ہے ۔

ذرائع کے مطابق بی ایچ یو لڈیوالہ میں ایم او کی رہائش نہیں ہے کوارٹرز کی کمی ہے ، مڈوائف صرف ایک ہے جبکہ تین کی ضرورت ہے ۔ نائب قاصد موجود نہ ہے، سکیورٹی گارڈ بھی نہیں اور مریضوں کو دوائیاں نہیں مل رہی کیونکہ میڈیسن موجود ہی نہیں ہیں، جس کی وجہ سے مریض ذلیل و خوار ہو رہے ہیں ۔

بی ایچ یو لڈیوالہ میں دس سے زیادہ گاؤں کے لوگ علاج و چیک اپ کیلئے آتے ہیں، لیکن یہاں ویکسینیٹر کی تعدادکم ہے ،مریضوں کی تعداد زیادہ اور میڈیسن نہ ہونے کے برابر ہے ۔ جبکہ مریضوں کو چیک کرنیوالے ڈاکٹرز کی بھی کوئی ٹائمنگ نہیں ہے ۔ بی ایچ یو لڈیوالہ کی ایمبولینس ہے لیکن وہ 92 موڑ کھڑی ہے، جس کی وجہ سے یہاں کی خواتین و مریض شدید پریشان ہیں ۔ اسکے علاوہ لیڈی ہیلتھ سپروائزر کی سیٹ باالکل خالی پڑی ہے ۔ ایل ایچ ایس کو پک اینڈ ڈراپ کرنے کیلئے نہ ڈرائیور ہےاور نہ ہی رہائش کا کوئی انتظام اور گاڑی بھی نہیں ہے ۔

بی ایچ یو لڈیوالہ کی عوام محکمہ ہیلتھ کیخلاف سراپا احتجاج بن گئی ۔ شہریوں کا کہنا تھا کہ روزانہ کی بنیاد پر ہمیں پریشانی کاسامناہے لیکن ابھی تک سی ای او ہیلتھ نے کوئی نوٹس نہیں لیا ۔ اور نہ ہی کسی دیگر آفیسر نے کوئی توجہ دی، جو سی ای او ہیلتھ کی کارکردگی کا منہ بولتا ثبوت ہے ۔ علاقہ مکینوں کمشنر سرگودھا اور وزیراعلیٰ پنجاب سے فوری نوٹس لینے کا مطالبہ کر دیا ہے

سرگودھا ،باغی ٹی وی( ادریس نواز چدھڑ سے ) پٹواری نے زمین کے اصل حقداران کوان کےحصے سے محروم کر دیا،ٹاؤن پلانر رانا حسن نے محکمہ مال کی بھگت سے کمرشل زمین کو زرعی بنا کر رجسٹریاں کر کے حکومت کو کروڑوں روپے کا ٹیکہ لگا دیا

سرگودھا کے نواحی علاقہ چک نمبر 41 شمالی میں ٹاؤن پلانر رانا حسن نے دیگر ساتھیوں نے اے ڈی ایل آر مٹھہ لک انور ، پٹواری وجاہت و عملہ کمپیوٹر لینڈ ریکارڈ کیساتھ ملی بھگت کر کے زمین کے اصل حقداران کو انکے حصے سے محروم کر دیا ۔

متاثرین کے مطابق عدالتی سٹے آرڈر ہونے کے باوجود محکمہ مال کی ملی بھگت سے مبینہ طور پر رجسٹری انتقال کیا جا رہا ہے، ستم ظریفی یہہ ہے کہ ٹاؤن پلانر رانا حسن یونس و دیگر محکمہ مال کی گٹھ جوڑ سے کمرشل و سکنی زمین کو زرعی بنا کر رجسٹریاں جاری کر کے حکومت پنجاب کو کروڑوں روپے کا چونا لگا رہے ہیں ۔

متاثرہ شہری محمد افضل و دیگر نے محکمہ اینٹی کرپشن میں درخواست دائر کی ۔ جس پر ابتدائی طور پر اسسٹنٹ ڈائریکٹر تصور عباس بوسال نے کارروائی کی ۔ اور ملزمان کو دس دن کی ڈیڈلائن دی ۔ لیکن انکے تبادلہ کے بعد متاثرین کی درخواست کو سردخانے میں ڈال دیا گیا ۔

متاثرین کی درخواست پر تاحال کوئی کارروائی نہ کی جا سکی ۔ متاثرین نے وزیراعلیٰ پنجاب مریم نواز شریف ، کمشنر سرگودھا اور ڈائریکٹر اینٹی کرپشن سرگودھا سے فوری نوٹس لیتے ہوئے ملزمان کیخلاف قانونی کاررواری کرنے اور قبضہ واگذار کروانے کا مطالبہ کر دیا ۔

سرگودھا ،باغی ٹی وی( ادریس نواز چدھڑ سے ) تھانہ بھیرہ کے علاقہ میں چوری و ڈکیتی کی وارداتوں میں اضافہ ۔ تاجر پولیس کیخلاف سراپا احتجاج بن گئے

تفصیلات کے مطابق سرگودھا میں تھانہ بھیرہ کے علاقہ میں بڑھتی ہوئی چوری و ڈکیتی کی وارداتوں نے شہریوں و تاجروں کا جینا محال کر دیا ۔ جس کے باعث تاجر پولیس کیخلاف سراپا احتجاج بن گئے اور ہڑتال کر دی ۔

اس موقع پر تاجروں کا کہنا تھا کہ آئے روز تاجروں کو چور و ڈکیت لوٹ رہے ہیں، چند روز قبل بھی تاجر کی دکان سے ایک کروڑ 15 لاکھ روپے کے موبائل چوری ہو گئے ۔ لیکن تھانہ بھیرہ پولیس مقدمہ درج کر کے ملزمان کو گرفتار نہیں کر پاتی ۔ پولیس چوروں و ڈکیتوں کو گرفتار کرنے میں مکمل ناکام ہو چکی ہے ۔

تاجروں کا مزید کہنا تھا کہ ہم ایسے حالات میں کیسے کاروبار کریں، آخر پولیس ملزمان کو گرفتار کیوں نہیں کر پا رہی ، تاجروں نے ڈی پی او سرگودھا اور آئی جی پنجاب سے بڑھتی ہوئی چوری و ڈکیتی کی وارداتوں پر سخت نوٹس لینے اور ملزمان کو جلد گرفتار کرنے کا مطالبہ کر دیا اور کہا کہ اگر ملزمان کو جلد گرفتار نہ کیا گیا تو تاجر مزید ہڑتال کرنے پر مجبور ہوں گے ۔ اور احتجاج ملزمان کی گرفتاری تک جاری رہے گا ۔

جبکہ پولیس کا اپنےمؤقف میں کہنا تھا کہ مدعیان سے ایس ایچ او نے ملاقات کی ہے اور متعلقہ پولیس نے مدعیان کو جلد ملزمان کی گرفتاری کی یقین دہانی بھی کروائی ہے.

سرگودھا ،باغی ٹی وی (نامہ نگارشاہنوازجالپ+سٹی رپورٹرادریس نواز) ٹریفک پولیس نے کھڑے موٹر سائیکل بازاروں سے اٹھانا شروع کر دئیے

عید کیلئے بچوں کو شاپنگ کروانے کیلئے آئے شہری دوکان کے سامنے موٹر سائیکل کھڑا کرتے ہیں ٹریفک پولیس کھڑے موٹر سائیکل کا 2000 ہزار جرمانہ کر دیتے ہیں ، ٹریفک پولیس روزانہ کی بنیاد پر درجنوں موٹر سائیکل کھڑے بازار سے اٹھا لیتے ہیں ،ٹریفک پولیس روزانہ چلان کی مد میں لاکھوں روپے اکٹھے کر رہے ہیں

شہریوں کاکہنا ہے کہ دیہاتوں سے شاپنگ کرنے سرگودھا آتے ہیں لیکن ٹریفک پولیس نے شہر آنا بھی ہمارے لیے عذاب بنا دیا ہے دو ہزار جرمانہ دیں یا بچوں کی عید شاپنگ کریں ۔

ایک شہری نے بتایا کہ اردو بازار سے کتاب لینے آیا تھا دیکھا تو کھڑا موٹر سائیکل غائب تھا پتہ کرنے پر معلوم ہوا ٹریفک پولیس اٹھا کر لے گئی ہے دفتر جا کر پتہ چلا دو ہزار جرمانہ ہو گیا ہے ایک کتاب 200کی لی تھی جرمانہ ادا کر کے 2200 سو میں پڑی ہے ۔

شہری ٹریفک پولیس کے ناروا سلوک پر پھٹ پڑے ،شہریوں کاکہنا ہے کہ سرکار کا کام بنتا ہے عوام کہ سہولت دیں لیکن ٹریفک پولیس نے ہماری جیبوں پر ڈاکہ مارنا شروع کر رکھا ہے،مہنگائی اتنی ہے کہ دو وقت کی روٹی کھانا مشکل ہو چکا ہے دو ہزار کا موٹر سائیکل چلان کرنا ظلم ہے ۔

شہری نے بتایا کہ ہیلمٹ کا چالان ٹریفک پولیس نے دو ہزار کرنا شروع کیا تھا اب کھڑے موٹر سائیکلوں کا دو ہزار چالان کرنا بھی شروع کر دیا ہے وزیر اعلی پنجاب اورآئی جی پنجاب نوٹس لیں ۔