Category: سیالکوٹ

ڈسکہ،باغی ٹی وی(نامہ نگارملک عمران) انجمن خدمت خلق رجسٹرڈ ڈسکہ کے نو منتخب عہدیداران برائے سال 2024-26 کی تقریب حلف برداری اور 750 واں ماہانہ اجلاس زچہ بچہ ہسپتال ڈسکہ میں زیر صدارت میاں سعید احمد صراف منعقد ہوا۔

تقریب کا آغاز تلاوتِ قرآنِ پاک سے ہوا، جس کی سعادت حافظ عبدالغفار نے حاصل کی، جبکہ نعت رسول مقبولؐ انوار احمد سیال نے پیش کی۔ تقریب کے مہمانِ خصوصی محمد شریف گھمن (ڈپٹی ڈائریکٹر سوشل ویلفیئر سیالکوٹ) اور عدنان احمد راٹھور (اسسٹنٹ ڈائریکٹر سوشل ویلفیئر آفس ڈسکہ) نے نو منتخب عہدیداران سے حلف لیا۔

محمد شریف گھمن نے تقریب سے خطاب کرتے ہوئے ادارے کی شفافیت اور صفائی کے نظام کی تعریف کی اور اسے انسانیت کی خدمت کے لیے بہترین قرار دیا۔

جنرل سیکرٹری محمد انور مغل نے نومبر کے اجلاس کی کارروائی پیش کی، جسے متفقہ طور پر منظور کیا گیا۔ فنانس سیکرٹری انوار احمد سیال نے مالی گوشوارہ پیش کیا، جبکہ سیکرٹری نشر و اشاعت سہیل سلمان ٹھروہی نے گزشتہ ماہ کی شائع شدہ رپورٹس پیش کیں۔

اجلاس میں ڈسکہ میں امن و امان کی بگڑتی صورتحال پر تشویش کا اظہار کیا گیا۔ تقریب کا اختتام مولانا محمد ایوب خان کی دعا اور میاں سعید احمد صراف کی تواضع سے ہوا۔

سیالکوٹ،باغی ٹی وی(بیوروچیف شاہدریاض) ڈپٹی کمشنر اور ڈی پی او کی ہدایت پر اور ڈسٹرکٹ بار ایسوسی ایشن کے تعاون سے چائلڈ پروٹیکشن و ویلفئیر بیورو نے ضلع کچہری میں ایک بڑے پیمانے پر آپریشن کرکے بھیک مانگنے والے بچوں اور پیشہ ور بھکاریوں کے خلاف کارروائی کی ہے۔

اس آپریشن میں ضلعی پولیس، سول ڈیفنس ڈیپارٹمنٹ اور سوشل ویلفیئر ڈیپارٹمنٹ نے بھی بھرپور کردار ادا کیا۔ آپریشن کے دوران ایک درجن سے زائد بچوں کو بچایا گیا اور انہیں محفوظ مقام پر منتقل کیا گیا ہے۔ ساتھ ہی، پیشہ ور بھکاریوں کو بھی حراست میں لیا گیا ہے۔

ڈسٹرکٹ بار ایسوسی ایشن کے صدر عرفان اللہ وڑائچ اور سیکرٹری افضال اسلم نے ضلع کچہری میں بھکاریوں کے خلاف کی جانے والی اس کارروائی پر اطمینان کا اظہار کیا ہے۔ انہوں نے کہا کہ بچوں کو بچانا ہم سب کی ذمہ داری ہے اور وہ اس طرح کے آپریشنز میں ہر ممکن تعاون جاری رکھیں گے۔

ڈسکہ،باغی ٹی وی (نامہ نگار ملک عمران)تحصیل فٹبال ایسوسی ایشن ڈسکہ کے زیر اہتمام ڈسکہ سٹیڈیم میں ایک شاندار فٹبال میچ کا انعقاد کیا گیا جس میں ڈسکہ اور سمبڑیال کی ٹیمیں آمنے سامنے تھیں۔ ایک دلچسپ مقابلے کے بعد سمبڑیال کی ٹیم نے ڈسکہ کو دو صفر سے شکست دے کر میچ جیت لیا۔

اس موقع پر مہمان خصوصی طور پر ایم این اے سیدہ نوشین افتخار نے شرکت کی۔ انہوں نے کھلاڑیوں کا حوصلہ افزائی کرتے ہوئے کہا کہ کھیلوں کے فروغ اور نوجوانوں میں صحت مندانہ سرگرمیوں کو فروغ دینا ہم سب کی ذمہ داری ہے۔ انہوں نے مسلم لیگ (ن) کے رہنما مرزا عرفان کی اس کوشش کو سراہا جس کے تحت نوجوان نسل کے لیے کھیلوں کے میدان فراہم کیے جا رہے ہیں۔ انہوں نے کھلاڑیوں کو یقین دلایا کہ وہ گراؤنڈ کی بہتری اور بڑے سطح پر فٹبال میچز کروانے کے لیے کوششیں کریں گی۔

فٹبال میچ کو دیکھنے کے لیے بڑی تعداد میں شائقین جمع تھے جنہوں نے کھلاڑیوں کی حوصلہ افزائی کی۔ میچ کے اختتام پر جیتنے والی سمبڑیال کی ٹیم کو انعامات سے نوازا گیا جبکہ تحصیل فٹبال ایسوسی ایشن کی جانب سے مہمان خصوصی کو شیلڈز پیش کی گئیں۔

سیالکوٹ،باغی ٹی وی(بیورو چیف شاہد ریاض) یکم فروری سے مشترکہ کھیوٹ کی تقسیم مہم کا آغاز

سیالکوٹ میں یکم فروری سے مشترکہ کھیوٹ کی تقسیم کی مہم کا آغاز کیا جا رہا ہے۔ پنجاب اربن لینڈ سسٹمز انہاسمنٹ (پلیس) کے تعاون سے محکمہ ریونیو سیالکوٹ اگلے تین ماہ کے دوران یہ مہم مکمل کرے گا۔

ایڈیشنل ڈپٹی کمشنر ریونیو محمد اقبال سنگھیڑا نے پلیس ٹیم اور ریونیو افسران کے مشترکہ اجلاس سے خطاب کرتے ہوئے مہم کے اہم پہلوؤں پر روشنی ڈالی۔ انہوں نے پلیس ٹیم کی کوششوں کو سراہتے ہوئے مہم کی کامیابی کے لیے ہر ممکن تعاون کی یقین دہانی کرائی۔

اجلاس میں پلیس ماہرین نے بتایا کہ وہ تمام اضلاع کی انتظامیہ اور دیگر متعلقہ اداروں سے مسلسل رابطے میں ہیں تاکہ مشترکہ کھیوٹ کی تقسیم کے عمل کو بروقت اور خوش اسلوبی سے مکمل کیا جا سکے۔

یہ اقدام ضلع سیالکوٹ سمیت پنجاب بھر میں ریونیو نظام کی بہتری اور شفافیت کے فروغ کے لیے اہم سنگ میل ثابت ہوگا۔

سیالکوٹ (باغی ٹی وی بیوروچیف شاہد ریاض) رکن صوبائی اسمبلی رانا عارف اقبال ہرناہ نے کہا کہ "ہمت کارڈ” کا اجراء وزیر اعلیٰ پنجاب کا تاریخی کارنامہ ہے، جو معذور افراد کی فلاح کے لیے ایک جامع اور مربوط پروگرام ہے۔

انہوں نے سوشل ویلفیئر کمپلیکس میں معذور افراد میں ہمت کارڈز کی تقسیم کی تقریب میں شرکت کی، جہاں 990 افراد کو پہلے مرحلے میں ہمت کارڈز جاری کیے گئے۔

رانا عارف اقبال نے کہا کہ ان کی کوشش ہے کہ حلقے کے تمام معذور افراد کو اس پروگرام سے فائدہ پہنچے اور ان کا حق ان تک پہنچایا جائے۔

ڈپٹی ڈائریکٹر سوشل ویلفیئر شریف گھمن نے کہا کہ اس پروگرام کا پراسس مکمل طور پر شفاف رکھا گیا ہے، جس میں درخواست دہندگان کی فزیکل ویریفیکیشن اور اکاؤنٹ کھلوانا شامل ہے۔