Category: شیخوپورہ

نارنگ منڈی (باغی ٹی وی، نامہ نگار): نارنگ منڈی کے علاقے کالاخطائی اسٹیشن میں ایک دلخراش واقعہ پیش آیا جہاں بارش کے کھڑے پانی میں ڈوب کر دو کمسن بہن بھائی جاں بحق ہو گئے۔ اس افسوسناک واقعے کے بعد پورا علاقہ سوگ میں ڈوب گیا ہے۔

تفصیلات کے مطابق 8 اور 9 سالہ بھائی اذبان اور سبحان اپنے گھر کے قریب بارش کے جمع شدہ پانی میں نہا رہے تھے کہ گہرے پانی میں چلے گئے اور ڈوب کر اپنی جانیں گنوا دیں۔

اہلِ علاقہ نے فوری کارروائی کرتے ہوئے دونوں بچوں کی لاشیں پانی سے نکال کر ان کے اہل خانہ کے حوالے کیں۔ اپنے لخت جگروں کی لاشیں دیکھ کر والدین حواس باختہ ہو گئے اور شدتِ غم سے نڈھال نظر آئے۔ یہ واقعہ پورے علاقے کے لیے گہرے صدمے کا باعث بنا ہے، جہاں ہر آنکھ اشکبار اور فضا سوگوار ہے۔

نارنگ منڈی(نامہ نگار محمد وقاص قمر) لاہور سے راولپنڈی جانے والی مسافر ٹرین اسلام آباد ایکسپریس کالاشاہ کاکونالہ ڈیک کے قریب حادثے کا شکار ہو گئی، جس کے نتیجے میں ٹرین کی چھ بوگیاں پٹری سے اتر گئیں اور کم از کم 27 مسافر زخمی ہو گئے ہیں، جبکہ ایک مسافر ٹرین کے نیچے دب گیا ہے۔

حادثے کے فوری بعد ریسکیو ٹیمیں جائے وقوعہ پر پہنچ گئیں اور امدادی سرگرمیاں شروع کر دی گئیں۔ زخمیوں کو نزدیکی ہسپتالوں میں منتقل کیا جا رہا ہے، جبکہ ریسکیو آپریشن تاحال جاری ہے۔ حکام کا کہنا ہے کہ کچھ زخمیوں کی حالت تشویشناک ہے۔

ذرائع کے مطابق ریلوے ٹریک کی حالت انتہائی خراب بتائی جا رہی ہے اور حالیہ شدید بارشوں کی وجہ سے ٹریک کو شدید نقصان پہنچا ہے، جو اس حادثے کا ممکنہ سبب قرار دیا جا رہا ہے۔

ریلوے حکام نے حادثے کی وجوہات جاننے کے لیے تحقیقات کا آغاز کر دیا ہے جبکہ متاثرہ ٹریک پر ٹرینوں کی آمد و رفت معطل کر دی گئی ہے۔

مزید تفصیلات آتے ہی شامل کی جائیں گی۔

نارنگ منڈی (باغی ٹی وی،نامہ نگار محمد وقاص قمر) نارنگ منڈی اور گردونواح میں سودی کاروبار کھلے عام جاری ہے، جبکہ پولیس اور سیکیورٹی ادارے مکمل خاموشی اختیار کیے ہوئے ہیں۔ قرآن و حدیث میں سود کی سخت ترین وعید کے باوجود گلی محلوں میں یہ مکروہ دھندہ پوری ڈھٹائی سے جاری ہے، جہاں سادہ لوح، غربت سے پریشان شہریوں کو سبز باغ دکھا کر پہلے قرضہ دیا جاتا ہے اور پھر سود کی بھاری قسطوں کی صورت میں ان کا جینا دوبھر کر دیا جاتا ہے۔

شہریوں کا کہنا ہے کہ کئی خاندان سود کی دلدل میں اس قدر پھنس چکے ہیں کہ اپنے گھر بار تک فروخت کر بیٹھے، لیکن پھر بھی سود سے نجات نہیں مل سکی۔ اللہ تعالیٰ نے سودی کاروبار کرنے والے کو اپنے مدمقابل قرار دیا ہے، مگر اس کے باوجود علاقے میں جگہ جگہ نجی اداروں اور ذاتی ڈیرے قائم کر کے یہ غلیظ کاروبار جاری ہے، جو دین، انسانیت اور ملکی قانون کی صریح خلاف ورزی ہے۔

مقامی لوگوں نے انکشاف کیا ہے کہ یہ سود خور مافیاز مہذب لباس، میٹھی زبان اور جعلی ہمدردی کے ذریعے غربت زدہ خاندانوں کو اپنے جال میں پھنسا لیتے ہیں اور پھر ان کی پوری زندگی کا چین چھین لیتے ہیں۔ افسوسناک امر یہ ہے کہ پولیس اور دیگر قانون نافذ کرنے والے ادارے ان سرگرمیوں سے باخبر ہونے کے باوجود آنکھیں بند کیے ہوئے ہیں، جس سے سود خوروں کو مزید شہہ مل رہی ہے۔

اہل علاقہ نے ڈسٹرکٹ پولیس آفیسر شیخوپورہ بلال ظفر شیخ، مذہبی و سماجی جماعتوں اور حکومت پنجاب سے اپیل کی ہے کہ فوری نوٹس لیا جائے، سودی کاروبار میں ملوث عناصر کے خلاف کریک ڈاؤن کیا جائے، اور غریب عوام کو اس معاشی ظلم سے نجات دلائی جائے۔

نارنگ منڈی (نامہ نگار باغی ٹی وی محمد وقاص قمر) نارنگ شہر اور اس کے گردونواح میں ناقص، غیر معیاری اور مضر صحت جعلی مشروبات کی کھلے عام فروخت جاری ہے جبکہ پنجاب فوڈ اتھارٹی اور دیگر متعلقہ ادارے مکمل طور پر خاموش تماشائی بنے ہوئے ہیں۔ ذرائع کے مطابق شہر کی عام دکانوں پر غیر رجسٹرڈ، نامعلوم کمپنیوں کے کولڈ ڈرنکس اور جوسز بلا روک ٹوک فروخت ہو رہے ہیں جن کے استعمال سے متعدد شہریوں کے بیمار ہونے کی اطلاعات سامنے آئی ہیں۔

اہل علاقہ نے بتایا کہ یہ جعلی مشروبات نہ صرف انسانی صحت کے لیے خطرناک ہیں بلکہ بچوں میں پیٹ، جگر اور دیگر بیماریوں کا باعث بھی بن رہے ہیں۔ ان مشروبات کی فروخت میں روز بروز اضافہ ہوتا جا رہا ہے، جس سے مقامی انتظامیہ کی کارکردگی پر سنجیدہ سوالات اٹھنے لگے ہیں۔

شہریوں کا کہنا ہے کہ پنجاب فوڈ اتھارٹی کی جانب سے کوئی چیک اینڈ بیلنس موجود نہیں، ان کا عملہ دفتروں تک محدود ہے اور موقع پر کارروائی نہ ہونے کے برابر ہے۔

اہل علاقہ نے وزیراعلیٰ پنجاب، سیکریٹری فوڈ اور ڈی جی فوڈ اتھارٹی سے فوری نوٹس لینے اور جعلی مشروبات کے خلاف کریک ڈاؤن کا مطالبہ کیا ہے تاکہ عوام کی صحت کو لاحق خطرات کا سدباب کیا جا سکے۔

نارنگ منڈی (باغی ٹی وی، نامہ نگار محمد وقاص)نارنگ منڈی کے نواحی گاؤں لدھیکے سٹاپ پر واقع ایک ہوٹل پر خوفناک ڈکیتی کی واردات پیش آئی، جہاں چھ نامعلوم ڈاکوؤں نے اسلحے کے زور پر ہوٹل سے 85 ہزار روپے نقدی لوٹ لی اور فرار ہونے سے قبل ہوٹل مالک پر انسانیت سوز تشدد کیا۔

عینی شاہدین کے مطابق ڈاکو واردات کے دوران نہایت سنگدلی سے پیش آئے۔ ہوٹل مالک کو شدید مار پیٹ کا نشانہ بنایا گیا اور مبینہ طور پر اس کے نازک حصے میں زہریلا مواد ڈال دیا گیا، جس سے اس کی حالت نازک ہو گئی۔ متاثرہ شخص کو فوری طور پر تشویشناک حالت میں اہسپتال منتقل کر دیا گیا، جہاں اس کا علاج جاری ہے۔

علاقہ مکینوں میں واقعے کے بعد شدید خوف و ہراس پھیل گیا ہے۔ عوام نے پولیس کی ناکامی پر سخت احتجاج کرتے ہوئے کہا کہ نواحی دیہات میں جرائم پیشہ عناصر بے خوف ہو چکے ہیں اور پولیس کی رٹ مکمل طور پر ختم ہو چکی ہے۔

شہریوں نے اعلیٰ حکام سے مطالبہ کیا ہے کہ اس انسانیت سوز واقعے کا فوری نوٹس لیا جائے، ڈاکوؤں کو گرفتار کر کے قانون کے کٹہرے میں لایا جائے اور علاقے میں سیکیورٹی کے موثر اقدامات کیے جائیں تاکہ عوام کو تحفظ کا احساس ہو سکے۔