Category: شیخوپورہ

شیخوپورہ میں اسٹیج اداکارہ پر مبینہ تشدد کے مقدمے میں اہم پیش رفت سامنے آئی ہے، جہاں ایڈیشنل سیشن جج نے مرکزی ملزم زین کی عبوری ضمانت کی درخواست منظور کرتے ہوئے اسے 15 اگست تک ریلیف فراہم کر دیا۔

اداکارہ شمع ناز نے میڈیا سے گفتگو کرتے ہوئے الزام عائد کیا کہ پولیس نے ان کی درخواست کے مطابق مقدمہ درج نہیں کیا، جس کے باعث انہیں انصاف کے حصول میں مشکلات کا سامنا ہے۔ انہوں نے مطالبہ کیا کہ واقعے کی غیر جانبدارانہ تحقیقات کر کے ذمہ دار افراد کے خلاف قانون کے مطابق کارروائی کی جائے۔دوسری جانب شیخوپورہ پولیس کے ترجمان کا کہنا ہے کہ مرکزی ملزم زین راجہ کو لڑائی جھگڑے کے ایک پرانے مقدمے میں گرفتار کیا گیا ہے، جبکہ اسٹیج اداکارہ پر تشدد کے معاملے کی بھی قانونی تقاضوں کے مطابق تفتیش جاری ہے۔

پولیس کے مطابق واقعے کے بعد شیخوپورہ کے مختلف تھیٹرز میں کام کرنے والے اداکاروں اور فنکاروں کی سیکیورٹی مزید سخت کر دی گئی ہے تاکہ کسی بھی ناخوشگوار واقعے سے بچا جا سکے۔پولیس حکام کا کہنا ہے کہ کیس کی تحقیقات جاری ہیں اور شواہد کی روشنی میں مزید قانونی کارروائی عمل میں لائی جائے گی، جبکہ عدالت نے ملزم کی عبوری ضمانت پر آئندہ سماعت 15 اگست تک ملتوی کر دی ہے۔

پاکستان کے تمام مذاہب اور مکاتبِ فکر کے قائدین نے ہندوستان کا بے بنیاد پروپیگنڈا زمین بوس کر دیا۔پاکستان میں بین المذاہب رواداری کی عظیم مثال ، فاروق آباد کی دھرم شالہ کی تعمیر نو اور اس کی اصل حالت میں باقی رکھنے کا متفقہ اعلان کر دیا گیا،سکھ برادری کی دھرم شالہ جس کی دیوار خستہ حالت کی وجہ سے گر گئی تھی ،اس کی باہمی تعاون سے تعمیر نو اور اس کی اصل حالت میں باقی رکھنے کا متفقہ اعلان کیا گیا

گزشتہ چند روز سے ہندوستان بے بنیاد پروپیگنڈا کر رہا تھا کہ فاروق آباد شیخوپورہ میں سکھ برادری کے گوردوارے کو پاکستانیوں نے گرا کر قبضہ کر لیا ہے جبکہ حقیقتِ یہ ہے کہ یہ دھرم شالہ بیٹھک گزشتہ قیامِ پاکستان سے پہلے کی جس حالت میں تھی، اسی طرح قائم ہے اور اس کی ایک دیوار خستہ حال ہونے کی وجہ سے گر گئی تھی جس کو آج پاکستان کے تمام مذاہب اور مکاتبِ فکر کے قائدین نے جا کر دوبارہ تعمیر کے لیے افتتاح کر دیا،قومی پیغامِ امن کمیٹی کے کوآرڈی نیٹر اور پاکستان علما کونسل کے چیئرمین حافظ محمد طاہر محمود اشرفی کے ہمراہ تمام مسلم مکاتبِ فکر کے قائدین مولانا زاہد محمود قاسمی ، حافظ مقبول احمد، علامہ غلام مصطفیٰ حیدری ، مولانا فاروق اعظم، مولانا اسلم صدیقی، مولانا سلمان عصری ، مولانا شاہد سعیدی، مسیحی قائدین بشپ کامران ، پنڈت لال ، سردار پلوندر سنگھ، سردار رنجیت سنگھ گیانی، سردار امر جیت سنگھ، سردار گلاب سنگھ، سردار جکرن سنگھ، انجمن تاجران فاروق آباد کے صدر شیخ شہزاد انجم نے آج فاروق آباد کا دورہ کیا اور یہ اعلان کیا کہ دھرم شالہ جس طرح دیوار کے گرنے سے پہلے تھی، اسی طرح باقی رہے گی اوگرے ہوئے حصے کی تعمیرِ نو ہوگی۔

اس موقع پر میڈیا سے گفتگو کرتے ہوئےپاکستان علما کونسل کے چیئرمین علامہ طاہر اشرفی کا کہنا تھا کہ پاکستان کے اندر مختلف مذاہب، مسالک کے لوگ رہتے ہیں ،کسی کو یہ حق حاصل نہیں کہ کسی دوسرے کی عبادتگاہ،مقدسات کی توہین کرے یا قبضہ کرے،حکومت پاکستان اپنا واضح مؤقف رکھتی ہے، دھرم شالہ، بیٹھک کا ریکارڈ حکومت پاکستان کے پاس موجود ہے، جب ہمارےعلم میں آیا کہ دیوار گری ہے،جس طرح یہ بلڈنگ تھی اسی طرح رہے گی، کسی کو حق نہیں کہ اس پر قبضہ کرے، بطور مسلمان تمام علما جو آج آئے ہیں میں سب کا شکر گزار ہوں،مسیحی برادری کا بھی شکر گزار ہوں، یہ پیغام دینے آئے ہیں کہ جو دیوار گری ہم خود بنائیں گے،نہ اضافہ کرنے دیں گے نہ کمی کرنے دیں گے،ہم بھی اسی لئے آئےہیں کہ سکھ برادری کو بتا دیں کہ کسی کو املاک یا عبادتگاہ پر قبضے کا حق نہیں، اس ملک کے آئین نے جتنا حق ہمیں دیا انہیں بھی حق حاصل ہے، پاکستان کے تمام مسالک اور مذاہب کے قائدین نے کہا کہ پاکستان ہم سب کا ملک ہے اور پاکستان میں غیر مسلموں کو جو حقوق حاصل ہیں وہ دنیا میں کہیں نہیں ہیں۔ پاکستان کے مسلمان اپنے غیر مسلم بھائیوں کے حقوق کے پاسبان ہیں اور حکومتِ پاکستان ہر طرح سے غیر مسلم برادری کو مکمل تحفظ فراہم کرے گی اور ان کی عبادات اور مقدس مقامات کا تحفظ ہر صورت کیا جائے گا۔

مرکزی مسلم لیگ کے نائب صدر حافظ طلحہ سعید نے کہا ہے کہ موجودہ حالات میں امت مسلمہ کو اتحاد،اخوت اور مضبوط نظریاتی بیانیے کی ضرورت ہے،یہودوہنود کا گٹھ جوڑ مسلم ممالک کے لئے خطرہ،ایٹمی پاکستان کو عدم استحکام سے دوچار کرنے کے لئے دہشتگردی ،سیاسی افراتفری کو فروغ دیا جا رہا ہے،قوم متحد رہے گی تو دشمن کی سازشیں ناکام ہوں گی

ان خیالات کا اظہار انہوں نے مرکزی مسلم لیگ شیخوپورہ کے زیر اہتمام مقامی ہال میں افطار ڈنر کی تقریب سے خطاب کرتے ہوئے کیا، اس موقع پر صدر وسطی پنجاب چوہدری حمیدالحسن گجر اور میاں حبیب الرحمن بھی موجود تھے، حافظ طلحہ سعید کا کہنا تھا کہ امت کو تقسیم کرنے والی ہر پالیسی قابلِ مذمت ہے،امت متحد ہو گی تو سازشوں کا ڈٹ کر مقابلہ کیا جا سکے گا، ایمان، اتحاد اور قربانی کے ذریعے بڑی سے بڑی مشکلات کا مقابلہ کیا جا سکتا ہے۔ آج سب سے بڑی ضرورت امت کے اتحاد کو مضبوط بنانے اور ہر قسم کے انتشار کو روکنے کی ہے۔مرکزی مسلم لیگ اتحاد امت ،خدمت کی سیاست کو فروغ دے رہی ہے، حکمرانوں کی پالیسیاں عوام دوست نہیں بلکہ عوام دشمن ہیں، پٹرولیم مصنوعات کی قیمتوں میں حالیہ اضافہ غریب عوام پر بوجھ ہے،ایک طرف عوام مہنگائی کی چکی میں پس رہے ہیں جبکہ دوسری جانب حکمران طبقہ اربوں ڈالر کے مہنگے طیاروں اور شاہانہ اخراجات میں مصروف ہے۔،اگر حکمران اشرافیہ کی غیر ضروری مراعات، سرکاری پٹرول اور شاہانہ اخراجات ختم کیے جائیں تو قومی خزانے کو اربوں ڈالر کی بچت ہو سکتی ہے اور عوام کو حقیقی ریلیف دیا جا سکتا ہے۔

وزیر اعلی پنجاب مریم نواز اور آئی جی پنجاب ڈاکٹر عثمان انور کا ویژن منشیات سے پاک پنجاب شیخوپورہ میں جاری ہے

ڈی پی او شیخوپورہ بلال ظفر شیخ کی خصوصی ہدایت پر ضلع بھر میں منشیات فروشوں کیخلاف بڑے پیمانے پر کریک ڈاؤن کا آغاز کیا گیا ہے،شیخوپورہ میں بہت بڑا منشیات فروش سی سی ڈی کے ساتھ مقابلے میں واصل جہنم ہو گیا۔ منشیات فروش ڈی ایس پیز محمد علی بٹ اور رئیس خان لودھی کے ساتھ مقابلے میں مارا گیا۔شیخوپورہ کے نواحی علاقے میں پولیس ریڈ کرنے کی جرات نہیں کرتی تھی، لاہور کے دبنگ ڈی ایس پی محمد علی بٹ اور رئیس خان لودھی نے ریڈ کیا اور ٹنوں کے حساب سے منشیات پکڑ لی،

پولیس حکام کے مطابق منشیات فروشوں کی اب خیر نہیں،کوئی منشیات فروش نہیں بچے گا،

محکمہ انتظامیہ نے ذخیرہ اندوزی کے خلاف بڑی کارروائی کرتے ہوئے تین مختلف ملوں پر چھاپے کے دوران گندم کی ساڑھے 17 ہزار بوریاں برآمد کرلیں۔

ایڈیشنل ڈپٹی کمشنر کے مطابق یہ کارروائی شیخوپورہ کے مختلف علاقوں شرق پور اور نارنگ منڈی میں کی گئی جہاں گندم کی بھاری مقدار ذخیرہ کرکے رکھی گئی تھی۔ انہوں نے بتایا کہ چھاپے کے دوران گندم کی مجموعی طور پر 17 ہزار 500 بوریاں قبضے میں لی گئیں۔انتظامیہ کے مطابق برآمد شدہ گندم میں سے 10 ہزار بوریاں فلور ملوں کو سرکاری نرخوں پر فروخت کر دی گئی ہیں تاکہ آٹے کی مارکیٹ میں کسی قسم کا بحران پیدا نہ ہو۔ڈپٹی کمشنر شیخوپورہ نے اس موقع پر کہا کہ باقی گندم بھی جلد از جلد فلور ملوں کو حکومت کی مقرر کردہ قیمت 3 ہزار روپے فی من کے حساب سے فراہم کر دی جائے گی۔ ان کا کہنا تھا کہ کسی کو بھی ذخیرہ اندوزی اور ناجائز منافع خوری کی اجازت نہیں دی جائے گی اور گندم کی تقسیم کو شفاف اور منصفانہ بنایا جائے گا۔

انتظامیہ کا مزید کہنا ہے کہ ذخیرہ اندوزی کے خلاف کارروائیاں آئندہ بھی جاری رہیں گی تاکہ عوام کو آٹے کی قلت یا اضافی قیمتوں کا سامنا نہ کرنا پڑے۔