Category: سیالکوٹ

سیالکوٹ،باغی ٹی وی(بیوروچیف شاہدریاض) سیدہ نوشین افتخار کا حلقہ این اے 73 کا دورہ، تاجروں کے مسائل حل کرنے کی یقین دہانی

رکن قومی اسمبلی اور صدر ینگ پارلیمینٹیرینز سیدہ نوشین افتخار نے اپنے حلقہ این اے 73 میں مختلف بازاروں کا دورہ کیا اور تاجروں سے ملاقات کرکے ان کے مسائل سے آگاہی حاصل کی۔

سیدہ نوشین افتخار نے انجمن تاجران کے عہدیداران کے ہمراہ مین بازار، مچھلی بازار، میلاد چوک اور دیگر تجارتی مراکز کا وزٹ کیا۔ تاجروں نے بجلی کی لٹکتی تاروں، سیوریج کے مسائل اور دیگر مشکلات کی نشاندہی کی۔ دکانداروں نے بتایا کہ لٹکتی تاریں کسی بھی وقت بڑے حادثے کا سبب بن سکتی ہیں، جس پر سیدہ نوشین افتخار نے فوری اقدامات کا وعدہ کیا اور دیگر مسائل کے حل کی بھی یقین دہانی کرائی۔

اس موقع پر انجمن تاجران نے ان کے دورے اور مسائل پر توجہ دینے پر شکریہ ادا کیا۔ سیدہ نوشین افتخار نے کہا کہ وہ حلقے کے مسائل سے بخوبی آگاہ ہیں اور ان کے حل کے لیے عملی اقدامات کر رہی ہیں۔ جلد ان مسائل پر قابو پا لیا جائے گا۔

سیالکوٹ،باغی ٹی وی (بیوروچیف شاہدریاض) انسپکٹر خرم شہزاد چیمہ کی ڈی ایس پی کے عہدے پر ترقی

سیالکوٹ میں مختلف تھانوں میں بطور ایس ایچ او خدمات انجام دینے والے انسپکٹر خرم شہزاد چیمہ کو ڈی ایس پی کے عہدے پر ترقی دے دی گئی ہے۔ خرم شہزاد چیمہ اس سے قبل سرکل آفیسر انٹی کرپشن اسٹیبلشمنٹ کے عہدے پر بھی کام کر چکے ہیں اور ان کی کارکردگی کو متعدد مواقع پر سراہا گیا ہے۔

ترقی کے بعد خرم شہزاد چیمہ کو عوامی خدمت کے لیے مزید اہم ذمہ داریاں سونپی جائیں گی۔ اس ترقی کو ان کی پیشہ ورانہ محنت اور دیانتداری کا اعتراف قرار دیا جا رہا ہے۔

سیالکوٹ،باغی ٹی وی (سٹی رپورٹرمدثر رتو)شہاب پورہ یونین کونسل میں ترقیاتی منصوبوں کا افتتاح

تفصیلات کے مطابق سیالکوٹ میں رکن صوبائی اسمبلی محمد منشاء اللہ بٹ نے شہاب پورہ یونین کونسل میں حکومت پنجاب کے ترقیاتی منصوبوں کا افتتاح کر دیا۔ تقریب میں یوسف جٹ، ملک بلال سرفراز، قمر بٹ، طارق بٹ، ایکسین میونسپل کارپوریشن بلال قیصر، سب انجینئر استفانس مسیح، عبدالحمید قاسم، شاہد بٹ اور دیگر معززین علاقہ بڑی تعداد میں شریک ہوئے۔

محمد منشاء اللہ بٹ نے کہا کہ مسلم لیگ (ن) کی حکومت نے وزیر اعلیٰ پنجاب مریم نواز شریف کے ویژن کے مطابق ترقیاتی منصوبوں کا آغاز کیا ہے تاکہ عام آدمی کے معیار زندگی کو بہتر بنایا جا سکے۔ ان منصوبوں میں گلیوں میں ٹف ٹائلز کی تنصیب، سیوریج سسٹم کی بہتری، اسٹریٹ لائٹس کی بحالی اور واٹر سپلائی کی اپ گریڈیشن شامل ہیں۔

انہوں نے مزید کہا کہ ترقیاتی منصوبوں کے معیار اور رفتار پر کوئی سمجھوتہ نہیں کیا جائے گا اور تمام منصوبے مقررہ وقت کے اندر مکمل کیے جائیں گے۔

سیالکوٹ،باغی ٹی وی (سٹی رپورٹرمدثررتو)ڈپٹی کمشنر کا تحصیل پسرور کا دورہ، تعلیمی اور صحت سہولیات کا جائزہ

تفصیل کے مطابق ڈپٹی کمشنر سیالکوٹ محمد ذوالقرنین لنگڑیال نے تحصیل پسرور کا دورہ کرتے ہوئے تعلیمی اور صحت کی سہولیات کا معائنہ کیا۔ انہوں نے کیڈٹ کالج پسرور اور گورنمنٹ ہائی اسکول بن باجوہ کا دورہ کیا اور تعلیمی سہولیات کا جائزہ لیا۔

ڈپٹی کمشنر نے بنیادی مرکز صحت بن باجوہ کی ری ویمپنگ کے جاری منصوبے کا معائنہ کیا اور او پی ڈی، فارمیسی، اور لیبارٹری کی 24/7 سہولیات کو چیک کیا۔ اس دوران انہوں نے گورنمنٹ سلولرنرز اسکول وزیر آباد روڈ سیالکوٹ کا بھی جائزہ لیا۔

ڈپٹی کمشنر نے ڈسٹرکٹ ایمرجنسی کنٹرول روم اور سیالکوٹ شہر کی گرین بیلٹس کا معائنہ کرتے ہوئے موجودہ سہولیات کی کارکردگی کو مزید بہتر بنانے کے لیے ہدایات جاری کیں۔

سیالکوٹ ،باغی ٹی وی( بیوروچیف شاہد ریاض)سپورٹس کمپلیکس اور گراؤنڈز کی بحالی، نوجوانوں کے لیے کھیلوں کے مواقع پیدا کرنے کا عزم

تفصیل کے مطابق اراکین صوبائی اسمبلی محمد منشاء اللہ بٹ اور چودھری فیصل اکرام نے اعلان کیا ہے کہ شہر میں کھیلوں کے فروغ کے لیے پسرور روڈ پر سپورٹس کمپلیکس سمیت دیگر گراؤنڈز کو اپ گریڈ کیا جا رہا ہے۔ ان منصوبوں کا مقصد نوجوان کھلاڑیوں اور اتھلیٹس کو اپنی صلاحیتوں کے نکھار کا موقع فراہم کرنا ہے۔

یہ بات انہوں نے سیالکوٹ پسرور روڈ پر واقع سپورٹس کمپلیکس، ہاکی اسٹیڈیم، اور فٹبال اسٹیڈیم کی بحالی اور تکمیل کا جائزہ لینے کے دوران کہی۔ اس موقع پر ڈسٹرکٹ سپورٹس آفیسر افتخار گوندل، سابق ڈائریکٹر لوکل گورنمنٹ عبدالحمید قاسم، نبیل لون، شاہد بٹ، اور عدنان اکبر چودھری بھی موجود تھے۔

محمد منشاء اللہ بٹ نے کہا کہ کھیلوں کا فروغ حکومت پنجاب کی اولین ترجیح ہے۔ انہوں نے مزید کہا کہ سپورٹس ڈیپارٹمنٹ کلب لیول پر کھیلوں کے مقابلوں کا انعقاد کرے گا تاکہ مقامی کھلاڑیوں کو اپنی صلاحیتوں کے اظہار کا موقع فراہم کیا جا سکے۔

اراکین اسمبلی کا کہنا تھا کہ نوجوان نسل کی مثبت سرگرمیوں میں شمولیت کے لیے کھیلوں کی سہولیات انتہائی ضروری ہیں، اور یہ اقدامات نہ صرف ان کے مستقبل کو بہتر بنائیں گے بلکہ علاقے کی مجموعی ترقی میں بھی کردار ادا کریں گے۔

سیالکوٹ،باغی ٹی وی (بیوروچیف شاہدریاض)سفید پوش طبقہ کیلئے گوشت خریدنا خواب بن گیا

تفصیلات کے مطابق سیالکوٹ میں گوشت کی بڑھتی ہوئی قیمتوں نے سفید پوش طبقے کے لیے گوشت خریدنا خواب بنا دیا ہے۔ شہر سمیت چاروں تحصیلوں اور مضافات میں چکن، چھوٹے اور بڑے گوشت کی من مانی قیمتوں پر فروخت جاری ہے، جس سے عوام شدید مشکلات کا شکار ہیں۔

وزیر اعلیٰ پنجاب مریم نواز شریف کے عوام کو مہنگائی سے ریلیف دینے کے دعوے محض کاغذی ثابت ہو رہے ہیں۔ شہری شکایت کرتے ہیں کہ چکن، چھوٹے اور بڑے گوشت سمیت دیگر اشیائے خوردونوش سرکاری نرخوں کے بجائے زیادہ قیمتوں پر فروخت کی جا رہی ہیں، جس پر وہ سراپا احتجاج ہیں۔

پرائس کنٹرول کمیٹیوں کی غیر فعالیت کے باعث مصنوعی مہنگائی نے انتظامیہ کی کارکردگی پر سوالیہ نشان لگا دیا ہے۔ چکن فروش سرکاری ریٹ لسٹ میں دی گئی قیمتوں کو نظر انداز کرتے ہوئے چکن گوشت 593 روپے کے بجائے 700 روپے فی کلو گرام، برائلر مرغی زندہ 409 روپے کے بجائے 500 روپے فی کلو گرام فروخت کر رہے ہیں۔ اسی طرح چھوٹا گوشت 1800 روپے کے بجائے 2200 روپے فی کلو اور بڑا گوشت 1000 سے 1200 روپے فی کلو تک فروخت کیا جا رہا ہے۔

انڈوں کی قیمتوں میں بھی ہوشربا اضافہ دیکھنے میں آ رہا ہے، جہاں تھوک ریٹ 323 روپے اور پرچون میں 327 روپے فی درجن وصول کیے جا رہے ہیں۔ ان غیر قانونی قیمتوں پر شہریوں کی شکایات کے باوجود حکام کی جانب سے کوئی مؤثر کارروائی دیکھنے میں نہیں آئی۔

شہریوں کا کہنا ہے کہ سرکاری نرخ نامے پر عملدرآمد نہ ہونے کی وجہ سے مہنگائی کی لہر نے ان کے لیے زندگی مزید مشکل بنا دی ہے۔ انہوں نے مطالبہ کیا ہے کہ پرائس کنٹرول کمیٹیوں کو فعال کیا جائے اور منافع خوروں کے خلاف سخت کارروائی کی جائے تاکہ عوام کو ریلیف فراہم کیا جا سکے۔