Category: سیالکوٹ

پسرور (نامہ نگار وقاص اسلم) سیالکوٹ کے نواحی گاؤں ستو والی میں نئے سال کے موقع پر ایک سادہ مگر پروقار تقریب کا انعقاد کیا گیا، جس میں کیک کاٹا گیا اور ملکی سلامتی و خوشحالی کے لیے خصوصی دعا کی گئی۔

تقریب میں سیاسی و سماجی شخصیت لیاقت سنیارہ نے خصوصی شرکت کی، جبکہ اٹلی سے معظم سنیارہ، سعودی عرب سے شیراز سنیارہ اور سلطان صاحب بھی شریک ہوئے۔ اس موقع پر وقاص اسلم (روزنامہ نوید پاکستان) کے علاوہ حسنین سنیارہ، وقاص سنیارہ، حسن سنیارہ اور دیگر معزز شخصیات نے بھی شرکت کی۔

شرکاء نے نئے سال کی آمد پر تمام پاکستانیوں کو مبارکباد دی اور دعا کی کہ نیا سال ملک پاکستان کے لیے ترقی، امن اور خوشحالی کا باعث ثابت ہو۔

پسرور (نامہ نگار وقاص اسلم)ڈپٹی سپرنٹنڈنٹ آف پولیس (ڈی ایس پی) مدثر صدیق نے موٹر سائیکل سواروں سے اپیل کی ہے کہ وہ ہر صورت ہیلمٹ کا استعمال یقینی بنائیں۔ انہوں نے تاکید کی کہ ہیلمٹ صرف چالان سے بچنے کے لیے نہیں بلکہ اپنی قیمتی جان کی حفاظت کے لیے معیاری اور اچھی کوالٹی کا استعمال کیا جائے۔

ڈی ایس پی مدثر صدیق کا کہنا تھا کہ معیاری ہیلمٹ سر پر شدید چوٹ اور حادثات کے سنگین خطرات سے بچاؤ میں کلیدی کردار ادا کرتا ہے۔ اس لیے تمام شہریوں کو چاہیے کہ وہ نہ صرف اپنی بلکہ دوسروں کی حفاظت کو بھی ترجیح دیں۔

میڈیا سے گفتگو کرتے ہوئے انہوں نے مزید کہا کہ جن موٹر سائیکل سواروں کے پاس ڈرائیونگ لائسنس نہیں ہے، وہ فوری طور پر اپنا لائسنس بنوائیں اور ایک ذمہ دار شہری ہونے کا ثبوت پیش کریں۔
یہ پیغام ٹریفک حادثات میں اضافے کے پیش نظر جاری کیا گیا ہے، جو اکثر ہیلمٹ نہ پہننے اور قوانین کی خلاف ورزی کی وجہ سے رونما ہوتے ہیں۔ پولیس کی جانب سے عوام میں شعور اجاگر کرنے کی یہ کوشش قابل تحسین ہے۔

پسرور (باغی ٹی وی،نامہ نگار وقاص اسلم ) بانیٔ پاکستان قائداعظم محمد علی جناحؒ کے یومِ ولادت کے موقع پر اسسٹنٹ کمشنر پسرور سدرہ ستار نے اپنے خصوصی پیغام میں کہا ہے کہ 25 دسمبر ہمارے قومی قائد کی عظیم جدوجہد اور لازوال قربانیوں کی یاد دلاتا ہے، جنہوں نے اپنی پوری زندگی اصولوں کی پابندی، نظم و ضبط اور محنت کے لیے وقف کر رکھی تھی۔ انہوں نے کہا کہ قائداعظمؒ نے برصغیر کے مسلمانوں کی سیاسی و معاشی محرومیوں کو بھانپتے ہوئے انہیں مسلم لیگ کے پلیٹ فارم پر متحد کیا اور انتھک جدوجہد کے ذریعے دنیا کے نقشے پر ایک ایسی آزاد ریاست تخلیق کی جہاں ہر شہری اپنے مذہب، ثقافت اور اقدار کے مطابق زندگی گزار سکے۔ سدرہ ستار نے اس بات پر زور دیا کہ پاکستان کا قیام ایک ایسی فلاحی اور جمہوری ریاست کے لیے عمل میں لایا گیا تھا جہاں قانون کی بالادستی ہو اور اقلیتوں، بالخصوص مسیحی برادری سمیت تمام شہریوں کو مساوی حقوق اور مکمل مذہبی آزادی حاصل ہو۔

انہوں نے موجودہ ملکی حالات پر تشویش کا اظہار کرتے ہوئے کہا کہ بدعنوانی، ناانصافی اور انتشار نے ہمیں قائد کے اصل وژن سے دور کر دیا ہے، جس کی وجہ سے ہماری نوجوان نسل مایوسی اور بے سمتی کا شکار ہو رہی ہے۔ اسسٹنٹ کمشنر نے واضح کیا کہ قائداعظمؒ کا نوجوانوں کے لیے ہمیشہ یہی پیغام رہا کہ وہ تعلیم پر توجہ دیں، دیانتداری اختیار کریں اور ملک کی خدمت کو اپنا شعار بنائیں۔ انہوں نے اپیل کی کہ 25 دسمبر کے دن کی اصل روح تقاضا کرتی ہے کہ ہم محض الفاظ کی حد تک نہیں بلکہ عملی طور پر قائد کے سنہری اصولوں "ایمان، اتحاد اور تنظیم” کو اپنائیں، کیونکہ قائد کے پاکستان کو حقیقی معنوں میں ترقی یافتہ بنانے کا یہی واحد راستہ ہے اور یہی ان سے سچی عقیدت کا اظہار ہو گا۔

سیالکوٹ (باغی ٹی وی، ڈسٹرکٹ رپورٹر مدثر رتو)ڈپٹی کمشنر صبا اصغر علی نے کہا ہے کہ حکومتِ پنجاب کی ہدایات پر کرسمس کے موقع پر مسیحیوں کی عبادت گاہوں میں چراغاں اور واشنگ کے خصوصی انتظامات کیے گئے ہیں، جبکہ شہر میں کرسمس بازار بھی قائم کر دیے گئے ہیں جہاں آٹے سمیت دیگر اشیائے ضروریہ رعایتی نرخوں پر فراہم کی جا رہی ہیں۔

انہوں نے یہ بات جناح ہال قلعہ میں ایس ڈبلیو ایم سی کے ورکرز کے ہمراہ کرسمس کیک کاٹنے کی تقریب سے خطاب کرتے ہوئے کہی۔ اس موقع پر سی او میونسپل کارپوریشن زبیر وٹو، ایم ڈی ایس ڈبلیو ایم سی کاشف نواز رندھاوا اور مسیحی رہنماؤں نے بھی شرکت کی۔

ڈپٹی کمشنر صبا اصغر علی نے بتایا کہ کرسمس کے موقع پر صفائی ستھرائی اور سیکیورٹی کے مؤثر انتظامات کیے گئے ہیں۔ انہوں نے مسیحی برادری کو کرسمس کی مبارکباد دیتے ہوئے نیک تمناؤں کا اظہار کیا اور کہا کہ قائداعظم کے پاکستان میں تمام مذاہب کو مساوی شہری حقوق حاصل ہیں اور ہر شہری اپنے عقیدے کے مطابق آزادانہ زندگی گزار سکتا ہے۔

انہوں نے مزید کہا کہ مسیحی برادری کی خدمات قابلِ تحسین ہیں اور وہ پاکستان کی ترقی اور خوشحالی میں مؤثر کردار ادا کر رہی ہے۔

سیالکوٹ(باغی ٹی وی،ڈسٹرکٹ رپورٹرمدثررتو)سیالکوٹ کے ڈپٹی ڈائریکٹر سوشل ویلفیئر شریف گھمن نے کہا ہے کہ معذور افراد کی بحالی اور انہیں معاشرے کا مفید شہری بنانا محض حکومت کی ذمہ داری نہیں بلکہ سماجی تنظیموں کو بھی اس کارِ خیر میں بڑھ چڑھ کر اپنا حصہ ڈالنا ہوگا۔ ان خیالات کا اظہار انہوں نے ایمن آباد روڈ پر سیوا فاؤنڈیشن کے زیر اہتمام گوجرانوالہ ڈویژن کے 100 معذور افراد میں مفت ویل چیئرز تقسیم کرنے کی تقریب سے بطور مہمانِ خصوصی خطاب کرتے ہوئے کیا۔ انہوں نے وزیر اعلیٰ پنجاب کے "ہمت کارڈ” اور معاون آلات کی فراہمی کے انقلابی منصوبوں کا ذکر کرتے ہوئے کہا کہ ان اقدامات سے معذور افراد کے لیے زندگی کی سہولیات میں بڑی آسانیاں پیدا ہوئی ہیں اور یہ امر خوش آئند ہے کہ سیوا فاؤنڈیشن جیسے فلاحی ادارے اس ضمن میں حکومت کا بھرپور ہاتھ بٹا رہے ہیں۔ تقریب میں سوشل ویلفیئر آفیسر عدنان راٹھور، صدر شیخ بلال جہانگیر، پراجیکٹ مینجر مبینہ نقوی، ممبر کور کمیٹی سلور سٹار ایجوکیشن محمد عابد عظیم اور عادل گوندل سمیت علاقہ بھر کی معزز شخصیات نے شرکت کی۔

تقریب کے دوران پراجیکٹ مینجر سیوا فاؤنڈیشن مبینہ نقوی نے ادارے کے دیگر فلاحی منصوبوں کی تفصیلات سے آگاہ کرتے ہوئے بتایا کہ فاؤنڈیشن کی جانب سے اسکولوں، مساجد اور دیہی علاقوں میں آر او پلانٹس نصب کیے جا رہے ہیں جن سے اس وقت ایک ملین سے زائد افراد مستفید ہو رہے ہیں۔ انہوں نے مزید بتایا کہ خواتین کو معاشی طور پر خود مختار بنانے کے لیے سلائی، بیوٹیشن اور کمپیوٹر کی فنی تربیت فراہم کی جا رہی ہے، جبکہ ہونہار طلبہ کے لیے اسکالرشپس اور اسکولوں میں جدید آئی ٹی لیبز کا قیام بھی ادارے کی ترجیحات میں شامل ہے۔ اس کے علاوہ بے روزگار افراد کو اپنا کاروبار شروع کرنے کے لیے بلاسود قرضے فراہم کیے جا رہے ہیں تاکہ وہ باعزت روزگار کما سکیں۔ انہوں نے یہ اعلان بھی کیا کہ ماضی کی طرح اس سال بھی رمضان المبارک کے مقدس مہینے میں مستحق گھرانوں میں راشن تقسیم کرنے کا جامع پروگرام ترتیب دیا گیا ہے۔

تقریب کے اختتام پر مہمانِ خصوصی شریف گھمن نے مستحقین میں ویل چیئرز تقسیم کیں اور سماجی خدمت کے میدان میں سیوا فاؤنڈیشن کی گراں قدر خدمات کو سراہتے ہوئے دیگر مخیر حضرات پر بھی زور دیا کہ وہ معذور افراد کی فلاح و بہبود کے لیے اپنا تعاون جاری رکھیں۔ شرکاء نے فاؤنڈیشن کے فلاحی کاموں پر اطمینان کا اظہار کیا اور اس عزم کا اعادہ کیا کہ معاشرے کے پسماندہ طبقات کی مدد کے لیے تمام دستیاب وسائل بروئے کار لائے جائیں گے تاکہ انہیں معاشرے کا فعال رکن بنایا جا سکے۔

سیالکوٹ (باغی ٹی وی/ڈسٹرکٹ رپورٹر مدثر رتو) محکمہ زراعت (توسیع) سیالکوٹ کے زیر اہتمام کاشتکاروں کے لیے گندم کی پیداوار میں اضافے کے حوالے سے ایک آگاہی سیمینار منعقد کیا گیا، جس میں کسانوں کو جدید زرعی مشاورت اور حکومتی سہولیات سے آگاہ کیا گیا۔

تحصیل ڈسکہ کے علاقے کنڈن سیان میں مقامی مارکیٹ میں منعقدہ سیمینار سے ڈائریکٹر زراعت (توسیع) گوجرانوالہ ڈاکٹر شکیل احمد، ڈپٹی ڈائریکٹر زراعت (توسیع) سیالکوٹ سجاد حیدر اور اسسٹنٹ ڈائریکٹر زراعت (توسیع) ڈسکہ کامران بھٹی نے خطاب کیا۔ اس موقع پر محکمہ زراعت (توسیع) پنجاب کے مختلف منصوبوں، جن میں پیداواری مقابلہ، گرین ٹریکٹر اسکیم، کسان کارڈ اور دیگر سہولیات شامل ہیں، کے بارے میں تفصیلی آگاہی فراہم کی گئی۔

چوہدری سعید اللہ سیان، سابق چیئرمین یونین کونسل کنڈن سیان نے کاشتکاروں کی نمائندگی کرتے ہوئے کسانوں کے مسائل اور تجاویز پیش کیں۔

مقررین نے اپنے خطاب میں کہا کہ وزیر اعلیٰ پنجاب مریم نواز شریف کی قیادت میں کسان دوست پالیسیوں کے باعث ضلع سیالکوٹ میں ریکارڈ رقبے پر گندم کی کاشت ہوئی ہے، جو کسانوں کے حکومتی اقدامات پر اعتماد کا واضح ثبوت ہے۔ انہوں نے کہا کہ پنجاب پورے پاکستان کی غذائی ضروریات پوری کرنے میں کلیدی کردار ادا کرتا ہے اور صوبائی حکومت کی زرعی پالیسیوں سے کسانوں کا اعتماد بحال ہوا ہے، جس کے نتیجے میں وہ دلجمعی سے کاشتکاری پر توجہ دے رہے ہیں۔

سیالکوٹ (باغی ٹی وی، ڈسٹرکٹ رپورٹر مدثر رتو) ڈپٹی کمشنر سیالکوٹ صبا اصغر علی کی زیر صدارت ڈسٹرکٹ ڈسپیوٹ ریزولوشن کمیٹی (ڈی آر سی) کا اجلاس منعقد ہوا، جس میں شہریوں کے مختلف تنازعات پر تفصیلی سماعت کی گئی۔ اجلاس میں ڈسٹرکٹ پولیس آفیسر فیصل شہزاد، ایڈیشنل ڈپٹی کمشنر ریونیو عباس ذوالقرنین، اسسٹنٹ کمشنر سیالکوٹ صفدر شبیر، اسسٹنٹ کمشنر ڈسکہ سعدیہ جعفر، ایس ڈی پی اوز اور متعلقہ ریونیو حکام نے شرکت کی۔

اجلاس کے دوران ڈی آر سی کو موصول ہونے والی 26 درخواستوں پر غور کیا گیا، جن میں اراضی تنازعات، خاندانی جھگڑے اور دیگر سول نوعیت کے معاملات شامل تھے۔ کمیٹی نے فریقین کے مؤقف سنے اور دستیاب ریکارڈ کا جائزہ لیا، جس کے بعد 5 درخواست گزاروں کو ان کی زمین کا قبضہ دلوانے کا فیصلہ کیا گیا۔

ڈپٹی کمشنر صبا اصغر علی نے کہا کہ ڈسٹرکٹ ڈسپیوٹ ریزولوشن کمیٹی عوام کو فوری، شفاف اور کم خرچ انصاف کی فراہمی کا ایک مؤثر پلیٹ فارم ہے، جہاں زمین و جائیداد کے تنازعات کو قانون کے دائرے میں رہتے ہوئے خوش اسلوبی سے حل کیا جاتا ہے۔ انہوں نے متعلقہ افسران کو ہدایت کی کہ تقسیم اور قبضے سے متعلق کیسز میں موقع پر جا کر انکوائری کو یقینی بنایا جائے جبکہ ریونیو افسران مکمل ریکارڈ بروقت فراہم کریں۔

ڈی پی او فیصل شہزاد نے کہا کہ تنازعات کا بروقت اور منصفانہ حل امن و امان کے قیام میں اہم کردار ادا کرتا ہے۔ انہوں نے پولیس افسران کو ہدایت کی کہ وہ ریونیو محکمے کے ساتھ مکمل تعاون کریں تاکہ شہریوں کو جلد ریلیف فراہم کیا جا سکے۔

اجلاس کے اختتام پر متعدد کیسز نمٹا دیے گئے جبکہ بعض معاملات میں مزید جانچ پڑتال اور فریقین کو آئندہ سماعت کے لیے طلب کرنے کی ہدایت جاری کی گئی۔