Category: سیالکوٹ

ڈسکہ (باغی ٹی وی نامہ نگار ملک عمران)پریس کلب ڈسکہ رجسٹرڈ کے سینئر وائس چیئرمین امین رضا مغل، جنرل سیکرٹری سید رضوان مہدی، اور انفارمیشن سیکرٹری رانا محمد افضل نے ممبران بابر ملک، راشد منہاس، شاہد صدیقی، اور آصف رضا کے ہمراہ سپریم کالج ڈسکہ کا دورہ کیا۔

کالج پہنچنے پر پرنسپل ثاقب جاوید گورسی نے ڈاکٹر ناصر حسین علوی کے ہمراہ پریس کلب کے وفد کا پرتپاک استقبال کیا۔ بعد ازاں، پریس کلب کے وفد نے پرنسپل ثاقب گورسی کے ساتھ کالج میں تعلیمی خدمات کے حوالے سے تفصیلی گفتگو کی اور تبادلہ خیال کیا۔ اس موقع پر پرنسپل ثاقب جاوید گورسی نے پریس کلب ڈسکہ رجسٹرڈ کے وفد کو یادگاری تحائف سے نوازا۔

پرنسپل ثاقب جاوید گورسی نے سپریم کالج ڈسکہ میں فراہم کی جانے والی تعلیمی خدمات کے متعلق بتایا۔ دورے کے اختتام پر پریس کلب کے عہدیداران نے پرنسپل کے ہمراہ سپریم کالج کی جدید کمپیوٹر لیب کا افتتاح کیا اور ملک و قوم کی ترقی کے لیے دعائے خیر کی۔

سیالکوٹ (باغی ٹی وی ڈویژنل بیوروچیف شاہد ریاض)سیالکوٹ میں گورنمنٹ علامہ اقبال ٹیچنگ میموریل ہسپتال کے گرلز ہاسٹل کے باہر نرسنگ کی طالبات نے ہائر ایجوکیشن کمیشن (ایچ ای سی) کی نئی پالیسی کے خلاف بھرپور احتجاجی مظاہرہ کیا۔ طالبات کا مطالبہ ہے کہ ایچ ای سی نے نرسنگ کے پاسنگ مارکس 50 فیصد سے بڑھا کر اچانک 60 فیصد کر دیے ہیں، جس کے باعث انہیں شدید مشکلات کا سامنا ہے۔

طالبات کا کہنا ہے کہ ایچ ای سی نے یہ پالیسی امتحانات کے بعد راتوں رات تبدیل کی ہے اور اس نئی پالیسی کے تحت فیل ہونے والی طالبات سے دوبارہ امتحانات دینے کا حق بھی چھین لیا گیا ہے۔ ان کا مؤقف ہے کہ فیل ہونے کی صورت میں ڈراپ آؤٹ کی پالیسی ان کی 13 سالہ تعلیمی محنت کو رائیگاں کر دے گی۔

ہسپتال کے پرنسپل کا اس حوالے سے کہنا ہے کہ اگر ایچ ای سی کی نئی پالیسی کی کوئی ٹھوس توجیہ (جسٹفیکیشن) موجود ہو گی تو وہ اس پر عمل درآمد کے پابند ہوں گے۔ تاہم، طالبات نے وزیراعظم پاکستان میاں محمد شہباز شریف اور وزیراعلیٰ پنجاب مریم نواز سے فوری نوٹس لینے کی اپیل کی ہے۔

سیالکوٹ (بیوروچیف خرم میر)اراکینِ صوبائی اسمبلی محمد منشاء اللہ بٹ اور چودھری فیصل اکرام نے امام صاحب روڈ سیالکوٹ کی گرین بیلٹس پر دعوتِ اسلامی کے ذمہ داران کے ہمراہ شجرکاری مہم کے تحت پودے لگا کر ماحول دوست سرگرمی کا باقاعدہ آغاز کیا۔ اس موقع پر دعوتِ اسلامی کے علاقائی علما، رضاکار اور شہریوں کی بڑی تعداد شریک تھی، جنہوں نے ماحولیاتی تحفظ کے اس اقدام کو سراہا۔

تقریب سے خطاب کرتے ہوئے محمد منشاء اللہ بٹ نے کہا کہ موسمیاتی تبدیلی، درجہ حرارت میں اضافہ اور غیر متوازن موسم جنگلات کی کٹائی اور ماحولیاتی عدم توازن کا نتیجہ ہیں۔ انہوں نے کہا کہ شجرکاری نہ صرف ایک قومی ذمہ داری بلکہ ایک مذہبی فریضہ بھی ہے، اور اگر ہم نے آج اس سمت میں عملی اقدامات نہ کیے تو آنے والی نسلوں کو سنگین نتائج بھگتنا ہوں گے۔ ان کا کہنا تھا کہ اسلام ہمیں فطرت سے محبت اور زمین کو سرسبز بنانے کا درس دیتا ہے، اس لیے ہر شہری کو چاہیے کہ وہ درخت لگا کر اور اس کی نگہداشت کر کے اپنا کردار ادا کرے۔

منشاء اللہ بٹ نے اس موقع پر بتایا کہ موجودہ حکومت وزیراعلیٰ پنجاب مریم نواز شریف کی قیادت میں ماحولیاتی تحفظ کے لیے مربوط حکمتِ عملی پر عمل پیرا ہے، جس میں عوام کی شمولیت کو کلیدی حیثیت حاصل ہے۔

دعوتِ اسلامی کے رہنماؤں نے تقریب کے دوران بتایا کہ تنظیم "مدنی ماحولیات مہم” کے تحت ملک بھر میں لاکھوں پودے لگا چکی ہے، تاکہ پاکستان کو سرسبز و شاداب بنایا جا سکے۔

تقریب کے اختتام پر شرکاء نے اجتماعی طور پر پودے لگائے اور ان کی حفاظت و نگہداشت کی ذمہ داری لینے کا عہد کیا۔ شجرکاری مہم کے اس بامقصد آغاز کو اہلِ علاقہ نے نہایت سراہا۔

سیالکوٹ (بیوروچیف خرم میر) گورنمنٹ لیڈی اینڈرسن ہائی اسکول سیالکوٹ کی ہونہار طالبہ فاطمہ شیراز نے میٹرک کے سالانہ امتحانات 2025 میں 1187 نمبر حاصل کر کے گوجرانوالہ بورڈ میں پہلی پوزیشن اپنے نام کر لی۔ اس شاندار تعلیمی کارنامے کے اعتراف میں ایک پروقار تقریب کا انعقاد کیا گیا۔

تقریب میں رکن پنجاب اسمبلی طارق سبحانی، سی ای او ایجوکیشن سیالکوٹ، کمشنر گوجرانوالہ نوید شیرازی اور چیئرمین تعلیمی بورڈ اختشام بٹ نے خصوصی شرکت کی۔ شرکاء نے فاطمہ شیراز کو شاندار کامیابی پر مبارکباد پیش کی اور اس کی محنت و لگن کو بھرپور سراہا۔

اس موقع پر اسکول کی پرنسپل محترمہ ارم شیرازی اور وائس پرنسپل میڈم سارا کو طلبہ کی مثالی رہنمائی اور معیاری تدریسی خدمات پر خراجِ تحسین پیش کیا گیا۔ فاطمہ کی کامیابی نہ صرف اسکول بلکہ پورے ضلع سیالکوٹ کے لیے فخر کا باعث قرار دی گئی ہے، جو تدریسی معیار اور طلبہ کی محنت کا عملی ثبوت ہے۔

سیالکوٹ (بیوروچیف خرم میر) ڈسٹرکٹ پولیس آفیسر سیالکوٹ فیصل شہزاد کی خصوصی ہدایات پر سٹی ٹریفک پولیس سیالکوٹ کی جانب سے شہریوں کے لیے فلاحی اقدام کے طور پر شیل چوک میں مفت ہیلمٹس تقسیم کیے گئے۔ اس مہم کی نگرانی ڈی ٹی او سیالکوٹ مدثر صدیق نے کی، جبکہ ڈی ایس پی ٹریفک سٹی سرکل نے شہریوں میں خود ہی ہیلمٹس تقسیم کیے۔

اس موقع پر شہریوں کو روڈ سیفٹی اور ہیلمٹ کے استعمال کی اہمیت سے متعلق آگاہی بھی فراہم کی گئی۔ ڈی ایس پی نے کہا کہ ہیلمٹ صرف ایک قانونی تقاضا نہیں بلکہ انسانی جان کی حفاظت کے لیے بنیادی ضرورت ہے، ہر موٹر سائیکل سوار کو چاہیے کہ وہ اپنی اور دوسروں کی سلامتی کے لیے ہیلمٹ کا استعمال یقینی بنائے۔

سٹی ٹریفک پولیس سیالکوٹ نے واضح کیا کہ وہ شہریوں کی جان و مال کے تحفظ کے لیے ہمہ وقت کوشاں ہے، اور آئندہ بھی ایسے فلاحی اقدامات جاری رکھے جائیں گے۔

ڈسکہ (باغی ٹی وی نامہ نگار ملک عمران) انجمن خدمت خلق رجسٹرڈ ڈسکہ کا 756 واں ماہانہ اجلاس زچہ بچہ ہسپتال پسرور روڈ پر سینئر نائب صدر خان عباس خان کی زیر صدارت منعقد ہوا۔ اجلاس کا آغاز حافظ عبدالغفار کی تلاوتِ قرآن پاک سے ہوا، جبکہ نعت رسول مقبول ﷺ انوار احمد سیال نے پیش کی۔ جنرل سیکرٹری کی غیر موجودگی میں ایگزیکٹو ممبر شاہ نواز مغل ایڈووکیٹ نے گزشتہ اجلاس کی کارروائی پیش کی، جسے متفقہ طور پر منظور کیا گیا۔

اس موقع پر صدر میاں سعید احمد صراف اور جنرل سیکرٹری محمد انور مغل بھی اجلاس میں شریک ہوئے۔ فنانس سیکرٹری انوار احمد سیال نے ماہ مئی 2025 کی مالی رپورٹ پیش کی، جسے بحث کے بعد منظور کر لیا گیا۔ بینک بیلنس کو تسلی بخش قرار دیا گیا اور فنڈ ریزنگ کرنے والے ممبران کو خراج تحسین پیش کیا گیا۔ سیکرٹری نشرو اشاعت سہیل سلمان ٹھروہی نے گزشتہ اجلاس کی شائع شدہ خبروں کی رپورٹ پیش کی، جس پر ان کی کارکردگی کو سراہا گیا۔

اجلاس میں زچہ بچہ ہسپتال کے سابق ایڈمن محسن غوری اور ان کے اہل خانہ کے ساتھ سوات میں پیش آنے والے المناک حادثے پر گہرے دکھ کا اظہار کیا گیا، جس میں 10 افراد جاں بحق ہوئے۔ طے پایا کہ اجلاس کے بعد تعزیت کے لیے ان کے گھر جایا جائے گا۔

شہر کی موجودہ صورتحال پر بات کرتے ہوئے ممبران نے گہری تشویش ظاہر کی کہ ڈسکہ کی کوئی بھی سڑک درست حالت میں نہیں، تمام سڑکیں اُکھاڑی جا چکی ہیں۔ اجلاس میں انتظامیہ سے مطالبہ کیا گیا کہ تعمیری کام جلد مکمل کر کے عوام کو سہولت فراہم کی جائے، اور برسات کے موسم میں نکاسی آب کا مؤثر بندوبست کیا جائے۔

اجلاس کا اختتام افتخار احمد کھوکھر کے والد کی وفات پر دعائے مغفرت، حافظ عبدالغفار کی دعا اور شاہ نواز مغل کی تواضع کے ساتھ کیا گیا۔