Category: سرگودھا

سرگودھاباغی ٹی وی (سٹی رپورٹر ادریس نواز چدھڑ ) وزیراعلیٰ پنجاب کے احکامات کے باوجود بھی تحصیل انتظامیہ گراں فروشوں کیخلاف کارروائی کرنے سے گریزاں ،جھال چکیاں و ماڑی میں گراں فروش متحرک

وزیراعلیٰ پنجاب مریم نواز شریف نے پرائس کنٹرول کمیٹیوں کو فعال کرنے اور مصنوعی مہنگائی کرنیوالوں کیخلاف کریک ڈاؤن کرنے کے احکامات جاری کئے لیکن تحصیل سرگودھا انتظامیہ نے وزیراعلیٰ پنجاب کے احکامات کو ہوا میں اڑا دیا ۔

شہریوں کا کہنا ہے کہ رمضان المبارک شروع ہوتے ہی نواحی علاقہ جھال چکیاں و ماڑی میں گراں فروش متحرک ہوگئے ہیں ۔ دکانداروں نے اپنی من مرضی کے ریٹ لگا رکھے ہیں اورشہریوں کو لوٹنے میں مصروف ہیں ، جن کیخلاف اسسٹنٹ کمشنر سرگودھا اور پرائس کنٹرول مجسٹریٹ کوئی بھی کارروائی کرنے سے گریزاں ہیں ۔

شہریوں کا مزید کہنا تھا کہ ہم نے تو کبھی اسسٹنٹ کمشنر کو جھال چکیاں اور ماڑی میں وزٹ کرتے دیکھا نہیں ۔ افسران اپنے دفاتر تک یا فوٹو سیشن کی حد تک کارروائیاں کرنے میں مصروف نظرآتے ہیں جبکہ دیہی علاقہ جات میں غریب عوام کو گراں فروش دونوں ہاتھوں سے لوٹ رہے ہیں ۔ جنہیں کوئی پوچھنے والا نہیں ہے اور تحصیل انتظامیہ نے تو عوامی مسائل سے منہ پھیر رکھا ہے ۔

مہنگائی نے پہلے ہی غریب کا جینا محال کر رکھاہے اور اب رمضان میں گراں فروش بھی متحرک ہوگئے ہیںاور افسران خاموش تماشائی بنے ہوئے ہیں ۔
شہریوں نے وزیراعلیٰ پنجاب مریم نواز شریف سے فوری نوٹس لیتے ہوئے تحصیل سرگودھا و ملحقہ دیہی علاقہ جات میں پرائس کنٹرول مجسٹریٹ کو متحرک کرنے کا مطالبہ کیا ہے تاکہ عوام کو رمضان میں گراں فروشوں سے تو چھٹکارا مل سکے ۔

سرگودھا،باغی ٹی وی (سٹی رپورٹر ادریس نواز چدھڑ)صوبائی وزیر مواصلات ملک صہیب احمد بھرتھ نے چک 6 ایم ایل پھلروان میں شہید کانسٹیبل محسن عباس کے والد اور والدہ سے ملاقات اور اظہار تعزیت کی ۔ صوبائی وزیر نے شہید کی قبر پر پھولوں کی چادر چڑھائی ۔

لواحقین سے بات چیت کرتے ہوئے صوبائی وزیر کا کہنا تھا کہ وزیراعلیٰ پنجاب مریم نواز شریف کی ہدایت پر تعزیت کیلئے آیا ہوں ۔ وزیراعلیٰ پنجاب جلد شہید کے اہل خانہ سے ملیں گی ۔

انہوں نے کہا کہ شہید کانسٹیبل محسن عباس نے عوام کے جان و مال کے تحفظ کیلئے قربانی دی ہے ۔ اہل علاقہ سمیت پوری قوم کو شہید کی قربانی پر فخر ہے ۔ شہید کی قربانی رنگ لائے گی اور ملک امن و امان کا گہوارہ بنے گا ۔

ان کا مزید کہنا تھا کہ حکومت شہید کے اہل خانہ کو کسی صورت تنہا نہیں چھوڑے گی ، وزیراعلیٰ پنجاب نے شہید کے اہل خانہ کیلئے فوری اقدامات کی ہدایت کی ہے ،شہداء پولیس ہمارے ماتھے کا جھومر ہیں ،شہداء کی قربانیوں کو کبھی فراموش نہیں کیا جا سکتا ۔

اس موقع پر ڈی پی او سرگودھا محمد فیصل کامران اور اسسٹنٹ کمشنر بھلوال سفیان بن دلاور سمیت دیگر پولیس و انتظامی افسران بھی موجود تھے ۔
یاد رہے کہ تھانہ میانی محافظ سکواڈ سرگودھا میں تعینات کانسٹیبل محسن عباس دو روز قبل ڈاکوؤں کا مقابلہ کرتے ہوئے شہید ہو گئے تھے.

محافظ سکواڈ ٹیم کا دوران پٹرولنگ موٹر سائیکل سوار 04 ڈاکوؤں سے سامنا ہوا تھا ، محافظ سکواڈ کے جوانوں نے مشکوک ڈاکوؤں کو روکنے کی کوشش کی تو
ڈاکوؤں نے پولیس پارٹی کو دیکھتے ہی سیدھی فائرنگ شروع کر دی تھی ، فائرنگ کے تبادلے میں کانسٹیبل محسن عباس پیٹ میں گولی لگنے سے شدید زخمی ہوئے جو ہسپتال پہنچانے پر بھی جانبر نہ ہو سکے ، فائرنگ کے تبادلے میں مرکزی شوٹر ڈاکو جہنم واصل ہواتھا ۔

سرگودھا،باغی ٹی وی (سٹی رپورٹرادریس نواز چدھڑ )برائلر مرغی کی قیمت میں خوفناک اضافہ کے ذمہ دار مرغی فروش دکاندار نہیں ،ندیم عطاری

پولٹری ایسوسی ایشن ضلع سرگودھا کے صدر محمد ندیم عطاری نے میڈیا سے گفتگو کرتے ہوئے کہا کہ مارکیٹ میں برائلر مرغی فی کلو 6 سو روپے سے زائد نرخوں پر فروخت ہو رہی ہے ۔ اور رمضان المبارک میں مزید اضافہ متوقع ہے ۔ ہیچری پر ایک دن کے چوزہ کی قیمت 60 سے 70 روپے ہونے چاہیے یہ چوزہ 174 روپے تک فروخت ہو رہا ہے ۔ جبکہ فیڈ کی قیمت بھی فی تھیلہ 2 ہزار زائد وصول کی جا رہی ہے ۔

فارم ریٹ پر کنٹرول نہ ہونے کی وجہ سے بھی قیمت میں اضافہ ہو رہا ہے ۔ ریٹیلر اور ہول سیلر کو 4 فیصد منافع ملتا ہے ۔ جس میں سے ان کے اخراجات نکال کر کچھ نہیں بچتا اور عام لوگ برائلر کی قیمت میں اضافے کا ذمہ دار دکاندار کو سمجھتے ہیں۔

محمد ندیم عطاری نے مزید کہا کہ برائلر مرغی کی قیمت کو کنٹرول کرنے کیلئے سنجیدہ اقدامات کی ضرورت ہے ۔ ہیچری اور فیڈ کے ریٹ فی الفور کم اور کنٹرول کیئے جائیں تاکہ صارفین کو ریلیف مل سکے ۔

انھوں نے کہا ملک میں مہنگائی بے حد بڑھ چکی ہے اور لوگوں کی قوّتِ خرید نہیں ہے ۔ رمضان المبارک میں اشیائے خوردونوش کو کم اور کنٹرول کرنا حکومت اور کاروباری حضرات کا فرض ہے ۔

سرگودھا ،باغی ٹی وی( رپورٹ ادریس نواز چدھڑ) نگہبان رمضان پیکج گھر تک اٹھا کر کون لے جائے گا ، عملہ میں کشمکش شروع ، خواتین رمضان پیکج کے حصول کیلئے ذلیل و خوار ہونے لگیں ۔

اسسٹنٹ کمشنر سرگودھا آمنہ احسان تارڑ نے وزیراعلیٰ پنجاب کی ہدایات پر مستحق خواتین کے گھروں تک نگہبان پیکج پہنچانے کیلئے ہر یونین کونسل میں سیکرٹری ، اس کا اسسٹنٹ اور ایک سکول ٹیچر کی ڈیوٹی لگائی ہے ۔

ذرائع کے مطابق عملہ گفٹ ہیمپر رکشے میں لوڈ کر کے ہر گاؤں کے کسی بااثر شخصیت کے ڈیرہ پر پہنچ جاتے ہیں ۔ جہاں پورے گاؤں کی خواتین اکٹھی ہو جاتی ہیں ۔ کافی زیادہ تعداد میں خواتین اکٹھی ہو جانے سے وہاں شدید بھگدڑ مچ جاتی ہے ۔

مستحق خواتین کے شناختی کارڈ وصول کرنا اور فہرستوں کے ساتھ ٹیلی کرنے میں بہت زیادہ وقت لگ جانے سے ایک دن میں بہت کم خواتین کو ہی راشن ملتا ہے ، اگلے دن پھر یہی عمل دہرایا جاتا ہے ۔

حکومت کی ہدایت کے مطابق یہ گفٹ ہیمپر مستحق خواتین کے گھروں تک پہنچائے جانے ضروری ہیں مگر یونین کونسل کے سیکرٹری اور سکول ٹیچر میں یہ بحث ہوتی رہتی ہے کہ یہ تھیلے کون اٹھا کر لے جائے ۔

جس کی وجہ سے دیہات میں ایک غیر ضروری بھگدڑ نظر آنے لگی ہے ۔ علاقہ کے سنجیدہ طبقوں نے اسسٹنٹ کمشنر سرگودھا سے مطالبہ کیا ہے کہ وہ گفٹ ہیمپر کی تقسیم کا کوئی زیادہ بہتر نظام وضع کریں تاکہ کسی کی عزت نفس مجروح کیئے بغیر سامان حقدار تک پہنچ سکے

سرگودھا،باغی ٹی وی (سٹی رپورٹرادریس نواز چدھڑ)وزیر اعلی پنجاب مریم نواز شریف پہلے کابینہ اجلاس کے بعد سرگودھا روانہ ہوئیں۔وزیر اعلی مریم نواز نے سرگودھا میں میڈیکل کالج، صدر پولیس اسٹیشن کا دورہ اور سرگودھا میں بااثر شخص کے ظلم کا نشانہ بننے والی معصوم بچی کے اہل خانہ سے ملاقات کی۔وزیراعلی مریم نواز نے سرگودھا انسٹی ٹیوٹ آف کارڈیالوجی کے لئے مجوزہ سائٹ کا جائزہ لیا۔

وزیر اعلی مریم نواز کو انسٹی ٹیوٹ آف کارڈیالوجی پراجیکٹ پر بریفنگ میں بتایا گیا کہ کارڈیالوجی انسٹیٹیوٹ میں کارڈیالوجی وارڈ،کیتھ لیب،انجیو وارڈ، نرسنگ، ڈاکٹر ہاسٹل اور دیگر شعبے قائم ہونگے۔انسٹی ٹیوٹ آف کارڈیالوجی میں سی سی یو،آئی سی یو اور او پی ڈی شامل ہے۔وزیراعلی مریم نواز نے کہا ہے کہ ہسپتال کی تعمیر کے لئے عوام کی آمدورفت میں آسانی کو مد نظر رکھا جائے۔

سرگودھا ڈی ایچ کیو ہسپتال کو بھی اپ گریڈ کیا جائے گا۔وزیر اعلی مریم نواز نے سرگودھا صدر پولیس اسٹیشن کا تفصیلی دورہ کیا۔وزیر اعلی مریم نواز نے صدر پولیس اسٹیشن میں فرنٹ ڈیسک اور دیگر حصے دیکھے اور حوالات کا بھی معائنہ کیا۔وزیر اعلی نے وکثم سپورٹ سینٹر کا دورہ کیا اور وہاں موجود خاتون سے بات چیت کی۔وزیراعلی مریم نواز نے خاتون کی طرف سے تعاون کا بتانے پر خاتون پولیس افسر کو سراہا۔

مریم نواز نے ہدایت کی کہ ہر کسی کی بات سننی ہے اورمظلوم کا ساتھ ضرور دیں۔بعدازاں وزیر اعلی مریم نواز شریف نے سرگودھا میں با اثر شخص کے ظلم کا نشانہ بننے والی معصوم بچی کے والد،والدہ اور بہن سے ملاقات کی۔وزیر اعلی مریم نواز سے ملتے ہوئے دکھیاری ماں پھوٹ پھوٹ کر رو پڑی۔ متاثرہ بچی کی ماں نے وزیراعلی مریم نواز کو بتایا کہ میری بچی روتی ترستی چلی گئی،ظالموں نے ملنے نہیں دیا۔

عائشہ سب کا خیال رکھتی،قرض اتارنے کے لئے نوکری کرتی تھی۔وزیراعلی مریم نواز شریف نے کہا کہ ماں ہوں،آپ کا دکھ سمجھتی ہوں۔ مریم نواز نے مظلوم خاندان کو دلاسہ دیا۔وزیر اعلی مریم نواز شریف نے صوبائی وزیر صہیب بھرتھ کو متاثرہ خاندان سے رابطہ رکھنے اور مسائل حل کرنے کی ہدایت کی۔

وزیر اعلی مریم نواز نے بڑی بیٹی کے علاج اور میڈیکل بورڈ قائم کرنے کے لئے کمشنر کو ہدایت کی۔پولیس نے وزیراعلی کو بتایا کہ معصوم بچی پر ظلم کرنے والے دونوں ملزم گرفتارکر لئے گئے ہیں۔وزیر اعلی مریم نواز نے ملزمان کے خلاف کیس کی بھرپور پیروی کرنے کی ہدایت کی۔

رکن قومی اسمبلی ڈاکٹر ذوالفقار،سینئر صوبائی وزیرمریم اورنگز یب،صوبائی وزیر خواجہ سلمان رفیق، خواجہ عمران نذیر،صہیب بھرتھ، مشیر پرو یز رشید،چیف سیکرٹری، سیکرٹریز، کمشنرسرگودھا،آر پی او، ڈپٹی کمشنر اور دیگر حکام بھی اس موقع پر موجود تھے۔

سرگودھا ،باغی ٹی وی( ادریس نواز چدھڑ سے ) پولیس کی بڑی کارروائی ، کمسن گھریلو ملازمہ کے تشدد اور قتل میں ملوث ملزمان گرفتار

تفصیلات کے مطابق ڈی پی او سرگودھا محمد فیصل کامران نے پریس کانفرنس کرتے ہوئے بتایا کہ ملزمان جواد بھٹی ولد غلام شبیر بھٹی نے عرصہ دو ماہ قبل ایک کمسن بچی عائشہ بی بی بعمر 12/13 سال کو گھر کے کام کاج کیلئے ملازمہ رکھا،ملزمان نہ صرف کمسن بچی سے گھریلو کام کاج کرواتے تھے بلکہ اس پر تشدد بھی کرتے تھے ۔

ملازمت کے شروع میں کمسن عائشہ کی اپنے والدین سے ملاقات ہوتی رہی لیکن بعد میں ملزمان نے عائشہ کے والدین سے ملاقات بند کر دی اور اس پر تشدد کرتے رہے، تشدد کی وجہ سے عائشہ کے جسم پر زخموں کے نشانات بن گئے ، جن کا علاج نہ کروایا گیا ، اور بدستور تشدد کرتے رہے ، کمسن عائشہ زخموں کی تاب نہ لاتے ہوئے جان کی بازی ہار گئی، ملزمان ڈیڈ باڈی کو گھر میں چھوڑ کر فرار ہو گئے ۔

کمسن مقتولہ کے والدین نے یکم مارچ 2024ء کو پولیس کو اطلاع دی جس پر پولیس نے فوری کارروائی کرتے ہوئے تمام شواہد کو اکٹھا کیا ، ڈیڈ باڈی کو ہسپتال منتقل کیا اور مقتولہ کے والد محمد طاہر کی مدعیت میں مقدمہ درج کر کے تفتیش شروع کی ۔

معاملہ کی حساسیت کو مدنظر رکھتے ہوئے اور اس بیہمانہ قتل میں ملوث ملزمان کی گرفتاری کیلئے ایس پی انویسٹی گیشن کی سربراہی اور اے ایس پی کوٹمومن کی زیرنگرانی خصوصی ٹیمیں تشکیل دی گئیں ۔

خصوصی ٹیموں نے مختلف اضلاع بشمول لاہور، ملتان، فیصل آباد، حافظ آباد اور سرگودھا کے مختلف علاقوں میں ریڈ کئے ۔ خصوصی ٹیموں نے جدید ٹیکنالوجی اور دستیاب وسائل کو بروئے کار لاتے ہوئے ملزمان کو لاہور اور حافظ آباد سے گرفتار کیا ۔

ملزمان نے اپنے جرم کا اعتراف کر لیا ہے ۔ آئندہ مقدمہ کی پیروی کر کے اس سفاک واقعہ میں ملوث ملزمان کو قرار واقعی سزا دلوانے کی بھرپور کوشش کی جائے گی .

سرگودھا ،باغی ٹی وی( ادریس نواز چدھڑ سے ) وزیراعلیٰ مریم نواز شریف کے پنجاب سے گندگی صاف کرنے کے احکامات کو تحصیل بھلوال انتظامیہ نے ہوا میں اڑا دیا ، تحصیل انتظامیہ نے شہر کا سارا کچرا چک 14 شمالی کے قریب پھینک دیا .

سرگودھا کی تحصیل بھلوال کے نواحی علاقہ چک 14 شمالی کے رہائشی تحصیل انتظامیہ کی نااہلی کے باعث بدبو اور تعفن زدہ ماحول میں سانس لینے پر مجبور ہیں ۔ وزیراعلیٰ پنجاب مریم نواز شریف نے کوڑا کرکٹ کو صاف کرنے کا ٹاسک دیا لیکن تحصیل بھلوال انتظامیہ نے سارا کوڑا چک 14 شمالی کے قریب پھینکا ہوا ہے ۔ جس پر ڈپٹی کمشنر سرگودھا اور کمشنر سرگودھا نے بھی آنکھیں بند کر رکھی ہیں کچرے کے باعث علاقہ مکین سراپا احتجاج ہیں، شہریوں کا سانس لینا بھی محال ہو چکا ہے ، بدبو اور تعفن زدہ ماحول میں سانس لینے سے شہری مختلف بیماریوں میں مبتلا ہونے لگے ۔

شہریوں نے متعدد درخواستیں دیں لیکن ڈپٹی کمشنر سرگودھا اور کمشنر سرگودھا نے مکمل خاموشی اختیار کی ہوئی ہے ، شہریوں کا کہنا ہے کہ ایک طرف تو وزیراعلیٰ پنجاب مریم نواز شریف پنجاب کو صاف کرنے کا دعوے کر رہی ہیں لیکن دوسری جانب پورے شہر کا کچرا ہمارے گاؤں کے قریب پھینک دیا گیاہے ۔ جو ہمارے ساتھ ظلم ھے ، ہمارے بچے خواتین بزرگ سانس کی بیماریوں میں مبتلا ہو رہے ہیں ، علاقہ میں رہنا بھی محال ہو چکا ہے ۔

اسسٹنٹ کمشنر بھلوال اپنے دفتر کے کمرے تک محدود ہیں ، کوئی ہماری درخواست سننے والا نہیں، شہریوں کا کہنا کہ ہماری وزیراعلیٰ پنجاب مریم نواز شریف اور منتخب عوامی نمائندگان سے اپیل ہے کہ فوری نوٹس لیں اور اس کچرے کو یہاں سے دوسری جگہ منتقل کیا جائے ۔

سرگودھا،باغی ٹی وی (نامہ نگارشاہنوازجالپ)نفسانفسی کے اس دور میں جہاں ہر انسان اپنی خواہشات کی تکمیل کے لئے جیتا ہے اور چاہتا ہے کہ وہ اپنے بچوں کے لیے دنیا بھر کی خوشیاں سمیٹ لے مگر نفسانفسی کے اس دور میں سرگودھا کی ایک ایسی شخصیت بھی ہے جو اپنے بچوں کی خواہشات کی تکمیل کے ساتھ ان بچوں کے سر پر بھی دست شفقت رکھے ہوئے ہے جن کے والدین اس دنیا میں موجود نہیں ہیں

سویٹ ہوم سرگودھا میں ایک ایسا ادارہ جہاں یتیم اور بے سہارا بچے پرورش کر رہے ہیں جن کی کفالت الحاج ممتاز اختر کاہلوں کرتے ہیں
الحاج ممتاز اختر کاہلوں نے کہا کہ عبدالوہاب کاہلوں کو پی پی 77سے ایم پی اے کے الیکشن کے لئے میدان میں اتاراہے تا کہ کامیابی کے بعد وہ سرگودھا کی تعمیر وترقی کے لیے کام کر سکے،

ان کا کہنا تھا کہ اپنے لیے تو سب ہی جیتے ہیں اس جہاں میں ہے زندگی کا مقصد اوروں کے کام آنا اور سب سے بڑی عبادت انساں سے پیار کرنا اور دکھی انسانیت کی خدمت کرنا-

سرگودھا،باغی ٹی وی (شاہنوازجالپ) تمام نشستوں پر مسلم لیگ ن کے امیدوار قومی و صوبائی اسمبلی بھاری اکثریت سے کامیاب ہوں گے۔زنیرا رحیم گجر
مسلم لیگ نون خواتین ونگ ضلع سرگودھا کی صدر زنیرا رحیم گجر نے میڈیا سے گفتگو کرتے ہوئے بتایا کہ ضلع سرگودھا کی تمام نشستوں پر مسلم لیگ ن کے امیدوار قومی و صوبائی اسمبلی بھاری اکثریت سے کامیاب ہوں گے۔ مسلم لیگی امیدواروں کی کامیابی کے لئے خواتین ونگ ضلع بھر میں متحرک ہے اور ڈور ٹو ڈور کمپئین جاری ہے

مسلم لیگ نون خواتین ونگ ضلع سرگودھا کی صدر زنیرا رحیم گجر نے میڈیا سے گفتگو کرتے ہوئے کہا کہ خواتین ملک کی ترقی اور خوشحالی کے لئے میاں نواز شریف اور محترمہ مریم نواز کے شانہ بشانہ کھڑی ہیں اور ملک کے عوام میاں نواز شریف کو وزیراعظم دیکھنا چاہتے ہیں میاں نواز شریف ترقی ، امن اور خوشحالی کی ضمانت ہیں اور وہ ایسے اقدامات کریں گے جس سے مہنگائی کم اور غریب آدمی کو ریلیف ذیادہ مل سکے گا۔

زنیرا رحیم گجر نے مزید کہا کہ اس وقت ضروری ہے کہ خواتین گھر کی چار دیواری سے باہر نکلیں اور ملک کی خاطر اپنا سیاسی اور جمہوری حق استعمال کریں 8 فروری میاں نواز شریف کی کامیابی کا دن ہے خواتین ہر حلقہ میں ن لیگ کے امیدواروں کی کامیابی کے لئے سرگرم عمل ہو جائیں اور گھر گھر نواز شریف اور مریم نواز کا پیغام پہنچائیں۔