Category: سیالکوٹ

سیالکوٹ، باغی ٹی وی( بیورووچیف شاہد ریاض سے) رکن صوبائی اسمبلی محمد منشاء اللہ بٹ نے کہا ہے کہ سیالکوٹ کی دھرتی سے تعلق رکھنے والے باصلاحیت اور محنتی مزدوروں کی ہنر مندی کا لوہا پوری دنیا مانتی ہیں ان کے ہاتھوں سے تیارکی جانے والی مصنوعات کی عالمی مارکیٹ میں بڑھتی ہوئی مانگ اس بات کا منہ بولتا ثبوت ہے اور اسی طرح یہاں کے برآمد کنندگان دنیا کے کونے کونے میں جاکر پاکستان کی مصنوعات کو متعارف کرواتے ہیں اور وطن عزیز کیلئے اربوں روپے کا قیمتی زرمبادلہ کما کر ملک و قوم کی خدمت کررہے ہیں ‘ آجر اور اجیر ایک ہی گاڑی کے دو پہیے ہیں دونوں کے مابین اعتماد کا مضبوط تعلق قائم کئے بغیرنا تو معیشت کو مضبوط بنیادوں پر استوار کیا جاسکتا ہے اور نہ ہی مزدوروں کے مسائل حل کیے جاسکتے ہیں۔

ان خیالات کا اظہار انہوں نے آج یوم مزدور کے سلسلہ میں وزیر آباد روڈ پر واقع مقامی ہوٹل میں ورکرز کنونشن سے خطاب کرتے ہوئے کیا۔اراکین صوبائی اسمبلی چودھری فیصل اکرام، چودھری طارق سبحانی، یوسف حسن باجوہ، عبدالشکور مرزا، شیخ شفیق الرحمن کے علاوہ مختلف ورکرز/ ٹریڈ یونین کے عہدیداران اور اراکین نے شرکت کی ۔

محمد منشاء اللہ بٹ نے کہاکہ حکومت پنجاب محنت کشوں کے حقوق کیلئے کوشاں ہے اور کم سے کم اجرت کے قانون پر عملدرآمد کو یقینی بنارہی ہے اور مزدوروں کوسوشل سیکیورٹی، صحت اور تعلیم کے تمام سہولیات کی بروقت فراہمی اور ان کے معیار کو بہتر بنانے کیلئے ٹھوس بنیادوں پر اقدامات کررہی ہے ۔

انہوں نے کہا کہ مزدوروں کے حقوق کا تحفظ حکومت کی اولین ترجیح ہے اور اس سلسلہ میں غفلت یا کوتاہی کا مظاہرہ ہرگز نہیں کیا جائے گا۔ انہوں نے کہاکہ لیبر ڈیپارٹمنٹ سیالکوٹ کے متعلق لیبر یونینز کے خدشات اور تحفظات کا ازالہ کیا جائے گااور مزدوروں کے مسائل کے حل میں رکاوٹ بننے والے افسران کا محاسبہ کیا جائے گا۔ انہوں نے کہاکہ یکم مئی مزدوروں کا عالمی دن ہے تاہم وہ مزدوروں کے مسائل کے حل کیلئے سارا سال حاضر ہیں ۔

رکن صوبائی اسمبلی چودھری طارق سبحانی نے خطاب کرتے ہوئے کہا کہ مزدوروں کے مسائل کے عملی اقدامات کئے جارہے ہیں اور اس دن کے منانے کا مقصد محنت کشوں اور مزدوروں کو خراج تحسین پیش کرنا ہے جو اپنے خون پسینے سے صنعت کا پہیہ چلا رہے ہیں ۔ انہوں نے کہاکہ کوئی بھی ملک مزدوروں کے بغیر ترقی نہیں کرسکتا ۔

انہوں نے کہاکہ مزدور پاکستان کی اہم شہری ہیں اور کو مراعات کی فراہمی کیلئے کوئی کسر نہیں رکھی جائے گی ۔تقریب سے لیبر یونین کے عہدیداران نے خطاب کرتے ہوئے کہا کہ ایک محنت کش اپنی جسمانی اور فکری استعداد کا بھرپور مظاہرہ کرتے ہوئے معاشرتی ترقی میں اپنا مؤثر کردار ادا کرتا ہے اس لئے حکومت کی یہ ذمہ داری بنتی ہے کہ محنت کشوں کے جائز ضروریات زندگی کے مطابق ان کو معاوضہ کی ادائیگی کو یقینی بنائیں تاکہ وہ معاشی مسائل کا شکار نہ ہوں ۔

انہوں نے کہاکہ اہلیت اور محنت کے مطابق معاوضہ اگر بروقت ادا کیاجائے تو محنت کشوں کے گھروں کے چولہے کبھی ٹھنڈے نہیں ہونگے ۔ انہوں نے کہاکہ حضور اکرمؐ نے فرمایا’’ مزدور کی مزدوری پسینہ خشک ہونے پہلے ادا کرو‘‘۔

سیالکوٹ ،باغی ٹی وی( بیوروچیف شاہد ریاض سے) ساہووالہ میں رفاعی تنظیم الغنی فری آئی ٹرسٹ کے زیر اہتمام سالانہ نویں فری آئی کیمپ کا انعقاد کیا گیا ، آنکھوں کے مخلتف امراض میں مبتلا 900 سے زائد مریضوں کا چیک آپ کرنے سمیت مفت ادویات اور فری آئی گلاسز کی فراہمی کی گئی ، آئندہ مرحلے میں بعذریہ لیزر فیکو سرجری 65 مریضوں کے حساس آپریشن بھی کیے جائیں گے ۔

رفاعی تنظیم الغنی فری آئی ٹرسٹ ساھووالہ کے زیر اہتمام سالانہ نویں فری آئی کیمپ کا انعقاد کیا گیا جس میں الغنی فری آئی ٹرسٹ کے منتظمین ڈاکٹر غلام صابر ، ڈاکٹر بلال صابر اور آئی سپیشلسٹ سرجن اور ڈاکٹروں کی ٹیم نے 900 سے زائد آنکھوں کے مریضوں کا چیک اپ کیا اور انہیں آنکھوں کے امراض کے متعلقہ ادویات اور گلاسز فری فراہم کئے گئے

جبکہ آئندہ ہفتے کے دوران آنکھوں کے حساس امراضِ میں مبتلا مریضوں کے بذریعہ لیزر فیکو آئی سرجری آپریشن بھی کیے جائیں گے ۔فری آئی کیمپ میں زندگی کے مختلف شعبوں سے تعلق رکھنے والی شخصیات نے بھی بھر پور شرکت کی.

سیالکوٹ ، باغی ٹی وی( بیوروچیف شاہد ریاض سے) بانی پاکستان حضرت قائد اعظم محمد علی جناح کے دورہ سیالکوٹ کو 80 سال مکمل ہو گئے ہیں۔ آج اس تاریخ ساز دورے کی 80 ویں سالگرہ مکمل ہونے پر سیالکوٹ کے ممتاز رائٹر اور محقق مرزا محمد ارشد طہرانی نے مسلم لیگ ن کے ضلعی صدر اور رکن صوبائی اسمبلی چودھری طارق سبحانی کو اپنی کتاب قائدہ اعظم کا دورہ سیالکوٹ پیش کی

انہیں بتایا کہ قائد اعظم آج کے دن 80 ,سال قبل مسلم لیگ پنجاب کے تین روزہ سالانہ صوبائی اجلاس میں شرکت کے تشریف لائے تو زندہ دلان سیالکوٹ نے ان کا فقیدالمثال استقبال کر کے انہیں خوش آمدید کہا۔

اُس اجلاس کی کامیابی کا انداز اس بات سے لگایا جاسکتا ہے کہ اس اجلاس میں صوبہ پنجاب کو پاکستان میں شامل کرنے کی مخالف جماعت یونی نسٹ پارٹی کے دس ارکان اسمبلی نے اپنی چھوڑ کر مسلم لیگ میں شرکت کا فیصلہ کیا تھا جبکہ اجلاس میں کئے جانے والے فیصلوں اور عوام کے ٹھاٹھے مارتے ہوئے سمندر کی وجہ تحریک پاکستان کو ایک نیا جوش و خروش اور جذبہ ملا اور 1945-46 کے انتخابات میں مسلم لیگ کو تاریخ ساز کامیابی نصیب ہوئی اور صرف تین سال کے عرصہ کے بعد پاکستان معرض وجود میں آگیا۔

مدینہ ٹرسٹ کے کوآرڈی نیٹر عبدالشکور مرزا نے قائد اعظم کے دورہ کی یادوں کو تازہ کرنے کے لئے ہمیں مل جل کر تقریبات اور اسے نئی نسل کو آگاہ کرنے کے اقدامات کرنے کی سنجیدہ کوششیں کرنی چاہئیں۔ اس سلسلے میں سب سے پہلے جن تین اہم مقامات پر قائد اعظم تشریف لے گئے انہیں قومی ورثہ قرار دیا جائے۔ ان میں تالاب شیخ مولا بخش ،مولوی میر حسن ہال گورنمنٹ مرے کالج اور سول ریسٹ ہاوس خیابان اقبال سیالکوٹ کینٹ شامل ہیں۔

رکن صوبائی اسمبلی چودھری طارق سبحانی نے کہا کہ انہیں یہ جان کر خوشی ہوئی ہے کہ سپوت شہر اقبال مرزا ارشد طہرانی نے دورہ قائداعظم کی یاداشتوں کو اکھٹا کرکے ایک بہت بڑا کارنامہ سرانجام دیا ہے۔ مرزا ارشد طہرانی کو مبارک باد پیش کرتا ہوں۔ انہوں نے یقین دلایا کہ وہ قائد اعظم کے دورہ کی یادوں کو تازہ کرنے کے لئے اپنے تمام وسائل بروئے کار لائیں گے۔

سیالکوٹ . باغی ٹی وی رپورٹنگ ٹیم شاہد ریاض، مدثر رتو ،غلام مصطفے مہر )صوبائی وزیر اقلیتی امور پنجاب سردار رامیش سنگھ اروڑہ نے کہا ہے کہ آئین پاکستان وطن عزیز میں بسنے والی تمام مذاہب کے ماننے والے کو مکمل آزادی دیتا ہے اور آئین کے نظر میں پاکستان میں بسنے والے ہر فرد کو بلا امتیاز رنگ و نسل مساوی حقوق حاصل ہیں،

پاکستان کی خوبصورتی یہ ہے کہ یہاں بسنے والے عوام اپنے عقائد اور مذہبی رسومات کی انجام دہی کیلئے آذاد ہے جس کا مظاہرہ حال ہی میں ایسٹر، رمضان، عید ، ہولی اور بیساکھی کے تہواروں کا انعقاد ہے جس میں تمام مذاہب کے لوگ ایک دوسرے کی خوشیوں میں شریک ہوتے ہیں اور یہی پیغام اللہ کی جانب سے بھیجے گئے نبیوں، پیغمبروں اوراولیاء کا بھی ہے جنھوں نے محبت، بھلائی، اخوت، رواداری کا درس کیا اور اس کیلئے تکالیف بھی برداشت کی۔

انہوں نے ان خیالات کا اظہار آج کرسچن ٹاؤن سیالکوٹ میں واقع ہاروسٹ لائف چرچ میں مسیحی کمیونٹی کے اجتماع سے بطور مہمان خصوصی خطاب کرتے ہوئے کیا۔

صوبائی وزیر اقلیتی امور سردار رامیش سنگھ اروڑہ نے کہا کہ جناب عیسی علیہ السلام اور امام حسین علیہ السلام نے ظلم کے سامنے ڈٹ جانے کا پیغام دیا جس پر عمل کرکے معاشرے سے ناانصافی اور ظلم کا خاتمہ کہا جاسکتا ہے۔ بعد ازاں صوبائی وزیر نے پاکستان لائف اسٹائل فرنیچر نمائش کا بھی افتتاح کیا اور فرنیچر بنانے والی مختلف کمپنیوں کی جانب سے لگائے جانے والے اسٹالز کا معائنہ کیا۔