Category: سیالکوٹ

سیالکوٹ (باغی ٹی وی، بیوروچیف شاہد ریاض) سیالکوٹ کی تحصیل سمبڑیال میں کاؤنٹر ٹیررازم ڈیپارٹمنٹ (سی ٹی ڈی) نے بڑی کارروائی کرتے ہوئے سنگین وارداتوں میں مطلوب ملزم کو ہلاک کر دیا۔ سی ٹی ڈی ذرائع کے مطابق کارروائی کے دوران چار مسلح ملزمان کی جانب سے ٹیم پر فائرنگ کی گئی، جس کے جواب میں پولیس نے بھی فائرنگ کی۔

پولیس کا کہنا ہے کہ فائرنگ کے تبادلے میں ایک مطلوب ملزم نوید اپنے ہی ساتھیوں کی فائرنگ کی زد میں آ کر موقع پر ہلاک ہو گیا۔ ہلاک ملزم نوید قتل، اقدام قتل اور ڈکیتی سمیت کم از کم پچیس سنگین مقدمات میں ملوث تھا۔ واقعے کا مقدمہ تھانہ سمبڑیال میں درج کر لیا گیا ہے۔

سی ٹی ڈی نے لاش کو تحویل میں لے کر مردہ خانے منتقل کر دیا ہے، جبکہ دیگر مفرور ملزمان کی تلاش کے لیے علاقے میں چھاپے مارے جا رہے ہیں۔ پولیس حکام کا کہنا ہے کہ جرائم پیشہ عناصر کے خلاف کارروائیاں جاری رہیں گی۔

سیالکوٹ (باغی ٹی وی بیوروچیف شاہد ریاض) سیالکوٹ میں واپڈا کے کینٹ سب ڈویژن پلی توپخانہ میں ایک افسوسناک واقعہ پیش آیا جہاں واپڈا اہلکار کی مبینہ بدزبانی، بدکلامی اور جان سے مارنے کی دھمکیوں کے بعد ہاتھا پائی کی نوبت آ گئی۔ یہ واقعہ اس وقت پیش آیا جب معروف سینئر صحافی شکیل سیھٹی نے اپنے جائز کام کے حصول کے لیے مبینہ طور پر پیسوں کی ڈیمانڈ پوری نہ کی۔ اس واقعے نے نہ صرف میڈیا حلقوں میں شدید غم و غصہ پیدا کیا ہے بلکہ سائلین نے بھی مذکورہ اہلکار کے متکبرانہ رویے کے خلاف شکایات کے انبار لگا دیے ہیں۔

تفصیلات کے مطابق، کینٹ سب ڈویژن پلی توپخانہ میں تعینات اسسٹنٹ لائن مین زوہیب نے سینئر صحافی شکیل سیھٹی کو اس بات پر شدید طیش میں آ کر گالم گلوچ اور بدزبانی شروع کر دی کہ ان کی درخواست پر عملدرآمد کرنا واپڈا اہلکار کی ڈیوٹی میں شامل ہے۔ زوہیب نے بدزبانی کے بعد ہاتھا پائی کی کوشش کی اور سینئر صحافی کو جان سے مارنے کی دھمکیاں بھی دیں۔

موقع پر موجود سائلین کے بیچ بچاؤ کے بعد سینئر صحافی وہاں سے نکلنے میں کامیاب ہوئے۔ سائلین نے بھی زوہیب نامی اہلکار کے متکبرانہ رویے کی شکایات کرتے ہوئے کہا کہ وہ اکثر لوگوں کے ساتھ ایسا ہی ناروا سلوک کرتا ہے۔

اس واقعے کے بعد معروف سینئر صحافی شکیل سیھٹی نے ایس سی واپڈا اور ایس ایچ او کینٹ سے داد رسی کی درخواست کی ہے اور قانون کے مطابق تحفظ فراہم کرنے کا مطالبہ کیا ہے۔ میڈیا نمائندگان اور میڈیا یونینوں نے اس واقعے کی شدید مذمت کی ہے اور حکام بالا سے ایسی "کالی بھیڑوں” کو محکمہ سے نکالنے کا مطالبہ کیا ہے۔ میڈیا برادری نے اپنے صحافی بھائی شکیل سیھٹی کے ساتھ مکمل یکجہتی کا اظہار کیا ہے۔

سیالکوٹ (باغی ٹی وی، بیوروچیف شاہد ریاض)سیالکوٹ میں افسوسناک واقعات کا سلسلہ جاری ہے، تھانہ کوٹلی لوہاراں کے علاقے شیرپور میں چار سالہ بچے کی لاش کار سے برآمد ہوئی جبکہ تھانہ ہیڈمرالہ کے علاقے گوندل میں درزی کو قتل کرنے والے ملزم کو عدالت نے سزائے موت سنا دی۔

شیرپور میں چار سالہ بچہ گزشتہ روز کھیلتے ہوئے لاپتہ ہو گیا تھا، جس کی لاش آج ایک کار سے برآمد ہوئی۔ پولیس نے نعش قبضے میں لے کر ہسپتال منتقل کر دی ہے۔ کمسن بچے کی موت پر علاقے میں کہرام مچ گیا ہے اور ہر آنکھ اشکبار ہے۔ عوامی حلقوں کا کہنا ہے کہ پولیس کی جدید ٹیکنالوجی کے باوجود بچہ بازیاب نہ ہو سکا اور ایک اور معصوم زندگی کا چراغ گل ہو گیا۔

دوسری جانب تھانہ ہیڈمرالہ کے علاقے گوندل میں تیرہ جولائی 2024 کو درزی اعجاز کو لڑائی چھڑوانے کی پاداش میں چھریاں مار کر قتل کر دیا گیا تھا۔ ملزم ساجد محمود عرف بلا کو ہومی سائیڈ یونٹ کے انسپکٹر شبیر گل نے گرفتار کر کے آلہ قتل برآمد کیا اور شواہد جمع کیے۔ ایڈیشنل سیشن جج شہزادی نجف نے مقدمے کی سماعت مکمل ہونے کے بعد جرم ثابت ہونے پر ملزم کو سزائے موت اور سات لاکھ روپے جرمانے کی سزا سنا دی۔

دونوں واقعات نے ضلع بھر میں خوف، افسوس اور غم کی فضا قائم کر دی ہے، جبکہ عوامی حلقوں نے مطالبہ کیا ہے کہ بچوں کے تحفظ کے لیے پولیس کو جدید اقدامات کرنے ہوں گے اور مجرموں کو سخت ترین سزائیں دے کر انصاف کا نظام مضبوط بنانا ہو گا۔

سیالکوٹ (باغی ٹی وی سٹی رپورٹر مدثر رتو)ریسکیو 1122 نے ضلعی انتظامیہ کے اشتراک سے دریائے چناب پر کمبھرانوالہ کے مقام پر سیلابی صورتحال سے نمٹنے کی فرضی مشق کا انعقاد کیا۔ مشق کا مقصد ممکنہ ہنگامی صورتحال میں ادارہ جاتی تیاری اور باہمی رابطے کو جانچنا تھا۔

یہ مشق بانی ڈائریکٹر جنرل پنجاب ایمرجنسی سروس ڈاکٹر رضوان نصیر کی ہدایت اور ریجنل ایمرجنسی آفیسر گوجرانوالہ کی نگرانی میں ڈسٹرکٹ ایمرجنسی آفیسر انجینئر نوید اقبال کی قیادت میں منعقد کی گئی۔ ڈپٹی کمشنر سیالکوٹ صبا اصغر علی کی خصوصی ہدایت پر ضلعی سطح کے تمام ادارے مشق میں شریک ہوئے۔

تمام محکموں نے اپنے آلات اور تیاریاں عوام کے سامنے پیش کیں۔ ریسکیو 1122 نے پانی میں ڈوبنے والوں کی تلاش، ابتدائی طبی امداد اور سیلابی ریسکیو آپریشن کا عملی مظاہرہ پیش کیا۔ فیلڈ میڈیکل کیمپ بھی قائم کیا گیا جس میں ریسکیو اہلکاروں نے فوری طبی سہولیات فراہم کرنے کی مشق کی۔

ڈی ڈی ایم سی کے کیوان حسن نے مشق کے کامیاب انعقاد پر تمام محکموں کو سراہا اور تیاریوں کو تسلی بخش قرار دیا۔ ڈسٹرکٹ ایمرجنسی آفیسر نوید اقبال کے مطابق ایسی مشقوں سے نہ صرف اداروں کی پیشہ ورانہ صلاحیتوں کا جائزہ لیا جاتا ہے بلکہ باہمی تعاون کو فروغ دے کر ممکنہ آفات میں بروقت ردعمل ممکن بنایا جا سکتا ہے۔

مشق میں ریسکیو محافظین کے علاوہ سول ڈیفنس، واسا، میونسپل کارپوریشن، محکمہ صحت، انہار، لائیو اسٹاک، ٹریفک پولیس، سوشل ویلفیئر آرگنائزیشن، حیی الفلاح اور روز ویلفیئر آرگنائزیشن نے بھی شرکت کی۔

سیالکوٹ (باغی ٹی وی، مدثر رتو) تھانہ حاجی پورہ کے علاقے مبارک پورہ میں افسوسناک واقعہ پیش آیا جہاں چچا نے فائرنگ کر کے اپنے بھتیجے زویار کو قتل کر دیا، جبکہ مقتول کا والد سفیان اور چھوٹا بھائی اذان گولیاں لگنے سے زخمی ہو گئے۔

پولیس کے مطابق زویار کی عمر تقریباً 25 سال تھی، جو موقع پر ہی دم توڑ گیا۔ زخمیوں کو طبی امداد کے لیے اسپتال منتقل کر دیا گیا ہے۔ واقعے کی اطلاع ملتے ہی پولیس موقع پر پہنچ گئی اور شواہد اکٹھے کر کے ملزم کی گرفتاری کے لیے کارروائی شروع کر دی گئی ہے۔

پولیس کا کہنا ہے کہ واقعے کی تفتیش جاری ہے اور جلد حقائق سامنے لائے جائیں گے۔