Category: سیالکوٹ

ڈسکہ ،باغی ٹی وی( نامہ نگار ملک عمران) صوبائی وزیر بلدیات میاں ذیشان رفیق نے ڈسکہ سول ہسپتال میں سٹی سکین مشین اور ڈسکہ شہر کی پانچ اہم سڑکوں کی تعمیر کے منصوبوں کا باضابطہ افتتاح کر دیا۔ اس موقع پر رکن صوبائی اسمبلی چوہدری نوید اشرف، سابق ایم پی اے چودھری جمیل اشرف، ایم ایس ڈاکٹر محمد علی بٹ کے علاوہ پاکستان مسلم لیگ ن کے مقامی رہنما، کارکنان اور معززین شہر کی بڑی تعداد موجود تھی۔

صوبائی وزیر بلدیات میاں ذیشان رفیق نے اس موقع پر گفتگو کرتے ہوئے کہا کہ حکومت پنجاب اور ورلڈ بینک کے باہمی تعاون سے ڈسکہ کی خستہ حال پسرور روڈ، جامکے روڈ، بینک روڈ، کالج روڈ اور سمبڑیال روڈ کی تعمیر نو پر 55 کروڑ روپے کی لاگت آئے گی۔ انہوں نے مزید بتایا کہ ان سڑکوں کے ساتھ ساتھ نکاسی آب کے نظام (اسٹرم ڈرینز/نالوں) کی تعمیر اور اسٹریٹ لائٹس کی تنصیب بھی اس منصوبے کا حصہ ہے۔

اس سے قبل صوبائی وزیر بلدیات نے سول ہسپتال ڈسکہ میں پرائیویٹ پبلک پارٹنر شپ کے تحت نصب کی گئی 16 سلائس سٹی سکین مشین کا افتتاح کیا۔ انہوں نے سول ہسپتال ڈسکہ کو پنجاب کا نمبر ون ٹی ایچ کیو ہسپتال قرار دیتے ہوئے ایم ایس ڈاکٹر محمد علی بٹ اور ان کی ٹیم کی پیشہ ورانہ خدمات اور خلوص نیت سے کام کرنے پر ان کی تعریف کی۔ میاں ذیشان رفیق نے اعلان کیا کہ سول ہسپتال ڈسکہ میں ایمرجنسی کی صورت میں سٹی سکین کی سہولت مفت فراہم کی جائے گی جبکہ روٹین کے کیسز میں صرف 2500 روپے فیس وصول کی جائے گی۔ انہوں نے یہ بھی بتایا کہ سٹی سکین مشین پی ایم یو سے منسلک ہے جس کی رپورٹ 4 گھنٹوں کے اندر آن لائن دستیاب ہو سکے گی۔

سیالکوٹ ،باغی ٹی وی(سٹی رپورٹر مدثر رتو) جماعت اسلامی حلقہ خواتین کی جانب سے سیالکوٹ بھر کے اسکولز اور کالجز کی طالبات کے لیے "فری غزہ یوتھ گالا” کا انعقاد کیا گیا۔ اس پُراثر تقریب میں قیمہ پاکستان جماعت اسلامی حلقہ خواتین محترمہ حمیرا طارق مہمانِ خصوصی تھیں، جن کے ہمراہ ان کی ٹیم اور موٹیویشنل اسپیکر ڈاکٹر جاوید اقبال اور ٹرینر زیر منصوری بھی موجود تھے۔ مختلف سیشنز میں طالبات سے خطاب کرتے ہوئے مہمانانِ گرامی نے ان کی رہنمائی کی۔

حمیرا طارق نے اپنے خطاب میں نوجوان لڑکیوں کو صحابیات اور امہات المومنین کی زندگیوں کو مشعلِ راہ بنانے کی تلقین کی۔ انہوں نے کہا کہ آج کی یوتھ ہی کل کی قیادت ہے، اور ضروری ہے کہ ہماری بیٹیاں ام عمارہ، ام سلمہ، حضرت خدیجہ اور حضرت عائشہ رضی اللہ عنہن جیسی عظیم خواتین کے نقش قدم پر چلیں، اور مغرب کے چکا چوند ایجنڈوں سے ہوشیار رہیں۔

موٹیویشنل اسپیکر ڈاکٹر جاوید اقبال نے طالبات کو ایک کامیاب، بااعتماد اور باعلم زندگی گزارنے کے حوالے سے مفید نکات بتائے۔ ان کا کہنا تھا کہ ذہنی، جسمانی اور روحانی صحت کے ساتھ ساتھ قرآن و سنت اور تاریخِ اسلام و موجودہ حالات کا علم حاصل کرنا موجودہ فتنوں سے بچاؤ اور اُمت کی فلاح کے لیے نہایت اہم ہے۔

پروگرام کے اختتام پر فلسطین سے اظہارِ یکجہتی کے طور پر ایک پُرامن ریلی نکالی گئی، جس کی قیادت امیرِ ضلع جماعت اسلامی چوہدری امتیاز احمد بریار نے کی۔ اس ریلی میں شہر سیالکوٹ کی بڑی تعداد میں طالبات اور خواتین نے بھرپور شرکت کی اور فلسطینی عوام کے ساتھ محبت و حمایت کا اظہار کیا۔

یہ یوتھ گالا نہ صرف طالبات کے لیے سیکھنے اور شعور بیدار کرنے کا ذریعہ بنا بلکہ امتِ مسلمہ کے اہم مسائل پر آواز بلند کرنے کا مؤثر پلیٹ فارم بھی ثابت ہوا۔

سیالکوٹ،باغی ٹی وی( سٹی رپورٹر مدثر رتو) ریسکیو 1122 سیالکوٹ اور عمران ادریس ٹیچنگ ہسپتال کے درمیان باہمی تعاون کی یادداشت پر دستخط کی تقریب ڈسکہ روڈ پر واقع ہسپتال میں منعقد ہوئی۔

ڈسٹرکٹ ایمرجنسی آفیسر انجینئر نوید اقبال نے سیکرٹری پنجاب ایمرجنسی سروس ڈاکٹر رضوان نصیر کے وژن "سیفر کمیونٹی” کے تحت، ریجنل ایمرجنسی آفیسر ڈاکٹر فواد شہزاد مرزا کی نگرانی میں معاہدے پر دستخط کیے۔ تقریب میں عمران ادریس گروپ کے چئیرمین ڈاکٹر عمران ادریس، سی ای او ڈاکٹر جاوید، ایم ایس ڈاکٹر منیم، ڈائریکٹر لائف سیونگ ونگ ڈاکٹر محمد ادریس، ایمرجنسی آفیسر عرفان یعقوب، تحصیل انچارج سیالکوٹ محمد رضا، کمیونٹی ونگ انچارج محمد وسیم، ڈپٹی ڈائریکٹر عدیل انجم، DDMC سیالکوٹ کیوان حسن، اور ریسکیو سکاؤٹس ہنزلہ شریک ہوئے۔

انجینئر نوید اقبال نے بتایا کہ اس معاہدے کے تحت ریسکیو 1122 اور عمران ادریس ہسپتال مل کر سکولز، کالجز کے طلبہ و طالبات اور کمیونٹی کو زندگی بچانے کی تربیت دیں گے تاکہ وہ ہنگامی حالات میں قیمتی جانیں بچا سکیں۔ ہسپتال انتظامیہ ریسکیو 1122 کو AED پیڈ فراہم کرے گی اور ریسکیورز کو American Heart Association کے تحت CPR کی تربیت بھی دی جائے گی۔

ڈاکٹر عمران ادریس نے کہا کہ ریسکیو 1122 ایک قابلِ تحسین ادارہ ہے جو دن رات عوام کی خدمت میں مصروف ہے۔ انہوں نے اسے فخر قرار دیتے ہوئے کہا کہ دونوں ادارے مل کر معاشرے میں جان بچانے کی تربیت کو فروغ دیں گے، جو ہر شہری کے لیے لازمی ہے۔ انہوں نے اپنے بھرپور تعاون کی یقین دہانی بھی کرائی۔

سیالکوٹ،باغی ٹی وی( سٹی رپورٹر مدثر رتو) وزیراعلیٰ پنجاب مریم نواز شریف نے کینال سٹی سیالکوٹ میں حلقہ پی پی 52 سمبڑیال کے رکن صوبائی اسمبلی چوہدری ارشد جاوید وڑائچ مرحوم کی رہائش گاہ کا دورہ کیا۔

مریم نواز شریف نے مرحوم کی بیٹیوں حنا ارشد وڑائچ اور زینا مصطفیٰ وڑائچ سے تعزیت کی اور چوہدری ارشد وڑائچ کے ایصالِ ثواب کے لیے فاتحہ خوانی کی۔ انہوں نے سوگوار خاندان کے لیے صبر جمیل کی دعا کی۔ مریم نواز نے کہا کہ چوہدری ارشد وڑائچ شرافت کی سیاست کا پیکر تھے، اور ان کی سیاسی و سماجی خدمات کو تادیر یاد رکھا جائے گا۔

اس موقع پر سینئر وزیر مریم اورنگزیب، دیگر صوبائی و قومی اسمبلی کے ممبران، اور چیف سیکرٹری بھی موجود تھے۔ دعا کی گئی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے۔ آمین۔

سیالکوٹ،باغی ٹی وی( بیوروچیف شاہد ریاض)سینئر صحافی مہر محمد مصطفیٰ کے والد انتقال کر گئے، نماز جنازہ میں مختلف شعبہ ہائے زندگی سے وابستہ افراد کی شرکت

پروفیشنل پرنٹ و الیکٹرانک میڈیا ایسوسی ایشن سیالکوٹ کے سرپرستِ اعلیٰ اور باغی ٹی وی کے نامہ نگار سینئرصحافی مہر محمد مصطفیٰ کے والد محترم طویل علالت کے بعد گزشتہ روز انتقال کر گئے۔ ان کی نماز جنازہ میں شہر بھر کی ممتاز شخصیات، صحافی برادری، وکلاء، سیاسی، سماجی اور رفاحی تنظیموں کے نمائندوں نے بڑی تعداد میں شرکت کی۔

نماز جنازہ کے موقع پر مرحوم کے لیے دعائے مغفرت اور لواحقین کے لیے صبر جمیل کی دعا کی گئی۔ اس موقع پر اہلِ علاقہ اور رفقاء نے مہر محمد مصطفیٰ سے اظہار تعزیت کرتے ہوئے ان کے والد کی دینی، اخلاقی و سماجی خدمات کو خراج عقیدت پیش کیا۔

سیالکوٹ (باغی ٹی وی، بیوروچیف شاہد ریاض)گورنمنٹ کالج ویمن یونیورسٹی سیالکوٹ میں شاعر مشرق علامہ محمد اقبال کے یوم وفات کے موقع پر "عصرِ حاضر میں اُمتِ مسلمہ کے مسائل اور فکرِ اقبال” کے عنوان سے ایک فکری و ادبی سیمینار کا انعقاد کیا گیا۔ اس تقریب کا اہتمام اقبال چئیر، ڈائریکٹوریٹ آف سٹوڈنٹس افیئرز، اوورِک اور شعبہ اردو کے باہمی تعاون سے کیا گیا۔

تقریب کا آغاز تلاوتِ کلامِ اقبال سے ہوا، جس کے بعد طالبات کے مابین بیت بازی کے مقابلے میں علامہ اقبال کے افکار کو اجاگر کیا گیا۔ نمایاں کارکردگی دکھانے والی ٹیموں کو نقد انعامات اور دیگر طالبات کو تعریفی اسناد دی گئیں۔

مہمانِ خصوصی پروفیسر رانا اعجاز حسین نے خطاب میں کہا کہ فکرِ اقبال آج بھی امتِ مسلمہ کے لیے مشعلِ راہ ہے اور نوجوانوں کو علم، کردار اور اتحاد کا پیغام دیتی ہے۔ وائس چانسلر پروفیسر ڈاکٹر شازیہ بشیر نے سیمینار سے خطاب میں اقبال کے افکار کو نوجوان نسل کے لیے مکمل ضابطہ حیات قرار دیا اور اقبال سینٹر آف ایکسیلینس اور سیرت سینٹر آف ایکسیلینس کے قیام کی منظوری کا اعلان کیا تاکہ طالبات علامہ اقبال اور سیرت النبی ﷺ پر تحقیق کر سکیں۔

صدر شعبہ اردو ڈاکٹر افضال بٹ نے انتظامیہ، مہمانانِ گرامی اور منتظمین کا شکریہ ادا کیا، جبکہ ڈاکٹر رفعت چوہدری، پروفیسر عذرہ سبطین، ڈاکٹر فرح دیبا اور اسد اعجاز نے بھی سیمینار میں شرکت کی اور اقبال سنٹر آف ایکسیلینس کے قیام کے لیے عطیات دیے۔

سیمینار کا اختتام مہمانانِ گرامی کو اعزازی شیلڈز اور کامیاب طالبات میں سرٹیفکیٹس کی تقسیم کے ساتھ ہوا۔ اس فکری نشست کو طالبات کی علمی، فکری اور قومی تربیت کی جانب اہم قدم قرار دیا گیا۔

سیالکوٹ,باغی ٹی وی(بیوروچیف شاہد ریاض)ڈپٹی کمشنر سیالکوٹ سید حسن رضا نے تحصیل سمبڑیال کا تفصیلی دورہ کرتے ہوئے مختلف علاقوں میں صفائی، گرین بیلٹس، تجاوزات اور صحت کی سہولیات کے حوالے سے انتظامات کا جائزہ لیا۔ ان کے ہمراہ اسسٹنٹ کمشنر غلام فاطمہ بندیال اور چیف آفیسر ضلع کونسل فیصل شہزاد بھی موجود تھے۔

ڈپٹی کمشنر نے گرین بیلٹس کو خوبصورت بنانے اور جہاں پودے خشک ہو چکے ہیں وہاں فوری نئے پودے لگانے کی ہدایت کی۔ انہوں نے تحصیل انتظامیہ کو سڑکوں کے اطراف سے تمام غیر ضروری بینرز اور سٹریمرز فوری طور پر ہٹانے کے احکامات دیے اور واضح کیا کہ تجاوزات کے خلاف زیرو ٹالیرینس کی پالیسی پر سختی سے عملدرآمد کیا جائے گا۔

انہوں نے صفائی کے حوالے سے سیالکوٹ سالڈ ویسٹ مینجمنٹ کمپنی کو عملے کی مکمل متحرکیت، بروقت کوڑا کرکٹ اٹھانے اور گلیوں و سڑکوں کی صفائی یقینی بنانے کی ہدایت کی۔ ستھرا پنجاب پروگرام کے تحت صفائی کے معیار میں مزید بہتری لانے پر زور دیا۔

ڈپٹی کمشنر نے ایکسین ہائی ویز کو بھی ہدایت کی کہ سڑکوں کے شولڈرز کو مضبوط اور پختہ کیا جائے تاکہ سڑکوں کی پائیداری بڑھے اور ٹریفک کی روانی متاثر نہ ہو۔ انہوں نے واضح کیا کہ تعمیراتی معیار پر کسی قسم کا سمجھوتہ ہرگز برداشت نہیں کیا جائے گا۔

بعد ازاں، سید حسن رضا نے تحصیل ہیڈ کوارٹر ہسپتال سمبڑیال کا اچانک دورہ کیا، جہاں انہوں نے ڈیوٹی روسٹر کے مطابق عملے کی حاضری چیک کی، ایمرجنسی اور دیگر طبی سہولیات کا جائزہ لیا، اور مریضوں کی عیادت کی۔ انہوں نے زیر علاج افراد سے طبی سہولیات، عملے کے رویے اور مفت ادویات کی فراہمی سے متعلق معلومات حاصل کیں۔

ڈپٹی کمشنر نے کہا کہ ضلعی انتظامیہ عوامی سہولیات کی بہتری اور تجاوزات و آلودگی کے خاتمے کے لیے بھرپور اقدامات کر رہی ہے، اور کسی قسم کی غفلت یا کوتاہی ہرگز برداشت نہیں کی جائے گی۔

ڈسکہ,باغی ٹی وی(نامہ نگارعمران ملک) انجمن خدمت خلق رجسٹرڈ ڈسکہ کا 753واں ماہانہ اجلاس اور ڈینگی آگاہی سیمینار زیر صدارت صدر میاں سعید احمد صراف مدرسہ جامع عزیزیہ وڈالہ روڈ پر منعقد ہوا۔ اجلاس کا آغاز تلاوتِ قرآن پاک سے ہوا جس کی سعادت حافظ عبدالغفار نے حاصل کی جبکہ نعت رسول مقبول ﷺ انوار احمد سیال نے پیش کی۔

جائنٹ سیکرٹری ضرار احمد خاں نے فروری 2025 کے اجلاس کی کارروائی پیش کی جسے متفقہ طور پر منظور کر لیا گیا۔ فنانس سیکرٹری انوار احمد سیال نے ماہ فروری کی آمدن و اخراجات کی تفصیلات پیش کیں، جنہیں بعد از بحث منظور کر لیا گیا۔ سیکرٹری نشرو اشاعت سہیل سلمان ٹھروہی نے گزشتہ اجلاس کی شائع شدہ خبریں پیش کیں۔

اجلاس میں ڈینگی سے بچاؤ کے لیے مؤثر اقدامات پر زور دیا گیا اور انتظامیہ سے اپیل کی گئی کہ ڈسکہ شہر میں فوری سپرے کروایا جائے تاکہ بڑھتی ہوئی گرمی میں مچھروں خصوصاً ڈینگی کے پھیلاؤ کو روکا جا سکے۔ سیمینار کے بعد ڈینگی آگاہی واک کا بھی اہتمام کیا گیا۔

تجاوزات کے خلاف جاری آپریشن پر گفتگو کرتے ہوئے ممبران نے مطالبہ کیا کہ اسے جلد مکمل کیا جائے تاکہ دکاندار دوبارہ اپنا کاروبار بحال کر سکیں۔ رمضان المبارک میں ادارے کے لیے کامیاب فنڈ ریزنگ پر صدر نے تمام ممبران کو مبارکباد دی۔

اجلاس کے اختتام پر جنرل سیکرٹری محمد انور مغل کے بھتیجے اور نائب صدر حبیب الرحمان مغل کے چچازاد بھائی کے انتقال پر دعائے مغفرت کی گئی۔ دعا اور تواضع کے بعد اجلاس اختتام پذیر ہوا۔