Category: سیالکوٹ

سیالکوٹ ، باغی ٹی وی(بیوروچیف شاہد ریاض)شہداء پولیس کو خراج تحسین پیش کرنے کیلئے پروقار تقریب کا انعقاد،فیملیز میں گولڈ میڈل تقسیم

وزیر اعلی پنجاب اور آئی جی پنجاب ڈاکٹر عثمان انور کی ہدایت پر ڈی پی او سیالکوٹ فیصل شہزاد کی سربراہی میں شہداء سیالکوٹ پولیس کو خراج تحسین پیش کرنے کیلئے پروقار تقریب کا انعقاد کیا گیا۔تقریب میں شہداء کی فیملیز نے شرکت کی۔فیملیز کیلئے افطار ڈنر کا اہتمام کیا گیا۔اور شہداء کی قربانیوں کو سراہتے ہوئے فیملیز میں گولڈ میڈل اور تحائف تقسیم کیے گئے۔

اس موقع پر ڈی پی او سیالکوٹ فیصل شہزاد نے اپنے خیالات کا اظہار کرتے ہو ئے کہا کہ شہداء ہمارے ماتھے کا جھومر ہیں اور محکمہ پولیس کا فخر ہیں۔ ہم ملک و قوم کی خاطر اپنی جانوں کا نذرانہ پیش کرنے والے شہداء کو سلام پیش کرتے ہیں، شہداء کی فیملیز ہماری اپنی فیملیز ہیں انہیں کبھی بھی تنہا نہیں چھوڑ سکتے ہیں۔

سیالکوٹ،باغی ٹی وی( بیوروچیف شاہد ریاض)پسرور میں ڈمپروں اور ٹریکٹر ٹرالیوں کے دن کے اوقات میں داخلے کے باعث ٹریفک کا نظام درہم برہم ہو گیا۔ کچہری روڈ اور ڈسکہ روڈ پر بے ہنگم ٹریفک کے باعث شہریوں کو شدید مشکلات کا سامنا ہے، جبکہ ٹریفک وارڈن پولیس غائب نظر آتی ہے۔

کچہری سے چاہ کھوکھراں تک گاڑیوں کی لمبی قطاریں لگی رہتی ہیں، جبکہ شہر بھر میں ڈمپروں کی بھرمار سے ٹریفک جام معمول بن چکا ہے۔ ٹمبر مارکیٹ، پرانا اڈہ لاریاں، ڈسکہ چوک سمیت مختلف مقامات پر بدترین ٹریفک جام دیکھنے میں آیا، جبکہ ٹریفک وارڈن پولیس کی عدم موجودگی شہریوں کے لیے مزید پریشانی کا باعث بنی۔

شہریوں نے ڈی ایس پی سمیت اعلیٰ حکام سے مطالبہ کیا ہے کہ فوری طور پر ٹریفک بحال کی جائے اور دن کے اوقات میں ڈمپروں کو شہر میں داخل ہونے سے روکا جائے۔

عوام کا مزید کہنا ہے کہ کچہری چوک، ڈسکہ موڑ، ستراہ چوک، امن چوک، غلہ منڈی چوک اور شاہ ببن گیٹ سمیت دیگر اہم مقامات پر ٹریفک وارڈنز کو تعینات کیا جائے تاکہ ٹریفک کی روانی متاثر نہ ہو۔

سیالکوٹ ،باغی ٹی وی(بیوروچیف شاہد ریاض) سکول داخلہ مہم 2025 کا آغاز، ایک لاکھ 13 ہزار بچوں کے داخلے کا ہدف مقرر

ڈپٹی کمشنر سیالکوٹ محمد ذوالقرنین لنگڑیال نے گورنمنٹ جامع ہائی سکول میں سکول داخلہ مہم 2025 کا افتتاح کر دیا۔ اس موقع پر بچوں کے نام رجسٹرڈ کیے گئے، بستے اور کتابیں تقسیم کی گئیں۔

افتتاحی تقریب سے خطاب میں ڈپٹی کمشنر نے کہا کہ ضلع سیالکوٹ میں ایک لاکھ 13 ہزار بچوں کے داخلے کا ہدف مقرر کیا گیا ہے۔ انہوں نے اساتذہ پر زور دیا کہ سکول سے باہر بچوں کو نہ صرف سکول لائیں بلکہ ان کی شخصیت سازی پر بھی خصوصی توجہ دیں تاکہ وہ تعلیمی میدان میں کامیابی حاصل کر سکیں۔

چیف ایگزیکٹو آفیسر ڈسٹرکٹ ایجوکیشن اتھارٹی سیالکوٹ مجاہد حسین علوی، ڈی ای او سیکنڈری ایجوکیشن محمد نواز شاہین اور ڈی ای او ایلیمنٹری ایجوکیشن محمد احمد ججہ نے بھی خطاب کیا۔ ان کا کہنا تھا کہ وزیر اعلیٰ پنجاب مریم نواز شریف کی ہدایت پر تعلیم کے فروغ کے لیے تمام وسائل فراہم کیے جا رہے ہیں۔

سی ای او ایجوکیشن نے کہا کہ نئے تعلیمی سال میں داخلوں پر کوئی پابندی نہیں، والدین جب چاہیں بچوں کا داخلہ کروا سکتے ہیں۔ اس موقع پر پرائمری سکولوں کے بچوں نے تعلیم کی اہمیت اجاگر کرنے کے لیے ٹیبلو پیش کیا اور ملی نغموں پر پرفارم کیا۔

سیالکوٹ، باغی ٹی وی(بیوروچیف شاہدریاض)انجمن مغلیہ کا بڑا اقدام، ذہین اور مستحق طلبہ کے لیے مغل اسکالرشپ فنڈ قائم

چیئرمین ایئر سیال فضل جیلانی نے اعلان کیا ہے کہ انجمن مغلیہ سیالکوٹ نے مغل جنرل اسپتال میں جدید طبی سہولیات کی کامیابی کے بعد، اب ذہین اور مستحق طلبہ و طالبات کے لیے "مغل اسکالرشپ فنڈ” قائم کرنے کا فیصلہ کیا ہے۔

انہوں نے ان خیالات کا اظہار انجمن مغلیہ سیالکوٹ کے سالانہ عشائیہ میں بطور صدرِ تقریب کیا۔ اس موقع پر صدر سیالکوٹ ایوان صنعت و تجارت اکرام الحق، نائب صدر عمر خالد، سرپرستِ اعلیٰ انجمن مغلیہ مبشر واحد، سیٹھ محمد یونس اور گورنمنٹ مرے کالج سیالکوٹ کے پرنسپل پروفیسر ڈاکٹر محمد نواز مرزا سمیت معززین شہر کی بڑی تعداد موجود تھی۔

فضل جیلانی نے کہا کہ انجمن مغلیہ سیالکوٹ بانی پاکستان قائداعظم کے ساتھی خان بہادر مرزا محمد دین کی تحریک سے وجود میں آئی اور آج بھی دُکھی انسانیت کی خدمت میں پیش پیش ہے۔ مخیر حضرات کے تعاون سے نہ صرف طبی سہولیات فراہم کی جا رہی ہیں بلکہ اب تعلیم کے میدان میں بھی مدد کا آغاز کر دیا گیا ہے۔

اس موقع پر سرپرستِ اعلیٰ انجمن مغلیہ مبشر واحد نے 50 لاکھ، سیٹھ محمد یونس نے 20 لاکھ اور صدر سیالکوٹ چیمبر اکرام الحق نے 3 لاکھ روپے عطیہ دینے کا اعلان کیا۔ دیگر عہدیداران شاہد افضل کھوکھر اور حسیب احمد بھٹی نے بھی فنڈ میں بھرپور تعاون کا یقین دلایا۔

تقریب میں انجمن مغلیہ کے فلاحی منصوبوں کے لیے مجموعی طور پر 5 کروڑ روپے کے عطیات دینے کا اعلان کیا گیا، جس پر صدر فضل جیلانی اور دیگر عہدیداران نے مخیر حضرات کا شکریہ ادا کیا۔

سیالکوٹ (باغی ٹی وی،سٹی رپورٹرمدثررتو) ای ایل سی کڈز کلب حسنات کیمپس کے ڈائریکٹر محسن سردار نے رمضان المبارک کی اہمیت بیان کرتے ہوئے کہا کہ یہ اللہ کی عظیم نعمت ہے، جس میں عبادات اور نیکیوں کا اجر کئی گنا بڑھا دیا جاتا ہے۔ انہوں نے کہا کہ رمضان میں شیطان کو قید کر دیا جاتا ہے تاکہ مسلمان زیادہ سے زیادہ عبادت کر سکیں اور اپنے گناہوں کی معافی حاصل کریں۔ ہمیں قرآن کی تلاوت کے ساتھ اس کا ترجمہ پڑھنے اور سیکھنے پر بھی توجہ دینی چاہیے۔

محسن سردار نے تاجر برادری سے اپیل کی کہ وہ روزہ داروں کو ریلیف فراہم کریں تاکہ اللہ کی خوشنودی حاصل کر سکیں۔

معروف قانون دان شاہد اقبال وریاہ ایڈووکیٹ نے بھی رمضان المبارک کی فضیلت پر روشنی ڈالتے ہوئے کہا کہ یہ اللہ تعالیٰ کی بڑی نعمت ہے، جس میں رحمتوں کی بارش ہوتی ہے۔ انہوں نے کہا کہ رمضان کی عظمت کا اندازہ اس بات سے لگایا جا سکتا ہے کہ قرآن مقدس اسی مہینے میں نازل ہوا۔ مسلمانوں کو اس مبارک مہینے میں عبادت کا خصوصی اہتمام کرنا چاہیے اور کوئی لمحہ ضائع نہیں کرنا چاہیے۔

سیالکوٹ (باغی ٹی وی بیوروچیف شاہد ریاض)پاکستان میں تعینات آسٹریلین ہائی کمشنر نیل ہاکنز نے وفد کے ہمراہ سیالکوٹ چیمبر آف کامرس اینڈ انڈسٹری کا دورہ کیا، جہاں انہوں نے صدر چیمبر اکرام الحق، نائب صدر عمر خالد اور دیگر ممبران سے ملاقات کی۔

ملاقات کے دوران دونوں ممالک کے درمیان تجارتی تعلقات کو مزید مستحکم بنانے، سرمایہ کاری کے مواقع تلاش کرنے اور سیالکوٹ کی برآمدی صنعت کو آسٹریلوی مارکیٹ میں فروغ دینے پر تفصیلی تبادلہ خیال کیا گیا۔ معروف صنعتکار خواجہ عابد اور سابق صدر سیالکوٹ چیمبر ماجد رضا بھٹہ نے اس موقع پر کہا کہ آسٹریلیا میں پاکستانی سپورٹس گڈز، کرکٹ گیئر، ساکر بال، ہارڈبال اور بیس بال کی مانگ میں اضافہ ہورہا ہے، جس سے ملکی برآمدات کو فروغ دیا جا سکتا ہے۔

صدر چیمبر اکرام الحق اور نائب صدر عمر خالد نے آسٹریلین ہائی کمشنر کو سیالکوٹ میں تیار کردہ مصنوعات کا تحفہ پیش کیا۔

سیالکوٹ (باغی ٹی وی،بیوروچیف شاہدریاض) رکن صوبائی اسمبلی محمد منشاء اللہ بٹ اور چوہدری فیصل اکرام نے گورنمنٹ علامہ اقبال میموریل ٹیچنگ ہسپتال کا دورہ کیا، جہاں انہوں نے زیر علاج مریضوں کی عیادت کی اور انہیں فراہم کی جانے والی طبی سہولیات کے معیار کا جائزہ لیا۔

دورے کے دوران اراکین اسمبلی نے ہسپتال کے مختلف شعبہ جات کا معائنہ کیا اور مریضوں کو درپیش مسائل سے آگاہی حاصل کی۔ میڈیکل سپرنٹنڈنٹ سہیل انجم بٹ نے ہسپتال میں دستیاب طبی سہولیات، ایمرجنسی سروسز، او پی ڈی، ادویات کی فراہمی اور دیگر انتظامی امور کے حوالے سے بریفنگ دی۔

اس موقع پر رکن صوبائی اسمبلی محمد منشاء اللہ بٹ نے کہا کہ وزیر اعلیٰ پنجاب مریم نواز شریف کے ویژن کے مطابق مریضوں کو معیاری علاج معالجے کی فراہمی حکومت کی اولین ترجیح ہے اور اس سلسلے میں ہر ممکن اقدامات کیے جا رہے ہیں۔ انہوں نے کہا کہ ڈسٹرکٹ ہیڈ کوارٹر ہسپتال اپنی استعداد سے زیادہ مریضوں کا بوجھ برداشت کر رہا ہے، تاہم آئندہ چند روز میں گورنمنٹ سردار بیگم ٹیچنگ ہسپتال کی ری ویمپنگ مکمل ہونے کے بعد مریضوں کا دباؤ کم ہو جائے گا۔

انہوں نے مزید کہا کہ سیالکوٹ میں آبادی کے تناسب سے ایک بڑے جدید ہسپتال کی اشد ضرورت ہے، جس کے لیے وزیر اعلیٰ پنجاب سے درخواست کی جائے گی اور موزوں جگہ پر پراجیکٹ کی منظوری حاصل کی جائے گی۔ انہوں نے اس بات پر زور دیا کہ ڈی ایچ کیو ہسپتال کی ری ویمپنگ کے بعد اسے کسی جدید ہسپتال سے کم نہیں سمجھا جا سکتا، جہاں مریضوں کو بہترین طبی سہولیات فراہم کی جا رہی ہیں۔

دورے کے موقع پر خواجہ سلطان ٹیپو، رفیق مغل اور مہر حسنین بھی موجود تھے، جنہوں نے ہسپتال میں جاری ترقیاتی کاموں اور سہولیات کے حوالے سے اپنے تاثرات کا اظہار کیا۔

سیالکوٹ (باغی ٹی وی سٹی رپورٹر مدثر رتو) گلوبل پاک کشمیر سپریم کونسل کے چیئرمین راجہ سکندر خان نے انسانی سمگلنگ کو ایک اندوہناک اور گھناؤنا جرم قرار دیتے ہوئے اس کی روک تھام کے لیے فوری اور ٹھوس اقدامات اٹھانے کا مطالبہ کیا ہے۔ انہوں نے کہا کہ انسانی سمگلنگ کے باعث نہ صرف قیمتی جانیں ضائع ہوتی ہیں بلکہ ہر سال لاتعداد گھرانے بھی اجڑ جاتے ہیں۔

لندن میں منعقدہ "سٹاپ دی ہیومن ٹریفکنگ اینڈ ماڈرن ڈے سلیوری” سیمینار میں بطور مہمان خصوصی خطاب کرتے ہوئے راجہ سکندر خان نے انسانی سمگلروں کو ایک ظالم مافیا قرار دیا جو غریب عوام کو جھوٹے اور سنہرے خواب دکھا کر ان سے پیسے اینٹھتے ہیں۔ انہوں نے کہا کہ اس اربوں ڈالر کی تجارت کو روکنے کے لیے بین الاقوامی مجرموں کے خلاف متحد ہو کر طاقت، ہمت اور دانش پیدا کرنا ہوگی۔

راجہ سکندر خان نے انسانی سمگلنگ میں ملوث خواتین، مردوں اور بچوں سے جنسی تجارت، جبری مشقت اور دیگر مجرمانہ سرگرمیوں کی مذمت کرتے ہوئے سٹاپ دی ہیومن ٹریفکنگ ٹیم کے منتظمین ڈاکٹر شیخ رمزی، ڈاکٹر صف بخشی اور کیپٹن علی جاوید کی کاوشوں کو سراہا۔ انہوں نے کمیونٹی سے منتظمین کی بھرپور مالی اور اخلاقی مدد کرنے کی اپیل بھی کی۔

سیمینار میں ڈاکٹر شیخ رمزی، کیپٹن علی جاوید، سابق ایم پی کیتھ بیسٹ، مارٹن ویٹ مین، نکولا گیرنگٹن، ڈاکٹر فوٹینی گوڈیلا، ایس روزن، ہرمیت شاہ سنگھ، ریو ڈاکٹر سر سمانا سری اور ٹریسی کولمین سمیت مختلف شعبہ ہائے زندگی سے تعلق رکھنے والے افراد نے شرکت کی اور انسانی سمگلنگ کی روک تھام پر زور دیا۔

سیالکوٹ ،باغی ٹی وی(بیوروچیف شاہدریاض) ایڈیشنل ڈپٹی کمشنر جنرل ایوب بخاری نے کہا ہے کہ وزیر اعلیٰ پنجاب مریم نواز شریف کی ہدایت کے مطابق ماہ صیام میں اشیائے ضروریہ کی مقررہ نرخوں پر صارفین کو فراہمی ڈسٹرکٹ ایڈمنسٹریشن کی اولین ذمہ داری ہے۔ اس مقصد کے حصول کے لیے پرائس مجسٹریٹس کو مؤثر انداز میں گراں فروشوں کے خلاف کارروائی کرنے کی ہدایت کی گئی ہے، جبکہ اس ضمن میں پولیس اور قانون نافذ کرنے والے اداروں کی مدد بھی لی جائے گی۔ انہوں نے ان خیالات کا اظہار ڈسٹرکٹ پرائس کمیٹی برائے اشیائے خوردونوش کے ممبران کے اجلاس سے خطاب کرتے ہوئے کیا۔

اجلاس میں وائس چیئرمین ضلعی پرائس کنٹرول کمیٹی خالد بٹ، سیکرٹری/ ڈی او انڈسٹریز تنویر احمد، ممبران ملک تاج، اشفاق نذر گھمن، عقیل کپور، حافظ نصیر، سیکرٹری مارکیٹ کمیٹی، لائیو اسٹاک اور فوڈ کنٹرولر کے مقامی حکام نے شرکت کی۔

ایڈیشنل ڈپٹی کمشنر جنرل ایوب بخاری نے کہا کہ رمضان المبارک کے دوران تاجر برادری اپنے منافع کی شرح کو کم سے کم رکھیں اور گراں فروشی سے گریز کریں۔ انہوں نے ہدایت کی کہ پرائس لسٹ کو دکانوں پر نمایاں جگہ پر آویزاں کیا جائے تاکہ صارفین آسانی سے قیمتوں سے آگاہ ہو سکیں۔ مزید برآں، پرائس مجسٹریٹس مارکیٹ میں اشیائے خوردونوش کی طلب و رسد پر نظر رکھیں گے اور ذخیرہ اندوزوں و مصنوعی قلت پیدا کرنے والے عناصر کے خلاف سخت کارروائی عمل میں لائی جائے گی۔

سیالکوٹ،باغی ٹی وی(بیوروچیف شاہدریاض) ڈپٹی کمشنر و کنٹرولر جنرل پرائسز سیالکوٹ، محمد ذوالقرنین لنگڑیال نے اشیائے خوردونوش کی نئی سرکاری قیمتوں کی فہرست جاری کر دی۔ نوٹیفکیشن کے مطابق، ضلع سیالکوٹ کی حدود میں مختلف اشیاء کی قیمتیں مقرر کر دی گئی ہیں تاکہ صارفین کو ریلیف فراہم کیا جا سکے۔

نوٹیفکیشن کے مطابق 20 کلوگرام وزنی تھیلا 1720 روپے جبکہ 10 کلوگرام وزنی تھیلا 855 روپے میں فروخت کیا جائے گا۔ چاول سپر باسمتی نیا 245 روپے فی کلو گرام، دال چنا موٹی 275 روپے فی کلو گرام، دال چنا باریک 260 روپے فی کلو گرام، دال مسور موٹی 275 روپے فی کلو گرام، دال ماش دھلی ہوئی 420 روپے فی کلو گرام، دال ماش بغیر دھلی ہوئی 385 روپے فی کلو گرام، کالے چنے موٹے 265 روپے فی کلو گرام، سفید چنے (5-6 ایم ایم سائز) 250 روپے فی کلو گرام جبکہ بیسن 300 روپے فی کلو گرام میں دستیاب ہوگا۔

فی تندوری روٹی (100 گرام وزنی) 14 روپے، مٹن 1800 روپے فی کلو گرام اور بیف 900 روپے فی کلو گرام میں فروخت کیا جائے گا۔ کھلا دودھ 170 روپے فی لیٹر جبکہ دہی 180 روپے فی کلو گرام میں فروخت کرنے کی ہدایت کی گئی ہے۔ بناسپتی گھی (پیکٹ/کھلا) اور چینی کی قیمتیں سرکاری پالیسی کے مطابق مقرر کی جائیں گی۔ برائلر، انڈے، سبزیوں اور پھلوں کی قیمتیں روزانہ کی بنیاد پر متعلقہ مارکیٹ کمیٹی کے نرخ نامہ کے مطابق ہوں گی۔

ڈپٹی کمشنر سیالکوٹ نے تمام دکانداروں کو سختی سے ہدایت کی ہے کہ وہ سرکاری نرخوں پر عمل کریں۔ کسی بھی قسم کی گراں فروشی یا زائد قیمت وصول کرنے کی صورت میں سخت قانونی کارروائی عمل میں لائی جائے گی۔ شہریوں کو بھی ہدایت دی گئی ہے کہ وہ مقررہ قیمتوں پر عمل درآمد نہ ہونے کی صورت میں متعلقہ حکام کو شکایات درج کرائیں۔