Category: سیالکوٹ

سیالکوٹ ،باغی ٹی وی(بیوروچیف شاہدریاض) رکن صوبائی اسمبلی محمد منشاء اللہ بٹ نے گورنمنٹ علامہ اقبال میموریل ٹیچنگ ہسپتال سیالکوٹ کا دورہ کیا، جہاں انہوں نے مریضوں کی عیادت کی اور دستیاب سہولیات کا جائزہ لیا۔ اس موقع پر ایڈیشنل ڈپٹی کمشنر مظفر مختار، ایم ایس ڈاکٹر سہیل انجم بٹ، ڈاکٹر انیل، شاہد بٹ اور ابوذر بھی موجود تھے۔

محمد منشاء اللہ بٹ نے کہا کہ موجودہ ہسپتال شہر کی بڑھتی آبادی کے پیش نظر اپنی استعداد سے خدمات انجام دے رہے ہیں، تاہم سیالکوٹ میں ایک نئے ڈسٹرکٹ ہیڈ کوارٹر ہسپتال کی تعمیر وقت کی اہم ضرورت ہے۔ انہوں نے بتایا کہ وفاقی وزیر دفاع خواجہ آصف نے پسرور روڈ پر موزوں جگہ کی نشاندہی اور منصوبہ بندی کی ہدایت دے دی ہے، اور جلد حکومت پنجاب سے اس منصوبے کی منظوری حاصل کی جائے گی۔

انہوں نے ہسپتال میں بے ہنگم ٹریفک اور رانگ پارکنگ پر تشویش کا اظہار کرتے ہوئے انتظامیہ کو سخت کارروائی کی ہدایت کی۔ کمشنر روڈ پر تجاوزات کے خاتمے کے لیے میونسپل حکام کو فوری اقدامات کرنے کی تاکید کی گئی۔

مزید برآں، محمد منشاء اللہ بٹ نے ڈی جی پارکس اینڈ ہارٹیکلچرل کو ہسپتال کے داخلی راستے پر لینڈ اسکیپنگ اور شجرکاری کرنے کی ہدایت دیتے ہوئے کہا کہ یہ اقدامات ہسپتال کی خوبصورتی میں اضافہ کریں گے۔

سیالکوٹ،باغی ٹی وی (بیوروچیف شاہدریاض) ڈپٹی کمشنر محمد ذوالقرنین لنگڑیال نے خبردار کیا ہے کہ پاکستان کی آبادی 2.9 فیصد سالانہ کی شرح سے بڑھ رہی ہے، اور اگر یہ سلسلہ جاری رہا تو اگلے 30 سالوں میں ملک کی آبادی 46 کروڑ تک پہنچ سکتی ہے۔

ڈسٹرکٹ کوآرڈینیشن کمیٹی برائے پاپولیشن ویلفیئر کے اجلاس سے خطاب کرتے ہوئے انہوں نے کہا کہ ملک پہلے ہی بے روزگاری، غذائی قلت، تعلیم، صحت اور رہائش کی شدید قلت کا شکار ہے۔ 45 فیصد بچے غذائی کمی کا شکار ہیں، جبکہ 60 فیصد آبادی ایک کمرے کے گھر میں رہنے پر مجبور ہے، اور 40 فیصد لوگ خط غربت سے نیچے زندگی گزار رہے ہیں۔

ڈپٹی کمشنر نے کہا کہ اس صورتحال میں پاپولیشن ویلفیئر ڈیپارٹمنٹ کو جنگی بنیادوں پر کام کرنے کی ضرورت ہے۔ عوام کو مختصر خاندانی نظام کی اہمیت اور فوائد سے آگاہ کرنا ہوگا اور یہ باور کروانا ہوگا کہ صحت مند اور خوشحال خاندان ہی ملک کی خوشحالی کی بنیاد ہیں۔

انہوں نے مزید کہا کہ آبادی اور وسائل میں توازن قائم کرنا ترقی کی بنیادی شرط ہے۔ پاکستان میں بڑھتی ہوئی آبادی کی وجہ سے تعلیمی ادارے، صحت کی سہولیات اور روزگار کے مواقع کم پڑ رہے ہیں، جس کے نتیجے میں جرائم کی شرح میں بھی اضافہ ہو رہا ہے۔

اجلاس میں ڈسٹرکٹ پاپولیشن ویلفیئر ڈیپارٹمنٹ کی کارکردگی کا جائزہ لیا گیا اور آگاہی مہم کے لیے جامع پلان تیار کرنے کی ہدایت کی گئی۔

سیالکوٹ،باغی ٹی وی( بیوروچیف شاہد ریاض) تین تھانوں میں نئے ایس ایچ اوز تعینات

تفصیل کے مطابق ڈسٹرکٹ پولیس آفیسر سیالکوٹ رانا عمر فاروق نے تین تھانوں میں نئے ایس ایچ اوز کی تعیناتی کے احکامات جاری کر دیے۔

سب انسپکٹر صاحبزادہ ادریس قریشی کو تھانہ بمبانوالہ، سب انسپکٹر عادل مصطفی باجوہ کو تھانہ ستراہ، اور انسپکٹر فیاض چیمہ کو تھانہ پھلورہ کا ایس ایچ او مقرر کیا گیا ہے۔

یہ تعیناتیاں پولیس نظام میں بہتری اور عوامی مسائل کے فوری حل کے لیے کی گئی ہیں۔

سیالکوٹ،باغی ٹی وی( بیوروچیف شاہد ریاض) ایڈیشنل ڈپٹی کمشنر ریونیو محمد اقبال سنگھیڑا نے واضح کیا ہے کہ سیالکوٹ ٹینری زون میں منتقل نہ ہونے والی تمام ٹینریوں کو یکم جنوری سے سیل کردیا جائے گا۔ ماحولیاتی آلودگی کا سبب بننے والی فیکٹریوں کے خلاف گرینڈ کریک ڈاؤن شروع کیا جائے گا۔

یہ اعلان انہوں نے ٹینری زون پراجیکٹ کی عملدرآمد کمیٹی کے اجلاس میں کیا، جس میں محکمہ ماحولیات اور دیگر متعلقہ اداروں کے افسران شریک تھے۔ محمد اقبال سنگھیڑا نے کہا کہ تمام اسٹیک ہولڈرز اور انتظامیہ اس معاملے میں متفق ہیں، اور کسی قسم کی رعایت نہیں برتی جائے گی۔

انہوں نے محکمہ ماحولیات کو ہدایت کی کہ وہ فعال اور غیر فعال ٹینریوں کا مکمل ڈیٹا تیار کریں۔ اجلاس میں بتایا گیا کہ سیالکوٹ ٹینری زون میں 107 ٹینریوں کی تعمیر جاری ہے جبکہ 433 پلاٹ مالکان نے کام شروع کر دیا ہے۔

مزید برآں، ایڈیشنل ڈپٹی کمشنر نے سرکاری محکموں کی کارکردگی بہتر بنانے کے لیے ضلعی افسران کے اجلاس کی بھی صدارت کی۔ پرائس مجسٹریٹس کو ہدایت دی گئی کہ مہنگے داموں اشیاء فروخت کرنے والوں پر جرمانے اور مقدمات درج کیے جائیں۔

سیالکوٹ،باغی ٹی وی (بیوروچیف شاہدریاض)قائداعظم کے 148 ویں یومِ ولادت پر مرے کالج میں سیمینار کا انعقاد

قائداعظم محمد علی جناح کے 148 ویں یومِ ولادت کے موقع پر مرے کالج سیالکوٹ میں انسٹیٹیوٹ آف بزنس لیڈرشپ (IBL) اسلام آباد کے زیرِ اہتمام ایک سیمینار کا انعقاد کیا گیا۔ پروگرام کی صدارت IBL کے چیف ایگزیکٹو وحید شریف اور ایگزیکٹو ایڈمن معاذ اشرف نے کی، جبکہ مہمانِ خصوصی سابق ایڈیشنل آئی جی پنجاب ڈاکٹر شعیب سڈل تھے۔

پروگرام میں ڈی پی او سیالکوٹ رانا عمر فاروق، مرے کالج کے پرنسپل، دیگر تعلیمی و تجارتی شخصیات، مرد و خواتین، اور شہر کے معززین نے شرکت کی۔

ڈاکٹر شعیب سڈل نے خطاب کرتے ہوئے قائداعظم کی خدمات اور قربانیوں کو خراجِ تحسین پیش کیا۔ انہوں نے کہا کہ قائداعظم نے سیالکوٹ کے اپنے دورے کے دوران نوجوانوں کے جوش و جذبے کو دیکھتے ہوئے کہا تھا کہ جب پنجاب جاگتا ہے، تو کوئی طاقت اسے روک نہیں سکتی۔ انہوں نے پاکستان کی آزادی کے لیے کی جانے والی قربانیوں کو یاد کرتے ہوئے کہا کہ نئی نسل پر فرض ہے کہ وہ ملک کی تعمیر و ترقی میں اپنا کردار ادا کرے۔

پروگرام کا مقصد قائداعظم کے افکار و نظریات کو اجاگر کرنا اور عوام میں شعور بیدار کرنا تھا۔ شرکاء نے اس موقع پر قائداعظم کے خواب کی تعبیر کے لیے اپنے عزم کا اعادہ کیا۔

سیالکوٹ،باغی ٹی وی( بیوروچیف شاہد ریاض) ک یوم قائداعظم اور کرسمس ڈے کے موقع پر ریسکیو 1122 کا عملہ ہائی الرٹ ہے۔ ڈسٹرکٹ ایمرجنسی آفیسر انجینئر نوید اقبال کے مطابق، ضلع بھر کی تمام تحصیلوں، گرجا گھروں اور تفریحی مقامات پر ریسکیو اہلکار ایمرجنسی وہیکلز کے ساتھ تعینات ہیں۔

ریسکیو 1122 کا عملہ ایمبولینسز، موٹر بائیک ایمبولینسز، فائر وہیکلز اور ریسکیو پوسٹوں کے ذریعے ایمرجنسی کور فراہم کر رہا ہے۔ انجینئر نوید اقبال نے کہا کہ کسی بھی ہنگامی صورتحال سے نمٹنے کے لیے ٹیمیں مکمل تیار ہیں اور عوام کو ہر ممکن تحفظ فراہم کیا جا رہا ہے۔

ریسکیو اہلکار یوم قائداعظم اور کرسمس کے دوران دیگر ایمرجنسیز پر بھی اپنی خدمات پیش کر رہے ہیں تاکہ شہریوں کو کسی بھی ناخوشگوار صورتحال میں فوری مدد فراہم کی جا سکے۔

سیالکوٹ، باغی ٹی وی( بیوروچیف شاہد ریاض)قائداعظم کے یوم ولادت پر گورنمنٹ جامع ہائی سکول میں تقریب

گورنمنٹ جامع ہائی سکول میں محکمہ تعلیم سیالکوٹ کے زیر اہتمام قائداعظم محمد علی جناح کے 148ویں یوم ولادت کی مناسبت سے ایک شاندار تقریب کا انعقاد کیا گیا۔ تقریب کی صدارت ڈپٹی کمشنر سیالکوٹ محمد ذوالقرنین لنگڑیال نے کی، جبکہ اسسٹنٹ کمشنر انعم بابر، محکمہ تعلیم کے مقامی حکام، اساتذہ اور طلباء و طالبات نے بھرپور شرکت کی۔

ڈپٹی کمشنر محمد ذوالقرنین لنگڑیال نے تقریب سے خطاب کرتے ہوئے کہا کہ قائداعظم کی انتھک محنت اور پختہ عزم کے باعث مسلمانانِ ہند کو آزادی نصیب ہوئی اور دنیا کے نقشے پر ایک نظریاتی ریاست "پاکستان” کا قیام ممکن ہوا، جہاں آج 23 کروڑ مسلمان آزادی کے ساتھ زندگی گزار رہے ہیں۔

انہوں نے کہا کہ آج ضرورت اس امر کی ہے کہ قوم قائداعظم کے فرامین ایمان، اتحاد، یقینِ محکم اور تنظیم کو اپنی زندگی کا حصہ بنائے۔ قائداعظم ایک ایسی ریاست کے حامی تھے جہاں اسلام کے سنہری اصولوں کی بنیاد پر ہر شہری کو مساوات، انصاف اور ترقی کے مساوی مواقع میسر ہوں۔ انہوں نے زور دیا کہ قائداعظم امن، محبت اور ترقی کا استعارہ ہیں اور ان کے افکار کو اپنانا ہی حقیقی کامیابی کی ضمانت ہے۔

تقریب کے دوران طلباء نے قائداعظم کی خدمات کو خراج عقیدت پیش کرتے ہوئے ملی نغمے اور تقاریر بھی پیش کیں۔