Category: سیالکوٹ

سیالکوٹ، باغی ٹی وی( بیوروچیف شاہد ریاض سے) ڈپٹی کمشنر سیالکوٹ محمد ذوالقرنین نے کہا ہے کہ وزیر اعلی پنجاب مریم نواز شریف کی ہدایت کے مطابق قربانی کے جانوروں کی خریدوفروخت کیلئے ضلع سیالکوٹ میں 5 سیلز پوائنٹس قائم کر دیئے گئے، عارضی مویشی منڈیوں کے فعال کردی گئیں۔

ضلع کونسل، میونسپل کارپوریشن/ کمیٹیز کے زیر اہتمام سیالکوٹ اگوکی روڈ، اکبر آباد چوک سیالکوٹ، نزد اے پی زیڈ سمبڑیال، شیری کوٹ جیسروالہ ڈسکہ اور پسرور سیالکوٹ روڈ پسرور پر قربانی کے جانوروں کیلئے قائم سیل پوائنٹس پر سائبان، پینے کے صاف پانی، انتظار گاہ اور صفائی کے خصوصی انتظامات کے ساتھ ساتھ محکمہ لائیو و ڈیری ڈویلپمنٹ کے ویٹرنری میڈیکل کیمپ اور ایمرجینسی ریسکیو اسٹیشنز بھی قائم کردیئے گئے ہیں۔

ڈپٹی کمشنر نے کہا کہ ضلع کے داخلی راستوں پر لائیو سٹاک چیک پوسٹوں سے قربانی کے جانوروں کو چیک کئے بغیر کوئی جانور سیل پوائنٹس میں نہیں آئے گا جس کیلئے لائیو سٹاک کے عملہ کی حاضری کی سختی سے چیکنگ و مانیٹرنگ کی جارہی ہے۔

انہوں نے کہا کہ وزیر اعلی پنجاب کی ہدایت پر عوام کو ریلیف دینے کیلئے سیل پوائنٹس بغیر نفع نقصان کے اصول کے تحت چلیں گے اور کسی جانور کی کوئی پرچی فیس وغیرہ نہیں ہوگی۔ انہوں نے کہا کہ ضلع چاروں تحصیلوں سیالکوٹ، ڈسکہ، پسرور اور سمبڑیال میں داخلی راستوں پربھی چیک پوسٹیں قائم کی جارہی ہیں جہاں باہر سے آنیوالے جانوروں کو مویشی منڈی میں آنے سے قبل تفصیلی چیک اور چراثیم کش سپرے کیا جائے گا۔

ڈپٹی کمشنر نے سمبڑیال، سیالکوٹ منڈیوں کی چیکنگ کے دوران لوکل گورنمنٹ کے متعلقہ حکام کو ہدایت کی وزیراعلیٰ مریم نواز شریف نے عیدالاضحی پر شہروں میں زیرو ویسٹ رکھنے کا حکم دیا ہے۔ اس امر کو یقینی بنانے کیلئے ضلع کونسل، میونسپل کارپوریشنز/ کمیٹیز ڈسکہ، پسرور اور سمبڑیال اور سیالکوٹ سالڈ ویسٹ مینجمنٹ کمپنی کے افسران اور عملہ کی چھٹیاں منسوخ کردی گئیں ہیں اور عید الاضحیٰ کے تیسرے روز تک بلا تعطل صفائی ستھرائی کو برقرار رکھنے کیلئے زیرو ویسٹ آپریشن جاری رہے گا۔

انہوں نے کہا کہ مویشی منڈیوں میں جانور خریدنے والے شہریوں کو پلاسٹک بیگ بھی دیا جائے گا جس میں جانوروں کی آلائشوں کو ڈال کر سالڈ ویسٹ کمپنی اور متعلقہ سینٹری ورکرز کے سپرد کریں گے اور ضمن میں ان کی قربانی کے اوقات کار کو بھی نوٹ کیا جائے گا۔

ڈپٹی کمشنر محمد ذوالقرنین نے کہا عید الاضحیٰ پر ضلعی پولیس تمام سیل پوائنٹس پر سیکیورٹی کے سخت انتظامات کو یقینی بنائیں گی جبکہ ایک پوائنٹس کو جانے والے راستوں کو ہر قسم کی تجاوزات سے پاک کیا جائے گا اور ٹریفک پلان پر عملدرآمد کیلئے ٹریفک پولیس اسپشل ڈیوٹی انجام دی گی۔

ڈپٹی کمشنر نے واضح کیا کہ ضلع میں صرف نوٹیفائیڈ عارضی مویشی قائم کرنے کی اجازت ہے اس کے علاوہ کوئی مویشی منڈی نہیں لگانے دی جائے گی۔ ڈپٹی کمشنر نے کہا کہ مویشی منڈیوں میں لائٹنگ کے خصوصی انتظامات کیے جائیں گے اور بیک اپ جنریٹرز بھی رکھے جائیں گے۔

سیالکوٹ،باغی ٹی وی( بیوروچیف شاہد ریاض سے)فارن سروسز سپیشلا ئزڈ ڈپلومیٹک کورس کے44ویں وفد نے سیالکوٹ چیمبر آف کامرس اینڈ انڈسٹری ( ایس سی سی آئی) کا دورہ کیا۔ صدر سیالکوٹ چیمبر آف کامرس اینڈ انڈسٹری عبدالغفور ملک، نائب صدر عامر مجید شیخ اور ویمن چیمبر لبنا تبسم نے معزز مہمانوں کا پرتپاک استقبال کیا۔

سیالکوٹ چیمبر آف کامرس کے آڈیٹوریم میں منعقدہ ایک اہم اجلاس کے دوران شرکاء سے خطاب کرتے ہوئے صدر سیالکوٹ چیمبر آف کامرس اینڈ انڈسٹری عبدالغفور ملک نے سرکاری افسران کی صلاحیتوں اور انکے کام کی استعداد کو بڑھانے کے لیے غیر متزلزل عزم پر معزز شرکاء کو خراج تحسین پیش کیا۔

ایس سی سی آئی کے صدر جناب عبدالغفور ملک نے مضبوط اقتصادی تعلقات کی تعمیر اور باہمی افہام و تفہیم کو فروغ دینے کے لیے اس طرح کی مصروفیات کی اہمیت پر زور دیا۔ انہوں نے امید ظاہر کی کہ یہ دورہ سیالکوٹ کی تاجر برادری اور سفارتی دستوں کے درمیان بڑھتے ہوئے تعاون کی راہ ہموار کرے گا، جو بالآخر خطے کی اقتصادی خوشحالی میں معاون ثابت ہوگا۔

انہوں نے کہا کہ مجھے پختہ یقین ہے کہ اس گروپ سے تعلق رکھنے والے ہمارے قابل افسران حکومتی مشینری کے ذریعے موثر کام کے لیے اپنے آپ کو پوری طرح وقف کر دیں گے، ان کا غیر متزلزل عزم بلاشبہ اپنے اپنے کرداروں میں بہتر نتائج دے گا، خواہ وہ وفاقی، صوبائی یا ضلعی سطح پر ہوں کیونکہ سب کا مقصد ملک کی ترقی اور شہریوں کی بھلائی ہے۔

صدر ایس سی سی آئی عبدالغفور ملک کا کہنا تھا کہ ترقی کے حصول کے لیے تجارت اور صنعت کو بہتر بنانے میں آپ افسران کا کردار انتہائی اہم ہے، ضروری تربیت حاصل کرکے اپنے علم اور صلاحیتوں کو مؤثر طریقے سے استعمال کرکے آپ ہمارے ملک کی ترقی میں نمایاں کردار ادا کر سکتے ہیں۔ انہوں نے کہا کہ ایس سی سی آئی حکومتی حکام کے ساتھ مضبوط روابط قائم کرنے اور اسے برقرار رکھنے میں بہت اہمیت رکھتا ہے اور ہم نے ہمیشہ خود کو حکومت کی ایک ٹیم سمجھا ہے تاکہ معیشت کو مضبوط کیا جا سکے۔

انہوں نے کہا کہ سیالکوٹ ٹیلنٹ سے بھرا شہر ہے جو صنعتکاروں کے ایک طبقے کی نمائندگی کرتا ہے، جنہوں نے برآمدات کی طرف اپنی جبلت اور بہترین نتائج حاصل کرنے کی خواہش کے ذریعے سیالکوٹ کو پاکستان کا واحد برآمدی شہر بنا دیا ہے۔ انہوں نے کہا کہ سیالکوٹ میں قائم چھوٹے اور درمیانے درجے کے کاروباری ادارے سالانہ 2.5 بلین امریکی ڈالر کا زرمبادلہ کما رہے ہیں۔

یہاں یہ بات بھی قابل ذکر ہے کہ سیالکوٹ ضلع سب سے زیادہ محنت کش شہر ہے اور ملک میں اس کی فی کس آمدنی بھی بہت بہتر ہے۔ صدر ایس سی سی آئی نے کہا کہ سیالکوٹ میں فٹ بال، فیلڈ ہاکی اسٹکس، کرکٹ گیئر اور باکسنگ گلوز کا استعمال اولمپکس اور ورلڈ کپ سمیت بین الاقوامی کھیلوں میں ہوتا ہے،اس شہر نے فیفا ورلڈ کپ کے لیے آفیشل میچ بال کی تیاری میں مشہور ترین کا درجہ حاصل کیا ہے۔

انہوں نے کہا کہ فیفا ورلڈ کپ 2022 قطر کی آفیشل میچ بال "الریحلا ” کو فخر کے ساتھ یہاں سیالکوٹ میں تیار کیا گیا تھا، اس کے علاوہ گزشتہ ورلڈ کپ کے فٹ بال بھی اسی شہر سے تیار کیے گئے تھے۔ انہوں نے کہا کہ ہم اس کا تذکرہ بڑے فخر کے ساتھ کرتے ہیں اور امید کرتے ہیں کہ ہم ایکسی لینس ماڈل کو جاری رکھیں گے اور ملک کے لیے مزید اعزازات حاصل کرنے کے لیے بھی پرعزم ہیں۔

انہوں نے کہا کہ ایک صدی پر محیط تاریخ سے جراحی کے آلات کی تیاری میں ہنرمند دستکاری کی وراثت نے ہمیں اعلیٰ معیار کے سرجیکل آلات تیار کرنے کے قابل بنایا ہے جو دنیا کے 140 سے زائد ممالک کو برآمد کیے جاتے ہیں اور جنہیں طبی ماہرین، سرجنز، بیوٹیشنز اور ڈینٹسٹ مکمل اعتماد کے ساتھ استعمال کرتے ہیں، اس کے علاوہ چمڑے کی مصنوعات اور ٹیکسٹائل ، کھیلوں کے لباس میں بھی سیالکوٹ کو معیار اور انداز میں دوسرے ممالک کے مقابلے میں مسابقتی برتری حاصل ہے۔

اس موقع پر انہوں نے فارن سروس کے افسران کو خطے میں صنعتی ترقی اور اقتصادی ترقی کو فروغ دینے کے لیے ایس سی سی آئی کی جانب سے شروع کیے گئے مختلف اقدامات اور منصوبوں کے بارے میں تفصیلی بریفنگ دی گئی۔وفد کو ون ونڈو آپریشن سسٹم سے متعارف کرایا گیا، جو کاروباری عمل کو ہموار کرتا ہے اور مقامی کاروباریوں کے لیے کارکردگی کو بڑھاتا ہے۔

افسران نے نئے افتتاح شدہ بزنس فیسیلیٹیشن سینٹر کا بھی دورہ کیا، جہاں انہوں نے کاروباری برادری کو دستیاب معاون خدمات کے بارے میں معلومات حاصل کیں۔ اس دورے نے فارن سروس کے افسران کو ایس سی سی آئی کے اراکین کے ساتھ بات چیت کرنے کا موقع فراہم کیا، جس سے وہ سیالکوٹ میں کاروباری اداروں کو درپیش چیلنجوں اور مواقع کے بارے میں بصیرت حاصل کر سکیں۔

بات چیت میں بین الاقوامی تجارت، برآمدی مواقع اور اقتصادی سفارت کاری کو فروغ دینے میں ایس سی سی آئی کے کردار سمیت متعدد موضوعات کا احاطہ کیا گیا۔

ڈائریکٹر فارن افئیرز اکیڈمی ارسلان میر نے بھی اس موقع پر اظہار خیال کیا اور کہا کہ اس دورے کا مقصدکاروباری برادری کے ساتھ بات چیت کرنا ہے کیونکہ اس ٹریننگ کے بعد ان میں سے زیادہ تر پالیسی سازی کی نشستوں پر فائز ہوں گے اور وہ پالیسی سازی کے عمل میں شامل ہوں گے۔

انہوں نے کہا کہ ہم انہیں ایکسپوژر دینا چاہتے ہیں تاکہ وہ کاروباری برادری کے مسائل کی نشاندہی کریں اور پھر پالیسی سازی کے دوران ان کی مدد کریں ۔ انہوں نے کہا کہ شہر سیالکوٹ لوگوں کو روزگار فراہم کرنے اور ملکی برآمدات میں جس طرح اپنا کردار ادا کر رہا ہے وہ بہت اچھا کام کر رہا ہے۔ انہوں نے سیالکوٹ کے بڑے منصوبوں کے قیام پر سیالکوٹ کے برآمد کنند گان کے جذبے کو بھی سراہا۔

سیالکوٹ،باغی ٹی وی( بیوروچیف شاہد ریاض سے) حکومت پنجاب اور لاہور ہائیکورٹ کے احکامات اور ہدایات کے مطابق ضلع سیالکوٹ میں پلاسٹک شاپنگ بیگ کی خرید وفروخت پر پابندی عائد کردی گئی ہے،

ضلع سیالکوٹ کے پلاسٹک اینڈ پیکنگ میٹریل کے کاروبار سے وابستہ افراد کو واضح احکامات جاری کئے ہیں کہ وہ شاپر بیگز کو ہر گز فروخت نہ کریں اور اس کو بنوانے کیلئے دیئے جانے والے پیشگی آرڈر کو کینسل کیا جائے۔

یہ بات ڈپٹی کمشنر سیالکوٹ محمد ذوالقرنین نے 5 جون کے بعد ضلع سیالکوٹ میں شاپنگ بیگ کے استعمال پر پابندی کی بابت کئے جانے والی اقدامات اور کارروائیوں کا جائزہ لینے کیلئے محکمہ ماحولیات اور انڈسٹریز کے مقامی حکام سے خطاب کرتے ہوئے کہی۔

ڈپٹی کمشنر نے سیکرٹری انڈسٹری پرائسسز، ویٹ اینڈ میئر کو ہدایت کی کہ وہ انجمن تاجران، اور ٹریڈرز ایسوسی ایشن اور پرائس مجسٹریٹس کے تمام دودھ فروش، تندوروں، بیکریوں اور جنرل اسٹورز پر شاپنگ بیگ کے استعمال کی ممانعت کے بارے میں نوٹس لگائیں جس پر صارفین کو بھی اپیل کی جائے کہ وہ دودھ، روٹی کیلئے گھر سے برتن، کپڑے یا کاغذ کا تھیلا لائیں۔

انہوں نے کہا کہ پلاسٹک بیگز ماحول کیلئے زہر قاتل بن چکا ہے اور ماحول کو شاپر بیگ سے پاک کرنے کیلئے ہر شہری اور بالخصوص تاجر کمیونٹی کو اپنا کردار ادا کرنا ہوگا۔

ڈپٹی ڈائریکٹر ماحولیات مقصود ربانی بٹ نے بتایا کہ تمام پلاسٹک اینڈ پیکنگ میٹریل کی شاپس پر نوٹس آویزاں کر دیئے گئے ہیں اور پلاسٹک ایسوسی ایشن نے یقین دہانہ کروائی ہے کہ وہ اس ضمن میں انتظامیہ کی جانب سے ملنے والی ہدایات پر مکمل عمل کریں گے۔

سیالکوٹ ،باغی ٹی وی (بیوروچیف شاہد ریاض سے) نیشنل انسٹی ٹیوٹ آف مینجمنٹ لاہور کے زیر اہتمام 35 ویں سینئر مینجمنٹ کورس میں شریک افسران کا ڈی سی آفس کا دورہ، ڈپٹی کمشنر محمد ذوالقرنین نے افسران کو ضلع سیالکوٹ کی ڈسٹرکٹ مینجمنٹ اور جاری ترقیاتی منصوبوں کے بارے میں تفصیلی بریفنگ دی۔

ڈپٹی کمشنر سیالکوٹ محمد ذوالقرنین نے بتایا کہ ضلع سیالکوٹ ایک تاریخی اور قدیمی شہر ہونے کے ساتھ ساتھ جدید روایات کا امین شہر ہے، برآمدات کے اعتبار سے ملک تیسرا بڑا شہر ہے جس کی فی کس آمدن اور شرح خواندگی ملک میں سر فہرست ہے۔ جس کا سارا کریڈٹ اس سٹی آف انٹر پرائز کے لوگوں کو جاتا ہے جو اپنی مدد آپ کے تحت اور پبلک پرائیویٹ پارٹنر شپ کے ساتھ مسائل کے حل کیلئے کوشاں رہتے ہیں۔

انہوں نے کہا کہ سیالکوٹ شہر کے بزنس ماڈل کو پنجاب اور ملک کے دوسرے اضلاع پر اپلائی کیا جائے تو ملک کا سب سے بڑا مسئلہ زرمبادلہ کا حل ہوسکتا ہے۔

انہوں نے کہا کہ سیالکوٹ کی مردم خیز مٹی نے جہاں اقبال، فیض، امجد اسلام اور ظہیر عباس جیسے نامور سپوتوں کو جنم دیا ہے وہیں پر یہاں کے ہنر مندوں کے ہاتھوں سے تیار ہونے والے آلات جراحی، چمڑے کی مصنوعات، کٹلری، کھیلوں کا سامان اور گارمنٹس کی دنیا بھر میں مانک ہے اور سالانہ 3 سے 4 بلین ڈالرز کی ایکسپورٹ اس بات کا ثبوت ہے۔

انہوں نے کہا کہ نجی شعبہ میں پہلا ڈرائی پورٹ، ائیر پورٹ اور ائیر لائن کا کریڈٹ بھی سیالکوٹ کی کمیونٹی کو جاتا ہے۔ انہوں نے کہا کہ 1998 اور 2008 میں سٹی پیکج کے نام سے یہاں کے باسیوں نے حکومت سے میچنگ گرانٹ کی مد میں شہر کی اہم شاہراہوں کو تعمیر کرکے ایک مثال قائم کی۔

ڈپٹی کمشنر محمد ذوالقرنین نے کہا کہ سیالکوٹ بین المذاہب ہم آہنگی کے حوالے سے بھی مثالی شہر ہے یہاں 7 لاکھ کے قریب مسیحی بستے ہیں جبکہ سکھ اور ہندو مت کے ماننے والے بھی موجود ہیں اور ان کے مابین مذہبی رواداری اور ہم آہنگی قابل تعریف ہے۔

ڈپٹی کمشنر محمد ذوالقرنین نے کہا کہ اساتذہ معاشرے کے اصل معمار ہیں، محنتی اور فرض شناس اساتذہ کی خدمات کے اعتراف کیلئے ڈسٹرکٹ لیول پر بیسٹ ٹیچر ایوارڈ کا اجراء کیا گیا ہے جبکہ 10 سکولوں میں فری کوچنگ سنٹرز میں 3 ہزار بچوں کو فری کو چنگ دی جارہی ہے اور گزشتہ سال جن پانچ سرکاری سکولوں میں فری کوچنگ دی گئی وہاں کے بچوں نے بورڈ کے امتحانات میں بہتر اور حوصلہ افزائی نتائج دیئے۔

ڈپٹی کمشنر نے بتایا کہ ضلع کچہری کی ایمن آباد روڈ پر شفٹنگ کے لئے منصوبہ بندی کی جارہی ہے جبکہ شہر میں ذرائع آمدورفت کو تیز کرنے کیلئے رنگ روڈ کے پراجیکٹ پر بھی کام شروع کردیا گیا جبکہ لاہور سیالکوٹ موٹروے کی تکمیل کے بعد سیالکوٹ سے کھاریاں موٹر وے کی تعمیر جاری ہے۔

نیشنل انسٹی ٹیوٹ آف مینجمنٹ لاہور کے زیر اہتمام ایس ایم سی کورس میں شامل 18 افسران شریک تھے۔ جنہوں نے انتظامیہ اور ڈیپارٹمنٹ کے مینجمنٹ اور درپیش چیلنجز کے بارے میں سوالات کئے جس کے ڈپٹی کمشنر اور متعلقہ افسران نے جوابات دیئے۔

ڈپٹی کمشنر محمد ذوالقرنین کی بریفنگ پر نیشنل انسٹی ٹیوٹ آف مینجمنٹ کے حکام اور افسران نے شکریہ ادا کیا اور این آئی ایم کی جانب سے یادگاری سووینیر پیش کیا۔

سیالکوٹ ،باغی ٹی وی (بیوروچیف شاہد ریاض سے) کمشنر گوجرانوالہ ڈویژن سید نوید حیدر شیرازی نے کہا ہے کہ پسرور کیڈٹ کالج کو بہترین تعلیمی درسگاہ بنایا جائے گا، زیر تعلیم کیڈٹس کو معیاری تعلیم کے ساتھ ساتھ ان کی کردار اور شخصیت پر خصوصی توجہ دی جائے گی تاکہ ناصرف وہ عملی زندگی میں کامیاب ہوں بلکہ معاشرے کے مفید شہری بنے۔

یہ بات انہوں نے پسرور کیڈٹ کالج کی 17 ویں ایگزیکٹو کمیٹی کے اجلاس سے خطاب کرتے ہوئے کہی۔ اجلاس میں ڈپٹی کمشنر محمد ذوالقرنین، پرنسپل کرنل ریٹائرڈ جاوید علیم، لیفٹیننٹ کرنل عدنان، اسسٹنٹ کمشنر پسرور قمر منج اور اسسٹنٹ پروفیسر عذرا اکرم بھی موجود تھی۔

کمشنر گوجرانوالہ ڈویژن سید نوید حیدر شیرازی نے کہا کہ 159 ایکڑ رقبہ پر محیط پسرور کیڈٹ کالج تیزی سے ترقی کی منازل طے کررہا ہے۔ کیڈٹ کالج میں زیر تعلیم بچوں کو آئی ٹی، سپورٹس ، جم سمیت میس کی بہترین سہولیات کی فراہمی کو یقینی بنایا جارہا ہے اور ضابطہ اخلاق پر سختی سے عملدرآمد کروایا جائے گا تاکہ ان کو منفی سرگرمیوں سے محفوظ رکھا جاسکے، اساتذہ کی کیپسٹی بلڈنگ کے لئے کورسسز کروائے جائیں گی۔

انہوں نے کہا کہ کیڈٹ کالج پسرور میں ایسا ماحول بنایا جائے گا جس میں کیڈٹس کی ذہنی و جسمانی نشوونما کو فروغ حاصل ہو۔ کمشنر گوجرانوالہ ڈویژن نے پرنسپل پسرور کیڈٹ کالج کی جانب سے نئے اکیڈمک اور ہم نصابی پروگرام کے اجراء پر سراہتے ہوئے ہدایت کی کہ کیڈٹ کالج پسرور میں زیر تعلیم ہر بچہ ادارے کیلئے نیک نامی کا باعث بنے اور اپنے والدین کیلئے فخر بن سکیں۔

انہوں نے کہا کہ پرنسپل کو ہدایت کی کہ وہ سولر سسٹم کی تنصیب کیلئے منصوبہ بنا کر دیں جس پر کام کروایا جائے گا۔ کمشنر گوجرانوالہ ڈویژن نے ایگزیکٹو کمیٹی کے اراکین پر زور دیا کہ وہ ادارے کی بہتری کیلئے اپنا ایکٹیو رول ادا کریں۔

پرنسپل کیڈٹ کالج نے ایگزیکٹو کمیٹی کے ممبران کو کیڈٹ کالج کی ایچیویمنٹ، مستقبل کے ٹارگٹس اور درپیش چیلنجز کے بارے تفصیلی بریفنگ دی۔ بعد ازاں کمشنر گوجرانوالہ نے کیڈٹ کالج کے مختلف حصوں کا دورہ کیا۔

سیالکوٹ ، باغی ٹی وی( بیوروچیف شاهد ریاض سے) پنجاب کونسل آف دی آرٹس وزارت اطلاعات و ثقافت کے زیر اہتمام پہلے پنجاب مقابلہ موسیقی میں ضلعی سطح پر فیصل عباس نے پہلی،حمزہ کامران نے دوسری اور حیدر علی نے تیسری پوزیشن حاصل کرلی ہے ،

مہمان خصوصی ڈپٹی کمشنر سیالکوٹ محمد ذوالقرنین نے پوزیشن ہولڈرز میں انعامات تقسیم کیے ،

ڈائریکٹر گوجرانولہ آرٹس کونسل غلام عباس، اسسٹنٹ ڈائریکٹر شمسہ گیلانی، سیالکوٹ ٹورازم ڈویلپمنٹ فورم کے مرزا عبد الشکور بھی موجود تھے۔

وزیر اعلیٰ پنجاب مریم نواز کے وژن کے مطابق موسیقی میں نئے ٹیلنٹ کی تلاش کے لیے ضلعی سطح پر مقابلے میں درجنوں نوجوان گلوکاروں نے اپنے فن کے جوہر دکھائے اور حاضرین سے داد سمیٹی۔

ڈپٹی کمشنر محمد ذوالقرنین نے تقریب تقسیم انعامات سے خطاب کرتے ہوئے پوزیشن ہولڈرز کو مبارکباد دی اور امید ظاہر کی کہ وہ ڈویژن اور صوبہ کی سطح پر بھی کامیابیوں کا سلسلہ جاری رکھیں گے ۔

انہوں نے پہلے مقابلہ موسیقی کے انعقاد پر پنجاب کونسل آف دی آرٹس وزارت اطلاعات و ثقافت کی ٹیم کو بھی سراہا اور امید ظاہر کی کہ مستقبل میں بھی سیالکوٹ میں ثقافتی پروگراموں کا انعقاد کیا جائے گا ۔