Category: سیالکوٹ

سیالکوٹ (باغی ٹی وی، ڈسٹرکٹ رپورٹر مدثر رتو)سابق امیدوار قومی اسمبلی اور معروف سماجی رہنما چوہدری آصف علی باجوہ نے بھاگووال میں زیرِ تعمیر اکاش کمرشل سینٹر کا دورہ کیا اور جاری کام کا تفصیلی جائزہ لیا۔ انہوں نے تعمیراتی ٹیم کو ہدایت کی کہ معیار کو مزید بہتر بنایا جائے اور منصوبے کو مقررہ مدت کے اندر مکمل کیا جائے۔

چوہدری آصف علی باجوہ نے گفتگو کرتے ہوئے کہا کہ اکاش کمرشل سینٹر کی تکمیل سے علاقے میں تجارتی سرگرمیوں کو فروغ ملے گا اور مقامی افراد کے لیے روزگار کے نئے مواقع پیدا ہوں گے۔ ان کا کہنا تھا کہ جدید طرز پر تعمیر ہونے والا یہ منصوبہ مستقبل میں بھاگووال کی شناخت ثابت ہوگا۔

انہوں نے شفافیت، معیار اور بروقت تکمیل کو اپنی اولین ترجیحات قرار دیتے ہوئے کہا کہ تعمیراتی عمل طے شدہ معیار کے مطابق تیزی سے آگے بڑھ رہا ہے۔ انہوں نے مختلف بلاکس کا جائزہ لیا، حفاظتی انتظامات چیک کیے اور مزدوروں و انجینئرنگ اسٹاف کی محنت کو سراہا۔

دورے کے اختتام پر چوہدری آصف علی باجوہ نے امید ظاہر کی کہ منصوبے کی بروقت تکمیل سے مقامی معیشت کو تقویت ملے گی اور یہ کمرشل سینٹر تاجروں کے لیے ایک اہم کاروباری مرکز ثابت ہوگا۔

سیالکوٹ (باغی ٹی وی، مدثر رتو) سینٹر آف ایکسی لینس بوائز سیالکوٹ میں تین روزہ سالانہ اسپورٹس فیسٹیول 2025 کامیابی سے اختتام پذیر ہوا۔ تقریب میں ایگزیکٹو ڈسٹرکٹ آفیسر ایجوکیشن سیالکوٹ مجاہد علوی، بورڈ آف گورنرز کے ممبران، پرنسپل شہباز حسن اور گرلز کیمپس کی پرنسپل میڈم ارم شیرازی نے خصوصی شرکت کی۔ کھلاڑیوں کے مارچ پاسٹ نے شرکا کی توجہ کا مرکز بنا کر فیسٹیول کو یادگار بنا دیا۔

فیسٹیول میں کرکٹ، والی بال، فٹبال اور بیڈمنٹن کے مقابلے منعقد ہوئے جبکہ ایتھلیٹکس میں 100 میٹر، 200 میٹر، 400 میٹر دوڑ، رَسّہ کشی اور لانگ جمپ نے ماحول کو جوش و خروش سے بھر دیا۔ بہترین کھیل پیش کرنے والے کھلاڑیوں اور ٹیموں کو مہمانِ خصوصی نے ٹرافیاں اور میڈلز سے نوازا۔

سی ای او ایجوکیشن سیالکوٹ مجاہد علوی نے خطاب کرتے ہوئے کہا کہ کھیل محض تفریح کا ذریعہ نہیں بلکہ طلبہ کی شخصیت اور کردار سازی میں بنیادی کردار ادا کرتے ہیں۔ انہوں نے کہا کہ میدانِ کھیل بچوں کو ٹیم ورک، برداشت، محنت، خود اعتمادی اور مقابلہ بازی جیسے اوصاف سکھاتے ہیں، جو زندگی کے ہر شعبے میں کامیابی کی بنیاد بنتے ہیں۔

انہوں نے اسپورٹس فیسٹیول کے بہترین انتظامات پر سکول انتظامیہ کی کاوشوں کو سراہتے ہوئے کہا کہ ایسے پروگرام نصابی سرگرمیوں کے ساتھ طلبہ کی جسمانی اور ذہنی صحت کو بہتر بناتے ہیں۔ مجاہد علوی نے اعلان کیا کہ ضلعی سطح پر کھیلوں کے مواقع کو مزید وسیع کیا جائے گا اور کھیلوں کے فروغ کے لیے حکومتی سطح پر جامع حکمتِ عملی جاری ہے۔

آخر میں پرنسپل شہباز حسن نے تمام مہمانوں، اساتذہ، کھلاڑیوں اور آرگنائزنگ کمیٹی کا شکریہ ادا کرتے ہوئے کہا کہ اسپورٹس فیسٹیول جیسے ایونٹس طلبہ میں اعتماد، نظم و ضبط اور صحت مند مقابلے کی روح پیدا کرتے ہیں۔

پسرور (باغی ٹی وی، نامہ نگاروقاص اسلم) ایڈیشنل ڈپٹی کمشنر جنرل سیالکوٹ شاہد عباس نے کہا ہے کہ لیبر ڈیپارٹمنٹ سیالکوٹ کم سے کم اجرت کے قانون پر مکمل عمل درآمد کو یقینی بنائے اور کم سن بچوں سے مشقت لینے والے خلاف سخت کارروائی کرے۔ انہوں نے یہ بات ڈسٹرکٹ ویجی لینس کمیٹی برائے انسداد جبری مشقت اور اینٹی ہیومین ٹریفکنگ کے اجلاس سے خطاب کرتے ہوئے کہی۔

شاہد عباس نے مزید کہا کہ لیبر کورٹ کے فیصلوں پر فوری عمل درآمد کے لیے ڈسٹرکٹ ایڈمنسٹریشن لینڈ ریونیو ایکٹ کے تحت کارروائی کرے گی تاکہ کسی قسم کی خلاف ورزی نہ ہو۔ اجلاس میں ڈپٹی ڈائریکٹر لیبر طیب ورک، صدر بھٹہ ایسوسی ایشن میاں اکرام، سول سوسائٹی کے ممبران اشفاق نذر گھمن اور مرزا عبدالشکور، اسسٹنٹ ڈائریکٹر پیسی ساجد علی، اور لٹریسی و چائلڈ پروٹیکشن بیورو کے مقامی حکام بھی موجود تھے۔

ایڈیشنل ڈپٹی کمشنر نے بتایا کہ ضلع سیالکوٹ میں بھٹہ مزدور بچوں کے لیے لٹریسی ڈیپارٹمنٹ کی جانب سے قائم غیر رسمی اسکولوں کے معائنہ کے لیے سول سوسائٹی اور بھٹہ ایسوسی ایشن کے عہدیداران مشترکہ وزٹ کر کے رپورٹس پیش کریں گے تاکہ بچوں کی تعلیم اور حفاظت کو یقینی بنایا جا سکے۔

سیالکوٹ (باغی ٹی وی، ڈسٹرکٹ رپورٹر مدثر رتو)آل پاکستان میڈیا ہاؤس رجسٹرڈ کو منشیات جیسی لعنت کے خاتمے کے لیے مستقل بنیادوں پر انٹرنیشنل کبڈی ایونٹس کے انعقاد پر اینٹی نارکوٹکس فورس پنجاب کی جانب سے ایوارڈ 2025 سے نوازا گیا ہے۔ برگئیڈئیر سکندر حیات چوہدری، کمانڈنٹ آفیسر اے این ایف لاہور ریجن، نے لاہور ریجنل آفس میں تنظیم کے مرکزی بانی و صدر ڈاکٹر محمد زمان ہنجرا (گولڈ میڈلسٹ) کو یہ اعزاز پیش کیا۔

تقریب میں آل پاکستان میڈیا ہاؤس رجسٹرڈ کے مرکزی چیئرمین مشاورت کمیٹی شاہد محمود وڑائچ، چیئرمین انفارمیشن میاں تنویر احمد، چیئرمین شمالی پنجاب محمد آصف شیراز، جنرل سیکرٹری پنجاب حسن بلال اور آئی ٹی انچارج محمد ذوہیب امجد نے خصوصی شرکت کی۔

اینٹی نارکوٹکس فورس نے منشیات سے پاک معاشرے کے قیام کے لیے آل پاکستان میڈیا ہاؤس رجسٹرڈ کی خدمات کو سراہتے ہوئے اسے معاشرتی بہتری کا ایک مثالی کردار قرار دیا۔

تنظیم کا بنیادی منشور ہے:”نشہ سے انکار، زندگی سے پیار”
جبکہ تنظیم کا عزم ہے:”ہمارا عزم— منشیات سے پاک معاشرہ”

تقریب کے اختتام پر شرکا نے اس عزم کا اعادہ کیا کہ اینٹی نارکوٹکس فورس (ANF) اور کاؤنٹر نارکوٹکس فورس کے ساتھ مل کر ملک بھر میں منشیات کے خلاف آگاہی مہم اور مثبت سرگرمیوں کا سلسلہ جاری رکھا جائے گا۔

سیالکوٹ (باغی ٹی وی، ڈسٹرکٹ رپورٹر مدثر رتو) ریسکیو 1122 کی جانب سے دی ویژن پبلک ہائی اسکول اینڈ کالج درمان میں طلباء و طالبات کے لیے ایمرجنسی ریسپانس اور ابتدائی طبی امداد سے متعلق ایک روزہ تربیتی سیشن منعقد کیا گیا۔

تربیتی سیشن کے دوران ریسکیو اہلکاروں نے طلباء کو مختلف ہنگامی صورتحال—جس میں ٹریفک حادثات، آگ لگنے کے واقعات اور طبی ایمرجنسی شامل ہیں جس میں فوری، درست اور مؤثر اقدامات سے متعلق رہنمائی فراہم کی۔ اس موقع پر سی پی آر (CPR)، زخمیوں کو محفوظ طریقے سے منتقل کرنے کے اصول، اور ریسکیو سروسز کو بروقت اطلاع دینے کا طریقہ کار باقاعدہ عملی مظاہروں کے ساتھ سمجھایا گیا۔

طلباء و طالبات نے تربیتی پروگرام میں گہری دلچسپی کا اظہار کیا اور ریسکیو ٹیم سے مختلف سوالات بھی پوچھے۔ اسکول انتظامیہ نے ریسکیو 1122 کی اس کاوش کو سراہتے ہوئے کہا کہ ایسے تربیتی سیشنز نوجوانوں میں ایمرجنسی صورتحال سے نمٹنے کی آگاہی اور ذمہ داری کا شعور اجاگر کرنے میں اہم کردار ادا کرتے ہیں۔

آخر میں ادارے کے مینجنگ ڈائریکٹر حمزہ چوہان نے ریسکیو ٹیم کا شکریہ ادا کرتے ہوئے ان کی خدمات کو خراجِ تحسین پیش کیا۔ ریسکیو 1122 نے بھی مستقبل میں ادارے میں اسی نوعیت کے مزید تربیتی پروگرام جاری رکھنے کے عزم کا اظہار کیا۔