Category: سیالکوٹ

ڈسکہ ، باغی ٹی وی(نامہ نگار ملک عمران کی رپورٹ )رمضان المبارک میں مہنگائی کو کنٹرول کرنے کے حکومتی دعوے صرف دعوے ہی ثابت ہو رہے ہیں۔ رمضان کا دوسرا عشرہ شروع ہو چکا ہے، لیکن مہنگائی کم ہونے کے بجائے مزید بڑھ رہی ہے اور گراں فروشی عروج پر ہے۔

حکومتی دعووں کے باوجود، رمضان کے آغاز سے ہی ملک بھر میں اشیاء خورونوش کی قیمتوں میں ہوشربا اضافہ دیکھنے میں آ رہا ہے۔ گوشت، سبزیوں، پھلوں اور روزمرہ استعمال کی دیگر اشیاء کی قیمتیں اب بھی آسمان سے باتیں کر رہی ہیں، جس کی وجہ سے شہری شدید مشکلات کا شکار ہیں۔

مارکیٹ سروے کے مطابق، رمضان سے پہلے جو اشیاء عام نرخوں پر دستیاب تھیں، وہ اب بھی دوگنی قیمت پر فروخت ہو رہی ہیں۔ آٹا، چینی، گھی، دودھ اور دیگر بنیادی ضروریات کی اشیاء کی قیمتوں میں 20 سے 50 فیصد تک اضافہ ہو چکا ہے۔ پھلوں اور سبزیوں کی قیمتیں بھی غریب آدمی کی پہنچ سے دور ہوتی جا رہی ہیں۔

شہریوں کا کہنا ہے کہ رمضان میں مہنگائی کنٹرول کرنے کے دعوے صرف دعوے ہی ثابت ہو رہے ہیں۔ حکومت کو فوری طور پر مہنگائی کو کنٹرول کرنے کے لیے اقدامات کرنے چاہئیں۔

سیالکوٹ،باغی ٹی وی(بیوروچیف شاہد ریاض) الخدمت فاؤنڈیشن ضلع سیالکوٹ اور نون کیش اینڈ کیری کے تعاون سے 300 سے زائد یتیم بچوں کو عید کی خریداری کروائی گئی۔ اس موقع پر صدر الخدمت فاؤنڈیشن ضلع سیالکوٹ خواجہ مسعود اختر (ستارہ امتیاز، ہلال امتیاز)، سی ای او نیو ویز انڈسٹریز طلال امجد پوری سمیت دیگر معزز شخصیات نے شرکت کی۔

الخدمت فاؤنڈیشن اور نون کیش اینڈ کیری کی جانب سے یہ اقدام یتیم بچوں کو عید کی خوشیوں میں شامل کرنے کے لیے کیا گیا۔ بچوں نے اپنی پسند کے کپڑے، جوتے اور دیگر اشیاء خریدیں۔

اس موقع پر الخدمت فاؤنڈیشن کے صدر خواجہ مسعود اختر نے کہا کہ یتیم بچوں کی مدد کرنا ایک نیک کام ہے اور الخدمت فاؤنڈیشن ہمیشہ ایسے کاموں میں پیش پیش رہتی ہے۔ انہوں نے نون کیش اینڈ کیری کا بھی شکریہ ادا کیا جنہوں نے اس نیک کام میں ان کا ساتھ دیا۔

سیالکوٹ،باغی ٹی وی(سٹی رپورٹر مدثر رتو) سیالکوٹ کے نجی تعلیمی ادارے حسین پورہ (ای ایل سی) حسنات کیمپس میں ناموس رسالت ﷺ منایا گیا، جس کا باقاعدہ آغاز تلاوت کلام مجید سے ہوا۔ بچوں نے نعت رسول مقبول ﷺ اور تقاریر بھی پیش کیں۔ پروگرام میں حصہ لینے والے طلباء و طالبات کو انعامات بھی تقسیم کیے گئے۔

(ای ایل سی) حسنات کیمپس کے ڈائریکٹر محسن سردار نے طلباء کو بتایا کہ ناموس رسالت ﷺ منانے کا مقصد یہ ہے کہ حرمت رسول ﷺ پر کوئی سمجھوتہ قابل قبول نہیں۔ حکومت پاکستان کی جانب سے آج ملک بھر میں "یوم تحفظ ناموس رسالت ﷺ” منایا جا رہا ہے، لیکن کیا اس ملک میں 295c کے قانون پر عملدرآمد ہو رہا ہے؟ جن مجرموں کو سزائیں ہو چکی ہیں، کیا ان کی سزاؤں پر عملدرآمد ہو چکا ہے؟ سوشل میڈیا پر سوچی سمجھی سازش کے تحت ہونے والی توہین کو کس طرح روکا جائے گا؟

انہوں نے کہا کہ گزشتہ کچھ عرصے میں اسلام دشمن قوتوں نے ایک بار پھر توہین رسالت ﷺ کے ناپاک عزائم کو عملی جامہ پہنانے کی کوشش کی ہے۔ یورپ اور دیگر مغربی ممالک میں گستاخانہ خاکوں کی اشاعت، اسلام مخالف قوانین، اور سوشل میڈیا پر توہین آمیز مہمات جیسے گھناؤنے اقدامات مسلمانوں کے جذبات کو شدید ٹھیس پہنچا رہے ہیں۔ اس کے علاوہ، بھارت، فرانس، نیدرلینڈز، ڈنمارک اور دیگر کئی ممالک میں سرکاری سرپرستی میں اسلاموفوبیا اور توہین رسالت ﷺ کو فروغ دیا جا رہا ہے۔ گستاخی کے یہ واقعات مسلمانوں کے عقائد پر براہ راست حملہ ہیں، جو ناقابل برداشت ہیں۔ ہم نبی کریم ﷺ کی حرمت پر کسی بھی قسم کی گستاخی برداشت نہیں کر سکتے۔ حکومت پاکستان کو اس مقدس مشن کے لیے ہر ممکن اقدام اٹھانے چاہئیں۔ کیا ان ممالک سے ان عوامل کو روکنے کی بات کی گئی ہے؟؟

سر زیشان نے اپنے خطاب میں کہا کہ ہم پوری دنیا کو واضح پیغام دیتے ہیں کہ ناموس رسالت ﷺ ہماری ریڈ لائن ہے اور ہم نے اس مقدس مشن کے لیے پہلے بھی شہادتیں/قربانیاں دی ہیں اور آئندہ بھی اس کے لیے تیار ہیں۔ پاکستان میں قانون ناموس رسالت ﷺ پر سختی سے عمل درآمد کو یقینی بنایا جائے اور کسی بھی قسم کی نرمی نہ برتی جائے۔ ہماری ہر سانس، ہر لمحہ، ہر دن ناموس رسالت ﷺ کے تحفظ کے لیے وقف ہے اور ان شاءاللہ تا صبح قیامت ناموس رسالت ﷺ پر پہرہ جاری رہے گا اور ختم نبوت ﷺ کا دفاع کرتے رہیں گے۔

سیالکوٹ،باغی ٹی وی(بیوروچیف شاہد ریاض): ڈپٹی کمشنر محمد ذوالقرنین لنگڑیال نے سہولت رمضان بازار کا تفصیلی دورہ کیا اور سہولت بازار میں چینی، چکن، آلو، پیاز، ٹماٹر اور آٹا سمیت دیگر اسٹالز پر اشیاء خوردونوش کی قیمتوں اور معیار کا جائزہ لیا۔

ڈپٹی کمشنر نے سینئر شہریوں کے لیے مختص ویٹنگ ایریا کا بھی معائنہ کیا جہاں پر بزرگ شہری بیٹھ کر کریانہ، سبزی، فروٹ اور ڈیری مصنوعات بغیر کسی اضافی قیمت کے خرید سکتے ہیں۔ انہوں نے کہا کہ سہولت بازار میں بائیک موجود ہے جو شہریوں کے گھروں میں سامان ضروریہ بغیر کسی اجرت کے ڈیلیور کر رہی ہے۔

سیکرٹری مارکیٹ کمیٹی عبداللہ ملک نے بتایا کہ محکمہ لائیو سٹاک کے تعاون سے سہولت بازار میں چکن 25 روپے فی کلوگرام ارزاں نرخوں پر دستیاب ہے جبکہ چینی 130 فی کلوگرام کے حساب سے صارفین کو فراہم کی جا رہی ہے۔

سیالکوٹ،باغی ٹی وی(بیوروچیف شاہد ریاض) رکن صوبائی اسمبلی محمد منشاء اللہ بٹ نے کہا ہے کہ وزیر اعلیٰ پنجاب مریم نواز شریف کی محنت رنگ لا رہی ہے۔ صرف ایک سالہ دور حکومت میں پنجاب کی عوام کی خدمت کے ایسے بے مثال منصوبوں کا کامیابی سے آغاز کیا گیا ہے جن کی ماضی میں کوئی مثال نہیں ملتی۔ کارکردگی کے اعتبار سے وزیر اعلیٰ پنجاب دوسرے صوبوں کے وزرائے اعلیٰ سے کئی گنا آگے نکل چکی ہیں۔ مریم نواز کی حکومت کی مقبولیت اور کامیابی کی واحد وجہ میاں محمد نواز شریف کا ویژن ہے جس کی تکمیل کے لیے سی اہم پنجاب دن رات کوشاں ہیں۔

ان خیالات کا اظہار انہوں نے اپنے حلقہ انتخاب ماڈل ٹاؤن، گنجیانوالی اور کیپٹل روڈ پر جاری ترقیاتی منصوبوں کا جائزہ لینے کے دوران کیا۔ محمد منشاء اللہ بٹ نے کہا کہ نامساعد حالات میں حکومت سنبھالنے کے باوجود مریم نواز نے اسٹیشن ایبل ڈویلپمنٹ گولز پروگرام کا اجراء کیا جس کی بدولت حلقہ میں ترقیاتی دور کا آغاز وہیں سے ہو رہا ہے جہاں 2018 میں میاں شہباز شریف کی حکومت نے چھوڑا تھا۔

محمد منشاء اللہ بٹ نے کہا کہ مسلم لیگ ن کو جب بھی حکومت کا موقع ملا تو ان کے دور میں ملک نے ترقی کی۔ انہوں نے کہا کہ مسلم لیگ ن کی سیاست کا مرکز استحکام پاکستان اور یہاں بسنے والے عوام کو معیاری میونسپل سروسز کی فراہمی ہے اور ان کو ایسا ماحول فراہم کرنا ہے جس میں انہیں آگے بڑھنے کے مساوی مواقع میسر ہوں۔ انہوں نے قبرستان شہیداں کیپٹل روڈ کی زیر تعمیر دیوار کے منصوبے کو جلد مکمل کرنے کی ہدایت کی۔

سیالکوٹ،باغی ٹی وی(بیوروچیف شاہد ریاض) وزیر اعظم پاکستان میاں محمد شہباز شریف کی خصوصی ہدایت پر، سینیٹر کیپٹن شاہین خالد بٹ، منیجنگ ڈائریکٹر پاکستان بیت المال کی قیادت میں، پاکستان بیت المال کی جانب سے ملک بھر کی طرح ضلع سیالکوٹ میں بھی افطار کا اہتمام کیا جا رہا ہے۔

سیالکوٹ میں اس نیک کام کی نگرانی اسسٹنٹ ڈائریکٹر سیالکوٹ اظہر فاروق کر رہے ہیں۔ پاکستان بیت المال کے زیر اہتمام عدالت گڑھا سیالکوٹ میں قائم سکول برائے بحالی مزدور اطفال (SRCL نمبر 2) میں روزانہ افطار کا عمل ٹیچر انچارج مس ثمینہ کوثر کی نگرانی میں جاری ہے۔ یہاں ہر روز 150 افراد میں افطاری کے ڈبے تقسیم کیے جا رہے ہیں۔ ان ڈبوں میں چنا چاول پلاؤ، تین کھجوریں اور دو عدد پکوڑے شامل ہوتے ہیں۔

غریب اور مستحق افراد میں افطاری کے ڈبے تقسیم کرنے کا یہ سلسلہ یکم رمضان سے شروع ہے اور ستائیس رمضان المبارک تک جاری رہے گا۔ روزانہ افطاری سے استفادہ کرنے والے افراد نے وزیر اعظم پاکستان میاں محمد شہباز شریف اور منیجنگ ڈائریکٹر پاکستان بیت المال سینیٹر کیپٹن شاہین خالد بٹ کی طرف سے افطاری کروانے پر ان کا دلی طور پر شکریہ ادا کیا ہے۔