سیالکوٹ(باغی ٹی وی بیوروچیف شاہد ریاض)سیالکوٹ کے علاقہ ایمن آباد روڈ پر پولیس نے ایک اشتہاری کی گرفتاری کے لیے چھاپہ مارا تو وہاں ایک قحبہ خانہ چلایا جا رہا تھا، جہاں سے نائیکہ سمیت 11 مرد و خواتین کو رنگے ہاتھوں گرفتار کر لیا گیا۔ تاہم، جس اشتہاری ملزم ندیم کی گرفتاری کے لیے چھاپہ مارا گیا تھا، وہ فرار ہونے میں کامیاب ہو گیا۔
تھانہ صدر سیالکوٹ کے ایس ایچ او انسپکٹر غازی میاں عبدالرزاق کو بھڈال کے قریب ایمن آباد روڈ پر فرزانہ نامی خاتون کے قحبہ خانہ چلانے کی شکایات ملی تھیں۔ ان شکایات پر فوری کارروائی کرتے ہوئے ایس ایچ او نے لیڈیز پولیس کے ہمراہ ایک پارٹی تشکیل دی اور مکان پر چھاپہ مارا۔ چھاپے کے دوران فحش حرکات کرتے ہوئے 11 افراد کو موقع سے گرفتار کر لیا گیا۔
گرفتار ہونے والوں میں اقراء، ثوبیہ، تانیہ، کنزہ، صائمہ، شہروز، عبدالحاد، ابرار، ایریل، علی اور شعیب شامل ہیں۔ دورانِ تفتیش خواتین نے انکشاف کیا کہ نائیکہ فرزانہ انہیں مردوں سے ملنے کے عوض پانچ سو سے ایک ہزار روپے دیتی تھی۔ پولیس نے گرفتار ملزمان کے خلاف فحاشی کے الزام میں مقدمہ درج کرکے انہیں عدالت میں پیش کر دیا ہے۔
ایک دوسرے واقعے میں، پولیس نے سلطان چوک کے قریب سے یاسین نامی شخص کے قبضے سے دو کلو سے زائد چرس برآمد کی ہے اور اس کے خلاف بھی مقدمہ درج کر لیا ہے۔
