Category: سیالکوٹ

سیالکوٹ سے مدثر رتو کی رپورٹ کے مطابق سیالکوٹ کینٹ میں واقع معروف کلینک "دی رینوو بائے زہرہ ایس تھیٹک” کی جانب سے جلدی امراض کے لیے مفت میڈیکل کیمپ کا انعقاد کیا گیا۔ کیمپ کی سربراہی ماہرِ امراضِ جلد ڈاکٹر سیدہ ثناہ زہرہ نے کی، جبکہ ڈاکٹر زینب طاہر اور ڈاکٹر رمشہ نے بدلتے موسم کے باعث جلد پر پڑنے والے اثرات کا معائنہ کیا، مریضوں کو مفت ادویات فراہم کیں اور اُن کے لیے متوازن ڈائٹ پلان بھی تجویز کیا۔

کیمپ میں ہیئر ٹرانسپلانٹ اسپیشلسٹ ڈاکٹر جعفر نے گرتے بالوں اور گنج پن کے مریضوں کا معائنہ کیا، جبکہ میڈیکل اسپیشلسٹ ڈاکٹر عثمان نے دل، جگر اور دیگر مختلف امراض میں مبتلا مریضوں کا چیک اپ کیا۔

فری میڈیکل کیمپ میں سینکڑوں مریضوں نے شرکت کی اور مفت علاج، مشوروں اور ادویات سے بھرپور استفادہ کیا۔

سیالکوٹ(باغی ٹی وی،نامہ نگارمحمدطلحہ) پاکستان میں سیلاب کے اثرات پر قومی سیمینار — شہید بھٹو فاؤنڈیشن، پی ایچ آر این اور پاک ویلفیئر آرگنائزیشن کا مشترکہ انعقاد

تفصیلات کے مطابق اسلام آباد میں “پاکستان میں سیلاب کے اثرات” کے موضوع پر ایک اہم قومی سیمینار کا انعقاد کیا گیا، جس کی میزبانی شہید بھٹو فاؤنڈیشن نے پاکستان ہیومن ریسورس نیٹ ورک (PHRN) اور پاک ویلفیئر آرگنائزیشن کے اشتراک سے شہید ذوالفقار علی بھٹو سائنس اینڈ ٹیکنالوجی یونیورسٹی کیمپس میں کی۔

اس سیمینار میں ماہرینِ ماحولیات، پالیسی سازوں، جامعات کے نمائندوں، صحافیوں اور سول سوسائٹی کے اراکین نے بھرپور شرکت کی۔ شرکاء نے پاکستان میں حالیہ سیلابوں کے سماجی، ماحولیاتی اور معاشی اثرات، حکمرانی کے چیلنجز اور کمیونٹی کی شمولیت کے کردار پر تفصیلی اظہارِ خیال کیا۔

تقریب کی نظامت معروف سماجی کارکن محترمہ مغیزہ امتیاز نے کی۔ اپنے ابتدائی کلمات میں انہوں نے کہا کہ قدرتی آفات کے مقابلے کے لیے حکومتی سطح پر اقدامات کے ساتھ ساتھ عوامی آگاہی اور شہری ذمہ داری بھی ناگزیر ہے۔ انہوں نے سیالکوٹ کے متاثرہ علاقوں کی صورتحال پر روشنی ڈالتے ہوئے انتظامی کمزوریوں اور عوامی مشکلات کو اجاگر کیا۔

شہید بھٹو فاؤنڈیشن کے چیف ایگزیکٹو آفیسر آصف خان نے سیمینار کا افتتاح کیا اور کہا کہ "اداروں، کمیونٹیز اور تحقیقی حلقوں کے درمیان مضبوط تعاون ہی پائیدار ترقی اور قدرتی آفات کے مؤثر ردعمل کی بنیاد ہے۔”

محترمہ امائمہ افتخار (سی ای او اپ مارک) نے نجی شعبے کے کردار پر گفتگو کرتے ہوئے کہا کہ کارپوریٹ اداروں کو بحالی، روزگار کے فروغ اور ماحول دوست ترقی میں اپنا مؤثر کردار ادا کرنا ہوگا۔

محترمہ سویرا پرکاش نے خیبرپختونخوا کی نمائندگی کرتے ہوئے بین الصوبائی ہم آہنگی اور وسائل کی منصفانہ تقسیم کی ضرورت پر زور دیا، جبکہ ڈاکٹر انجم رشید، سربراہ شعبہ ماحولیات انسٹیٹیوٹ آف ریجنل اسٹڈیز، نے گلیشیئر پگھلاؤ، درجہ حرارت میں اضافے اور ماحولیاتی توازن کے بگاڑ پر تحقیقی تجزیہ پیش کیا۔

انہوں نے پالیسی ہم آہنگی، جنگلات کی بحالی اور واٹر شیڈ مینجمنٹ کو قومی ترجیحات میں شامل کرنے پر زور دیا۔
ڈاکٹر نعیم شہزاد، آزاد ماہرِ آفات، نے ادارہ جاتی ہم آہنگی اور نیشنل ڈیزاسٹر رسپانس فریم ورک کی مضبوطی کے لیے قابلِ عمل تجاویز پیش کیں۔

ڈاکٹر راشد آفتاب (ڈین رِفاہ یونیورسٹی) نے کہا کہ جامعات میں ڈیزاسٹر مینجمنٹ کو نصاب کا حصہ بنایا جانا چاہیے تاکہ نئی نسل قدرتی آفات کے مؤثر انتظام میں کردار ادا کر سکے۔
ڈاکٹر نصیر گلانی، سابق سینئر سول سرونٹ، نے “ڈیویلپمنٹ فنانس اور شمولیت” کے موضوع پر خطاب کرتے ہوئے کہا کہ متاثرہ طبقات کی بحالی کے لیے جامع مالیاتی ماڈلز تیار کرنا ناگزیر ہے۔

ڈاکٹر اسد غفران نے سیلاب کے ماحولیاتی اثرات پر گفتگو کرتے ہوئے کہا کہ حیاتیاتی تنوع کے تحفظ کو قومی پالیسی کا حصہ بنایا جائے تاکہ ماحولیاتی تباہی کو روکا جا سکے۔
ڈاکٹر صادیہ کمال، جنوبی پنجاب سے تعلق رکھنے والی صحافی و محقق، نے کہا کہ میڈیا کو شفافیت، توازن اور بروقت اطلاع رسانی میں اپنا ذمہ دارانہ کردار ادا کرنا ہوگا۔

سی ای او سیالکوٹ انفارمیشن مدثر رتو نے خطاب میں کہا کہ “ہم سب کو مل کر مضبوط پاکستان کی تعمیر کے عزم کو عملی جامہ پہنانا چاہیے، اور جب بھی یہ قوم آزمائش میں ہو، انسانیت کی خدمت کو اپنا اولین فرض سمجھنا چاہیے۔”

مسٹر عبدالشکور، نمائندہ پاک ویلفیئر آرگنائزیشن، نے موسمیاتی تبدیلی اور کمیونٹی ایمپاورمنٹ کے اقدامات پر زور دیا۔
پاکستان پیپلز پارٹی کے ہیومن رائٹس سیل کے صدر فرحت اللہ بابر نے خطاب میں نیشنل ڈیزاسٹر ایکٹ کو اپ ڈیٹ کرنے اور ادارہ جاتی احتساب کے نظام کو مزید فعال بنانے کی ضرورت پر زور دیا۔

مسٹر زمرد خان، پیٹرن اِن چیف پاکستان سویٹ ہومز، کو انسانی خدمت کے اعتراف میں خراجِ تحسین پیش کیا گیا۔ انہوں نے سیلابی ریلیف آپریشنز کے دوران اپنے تجربات بیان کیے۔

اختتامی تقریب میں تمام معزز مہمانوں اور تنظیمی نمائندوں کو یادگاری شیلڈز پیش کی گئیں۔
محترمہ مغیزہ امتیاز نے اپنے اختتامی کلمات میں کہا کہ “سیلابی بحران سے نمٹنے کے لیے اجتماعی ذمہ داری، مضبوط پالیسی عمل درآمد، اور شہری شمولیت ہی پاکستان کو محفوظ مستقبل کی طرف لے جا سکتی ہے۔”

منتظم اداروں کا تعارف:
شہید بھٹو فاؤنڈیشن، پاکستان ہیومن ریسورس نیٹ ورک اور پاک ویلفیئر آرگنائزیشن پاکستان میں موسمیاتی تبدیلی، آفات کی تیاری، اور پائیدار ترقی کے فروغ کے لیے مشترکہ طور پر سرگرم عمل ہیں۔ یہ ادارے شواہد پر مبنی پالیسی سازی، شفاف حکمرانی اور بین الادارہ جاتی تعاون کے ذریعے ایک محفوظ اور مستحکم پاکستان کے قیام کے لیے پرعزم ہیں۔

سیالکوٹ(باغی ٹی وی،ڈسٹرکٹ رپورٹر مدثر رتو)سیالکوٹ میں چار روزہ قومی انسدادِ پولیو مہم کا آغاز کر دیا گیا۔ ڈپٹی کمشنر صبا اصغر علی نے مریم نواز کلینک 24/7 مراد پور میں بچوں کو پولیو اور وٹامن اے کے قطرے پلا کر مہم کا باضابطہ افتتاح کیا۔ مہم 13 سے 16 اکتوبر تک جاری رہے گی، جبکہ 17 اکتوبر کو کیچ اپ ڈے منایا جائے گا تاکہ کوئی بھی بچہ ویکسین سے محروم نہ رہ جائے۔

افتتاحی تقریب میں سی ای او ہیلتھ ڈاکٹر محمد اسلم چودھری، ڈی ایچ او ڈاکٹر احمد ناصر، ڈاکٹر شہزاد اقبال، ڈاکٹر ولید اور ڈاکٹر سدرہ گیلانی سمیت دیگر افسران بھی موجود تھے۔

ڈپٹی کمشنر صبا اصغر علی نے اس موقع پر کہا کہ پولیو کے مکمل خاتمے کے لیے حکومتِ پنجاب اور ضلعی انتظامیہ پوری طرح متحرک ہے۔ انہوں نے بتایا کہ مہم کے دوران پانچ سال سے کم عمر کے 7 لاکھ 95 ہزار 877 بچوں کو پولیو سے بچاؤ کے قطرے پلانے کا ہدف مقرر کیا گیا ہے، جس کے لیے 2,878 ٹیمیں تشکیل دی گئی ہیں جن میں 6,288 ہیلتھ ورکرز اور رضا کار شامل ہیں۔

تحصیل وار ہدف کے مطابق:
تحصیل سیالکوٹ میں 3,47,969 بچے
تحصیل ڈسکہ میں 1,70,167 بچے
تحصیل پسرور میں 1,67,203 بچے
تحصیل سمبڑیال میں 87,368 بچوں کو قطرے پلائے جائیں گے۔

ڈپٹی کمشنر نے مزید بتایا کہ حالیہ ماحولیاتی نمونوں کے مطابق سیالکوٹ میں پولیو کی صورتحال اطمینان بخش ہے۔ جون 2025 میں ایک مثبت نمونہ آنے کے بعد جولائی سے ستمبر 2025 تک تمام رپورٹس منفی رہیں، جو انسداد پولیو سرگرمیوں کی کامیابی کا ثبوت ہے۔

انہوں نے کہا کہ مہم کی مانیٹرنگ کے لیے ضلعی انتظامیہ کی زیر نگرانی روزانہ شام کو میٹنگز ہوں گی، جن میں ٹیموں کی کارکردگی اور کوریج کا تفصیلی جائزہ لیا جائے گا جبکہ مرکزی اجلاس ڈپٹی کمشنر آفس میں رات 8 بجے منعقد ہوگا۔

سی ای او ہیلتھ ڈاکٹر محمد اسلم چودھری نے بتایا کہ عالمی ادارہ صحت (WHO) اور دیگر شراکت داروں کے تعاون سے مہم کے دوران MPQA اور LQAS سروے بھی کیے جائیں گے تاکہ ہر بچے تک ویکسین کی رسائی یقینی بنائی جا سکے۔

ڈپٹی کمشنر صبا اصغر علی نے والدین سے اپیل کی کہ وہ اپنے پانچ سال سے کم عمر بچوں کو پولیو کے قطرے ضرور پلوائیں، کیونکہ "ایک بھی غیر محفوظ بچہ پوری کمیونٹی کے لیے خطرہ بن سکتا ہے۔”

سیالکوٹ (باغی ٹی وی،ڈسٹرکٹ رپورٹر) پاکستان میں 2025 کے تباہ کن سیلاب کے دوران متاثرہ علاقوں میں بے مثال خدمات انجام دینے والے افراد کو خراجِ تحسین پیش کرنے کے لیے ایک خصوصی تقریب کا انعقاد کیا گیا۔ یہ تقریب پاک ویلفیئر آرگنائزیشن نے شہید بھٹو فاؤنڈیشن اور پاکستان ہیومن ریسورس نیٹ ورک کے اشتراک سے شہید ذوالفقار علی بھٹو سائنس اینڈ ٹیکنالوجی یونیورسٹی اسلام آباد میں منعقد کی۔

تقریب میں مسٹر مدثر رتو (سی ای او سیالکوٹ انفارمیشن چینل اور ڈسٹرکٹ رپورٹرباغی ٹی وی) کو خیبر پختونخوا، سیالکوٹ، گجرات اور جنوبی پنجاب کے سیلاب متاثرین (خاص طور پر علی پور کے علاقے سیت پور اور خیرپورسادات )کے لیے ان کی بے لوث خدمات پر خصوصی اعزاز سے نوازا گیا۔ مدثر رتو نے نہ صرف متاثرہ علاقوں میں امدادی سرگرمیوں کو منظم کیا بلکہ میڈیا کے ذریعے عوامی شعور بیدار کرنے میں بھی اہم کردار ادا کیا۔

تقریب کے انتظام و اہتمام میں محترمہ مغیزہ امتیاز نے کلیدی کردار ادا کیا۔ انہوں نے مدثر رتو کو سیالکوٹ سے اسلام آباد مدعو کیا اور پروگرام کی کامیابی کو یقینی بنانے کے لیے ہر سطح پر معاونت فراہم کی۔ ان کی انتظامی صلاحیتوں اور سماجی وابستگی کو بھی تقریب میں سراہا گیا۔

مدثر رتو نے تقریب سے خطاب کرتے ہوئے کہا کہ پاکستان کو درپیش قدرتی آفات کے وقت ہر فرد کو انسانیت کی خدمت کو اپنا اولین فرض سمجھنا چاہیے۔ انہوں نے کہا:

"ہم سب کو مل کر مضبوط پاکستان کی تعمیر کے عزم کا اعادہ کرنا چاہیے اور جب بھی اس قوم پر آفات آئیں تو سب مل کر انسانوں کی خدمت کو اپنا اولین فرض سمجھیں۔”

ان کا خطاب حاضرین کے لیے جذبۂ خدمت، قومی یکجہتی اور عوامی فلاح کا پیغام تھا، جسے شرکاء نے بھرپور پذیرائی دی۔

تقریب میں مختلف شعبہ ہائے زندگی سے تعلق رکھنے والے افراد، طلبہ، سول سوسائٹی کے نمائندگان اور میڈیا شخصیات نے شرکت کی۔ اس موقع پر سیلاب متاثرین کی خدمات پر مبنی ویڈیو پریزنٹیشن بھی پیش کی گئی، جس میں مدثر رتو کی سرگرمیوں کو اجاگر کیا گیا۔ اختتام پر اعزازی شیلڈز اور اسناد تقسیم کی گئیں۔

یہ تقریب نہ صرف ایک فرد کی خدمات کا اعتراف تھی بلکہ پورے معاشرے کو یہ پیغام دینے کا ذریعہ بھی بنی کہ جب قوم پر مشکل وقت آئے، تو ہر فرد کو اپنا کردار ادا کرنا چاہیے۔ مدثر رتو کی خدمات اس بات کا ثبوت ہیں کہ میڈیا صرف خبر رسانی کا ذریعہ نہیں بلکہ خدمتِ خلق کا ایک مؤثر ہتھیار بھی بن سکتا ہے۔

سیالکوٹ (باغی ٹی وی، بیورو رپورٹ + مدثر رتو) ڈپٹی کمشنر سیالکوٹ صبا اصغر علی نے پیرا فورس کی ڈسٹرکٹ کمان سنبھال لی۔ اس موقع پر منعقدہ تقریب میں فورس کے جوانوں نے شاندار پریڈ کرتے ہوئے ڈسٹرکٹ کمانڈر کو سلامی پیش کی۔

تقریب سے خطاب کرتے ہوئے صبا اصغر علی نے کہا کہ پیرا فورس عوامی خدمت، قانون پر عملدرآمد اور شفاف گورننس کے فروغ میں سنگِ میل ثابت ہوگی۔ انہوں نے واضح کیا کہ فورس میرٹ پر کام کرے گی اور تجاوزات کے خاتمے کے لیے بلا امتیاز کارروائی کو یقینی بنایا جائے گا۔ شہریوں کو پہلے اعلامیہ اور نوٹسز کے ذریعے خود تجاوزات ختم کرنے کا موقع دیا جائے گا، بصورت دیگر قانونی کارروائی عمل میں لائی جائے گی۔

تقریب میں ایڈیشنل ڈپٹی کمشنر جنرل سید ایوب بخاری اور ایس ڈی ای او افضل سیکھرا نے باوقار انداز میں کمانڈنگ اسٹک ڈپٹی کمشنر کو پیش کی۔ یہ تقریب صوبہ بھر کے تمام اضلاع میں بیک وقت منعقد ہوئی، جس نے پیرا فورس کے نظم و ضبط، عوامی خدمت کے جذبے اور شفاف حکمرانی کے عزم کو اجاگر کیا۔

سیالکوٹ (باغی ٹی وی نامہ نگار محمد طلحہ)چیئرمین پنجاب لینڈ ریکارڈ اتھارٹی و رکن پنجاب اسمبلی طارق سبحانی نے ای خدمت سینٹر سیالکوٹ کا دورہ کیا۔

30 ستمبر 2025 کو کیے گئے اس دورے کے دوران طارق سبحانی نے شہری سہولیات کی فراہمی کے اس جدید اور مؤثر نظام کو خوش آئند قرار دیا۔ انہوں نے چیئرمین پنجاب انفارمیشن ٹیکنالوجی بورڈ (PITB) فیصل یوسف کی بصیرت افروز قیادت کو خراجِ تحسین پیش کرتے ہوئے کہا کہ عوامی خدمت کے لیے ایک فعال اور شفاف پلیٹ فارم کی فراہمی قابلِ تعریف ہے۔

طارق سبحانی نے سنٹر میں موجود شہریوں سے ملاقات کی، ان کے تاثرات سنے اور عملے کے پیشہ ورانہ رویے، خوش اخلاقی اور بہترین خدمات پر اطمینان کا اظہار کیا۔ ان کا کہنا تھا کہ ای خدمت سینٹرز شفافیت، مؤثریت اور عوامی خدمت کی روشن مثال ہیں، جو حکومت پنجاب کی عوام دوست پالیسیوں کا عملی مظہر ہیں۔

انہوں نے زور دیا کہ اس ماڈل کو صوبے بھر میں مزید وسعت دی جائے تاکہ عوام کا اعتماد بڑھ سکے اور سہولیات کی فراہمی میں مزید بہتری آئے۔ دورے کے اختتام پر طارق سبحانی نے سیالکوٹ ای خدمت سینٹر پر فراہم کی جانے والی سہولیات پر چیئرمین PITB فیصل یوسف اور ان کی ٹیم کو نیک تمناؤں کے ساتھ خراجِ تحسین پیش کیا اور عوامی خدمت کے جذبے کے ساتھ کام جاری رکھنے کی تلقین کی۔

سیالکوٹ (باغی ٹی وی، ڈسٹرکٹ رپورٹر مدثر رتو) وزیر اعلیٰ پنجاب مریم نواز شریف کے بحالی سیلاب پروگرام 2025 کے تحت ضلع سیالکوٹ میں سیلاب متاثرین کے نقصانات کے ازالے کے لیے فلڈ ڈیمج اسسمنٹ کا باضابطہ آغاز کر دیا گیا۔

ڈپٹی کمشنر صبا اصغر علی نے بتایا کہ ضلع بھر میں اسسٹنٹ کمشنرز کی نگرانی میں خصوصی ٹیمیں تشکیل دی گئی ہیں جن میں پٹواریوں کے ساتھ ساتھ زراعت، لائیو اسٹاک، اربن یونٹ اور پاک فوج کے نمائندے شامل ہیں۔ یہ ٹیمیں جانی، مالی، لائیو اسٹاک، فصلات اور مکانات کو پہنچنے والے نقصانات کا تفصیلی سروے کریں گی جو تین سے چار ہفتوں میں مکمل ہوگا تاکہ متاثرہ خاندانوں کی بروقت مدد اور معاوضے کی ادائیگی کو یقینی بنایا جا سکے۔

ڈپٹی کمشنر نے کہا کہ حکومت پنجاب سیلاب متاثرین کے ساتھ کھڑی ہے اور شفاف و مؤثر سروے سے ریلیف کی فراہمی یقینی بنائی جائے گی۔ فلڈ ڈیمج اسسمنٹ سے متعلق اجلاس میں ایڈیشنل ڈپٹی کمشنر ریونیو عباس ذوالقرنین، اسسٹنٹ کمشنر سمبڑیال غلام فاطمہ بندیال، پاک فوج، اربن یونٹ، لائیو اسٹاک، ریونیو اور زراعت کے حکام نے شرکت کی۔

سیالکوٹ (نامہ نگار باغی ٹی وی، محمد طلحہ) وزیر اعلیٰ پنجاب مریم نواز شریف کی ہدایت پر سیالکوٹ میں سیلاب میں جاں بحق افراد کے لواحقین میں امدادی چیکس تقسیم کر دیے گئے۔ ڈسکہ میں منعقدہ تقریب میں صوبائی وزیر بلدیات میاں ذیشان رفیق نے متاثرہ خاندانوں کو چیکس دیے۔ اس موقع پر کمشنر گوجرانوالہ سید نوید حیدر شیرازی، ڈپٹی کمشنر سیالکوٹ صبا اصغر علی اور دیگر حکام بھی موجود تھے۔

تقریب سے خطاب کرتے ہوئے میاں ذیشان رفیق نے کہا کہ مریم نواز شریف نے نواز شریف کے عوامی خدمت کے مشن کو نئی بلندیوں تک پہنچایا ہے۔ ان کا کہنا تھا کہ پنجاب میں تاریخ کا سب سے بڑا سیلاب آیا لیکن وزیر اعلیٰ مریم نواز شریف دن رات متاثرین کی خدمت میں مصروف ہیں۔ ذیشان رفیق نے کہا کہ ناقدین کو کام میں کمی نظر نہیں آئی تو وہ تصاویر پر تنقید کرنے لگے، تاہم حقیقت یہ ہے کہ حکومت عملی اقدامات کے ذریعے متاثرین کے ساتھ کھڑی ہے۔

انہوں نے کہا کہ انسانی جان کا ازالہ ممکن نہیں لیکن حکومت کی مدد متاثرہ خاندانوں کے غم میں شریک ہونے کی ایک کوشش ہے۔ ذیشان رفیق کا کہنا تھا کہ جس کا نقصان ہوا ہے وہ حقدار ہے کہ حکومت اس کے ساتھ کھڑی ہو۔ انہوں نے واضح کیا کہ عوام کے لیے مختص ایک ایک پائی امانت ہے جو شفافیت کے ساتھ ان تک پہنچائی جا رہی ہے۔

صوبائی وزیر بلدیات نے کہا کہ اگر حکومت اقدامات نہ کرتی تو تاریخی سیلاب سے نقصان کئی گنا زیادہ ہوتا۔ انہوں نے کہا کہ گزشتہ برس انہی دنوں عوام بجلی کے بلوں سے بلبلا اٹھے تھے لیکن مریم نواز نے لوگوں کو بجلی کے بلوں میں 58 ارب روپے کا ریلیف دیا۔

ذیشان رفیق نے کمشنر گوجرانوالہ سید نوید حیدر شیرازی، ڈپٹی کمشنر سیالکوٹ صبا اصغر علی اور ان کی ٹیموں کی کارکردگی کو سراہتے ہوئے کہا کہ انہوں نے جانفشانی سے کام کیا جبکہ "ستھرا پنجاب” کے ورکرز نے بھی گھر گھر جا کر متاثرین کی مدد کی۔

سیالکوٹ(باغی ٹی وی ،ڈسٹرکٹ رپورٹرمدثررتو) ڈسٹرکٹ ہیلتھ آفیسر (DHO)ڈاکٹر سادات انور نے سوشل میڈیا پر سروائیکل کینسر سے بچاؤ کی ویکسین کے بارے میں پھیلائی جانے والی منفی اور بے بنیاد افواہوں کو سختی سے مسترد کر دیا ہے۔ انہوں نے عوام سے اپیل کی ہے کہ وہ ایسی جھوٹی خبروں پر یقین نہ کریں اور صرف مستند طبی ماہرین کی بات پر بھروسہ کریں۔

تفصیلات کے مطابق ڈاکٹر سادات انور نے بتایا کہ سروائیکل کینسر سے بچاؤ کی مہم 15 سے 27 ستمبر تک ڈسکہ میں جاری ہے۔ اس مہم کے تحت 9 سے 14 سال کی بچیوں کو عالمی ادارہ صحت (WHO) اور یونیسیف سے منظور شدہ ویکسین دی جا رہی ہے۔ انہوں نے واضح کیا کہ یہ ویکسین مکمل طور پر محفوظ اور موثر ہے اور مستقبل میں بچیوں کو اس مہلک بیماری سے بچانے میں اہم کردار ادا کرے گی۔

ڈسٹرکٹ ہیلتھ آفیسر نے والدین پر زور دیا ہے کہ وہ بے بنیاد پروپیگنڈے کا شکار ہوئے بغیر اپنی بچیوں کو بروقت ویکسین لگوائیں تاکہ ان کی صحت اور مستقبل کو یقینی بنایا جا سکے۔