Category: شیخوپورہ

نارنگ منڈی (نامہ نگار محمد وقاص قمر) نارنگ ریلوے اسٹیشن پر خواتین کے ساتھ بدتمیزی اور تشدد کا ایک افسوسناک واقعہ پیش آیا ہے، جہاں درجن بھر سے زائد نوجوانوں نے ایک خاتون پر وحشیانہ تشدد کیا اور ان پر تھپڑوں کی بارش کر دی۔ عینی شاہدین کے مطابق، یہ واقعہ اس وقت پیش آیا جب خواتین نے ایک مقامی نوجوان کو چھیڑ چھاڑ کرنے سے منع کیا۔

تفصیلات کے مطابق، نارنگ ریلوے اسٹیشن پر موجود کچھ خواتین نے ایک نوجوان کی ہراسانی اور بدتمیزی پر اسے منع کیا، جس پر وہ نوجوان آپے سے باہر ہو گیا۔ اس نے فوراً اپنے دوستوں کو فون کر کے اسٹیشن پر بلا لیا۔ جب ٹرین اسٹیشن پر پہنچی اور خواتین اس میں داخل ہونے لگیں تو ان لڑکوں نے حملہ کر دیا اور خواتین کو زدوکوب کیا۔

حملہ آور نوجوانوں نے صرف اسٹیشن پر ہی نہیں بلکہ ٹرین کے اندر داخل ہو کر بھی خواتین کو تشدد کا نشانہ بنایا، جس سے مسافروں میں خوف و ہراس پھیل گیا۔ اس واقعے نے ریلوے اسٹیشنز پر خواتین کی حفاظت پر سنگین سوالات کھڑے کر دیے ہیں۔

مقامی افراد اور مسافروں نے ریلوے کے اعلیٰ حکام سے فوری نوٹس لینے اور مجرموں کو کیفر کردار تک پہنچانے کا مطالبہ کیا ہے۔ انہوں نے کہا کہ ایسے واقعات نہ صرف معاشرے کی اخلاقی گراوٹ کو ظاہر کرتے ہیں بلکہ اس بات کا بھی ثبوت ہیں کہ عوامی مقامات پر خواتین محفوظ نہیں۔ حکام کو چاہیے کہ وہ اس قسم کے واقعات کی روک تھام کے لیے سخت اقدامات کریں تاکہ مستقبل میں ایسا کوئی واقعہ دوبارہ رونما نہ ہو سکے۔

نارنگ منڈی (نامہ نگار: محمد وقاص قمر)نارنگ منڈی شہر اور گردونواح میں آئس سمیت دیگر منشیات کی سرعام فروخت عروج پر ہے۔ منشیات فروش دیدہ دلیری سے اپنا مکروہ دھندہ جاری رکھے ہوئے ہیں، جب کہ پولیس اور سکیورٹی ادارے بے بسی کی تصویر بنے ہوئے ہیں۔ اس تشویشناک صورتحال کے نتیجے میں نوجوان نسل تباہی کے دہانے پر پہنچ چکی ہے۔

شہر میں آئس کے نشے کے ساتھ ساتھ چرس، افیون اور شراب کی فروخت بھی عام ہے۔ منشیات استعمال کرنے والوں کی تعداد میں دن بدن اضافہ ہو رہا ہے، اور سب سے زیادہ پریشان کن بات یہ ہے کہ اس میں کم عمر نوجوانوں کی تعداد تیزی سے بڑھ رہی ہے۔ منشیات فروشوں کی چاندی ہو چکی ہے اور وہ بغیر کسی خوف کے اپنے مذموم مقاصد میں کامیاب ہو رہے ہیں۔

منشیات کی روک تھام کے لیے کوئی خاطر خواہ اقدامات نہ ہونے پر شہریوں میں شدید اضطراب پایا جاتا ہے۔ وہ سوال اٹھا رہے ہیں کہ آخر پولیس اور قانون نافذ کرنے والے ادارے کیوں خاموش تماشائی بنے ہوئے ہیں؟ روزانہ نئے لوگ اس لعنت کا شکار ہو رہے ہیں، اور کئی ماؤں کی گودیں اجڑ چکی ہیں۔

اہل علاقہ کا کہنا ہے کہ پولیس منشیات فروشوں کو پکڑنے میں بری طرح ناکام ہو چکی ہے۔ پولیس کی اس ناکامی پر شہری برہم ہیں۔ اہل علاقہ نے آئی جی پنجاب ڈاکٹر عثمان انور سمیت تمام سیاسی نمائندوں اور سماجی تنظیموں سے مطالبہ کیا ہے کہ وہ اس سنگین صورتحال کا فوری نوٹس لیں اور شہر کو منشیات کے اس جال سے نجات دلائیں۔ شہریوں کا کہنا ہے کہ اگر فوری اقدامات نہ کیے گئے تو پورا شہر اس نشے کی لعنت میں جکڑ جائے گا۔

نارنگ منڈی (نامہ نگار محمد وقاص قمر) مریدکے نارووال روڈ پر مسلح ڈکیتی کی واردات میں پیزا ڈلیوری بوائے لٹ گیا۔ تفصیلات کے مطابق ایچ ایف سی نارنگ پیزا شاپ کا ڈلیوری بوائے جاوید مریدکے نارووال روڈ پر پیزا ڈلیوری کے لیے جا رہا تھا کہ پنڈوری کے قریب تین نامعلوم موٹر سائیکل سوار ڈاکوؤں نے اسے روک لیا۔ ملزمان نے اسلحہ کے زور پر ہزاروں روپے نقدی اور موبائل فون چھین لیا اور موقع سے فرار ہو گئے۔

نارنگ پولیس نے واقعے کا مقدمہ درج کر کے ملزمان کی تلاش اور تفتیش کا آغاز کر دیا ہے۔

نارنگ منڈی (نامہ نگار محمد وقاص قمر) – پنجاب حکومت کی ہدایت پر محکمہ زراعت توسیع نے نارنگ منڈی میں جعلی اور غیر معیاری کھاد و ادویات فروخت کرنے والے ڈیلرز کے خلاف سخت کارروائی شروع کر دی ہے۔

اسسٹنٹ ڈائریکٹر محکمہ توسیع مریدکے، ملک فاروق احمد کی قیادت میں ایک ٹیم نے ٹیکنیکل زراعت آفیسر اقراء نذیر اور زراعت آفیسر ملک آصف کے ہمراہ نارنگ منڈی کے مختلف علاقوں میں زرعی دکانوں پر اچانک چھاپے مارے۔ اس دوران انہوں نے مختلف کھادوں جیسے زنک، ہیومک ایسڈ، اور ڈی اے پی کے ساتھ ساتھ دیگر زرعی ادویات کا بھی معائنہ کیا۔

معیار کی جانچ کے لیے، ٹیم نے تمام اشیاء کے نمونے حاصل کر کے لیبارٹری بھجوا دیے ہیں۔ اسسٹنٹ ڈائریکٹر ملک فاروق احمد نے بتایا کہ وزیراعلیٰ پنجاب مریم نواز کے ویژن اور ڈپٹی ڈائریکٹر شیخوپورہ محمد شفیق کی ہدایات کے مطابق، کاشتکاروں کو معیاری اور سستی زرعی اشیاء کی فراہمی حکومت کی اولین ترجیح ہے۔

انہوں نے مزید کہا کہ جعلی یا غیر معیاری ادویات فروخت کرنے والوں کے خلاف سخت قانونی کارروائی کی جائے گی اور کاشتکاروں کو نقصان سے بچانے کے لیے چھاپوں کا سلسلہ جاری رہے گا۔

نارنگ منڈی (نامہ نگار محمد وقاص قمر) شہر اور اس کے نواحی علاقوں میں آوارہ کتوں کی بڑھتی ہوئی تعداد نے شہریوں کی زندگی اجیرن کر دی ہے۔ عوامی مقامات پر خونخوار کتوں کی موجودگی شہریوں کے لیے پریشانی کا باعث بن رہی ہے، لیکن متعلقہ محکمے اس مسئلے کو حل کرنے کے لیے کوئی اقدامات نہیں کر رہے۔

شہر کی گلیوں، بازاروں، ریلوے اسٹیشن، بینکوں، سرکاری عمارتوں اور پارکس میں درجنوں آوارہ کتے ٹولیوں کی شکل میں گھومتے پھرتے ہیں۔ شہریوں کا گھروں سے باہر نکلنا مشکل ہو گیا ہے، بچے باہر نکلنے سے ڈرتے ہیں اور خواتین و طالبات کا بازار اور تعلیمی اداروں میں جانا بھی دشوار ہو چکا ہے۔

اس صورتحال پر محکمہ صحت اور بلدیہ ایک دوسرے پر ذمہ داری ڈال رہے ہیں، جس کی وجہ سے یہ مسئلہ حل طلب ہے۔ شہریوں نے ڈپٹی کمشنر شیخوپورہ شاہد عمران مارتھ سے اس سنگین مسئلے کا فوری نوٹس لینے اور آوارہ کتوں کو تلف کرنے کے لیے اقدامات کا مطالبہ کیا ہے۔

نارنگ منڈی(نامہ نگارمحمدوقاص) نارنگ منڈی میں پولیس کی ایک ایسی کارروائی سامنے آئی ہے جس نے قانون کے نفاذ اور غریبوں کے ساتھ برتاؤ پر کئی سوالات کھڑے کر دیے ہیں۔ رفیق آباد کا رہائشی نوجوان قاسم جو حال ہی میں اپنی کنٹریکٹ ملازمت سے فارغ ہوا تھا، ایک عام ٹی شرٹ اور بلیک ٹراؤزر پہننے پر پولیس کے شکنجے میں آگیا۔

تفصیلات کے مطابق قاسم رتیاں کینٹ، نارنگ میں کنٹریکٹ پر بھرتی ہوا تھا، مگر ملازمت کی مدت پوری ہونے پر اس کی ایکسٹینشن نہ ہو سکی اور اسے اپنی نوکری سے ہاتھ دھونا پڑا۔ گزشتہ دنوں پٹرولنگ پولیس نے گشت کے دوران قاسم کو روکا اور اس کی ٹی شرٹ کے بارے میں پوچھ گچھ کی۔ قاسم نے پولیس کو بتایا کہ یہ ایک عام ٹی شرٹ ہے جو وہ اپنی ڈیوٹی کے دوران پہنا کرتا تھا، مگر پولیس نے اس کی بات سنے بغیر ہی اسے نارنگ تھانے لے جا کر حوالات میں بند کر دیا۔

نارنگ پولیس نے مزید "پھرتی” دکھاتے ہوئے قاسم پر جعلی ایس ایس کمانڈو بن کر لوگوں کو لوٹنے کا مقدمہ درج کر دیا اور اسے جیل بھیج دیا۔ یہ واقعہ اس بات کی طرف اشارہ کرتا ہے کہ ایک بے روزگار اور غریب نوجوان کس طرح پولیس کی ہٹ دھرمی کا شکار ہوا۔

مقامی شہریوں کا کہنا تھا کہ کیا ملک کا قانون صرف غریبوں کے لیے ہے؟ ایک طرف جہاں وڈیرے غیر قانونی اسلحہ کے ساتھ گھومتے ہیں، ان کے خلاف کوئی کارروائی نہیں ہوتی، وہیں ایک غریب نوجوان صرف ایک عام لباس پہننے کی وجہ سے جعلی مقدمے کا سامنا کر رہا ہے۔ قاسم کے گھر پہلے ہی فاقے پڑے ہیں اور اس پر یہ اضافی مصیبت آن پڑی ہے۔

شہریوں نے آر پی او، ڈی پی او شیخوپورہ اور آئی جی پنجاب سے اس واقعے کا فوری نوٹس لینے کا مطالبہ کیا ہے ،اور ساتھ کہا ہے کہ ذمہ دار اہلکاروں کے خلاف کارروائی کی جائے اور اس بے گناہ نوجوان کو انصاف دلایا جائے۔

نارنگ منڈی (نامہ نگار محمد وقاص قمر) لاہور سے سیالکوٹ جانے والی لاثانی ایکسپریس پر کوٹ مولچند کے قریب شرپسند عناصر کی جانب سے شدید پتھراؤ کیا گیا، جس کے نتیجے میں قلعہ احمد آباد کا رہائشی بزرگ مسافر ظفر اقبال آنکھ پر پتھر لگنے سے شدید زخمی ہوگیا۔ عینی شاہدین کے مطابق پتھر لگنے سے مسافر کا چہرہ لہولہان ہوگیا جبکہ بوگیوں پر بھی شدید نقصان پہنچا۔

ذرائع کا کہنا ہے کہ اس قسم کے واقعات معمول بن چکے ہیں،کبھی ٹرین کے انجن کو نشانہ بنایا جاتا ہے تاکہ ڈرائیوروں کو ہراساں کیا جا سکے، تو کبھی مسافروں پر گندگی سے بھرے شاپر، کیچڑ اور پتھر برسائے جاتے ہیں، جس سے متعدد افراد زخمی ہو چکے ہیں۔ انجن کے شیشے ٹوٹنے اور بوگیوں کو نقصان پہنچنے کے واقعات کے باوجود پاکستان ریلوے اور ریلوے پولیس کی جانب سے کوئی عملی قدم نہیں اٹھایا گیا۔

گزشتہ روز کے واقعے میں زخمی ہونے والے بزرگ مسافر ظفر اقبال کو فوری طبی امداد دی گئی تاہم مسافروں نے شدید غم و غصے کا اظہار کرتے ہوئے وفاقی وزیر ریلوے حنیف عباسی اور آئی جی ریلوے پولیس رائے محمد طاہر سے مطالبہ کیا ہے کہ ایسے واقعات کا فوری نوٹس لیا جائے اور ملزمان کو گرفتار کر کے قانون کے کٹہرے میں لایا جائے تاکہ مسافروں کی جان و مال کا تحفظ یقینی بنایا جا سکے۔