Category: شیخوپورہ

شیخوپورہ (محمد فہیم شاکر سے )محکمہ بلڈنگز کے ایکسین نے اپنی من پسند فرم کو نوازنے کے لیے گورنمنٹ ریٹس سے بھی 2000فیصدکم پر کام کرنے کی آفر کر ڈالی جس سے قومی خزانہ کو 26لاکھ 80ہزار روپے کا چونا لگانے کی تیاری کر لی گئی ہے جس پر کنٹریکڑز سراپا احتجاج بن گئے انہوں نے وزیر اعلیٰ پنجاب سے صورتحال کا نوٹس لینے کی اپیل کی ہے،بتایا گیا ہے کہ 20مئی کو کمشنر آفس لاہور میں شرقپور میں باؤنڈری وال کے ایک کروڑ 61لاکھ73ہزار روپے مالیت کے منصوبہ میں کنٹریکٹرزنے ٹینڈر حاصل کرکے اوپن نیلامی میں حصہ لیا جس میں سب سے کم ریٹ ریلائنس کنسٹرکیشن کمپنی نے ظاہر کئے مگر ایکسین نے اپنی من پسند فرم نعیم اللہ خان اینڈ کمپنی کو نوازنے کے لیے ڈرافسمین اور ٹائپسٹ کے ذریعے اس کام کو 2000فیصد کم ریٹ پر کرکے یہ کام انہیں دینے کی تیاری شروع کر دی جس سے قومی خزانہ کو 26لاکھ روپے سے زائد کی رقم کا نقصان ہونے کا اندیشہ ہے اور یہ آفر غیر قانونی ہے جس پر کنٹریکٹرز نے اس کام کے ورک آڈرز روکنے کے لیے تحریری درخواست بھی دے دی ہے۔

شیخوپورہ (نمائندہ باغی ٹی وی) ڈپٹی کمشنر محمد اصغر جوئیہ نے موٹر وے پر فصلوں کی باقیات جلانے کے باعث پیدا ہونے والے دھویں کے نتیجہ میں ٹریفک حادثے کا نوٹس لیتے ہوئے زمینداروں کے خلاف کارروائی کا حکم دے دیا ہے۔

ڈپٹی کمشنر محمد اصغر جوئیہ نے کہا ہے کہ موٹروے کے قریب فصلوں کی باقیات کو آگ لگانا غیر قانونی اور انتہائی خطرناک عمل ہے۔فصل کی باقیات جلانا نہ صرف ماحول کو آلودہ کرتا ہے بلکہ حادثات کا بھی سبب بنتا ہے۔ ڈپٹی کمشنر نے کہا کہ آگ لگانے والے 39 زمینداروں کے خلاف مقدمہ درج کروا دیا گیا ہے جبکہ 17 کی گرفتاری بھی عمل میں لائی جا چکی ہے۔

انہوں نے کہا کہ محکمہ زراعت اور تمام متعلقہ افسران کو دوران سفر لوگوں کی زندگی کو محفوظ بنانے کے ضروری اقدامات کی ہدایات جاری کر رکھی ہیں۔ ڈپٹی کمشنر نے کہا کہ فصلوں کی باقیات کو آگ لگا کر لوگوں کی جانوں سے کھیلنے والے زمینداروں سے سختی سے نمٹا جائے گا۔عوام کی جانوں سے کھیلنے والے کسان کسی رعایت کے مستحق نہیں ہیں۔

انہوں نے کہا کہ ضلعی انتظامیہ نے موٹروے پولیس کے تعاون سے کسانوں کے لئے آگاہی مہم بھی شروع کر رکھی ہے۔سوشل میڈیا اور مساجد میں فصل کے باقیات کو آگ نہ لگانے کے اعلانات بھی کروائے جا رہے ہیں اور دیہات کے لمبرداران سے گارنٹی لی جا رہی ہے۔ڈپٹی کمشنر نے کہا کہ ضلعی انتظامیہ عوام الناس کے سفر کو محفوظ بنانے کے لئے متحرک اور فعال انداز میں فرائض سر انجام دے رہی ہے۔

شیخوپورہ (نمائندہ باغی ٹی وی) وزیراعلیٰ پنجاب سردار عثمان بزدار کی ہدایت پر ضلعی انتظامیہ کے زیر اہتمام شیخوپورہ میں فلسطین کی عوام سے اظہار یکجہتی کے لئے ریلی کا انعقاد کیا گیا ۔ ریلی کمپنی باغ سے شروع ہو کر ریلوے روڈ سے ہوتی ہوئی یادگار چوک جناح پارک پہنچ کر اختتام پذیر ہوئی۔ جس کی قیادت ڈپٹی کمشنر شیخوپورہ محمد اصغر جوئیہ اورڈی پی او شیخوپورہ غلام مبشر میکن نے کی۔ ریلی میں افسران ،صدر پریس کلب مبشر حسن بٹ، جنرل سیکرٹری رانا محمد عثمان، ملازمین و سول سوسائٹی اور زندگی کے ہر شعبہ سے تعلق رکھنے والے مرد و خواتین نے شرکت کی۔

ریلی میں وکلاء، صحافیوں ، سیاسی و سماجی شخصیات اور شہریوں کی بڑی تعداد نے بھی شرکت کی۔ ریلی کے شرکاءنے مختلف پلے کارڈ اور بینرز اٹھا رکھے تھے جن پر اسرائیلی مظالم کے خلاف اور فلسطینی عوام سے اظہار یکجہتی کی تحاریر درج تھیں۔ ریلی کے شرکاءنے اسرائیلی مظالم کے خلا ف شدید نعرے بازی کی اور اقوام متحدہ سے مطالبہ کیا کہ اسرائیلی بر بریت کا نوٹس لے کر فلسطینی عوام کا تحفظ کیا جائے۔

ڈپٹی کمشنر شیخوپورہ نے اس موقع پر میڈیا کے نمائندوں سے بات چیت کرتے ہوئے کہا کہ مسلمانوں کے قبلہ اول اور بیت المقدس فلسطین کی آزادی کے لئے ہر پلیٹ فارم سے آواز بلند اور ہر ممکن جدوجہد کی جائے گی۔ پاکستان فلسطینیوں کے ساتھ کھڑا ہے، مظلوم فلسطینیوں کا خون رائیگاں نہیں جانے دیں گے۔ انہوں نے کہا کہ وزیراعظم پاکستان عمران خان اسلامی ممالک کے سر براہان اور اقوام عالم سے رابطے میں ہیں اور یہ بات واضع ہے کہ فلسطین کو کبھی تنہا نہیں چھوڑا جائے گا۔

ڈی پی او شیخوپورہ نے گفتگو کرتے ہوئے کہا کہ فلسطین میں معصوم بچوں اور خواتین کو بے دردی سے شہید کیا جا رہا ہے ۔ اقوام عالم فلسطین میں اسرائیلی مظالم کا فوری نوٹس لے۔ صدر پریس کلب مبشر حسن بٹ نے کہا کہ ہم اسرائیل کو یہ بات واضع کر دینا چاہتے ہیں کہ ہمیں مذمت کے ساتھ ساتھ مرمت بھی کرنا آتی ہے۔

ترجمان ضلعی انتظامیہ فیصل جاوید نے کہا کہ اسرائیل کے جنگی عزائم اب دنیا پر واضع ہو چکے ہیں اورقبلہ اول کے تحفظ کے لئے مسلمان اپنی جانیں قربان کرنے کو تیار ہیں ۔ پاکستان کی حکومت مظلوم فلسطینی عوام پر ظلم کے خلاف ہر فورم پر آواز بلند کر رہی ہے ہم فلسطین پر ظلم کی بھر پور مذمت کرتے ہیں۔ ریلی کے اختتام پر بیت المقدس اور قبلہ اول کی حفاظت اور فلسطینی عوام کو فتح اور نصرت کے لئے خصوصی دعا کی گئی۔ ریلی کے دوران کورونا ایس او پیز کے تحت ماسک پہن کر شرکت کی اور سماجی فاصلوں کی خیال رکھا گیا۔ ڈپٹی کمشنر نے علماءکرام اور مشائخ سے اپیل کی کہ آج جمعتہ المبارک کا با برکت دن ہے۔ نماز جمعہ کی ادائیگی کے دوران فلسطینیوں کی آزادی کے لئے خصوصی دعاﺅں کا اہتمام کریں

شیخوپورہ (نمائندہ باغی ٹی وی ) گورنر پنجاب چوہدری محمد سرور نے شیخوپورہ کا دورہ کیا اور آب پاک واٹر فلٹریشن پلانٹ کا افتتاح کیا۔ پنجاب چوہدری محمد سرور نے اس موقع پر میڈیا سے گفتگو کرتے ہویے کہا کہ وزیر اعظم پاکستان اور وزیر اعلی پنجاب کے ویژن کے تحت پورے پنجاب میں شہریوں کو صاف پانی کی فراہمی کے لیے ہنگامی بنیادوں پر کام جاری ہے

رواں سال کے آخر تک پنجاب کے مختلف علاقوں میں 1600صاف پانی کے مراکز مکمل ہوجائیں گے اور 7.6 ملین لوگوں کو صاف پانی میسر ہوگا۔چوہدری محمد سرور کا کہنا تھا کہ ضلع شیخوپورہ اور ننکانہ صاحب کے عوام کو صاف پانی کی فراہمی کے لیے 48 واٹر فلٹریشن پلانٹ لگائے جا رہے ہیں۔جنوبی پنجاب کے علاقوں سمیت پورے پنجاب کے اضلاع میں آب پاک اتھارٹی کے تحت صاف پانی کی فراہمی کے لیے کام جاری ہے وہ دن انشاء اللہ دور نہیں جب پنجاب کے تمام عوام کو صاف پانی انکی دہلیز پر میسر ہو گا،دریں اثنا گورنر پنجاب نے ضلعی انتظامیہ کے افسران اراکین اسمبلی پاکستان تحریک انصاف کے عہدیداران سے بھی ملاقات کی اور ضلع شیخوپورہ میں مختلف ترقیاتی سکیمیوں اور مساٸل پر گفتگو کی۔

شیخوپورہ (نمائندہ باغی ٹی وی )روڑ پر سفر کرنے والوں میں موٹر سائیکل سوار سب سے زیادہ حادثات کا شکار ہوتے ہیں اس لئے موٹر سائیکل سواروں کی سیفٹی پر کام کرنا انتہائی اہم ہے ان خیالات کا اظہار ڈپٹی کمانڈنٹ موٹروے پولیس ٹریننگ کالج شیخوپورہ تیمور خان نے اٹلس ہنڈا کے اشتراک سے کالا شاہ کاکو کے مقام پر موٹرسائیکل سواروں سے متعلق ایک روڑ سیفٹی مہم کا آغاز کرتے ہوئے کیا۔ اٹلس ہنڈا کے نیشنل مینجر سیفٹی افتخار احمد، ریجنل مینجر سیفٹی آصف اکرام اورکشیر تعداد میں موٹروے پولیس کے افسران بھی اس موقع پر موجود تھے۔

روڑ سیفٹی کی خصوصی مہم کے دوران موٹرسائیکل سواروں میں ہیلمٹ تقسیم کئے گئے، بیک ویو مررلگائے گئے اور ہیڈ اور ٹیل لائٹس لگانے کے ساتھ ساتھ موٹرسائیکل سواروں کو کرونا وائرس سے بچاؤ کی آگاہی کے لئے ماسک بھی تقسیم کئے گئے۔ اس موقع پر میڈیا سے گفتگو کرتے ہوئے ڈپٹی کمانڈنٹ موٹروے پولیس ٹریننگ کالج تیمور خان نے کہا کہ موٹرسائیکل سواروں کے حادثات کی سب سے بڑی وجہ بیک ویو مررز کا نہ ہونا ہے۔ ہیڈ اور ٹیل لائٹس کا خراب ہونابھی حادثات کی وجہ بنتا ہے۔ انہوں نے مزید کہا کہ معیاری ہیلمٹ کے استمعال سے جان لیوا سر کی چوٹ سے بچاجا سکتا ہے۔ مہم کے دوران موٹرسائیکل سواروں کو بریف کیا گیا کہ ہیلمٹ کا استمعال لازمی کریں، لین تبدیل کرنے یا مڑنے کے لئے انڈیکٹرز کے ساتھ ساتھ بیک ویو مررز کا استمعال کریں، ہیڈ اور ٹیل لائٹس کو دُرست حالت میں رکھیں، دو سے زیادہ لوگ سفر نہ کریں، روڑ کے انتہائی بائیں جانب چلیں اور رفتار مناسب رکھیں۔

نیشنل مینجر سیفٹی ہنڈا اٹلس مسٹر افتخار احمد نے اس موقع پر کہا کہ اُن کی کمپنی روڑسیفٹی پر موٹروے پولیس کے عوامی خدمت کے ساتھ کام کرنے کے جذبے کو قدر کی نگاہ سے دیکھتی ہے اور وہ روڑسیفٹی کے شعور کو اُجاگر کرنے کے لئے موٹروے پولیس کے ساتھ مل کر مستقبل میں بھی کام کرتے رہیں گے