نارنگ منڈی (نامہ نگار محمد وقاص قمر) مریدکے نارووال روڈ پر مسلح ڈکیتی کی واردات میں پیزا ڈلیوری بوائے لٹ گیا۔ تفصیلات کے مطابق ایچ ایف سی نارنگ پیزا شاپ کا ڈلیوری بوائے جاوید مریدکے نارووال روڈ پر پیزا ڈلیوری کے لیے جا رہا تھا کہ پنڈوری کے قریب تین نامعلوم موٹر سائیکل سوار ڈاکوؤں نے اسے روک لیا۔ ملزمان نے اسلحہ کے زور پر ہزاروں روپے نقدی اور موبائل فون چھین لیا اور موقع سے فرار ہو گئے۔
نارنگ پولیس نے واقعے کا مقدمہ درج کر کے ملزمان کی تلاش اور تفتیش کا آغاز کر دیا ہے۔
نارنگ منڈی (نامہ نگار محمد وقاص قمر) ماہ ربیع الاول کی آمد کے سلسلے میں مرکز اہلسنت نارنگ میں مفتی شہباز رسول سعیدی کی زیر صدارت ایک اہم اجلاس منعقد ہوا۔ اس اجلاس میں علماء اور اہلسنت تنظیمات کے نمائندوں نے شرکت کی۔
اجلاس میں اس سال جشن عید میلاد النبیؐ کو شایان شان طریقے سے منانے کا اعلان کیا گیا۔ اس کی ایک خاص وجہ نبی کریم حضرت محمدؐ کی دنیا میں تشریف آوری کے 1500 سال مکمل ہونا ہے۔
اجلاس میں سابق صدر امن کمیٹی شہباز احمد، سابق جنرل سیکرٹری اعظم علی باجوہ، قاری محمد خالد چشتی، قاری محمد انیس، قاری یونس رضا، اور حافظ اسد سمیت تحریک لبیک، مصطفائی تحریک، اور تحریک منہاج القرآن جیسی تنظیمات کے نمائندے بھی موجود تھے۔
علماء اور تنظیمات اہلسنت نے کہا کہ وہ اس تاریخی جشن ولادت کو بھرپور طریقے سے منائیں گے کیونکہ آپؐ کی ولادت سے بڑھ کر کوئی اور خوشی نہیں ہے۔ ان کا کہنا تھا کہ جشن ولادت منانے کا مقصد کائنات کی سب سے عظیم خوشی کو دنیا کے سامنے اجاگر کرنا ہے۔
نارنگ منڈی (نامہ نگار محمد وقاص قمر) – پنجاب حکومت کی ہدایت پر محکمہ زراعت توسیع نے نارنگ منڈی میں جعلی اور غیر معیاری کھاد و ادویات فروخت کرنے والے ڈیلرز کے خلاف سخت کارروائی شروع کر دی ہے۔
اسسٹنٹ ڈائریکٹر محکمہ توسیع مریدکے، ملک فاروق احمد کی قیادت میں ایک ٹیم نے ٹیکنیکل زراعت آفیسر اقراء نذیر اور زراعت آفیسر ملک آصف کے ہمراہ نارنگ منڈی کے مختلف علاقوں میں زرعی دکانوں پر اچانک چھاپے مارے۔ اس دوران انہوں نے مختلف کھادوں جیسے زنک، ہیومک ایسڈ، اور ڈی اے پی کے ساتھ ساتھ دیگر زرعی ادویات کا بھی معائنہ کیا۔
معیار کی جانچ کے لیے، ٹیم نے تمام اشیاء کے نمونے حاصل کر کے لیبارٹری بھجوا دیے ہیں۔ اسسٹنٹ ڈائریکٹر ملک فاروق احمد نے بتایا کہ وزیراعلیٰ پنجاب مریم نواز کے ویژن اور ڈپٹی ڈائریکٹر شیخوپورہ محمد شفیق کی ہدایات کے مطابق، کاشتکاروں کو معیاری اور سستی زرعی اشیاء کی فراہمی حکومت کی اولین ترجیح ہے۔
انہوں نے مزید کہا کہ جعلی یا غیر معیاری ادویات فروخت کرنے والوں کے خلاف سخت قانونی کارروائی کی جائے گی اور کاشتکاروں کو نقصان سے بچانے کے لیے چھاپوں کا سلسلہ جاری رہے گا۔
نارنگ منڈی (نامہ نگار محمد وقاص قمر) شہر اور اس کے نواحی علاقوں میں آوارہ کتوں کی بڑھتی ہوئی تعداد نے شہریوں کی زندگی اجیرن کر دی ہے۔ عوامی مقامات پر خونخوار کتوں کی موجودگی شہریوں کے لیے پریشانی کا باعث بن رہی ہے، لیکن متعلقہ محکمے اس مسئلے کو حل کرنے کے لیے کوئی اقدامات نہیں کر رہے۔
شہر کی گلیوں، بازاروں، ریلوے اسٹیشن، بینکوں، سرکاری عمارتوں اور پارکس میں درجنوں آوارہ کتے ٹولیوں کی شکل میں گھومتے پھرتے ہیں۔ شہریوں کا گھروں سے باہر نکلنا مشکل ہو گیا ہے، بچے باہر نکلنے سے ڈرتے ہیں اور خواتین و طالبات کا بازار اور تعلیمی اداروں میں جانا بھی دشوار ہو چکا ہے۔
اس صورتحال پر محکمہ صحت اور بلدیہ ایک دوسرے پر ذمہ داری ڈال رہے ہیں، جس کی وجہ سے یہ مسئلہ حل طلب ہے۔ شہریوں نے ڈپٹی کمشنر شیخوپورہ شاہد عمران مارتھ سے اس سنگین مسئلے کا فوری نوٹس لینے اور آوارہ کتوں کو تلف کرنے کے لیے اقدامات کا مطالبہ کیا ہے۔
نارنگ منڈی(نامہ نگارمحمدوقاص) نارنگ منڈی میں پولیس کی ایک ایسی کارروائی سامنے آئی ہے جس نے قانون کے نفاذ اور غریبوں کے ساتھ برتاؤ پر کئی سوالات کھڑے کر دیے ہیں۔ رفیق آباد کا رہائشی نوجوان قاسم جو حال ہی میں اپنی کنٹریکٹ ملازمت سے فارغ ہوا تھا، ایک عام ٹی شرٹ اور بلیک ٹراؤزر پہننے پر پولیس کے شکنجے میں آگیا۔
تفصیلات کے مطابق قاسم رتیاں کینٹ، نارنگ میں کنٹریکٹ پر بھرتی ہوا تھا، مگر ملازمت کی مدت پوری ہونے پر اس کی ایکسٹینشن نہ ہو سکی اور اسے اپنی نوکری سے ہاتھ دھونا پڑا۔ گزشتہ دنوں پٹرولنگ پولیس نے گشت کے دوران قاسم کو روکا اور اس کی ٹی شرٹ کے بارے میں پوچھ گچھ کی۔ قاسم نے پولیس کو بتایا کہ یہ ایک عام ٹی شرٹ ہے جو وہ اپنی ڈیوٹی کے دوران پہنا کرتا تھا، مگر پولیس نے اس کی بات سنے بغیر ہی اسے نارنگ تھانے لے جا کر حوالات میں بند کر دیا۔
نارنگ پولیس نے مزید "پھرتی” دکھاتے ہوئے قاسم پر جعلی ایس ایس کمانڈو بن کر لوگوں کو لوٹنے کا مقدمہ درج کر دیا اور اسے جیل بھیج دیا۔ یہ واقعہ اس بات کی طرف اشارہ کرتا ہے کہ ایک بے روزگار اور غریب نوجوان کس طرح پولیس کی ہٹ دھرمی کا شکار ہوا۔
مقامی شہریوں کا کہنا تھا کہ کیا ملک کا قانون صرف غریبوں کے لیے ہے؟ ایک طرف جہاں وڈیرے غیر قانونی اسلحہ کے ساتھ گھومتے ہیں، ان کے خلاف کوئی کارروائی نہیں ہوتی، وہیں ایک غریب نوجوان صرف ایک عام لباس پہننے کی وجہ سے جعلی مقدمے کا سامنا کر رہا ہے۔ قاسم کے گھر پہلے ہی فاقے پڑے ہیں اور اس پر یہ اضافی مصیبت آن پڑی ہے۔
شہریوں نے آر پی او، ڈی پی او شیخوپورہ اور آئی جی پنجاب سے اس واقعے کا فوری نوٹس لینے کا مطالبہ کیا ہے ،اور ساتھ کہا ہے کہ ذمہ دار اہلکاروں کے خلاف کارروائی کی جائے اور اس بے گناہ نوجوان کو انصاف دلایا جائے۔
نارنگ منڈی (نامہ نگار محمد وقاص قمر) لاہور سے سیالکوٹ جانے والی لاثانی ایکسپریس پر کوٹ مولچند کے قریب شرپسند عناصر کی جانب سے شدید پتھراؤ کیا گیا، جس کے نتیجے میں قلعہ احمد آباد کا رہائشی بزرگ مسافر ظفر اقبال آنکھ پر پتھر لگنے سے شدید زخمی ہوگیا۔ عینی شاہدین کے مطابق پتھر لگنے سے مسافر کا چہرہ لہولہان ہوگیا جبکہ بوگیوں پر بھی شدید نقصان پہنچا۔
ذرائع کا کہنا ہے کہ اس قسم کے واقعات معمول بن چکے ہیں،کبھی ٹرین کے انجن کو نشانہ بنایا جاتا ہے تاکہ ڈرائیوروں کو ہراساں کیا جا سکے، تو کبھی مسافروں پر گندگی سے بھرے شاپر، کیچڑ اور پتھر برسائے جاتے ہیں، جس سے متعدد افراد زخمی ہو چکے ہیں۔ انجن کے شیشے ٹوٹنے اور بوگیوں کو نقصان پہنچنے کے واقعات کے باوجود پاکستان ریلوے اور ریلوے پولیس کی جانب سے کوئی عملی قدم نہیں اٹھایا گیا۔
گزشتہ روز کے واقعے میں زخمی ہونے والے بزرگ مسافر ظفر اقبال کو فوری طبی امداد دی گئی تاہم مسافروں نے شدید غم و غصے کا اظہار کرتے ہوئے وفاقی وزیر ریلوے حنیف عباسی اور آئی جی ریلوے پولیس رائے محمد طاہر سے مطالبہ کیا ہے کہ ایسے واقعات کا فوری نوٹس لیا جائے اور ملزمان کو گرفتار کر کے قانون کے کٹہرے میں لایا جائے تاکہ مسافروں کی جان و مال کا تحفظ یقینی بنایا جا سکے۔
نارنگ (نامہ نگار محمد وقاص قمر) نارنگ منڈی اور گردونواح کے سینکڑوں دیہات کیلئے قائم واحد دیہی مرکز صحت بدترین انتظامی غفلت کا شکار ہو چکا ہے۔ مرکز کو آؤٹ سورس کر دیا گیا ہے مگر تاحال کسی ٹھیکیدار نے چارج نہیں سنبھالا، جس کے نتیجے میں بنیادی سہولیات کا فقدان اور مریضوں کی مشکلات میں شدید اضافہ ہو گیا ہے۔
ہسپتال ذرائع کے مطابق دیہی مرکز صحت نارنگ کو آؤٹ سورس کیے جانے کے بعد نہ صرف کسی نجی آپریٹر نے ذمہ داری قبول کی، بلکہ ضلعی محکمہ صحت نے بجٹ بھی بند کر دیا، جس کے باعث ادویات کی شدید قلت پیدا ہو چکی ہے۔ یہاں تک کہ ایمرجنسی کی ادویات اور ڈریسنگ کا معمولی سامان تک دستیاب نہیں، اور مریضوں کو بازار سے ادویات خود خریدنے پر مجبور کر دیا گیا ہے۔
علاقہ مکینوں کا کہنا ہے کہ مرکز صحت میں بجلی کی بندش کی صورت میں جنریٹر تک تیل نہ ہونے کے باعث بند رہتا ہے، اور ہسپتال کئی کئی گھنٹے تاریکی میں ڈوبا رہتا ہے، جو مریضوں اور عملے دونوں کیلئے خطرناک صورتحال پیدا کر رہا ہے۔
اہلِ علاقہ نے شدید احتجاج کرتے ہوئے کہا کہ محکمہ صحت کی عدم توجہی نے عوام کو اذیت میں مبتلا کر دیا ہے۔ معمولی چوٹ یا بخار جیسے امراض میں بھی مریضوں کو پرائیویٹ کلینکس کا رخ کرنا پڑتا ہے، جو ایک غریب دیہی آبادی کیلئے ناقابلِ برداشت مالی بوجھ ہے۔
مقامی عوامی نمائندوں، سماجی شخصیات اور متاثرہ مریضوں نے صوبائی وزیر صحت خواجہ عمران نذیر سے فوری نوٹس لینے، مرکز صحت کا بجٹ بحال کرنے، ادویات کی فراہمی یقینی بنانے اور آؤٹ سورس ٹھیکیدار کو چارج سنبھالنے پر مجبور کرنے کا مطالبہ کیا ہے۔
نارنگ منڈی (نامہ نگار محمد وقاص قمر)لاہور،نارنگ،نارووال،سیالکوٹ ریلوے سیکشن پر سفر کرنے والے مسافروں کے لیے خوشخبری! سٹی پریس کلب نارنگ کی مسلسل کوششوں کے نتیجے میں اس سیکشن پر چلنے والی تمام مسافر ٹرینوں کی بوگیوں کی تعداد بڑھا کر 10 کر دی گئی ہے۔
سٹی پریس کلب نارنگ منڈی کی جانب سے طویل عرصے سے مذکورہ ریلوے سیکشن پر بوگیوں کی کمی اور مسافروں کو درپیش شدید مشکلات کے خلاف آواز بلند کی جا رہی تھی۔ اس حوالے سے جماعت اسلامی کے مرکزی رہنما چوہدری فرحان شوکت ہنجراء نے لیاقت بلوچ کے ہمراہ وفاقی وزیر ریلوے حنیف عباسی سے ملاقات کی اور عوامی مسائل سے آگاہ کیا۔
وفاقی وزیر ریلوے نے فوری ایکشن لیتے ہوئے اعلان کیا کہ 15 اگست 2025 سے سیالکوٹ ایکسپریس، لاثانی ایکسپریس، فیض احمد فیض ایکسپریس اور نارووال پیسنجر سمیت اس سیکشن پر چلنے والی تمام مسافر ٹرینوں میں بوگیوں کی تعداد 10 کر دی جائے گی تاکہ مسافروں کو بہتر سفری سہولیات فراہم کی جا سکیں۔
اس اہم پیشرفت پر سٹی پریس کلب نارنگ، جماعت اسلامی کے رہنما چوہدری فرحان شوکت ہنجراء، ڈیلی پیسنجر ایسوسی ایشن کے رہنما حافظ عبدالقیوم، حسن ریحان نارنگ کمیونٹی اور متعدد مسافروں نے وفاقی وزیر ریلوے حنیف عباسی کا تہہ دل سے شکریہ ادا کیا اور اسے عوامی ریلیف کی جانب ایک مثبت قدم قرار دیا۔
یہ اقدام نہ صرف مسافروں کی سفری مشکلات میں کمی لائے گا بلکہ ٹرینوں پر بڑھتے ہوئے بوجھ کو بھی مؤثر طریقے سے سنبھالنے میں مدد دے گا۔
نارنگ منڈی (باغی ٹی وی، نامہ نگار): نارنگ منڈی کے علاقے کالاخطائی اسٹیشن میں ایک دلخراش واقعہ پیش آیا جہاں بارش کے کھڑے پانی میں ڈوب کر دو کمسن بہن بھائی جاں بحق ہو گئے۔ اس افسوسناک واقعے کے بعد پورا علاقہ سوگ میں ڈوب گیا ہے۔
تفصیلات کے مطابق 8 اور 9 سالہ بھائی اذبان اور سبحان اپنے گھر کے قریب بارش کے جمع شدہ پانی میں نہا رہے تھے کہ گہرے پانی میں چلے گئے اور ڈوب کر اپنی جانیں گنوا دیں۔
اہلِ علاقہ نے فوری کارروائی کرتے ہوئے دونوں بچوں کی لاشیں پانی سے نکال کر ان کے اہل خانہ کے حوالے کیں۔ اپنے لخت جگروں کی لاشیں دیکھ کر والدین حواس باختہ ہو گئے اور شدتِ غم سے نڈھال نظر آئے۔ یہ واقعہ پورے علاقے کے لیے گہرے صدمے کا باعث بنا ہے، جہاں ہر آنکھ اشکبار اور فضا سوگوار ہے۔
نارنگ منڈی(نامہ نگار محمد وقاص قمر) لاہور سے راولپنڈی جانے والی مسافر ٹرین اسلام آباد ایکسپریس کالاشاہ کاکونالہ ڈیک کے قریب حادثے کا شکار ہو گئی، جس کے نتیجے میں ٹرین کی چھ بوگیاں پٹری سے اتر گئیں اور کم از کم 27 مسافر زخمی ہو گئے ہیں، جبکہ ایک مسافر ٹرین کے نیچے دب گیا ہے۔
حادثے کے فوری بعد ریسکیو ٹیمیں جائے وقوعہ پر پہنچ گئیں اور امدادی سرگرمیاں شروع کر دی گئیں۔ زخمیوں کو نزدیکی ہسپتالوں میں منتقل کیا جا رہا ہے، جبکہ ریسکیو آپریشن تاحال جاری ہے۔ حکام کا کہنا ہے کہ کچھ زخمیوں کی حالت تشویشناک ہے۔
ذرائع کے مطابق ریلوے ٹریک کی حالت انتہائی خراب بتائی جا رہی ہے اور حالیہ شدید بارشوں کی وجہ سے ٹریک کو شدید نقصان پہنچا ہے، جو اس حادثے کا ممکنہ سبب قرار دیا جا رہا ہے۔
ریلوے حکام نے حادثے کی وجوہات جاننے کے لیے تحقیقات کا آغاز کر دیا ہے جبکہ متاثرہ ٹریک پر ٹرینوں کی آمد و رفت معطل کر دی گئی ہے۔
مزید تفصیلات آتے ہی شامل کی جائیں گی۔