Category: سیالکوٹ

سیالکوٹ (باغی ٹی وی بیوروچیف شاہد ریاض)ضلع سیالکوٹ میں بھارت کی جانب سے حالیہ سرحدی جارحیت کے تناظر میں سیکیورٹی صورتحال کے پیش نظر انتظامیہ نے فوری طور پر الرٹ جاری کرتے ہوئے عوام کی سہولت اور بروقت رابطے کے لیے ہاٹ لائن قائم کر دی ہے۔ ڈپٹی کمشنر سیالکوٹ صباء اصغر علی کی ہدایت پر یہ ہاٹ لائن ڈسٹرکٹ ایمرجنسی آپریشن سینٹر (DEOC) دفتر ڈپٹی کمشنر سیالکوٹ میں مکمل طور پر فعال کر دی گئی ہے، جہاں شہری کسی بھی ہنگامی صورتِ حال، سرحدی کشیدگی، نقل مکانی یا ممکنہ خطرات کی اطلاع فوری طور پر دے سکتے ہیں۔

ڈپٹی کمشنر صباء اصغر علی کے مطابق شہریوں کو کسی بھی ممکنہ ایمرجنسی، جانی یا مالی نقصان یا غیر معمولی سرگرمی کی صورت میں فوری طور پر ہاٹ لائن نمبر 1718 پر رابطہ کرنے کی ہدایت کی گئی ہے۔ ہاٹ لائن 24 گھنٹے کام کرے گی اور ضلعی انتظامیہ، ریسکیو 1122، پولیس اور دیگر متعلقہ محکمے باہمی رابطے میں رہتے ہوئے کسی بھی اطلاع پر فوری ردعمل دیں گے۔

ڈپٹی کمشنر نے واضح کیا کہ حکومت پنجاب اور ضلعی انتظامیہ شہریوں کے جان و مال کے تحفظ کو اولین ترجیح دے رہی ہے اور بارڈر ایریاز میں موجود آبادیوں کو ہر ممکن تحفظ فراہم کرنے کے لیے تمام تر وسائل بروئے کار لائے جا رہے ہیں۔ انہوں نے کہا کہ امن و امان کی صورتحال پر کڑی نظر رکھی جا رہی ہے اور کسی بھی غیر متوقع حالات سے نمٹنے کے لیے ریسپانس میکانزم کو مزید مؤثر بنایا جا رہا ہے۔

انتظامیہ کی جانب سے عوام سے اپیل کی گئی ہے کہ وہ افواہوں پر کان نہ دھریں، سرکاری اطلاعات پر انحصار کریں اور کسی بھی مشتبہ سرگرمی یا ایمرجنسی کی اطلاع فوری طور پر ڈسٹرکٹ ایمرجنسی آپریشن سینٹر کو دیں تاکہ بروقت اقدامات کیے جا سکیں۔

یہ اقدام موجودہ حالات میں ضلعی سطح پر ایک مؤثر حکمت عملی کا حصہ ہے جس کا مقصد عوام کے تحفظ اور ہنگامی ردعمل کو یقینی بنانا ہے۔

سیالکوٹ، باغی ٹی وی( سٹی رپورٹر مدثر رتو ) عمران خان کے ساتھ زیادتی کی ذمہ دار اقتدار پر قابض جماعتیں ہیں۔ریحانہ ڈار

پاکستان تحریک انصاف رہنما و ٹکٹ ہولڈرریحانہ امتیاز ڈار نے کہا ہے کہ عمران خان اور پی ٹی آئی قیادت کےساتھ زیادتی کی ذمہ دار اقتدار پر قابض جماعتیں ہیں کارکنوں کے حق پر کسی کو ڈاکہ ڈالنے نہیں دیاجائے گا ، آج بھی پارٹی کا ہر کارکن عمران کیساتھ ڈٹ کے کھڑا ہےاڈیالہ جیل کے باہر عمران خان کی بہنوں کےساتھ پولیس اور جیل انتظامیہ کا رویہ قابل مذمت ہے ، خواتین کےساتھ ایسا رویہ پنجاب حکومت کا وطیرہ ہے جو قابل گرفت ہے ۔

حکومت نے پی ٹی آئی اور اس کی قیادت کےخلاف انتقامی کارروائیاں شروع کردی ہیں، ہزاروں کارکنوں اور رہنماﺅں کو گرفتار کرکے پابند سلاسل کیا جارہا ہے ۔ حکمران ہوش کے ناخن لیں اور پی ٹی آئی کے خلاف انتقامی کارروائیوں کا سلسلہ بند اور گرفتار رہنماﺅں و کارکنوں کو فوری طور پر رہا کیا جائے۔پاکستان تحریک انصاف رہنما و ٹکٹ ہولڈرریحانہ امتیاز ڈار نے کہا کہ سمجھ سے بالاتر ہے کہ آخر اس نظام کو اپنے ہی ملک کی ماو¿ں بہنوں اور بیٹیوں سے کس چیز کا خوف ہے؟بشری بی بی، علیمہ خان، ڈاکٹر یاسمین راشد، خدیجہ شاہ، عالیہ حمزہ، زرتاج گل، صنم جاوید، طیبہ راجہ ناجانے اور کتنی ماؤں بیٹیوں پر فسطائیت کے پہاڑ توڑے گئے مگر مجال ہے کہ اس بدترین جبر کے باوجود کسی ایک کی بھی وفاداری کو تبدیل کرسکے ہو۔

مان لو کہ تم ہار چکے ہو اور عمران خان جیت چکا ہے!میرے پاکستان کی بہادر ماو¿ں، بہنوں اور بیٹیوں آپ ہماری شیرنیاں ہو جو پورے جعلی نظام کے خلاف دھاڑ کر عمران خان کے نظریے پر ڈٹ کر کھڑی ہو۔

سیالکوٹ، باغی ٹی وی (سٹی رپورٹر مدثر رتو) چیئرمین گلوبل پاک کشمیر سپریم کونسل راجہ سکندر خان نے کہا ہے کہ پاکستان میں صحافیوں کا کردار قومی تاریخ کا روشن باب ہے۔ انہوں نے کہا کہ آئین، جمہوریت اور عوامی حقوق کی جدوجہد میں صحافت نے ہمیشہ مرکزی کردار ادا کیا ہے، اور یہی صحافت معاشرتی تبدیلی کا پیش خیمہ بنتی ہے۔

عالمی یومِ صحافت کے موقع پر میڈیا سے گفتگو کرتے ہوئے راجہ سکندر خان نے کہا کہ موجودہ دور صحافیوں کے لیے نہایت چیلنجنگ ہے، جہاں اظہارِ رائے کی آزادی دبائی جا رہی ہے، اور سچ لکھنے یا بولنے والے صحافیوں کو خطرات، دھمکیاں، حتیٰ کہ تشدد اور قید کا سامنا ہے۔ انہوں نے کہا کہ ایک آزاد اور باکردار صحافت کے بغیر کوئی معاشرہ حقیقی ترقی نہیں کر سکتا۔

راجہ سکندر خان نے قیامِ پاکستان کے وقت صحافیوں کی خدمات کو یاد کرتے ہوئے کہا کہ قائداعظم محمد علی جناح کے ہراول دستے میں بھی صحافت شامل تھی، اور آج بھی پاکستان کے باشعور صحافی آئین و جمہوریت کی جنگ میں اپنی جانوں کی پرواہ کیے بغیر اپنا کردار ادا کر رہے ہیں۔

انہوں نے کہا کہ ہم ان تمام بے باک صحافیوں کو خراج تحسین پیش کرتے ہیں جنہوں نے آزادیِ صحافت کے لیے اپنا خون دیا، جیلیں کاٹیں، ہتھکڑیاں پہنیں اور تشدد سہا، مگر سچ کی راہ سے نہ ہٹے۔

راجہ سکندر خان نے کہا کہ صحافت ایک مقدس پیشے سے بڑھ کر ایک عظیم مشن ہے، اور جس حکومت میں اظہارِ رائے اور صحافت کی آزادی نہ ہو، وہ جمہوریت کہلانے کی حقدار نہیں۔ انہوں نے اپنی اور اپنی ٹیم کی جانب سے تمام صحافی برادری کو سلام پیش کرتے ہوئے امید ظاہر کی کہ پاکستانی صحافی آئندہ بھی حق، انصاف اور عوامی آواز بلند کرتے رہیں گے۔

سیالکوٹ، باغی ٹی وی (سٹی رپورٹر مدثر رتو) یونین کونسل کوٹلی بہرام کے محلہ چاہ للاریاں میں ترقیاتی منصوبوں کے آغاز پر علاقہ مکینوں نے وفاقی وزیر دفاع خواجہ محمد آصف اور رکن صوبائی اسمبلی محمد منشاء اللہ بٹ کا شکریہ ادا کرتے ہوئے خوشی کا اظہار کیا۔

مسلم لیگ (ن) سٹی صدر رفیق مغل اور وائس چیئرمین رحمان شیر ایڈووکیٹ کی قیادت میں جاری ان منصوبوں میں گلیوں میں ٹف ٹائلز کی تنصیب اور سینی ٹیشن سروسز کی اپ گریڈیشن شامل ہے، جو میونسپل کارپوریشن سیالکوٹ کی نگرانی میں مکمل کیے جا رہے ہیں۔

اس موقع پر چیئرمین زاہد حسین خالدی، حافظ شبیر آرائیں ایڈووکیٹ، جنرل کونسلر طاہر خان، ذوالفقار علی، مشتاق سبحانی سمیت دیگر معززین علاقہ نے کہا کہ مسلم لیگ (ن) کے دور حکومت میں ہمیشہ ترقیاتی کاموں کا آغاز ہوا ہے، جو عوامی فلاح و بہبود اور معیارِ زندگی کی بہتری کی ضمانت ہے۔

علاقہ مکینوں نے ان اقدامات کو سراہتے ہوئے امید ظاہر کی کہ مستقبل میں بھی ترقیاتی سفر اسی طرح جاری رہے گا۔

سیالکوٹ، باغی ٹی وی (سٹی رپورٹر مدثر رتو) افواجِ پاکستان سے اظہارِ یکجہتی اور بھارتی جارحیت کے خلاف سول سوسائٹی کی جانب سے ریلی کا انعقاد کیا گیا، جس میں مختلف شعبہ ہائے زندگی سے تعلق رکھنے والے افراد نے بھرپور شرکت کی۔ ریلی کے شرکاء نے پاکستان زندہ باد اور پاک فوج زندہ باد کے نعرے لگائے اور وطن سے اپنی والہانہ محبت کا اظہار کیا۔

ریلی سے خطاب کرتے ہوئے محمد اشفاق نذر، محمد اشرف بھٹی، پیر غلام حسین سلطانی اور نازیہ کنول نے کہا کہ پاکستانی قوم افواج پاکستان کے ساتھ کندھے سے کندھا ملا کر کھڑی ہے، اور اگر بھارت نے سرحدی خلاف ورزی کی تو اسے منہ توڑ جواب دیا جائے گا۔ مقررین کا کہنا تھا کہ پاکستان تاقیامت قائم رہنے کے لیے بنا ہے، اور اس کی حفاظت، دفاع اور سلامتی کے لیے ہر ممکن قربانی دی جائے گی۔

انہوں نے کہا کہ افواج پاکستان کے شہداء کا خون کبھی رائیگاں نہیں جائے گا، اور پاکستانی عوام اپنے سپاہیوں کے حوصلے اور قربانیوں کو سلام پیش کرتی ہے۔ ریلی میں حاجی محمد سرور، حاجی محمد اکبر، عاشق حسین سمیت خواتین کی بڑی تعداد نے شرکت کی اور پاک فوج سے بھرپور یکجہتی کا اظہار کیا۔

مقررین نے عالمی برادری کو پیغام دیتے ہوئے کہا کہ پاکستانی قوم متحد ہے اور ملک دشمن عناصر کی ہر سازش کو ناکام بنانے کی صلاحیت رکھتی ہے۔

سیالکوٹ، باغی ٹی وی (نامہ نگار مہر مصطفیٰ) مسیحی رہنما بشپ آر ایم سیلاس گل، بانی و چیئرمین سمرنا چرچ آف پاکستان نے کہا ہے کہ "ہم ایک کروڑ پاکستانی مسیحی پاک آرمی کے شانہ بشانہ کھڑے ہیں”۔ انہوں نے سیالکوٹ میں میڈیا نمائندگان سے گفتگو کرتے ہوئے کہا کہ مسیحیوں نے ہمیشہ پاکستان کی سلامتی اور بقا کے لیے جانی و مالی قربانیاں دی ہیں اور آئندہ بھی پاکستان کی سالمیت کے لیے کسی بھی قربانی سے گریز نہیں کریں گے۔

انہوں نے مزید کہا کہ افواج پاکستان سرحدوں کی حفاظت پر دن رات تعینات ہیں اور پاکستانی مسیحی ان کا بھرپور ساتھ دے رہے ہیں۔ تاریخ گواہ ہے کہ مسیحی پاکستان کی ترقی اور سلامتی کے لیے ہمیشہ سرگرم رہے ہیں، اور 1965ء اور 1971ء کی جنگوں میں بھی ان کا کردار اہم تھا۔

بشپ آر ایم سیلاس گل نے کہا کہ پاکستان کی ترقی کی راہ میں آنے والی ہر رکاوٹ کے خلاف پاکستانی مسیحی اپنے عزم بلند رکھیں گے تاکہ ملک ترقی کی راہ پر گامزن رہے۔ انہوں نے کہا کہ ملک دشمن عناصر پاکستان کی ترقی کے راستے میں رکاوٹیں ڈالنے کی کوشش کر رہے ہیں، مگر افواج پاکستان ان تمام سازشوں کو ناکام بنانے کی بھرپور صلاحیت رکھتی ہیں، اور ہم پاکستانی مسیحی افواج کے ساتھ شانہ بشانہ کھڑے ہیں۔

سیالکوٹ،باغی ٹی وی(سٹی رپورٹر مدثر رتو) فائر فائٹرز کے عالمی دن پر ریسکیو 1122 کی فارورڈ اسپورٹس میں فرضی مشق

ریسکیو 1122 نے فائر فائٹرز کے عالمی دن کی مناسبت سے سیالکوٹ کے فارورڈ اسپورٹس، ساہیوالہ میں ایک فرضی مشق کا انعقاد کیا۔ یہ مشق ریجنل ایمرجنسی آفیسر گوجرانوالہ ڈاکٹر فواد شہزاد کی زیر نگرانی اور ڈسٹرکٹ ایمرجنسی آفیسر انجینئر نوید اقبال کی قیادت میں منعقد ہوئی، جس کا مقصد فیکٹری کے ورکرز اور سٹاف کو ہنگامی حالات جیسے آگ لگنے یا زلزلے سے نمٹنے کی تربیت فراہم کرنا تھا۔

مشق کے دوران ریسکیو ٹیم نے آگ لگنے کی صورتحال میں عمارت میں پھنسے افراد کو بحفاظت نکالنے، بلند عمارتوں سے لوگوں کو نیچے اتارنے، آگ پر فوری قابو پانے، اور زخمیوں کو جلد از جلد ہسپتال منتقل کرنے کے عملی مظاہرے پیش کیے۔ فرضی مشق میں فارورڈ اسپورٹس کی فرسٹ ایڈ اور فائر فائٹر ٹیم نے بھی حصہ لیا، جس کی قیادت سمیر رزاق نے کی، جبکہ مجموعی کمانڈ ایمرجنسی آفیسر عرفان یعقوب کے پاس تھی۔ ریسکیو سکاؤٹس نے ڈسٹرکٹ وارڈن جمیل جنجوعہ کی سربراہی میں فعال کردار ادا کیا۔

مشق کے موقع پر فارورڈ اسپورٹس کے سی ای او خواجہ مسعود، ڈائریکٹر آپریشن میجر شاہد، اور صدر روز ویلفیئر سوشل ورکر اشفاق نذر بھی موجود تھے۔ خواجہ مسعود نے مشق کا جائزہ لیتے ہوئے ریسکیو 1122 کی کاوشوں کو سراہا اور کہا کہ ایسی مشقیں ہنگامی حالات کے لیے تیاری اور ردعمل کو بہتر بناتی ہیں۔ انہوں نے کہا کہ "اس طرح کی مشقوں کا مقصد ہمیں یہ سکھانا ہے کہ ایمرجنسی میں ہمارا اگلا قدم کیا ہونا چاہیے۔” انہوں نے ریسکیو ٹیم کا شکریہ ادا کیا اور ان کی پیشہ ورانہ کارکردگی کی تعریف کی۔

ڈسٹرکٹ ایمرجنسی آفیسر انجینئر نوید اقبال نے کہا کہ ریسکیو 1122 سیکریٹری ایمرجنسی سروسز ڈاکٹر رضوان نصیر کے ویژن کے تحت معاشرے کو محفوظ اور صحت مند بنانے کے لیے ہر وقت تیار ہے۔ انہوں نے فائر فائٹرز کو خراج تحسین پیش کرتے ہوئے کہا کہ "ہمارے فائر فائٹرز حقیقی ہیرو ہیں، جو اپنی جانوں کی پروا کیے بغیر عوام کی جان و مال کی حفاظت کرتے ہیں۔”

تقریب کے اختتام پر ریسکیو 1122 کے شہدا کے لیے خصوصی دعا کی گئی، جس میں ان کی قربانیوں کو خراج عقیدت پیش کیا گیا۔ یہ مشق نہ صرف تربیتی مقاصد کے لیے اہم تھی بلکہ فائر فائٹرز کے عالمی دن کے موقع پر ان کی خدمات کو سراہنے کا ایک بہترین موقع بھی فراہم کیا۔

سیالکوٹ،باغی ٹی وی(بیورو چیف شاہد ریاض) سیالکوٹ پولیس نے منشیات کے خلاف بڑی کارروائی کرتے ہوئے پشاور سے لائی جانے والی منشیات کی بھاری کھیپ پکڑ لی۔ ڈسٹرکٹ پولیس آفیسر (ڈی پی او) فیصل شہزاد کی ہدایات پر صدر سیالکوٹ پولیس نے کریک ڈاؤن کے دوران ایک خاتون منشیات فروش کو گرفتار کیا۔

ایس ایچ او انسپکٹر غازی میاں عبدالرزاق کی سربراہی میں لیڈی پولیس کے ہمراہ محلہ سالو گجر کی رہائشی شمع بی بی کو گرفتار کیا گیا۔ ملزمہ کے قبضے سے 27 کلوگرام منشیات برآمد کی گئی، جس میں 8 کلو افیون، 6 کلو آئس، 6 کلو ہیروئن اور 7 کلو چرس شامل ہیں۔ برآمد شدہ منشیات کی مالیت تین کروڑ روپے سے زائد بتائی جا رہی ہے۔ اس کے علاوہ، ملزمہ سے منشیات کی فروخت سے حاصل ہونے والی 10 لاکھ 42 ہزار روپے کی نقد رقم بھی برآمد کی گئی۔

دورانِ تفتیش ملزمہ نے انکشاف کیا کہ وہ پشاور سے منشیات لا کر سیالکوٹ کے مختلف علاقوں میں سپلائی کرتی تھی۔ پولیس کے مطابق، شمع بی بی کے خلاف ماضی میں بھی منشیات فروشی کے متعدد مقدمات درج ہیں۔

ڈی پی او فیصل شہزاد نے کہا کہ اس کامیاب کارروائی سے منشیات کی سپلائی کی ایک بڑی چین کو توڑ دیا گیا ہے۔ انہوں نے مزید کارروائیوں کے تسلسل کو جاری رکھنے کا عزم ظاہر کیا۔ کارروائی میں شاندار کارکردگی دکھانے والی پولیس ٹیم کے لیے تعریفی سرٹیفکیٹس اور نقد انعامات کا اعلان بھی کیا گیا۔

یہ کارروائی سیالکوٹ پولیس کی منشیات کے خاتمے کے لیے جاری کوششوں کا حصہ ہے، جو معاشرے سے اس لعنت کو جڑ سے اکھاڑنے کے لیے پرعزم ہے۔

سیالکوٹ/باغی ٹی وی (بیوروچیف شاہد ریاض) پاکستان لٹریری سوسائٹی کے زیر اہتمام سیالکوٹ آرٹ اینڈ کلچر سینٹر میں "اقبال اور عشق رسول (ص)” کے موضوع پر ایک پروقار سیمینار کا انعقاد کیا گیا۔ تقریب کی صدارت سیالکوٹ آرٹ اینڈ کلچر سینٹر کے چیئرمین خالد لطیف نے کی، جبکہ نظامت کے فرائض تاریخ سیالکوٹ کے مؤلف اور مرکزی صدر اشفاق نیاز نے بخوبی انجام دئیے۔

اس موقع پر سیالکوٹ کے نامور شعرا کرام سید زاہد حسین بخاری، عبدالمجید صابری، رحمان امجد مراد اور صوفی حفیظ احمد قادری نے شاعر مشرق علامہ محمد اقبال کو اپنے منظوم کلام کے ذریعے خراج عقیدت پیش کیا۔

تقریب کے صدر خالد لطیف نے اپنے خیالات کا اظہار کرتے ہوئے کہا کہ آج ہم فکر اقبال پر عمل پیرا ہو کر اپنا کھویا ہوا مقام دوبارہ حاصل کر سکتے ہیں۔ پروفیسر قاسم علی بٹ نے پاکستان لٹریری سوسائٹی کی جانب سے اس پرفتن دور میں اقبال اور عشق رسول صلی اللہ علیہ والہ وسلم کے موضوع پر سیمینار کے انعقاد کو علامہ اقبال سے سچی محبت کا ثبوت قرار دیا۔

پروفیسر مصدق علی نے علامہ اقبال کو محض ایک شاعر ہی نہیں بلکہ ایک مفکر، مصلح، عاشق رسول (ص) اور ملت اسلامیہ کا نباض قرار دیا۔ پروفیسر شجاعت علی مجاہد نے کہا کہ حضور اکرم صلی اللہ علیہ والہ وسلم کی محبت کے بغیر ایمان مکمل نہیں ہوتا اور انسان بھی نامکمل رہتا ہے۔

معروف ادب شناس اور شاعر نصیر احمد بھلی نے کہا کہ علامہ محمد اقبال کا ہم پر بڑا احسان ہے کہ انہوں نے ہمیں پاکستان کی تشکیل دی، لیکن اس سے بھی بڑا احسان یہ ہے کہ انہوں نے نبی پاک صلی اللہ علیہ وآلہ وسلم کی شان ہمیں بتانے کی کوشش کی اور یہ اعزاز بہت کم لوگوں کو نصیب ہوتا ہے۔ معروف شاعر عبدالمجید صابری نے کہا کہ عشق ہر آدمی کے شعور کے مطابق ہوتا ہے اور وہ عشق، عشق نہیں ہوتا جو نتائج پیدا نہ کر سکے۔ مصنف و شاعر پروفیسر اکبر علی غازی نے اس خوبصورت تقریب کے انعقاد پر پاکستان لٹریری سوسائٹی کو خراج تحسین پیش کیا۔

انگلینڈ سے تشریف لائے معروف ایجوکیشنسٹ مزمل حیدر نے زور دیا کہ فکر اقبال کی تشریح اس انداز سے کی جائے کہ نئی نسل بھی اس سے آگاہ ہو، کیونکہ اس وقت علامہ اقبال کے پیغام کو عام کرنے کی اشد ضرورت ہے۔ معروف کیلیگرافر اور ماہر تعلیم عبدالوہاب نے کہا کہ شہر اقبال میں زندہ جاوید کارناموں کے حامل افراد کی پذیرائی کی جائے اور انہیں وہ مقام دیا جائے جس کے وہ حقدار ہیں۔ پاکستان لٹریری سوسائٹی کی سیکرٹری اطلاعات و نشریات عینی ملک نے یقین دلایا کہ سوسائٹی مستقبل میں بھی ایسے معلوماتی سیمینارز اور تقریبات کا اہتمام کرتی رہے گی۔

تقریب کے اختتام پر پاکستان لٹریری سوسائٹی کے سیکرٹری جنرل ایم عابد ایڈووکیٹ نے تقریب میں شرکت کرنے والے ادیبوں، شاعروں، دانشوروں اور معزز مہمانوں کا شکریہ ادا کیا۔ اس موقع پر پروفیسر محمد باقر ڈار، پروفیسر عبداللہ خانزادہ، ماہر تعلیم چوہدری منور احمد گجر، حکیم حامد محمود قریشی، صحافی آصف سیٹھی، صباح الدین لائبریرین، پاکستان لٹریری سوسائٹی کے رضوان واحد (ایف بی آر انسپیکٹر)، پی ایل ایس کے ضلعی صدر پروفیسر محمد ارشد اور فوکل پرسن احسن علی احسن سمیت دیگر اہم شخصیات نے بھی شرکت کی۔