Category: سرگودھا

سرگودھا۔ (اے پی پی) ایڈیشنل کمشنر ان لینڈ ریونیو اسد عزیز نے کہا ہے کہ چیف کمشنرسردار علی خوا جہ کی ہدایت پر سیلز ٹیکس کے قوانین پر عمل درآمد کیلئے خصوصی ایکشن پلان تیار کر لیاگیاہے جو کاروباری شخص خود کو رجسٹریشن نہیں کروائے گا اس کے خلاف قانون کے مطابق کارروائی کی جائیگی۔ گزشتہ روزاپنے ایک بیان میں انہوں نے کہا کہ ملکی ترقی کیلئے ضروری ہے کہ کاروباری طبقہ پوری ایمانداری سے ٹیکس ادا کرئے لیکن بدقسمتی سے ہمارے ملک میں ٹیکس دینے کا کلچر نہیں ہے۔ انہوں نے کہا کہ حکومت کی طرف سے ٹیکس قوانین میں ترامیم کی گئی ہیں۔ جن کا مقصد رجسٹر ڈ لوگوں کے لئے آسانیاں پیدا کرنا ہے تاکہ زیادہ سے زیادہ کاروباری شعبوں کو ٹیکس نیٹ میں لایا جاسکے۔ انہوں نے مزید بتایا کہ قلیل مدت میں سرگودہا میں 55بھٹوں،27سٹون کریشر یونٹ، سولہ جیولرزشاپس اور سولہ بیکولائٹس یونٹس کو رجسٹرڈ کیا گیا ہے۔ انہوں نے کہا کہ ایک ہزار مربع فٹ سے زیادہ کی دکان مالکان کو رجسٹرڈ کرنے کا عمل تیزی سے جاری ہے۔ انہوں نے کہا کہ ٹیکس نیٹ کو بڑھا نے کیلئے تمام ممکنہ اقدامات کئے جارہے ہیں تاکہ معیشت بہتر ہو اور ملک ترقی کی راہ پر گامزن ہو سکے۔

سرگودھا۔ (اے پی پی) سرگودھا میڈیکل کالج کے ماہرین ِ امراض چشم نے آنکھوں کی پتلیوں کا کامیاب ٹرانسپلانٹ کر لیا۔ڈسٹرکٹ ٹیچنگ ہسپتال سرگودھا میں پہلی مرتبہ یہ ٹرانسپلانٹ کیا گیا ہے۔ پہلی کھیپ کے تحت سرگودھا میڈیکل کالج کے ماہرامراض چشم و چیئرمین شعبہ امراض چشم پروفیسر ڈاکٹر ہاشم عمران و دیگر ڈاکٹرز پرمشتمل ٹیم نے پانچ مریضوں کی آنکھوں میں بذریعہ ٹرانسپلانٹ آنکھ کی پتلیاں کامیابی سے نصب کردیں جس کے بعد ان مریضوں کی بصارت بحال ہو گئی ہے۔کارنیا کا عطیہ پاکستان ایسوسی ایشن آف میمفسز (PAM) اور امریکہ میں پاکستانی ڈاکٹروں کی تنظیم ایسوسی ایشن آف پاکستانی فزیشنز نارتھ امریکہ (APPNA) کی جانب سے فراہم کیا گیاجن کو ڈسٹرکٹ ٹیچنگ ہسپتال میں سرگودھا میڈیکل کالج کے ڈاکٹرز نے مستحق مریضوں میں مفت ٹرانسپلانٹ کیا۔ڈاکٹر عمران ہاشم نے بتایا کہ آنکھوں کی شفاف پتلی کارنیا کہلاتی ہے جسے آنکھ کی کھڑکی بھی کہا جاتا ہے، بیماری یا چوٹ کی وجہ سے آنکھ کی پُتلی متاثر ہونے سے مریض ٹھیک طرح سے دیکھ نہیں سکتا اور آنکھوں کی روشنی بالکل ختم ہونے کا بھی خدشہ لاحق ہو جاتا ہے۔ اس کا علاج کارنیا کی تبدیلی ہے۔ ہمارے ملک میں آگاہی نہ ہونے کی وجہ سے لوگ کارنیا عطیہ کرنے سے کتراتے ہیں۔ فی الوقت بیرون ملک سے عطیہ کیے جانے والے کارنیا مریضوں میں ٹرانسپلانٹ کیے جا رہے ہیں۔ انہوں نے کہا کہ اب دوسرے مرحلہ کے تحت آگاہی مہم چلائیں گے تاکہ مقامی سطح پر کارنیا ڈونیشن کا آغاز ہو سکے۔

سرگودھا۔ (اے پی پی) سرگودھا میں کھیلوں کے فروغ کیلئے ہر ممکن اقدامات کئے جائینگے کیونکہ جس قوم کے گراؤنڈ آباد ہوتے ہیں اس کے ہسپتال برباد ہوجاتے ہیں، بچوں کو گراؤنڈز کی طرف راغب کرنے کیلئے ہم سب کو اپنا کردار ادا کرنا ہوگا۔ان خیالات کا اظہار ڈپٹی کمشنر سرگودھا محترمہ آسیہ گل نے پاکستان تحریک انصاف سپورٹس اینڈ کلچر فیڈریشن سرگودھا ڈویژن کے صدر راجہ عبدالوہاب سے ملاقات کے دورا ن کیا۔انہوں نے کہا کہ اس وقت سرگودھا کے نوجوانوں کو کھیلوں کی طرف راغب کرنے کی ضرورت ہے اگر ہم نے فوری توجہ نہ دی تو مستقبل میں اس کے نقصانات برداشت کرنا پڑینگے۔اس موقع پر راجہ عبدالوہاب نے ڈپٹی کمشنر سرگودھا کو مختلف کھیلوں کے ٹورنامنٹس کروانے اور گراؤنڈز کو آباد کرنے کے علاوہ گراؤنڈز میں بنیادی سہولتوں کی فراہمی کے حوالہ سے آگاہ کیا جس پر ڈپٹی کمشنر سرگودھا نے گراؤنڈز کے حوالہ سے ڈسٹرکٹ سپورٹس آفیسر کو ہدایت جاری کی کہ وہ کھیلوں کے فروغ کیلئے اپنا کردار ادا کریں۔ راجہ عبدالوہاب نے ڈپٹی کمشنر سرگودھا کا شکریہ ادا کیا۔

سرگودھا۔30ستمبر (اے پی پی) شہریوں کو پینے کے صاف پانی کی فراہمی حکومت کی اولین ترجیح ہے۔سرگودھا سمیت صوبہ بھر کے 36 اضلاع میں صاف پانی کی فراہمی کو یقینی بنانے کیلئے کمیٹیاں تشکیل دینے کا فیصلہ کیا گیاہے، اس اقدام سے شہریوں کو پینے کے صاف پانی کی فراہمی میں مدد ملے گی۔ ان خیالات کا اظہار پاکستان تحریک انصاف سپورٹس اینڈ کلچر فیڈریشن سرگودھا ڈویژن کے صدر راجہ عبدالوہاب نے کیا۔ انہوں نے کہا کہ اسوقت سرگودھا سمیت صوبہ بھر میں پینے کا صاف پانی سب سے بڑا مسئلہ ہے جس کو حل کرنے کیلئے حکومت نے ماسٹر پلان تیار کیا ہے۔ راجہ عبدالوہاب نے کہا کہ سرگودھا میں پینے کے صاف پانی کیلئے نہر لوئر جہلم، مٹھہ لک راجباہ، استقلال آباد راجباہ بہترین آبی گزر گاہیں جن سے گزشتہ 70 سال سے استفادہ نہیں کیا گیا اب اس پر توجہ دیکر پینے کے پانی کا مسئلہ حل کیا جائیگا۔راجہ عبدالوہاب نے کہا کہ اسی طرح سیوریج کا نظام بہتر بنانے کیلئے بھی ماسٹر پلان تشکیل دیا جارہا ہے۔

سرگودھا۔(اے پی پی) شہر بھر میں تجاوزات کیخلاف آپریشن کی تیاریاں مکمل کرلی گئی ہیں اور کسی بھی وقت تجاوزات کیخلاف بلا امتیاز آپریشن شروع کردیا جائیگا دکانداروں کے سامان ضبط کرنے انہیں جرمانہ کرنے اور ضبط شدہ مال کو نیلام کرنے کیلئے بھی اقدامات کو حتمی شکل دیدی گئی ہے جبکہ مختلف بازاروں کے بیرونی راستوں پر فولڈر بیرئیر لگانے کیلئے بھی اقدامات کو مکمل کیا جارہا ہے۔ ابتدائی طور پر کارخانہ بازار میں فولڈر بیرئیر لگنے سے بازاروں میں بے جا چنگ چی رکشاؤں کے داخلے پر پابندی سے بہتری آئی ہے جبکہ تجاوزات میں بھی نمایاں کمی دیکھنے میں آرہی ہے۔ذرائع کے مطابق کچہری بازار اور امین بازار میں فولڈنگ بیرئیر ابتدائی مرحلے میں لگائے جائینگے تاکہ ان بازاروں میں چنگ چی رکشاؤں‘ گدھا ریڑھیوں‘ گاڑیوں وغیرہ کے داخلے کو بند کیا جاسکے اور تجاوزات کو ختم کرنے میں یہ فولڈنگ بیرئیر مدد گار ثابت ہونگے اس طرح بازاروں کے اندرونی بلاکوں میں تجاوزات کے خاتمہ کیلئے بھرپور مہم چلائی جائیگی اور پھٹہ مافیا کا خاتمہ کیا جائیگا۔