Category: سکھر

گھوٹکی(باغی ٹی وی) بازار سکڑ گئے، ٹریفک پولیس غائب، شہری مشکلات کا شکار

میرپورماتھیلو سے باغی ٹی وی کے نامہ نگار مشتاق علی لغاری کی رپورٹ کے مطابق گھوٹکی کے بازار اور شاہراہیں بڑھتے ہوئے ٹریفک مسائل کے باعث شدید دباؤ کا شکار ہیں۔ ٹریفک پولیس کی غیر موجودگی اور ناقص انتظامات کی وجہ سے بازاروں میں خریداری اور گزرنا مشکل ہو گیا ہے۔

چوراہے اور اہم راستے گھنٹوں جام رہتے ہیں، جس سے پیدل چلنے والے، ایمرجنسی مریض، اور ملازمت پیشہ افراد شدید متاثر ہو رہے ہیں۔ شہریوں کا کہنا ہے کہ ٹریفک کے بہاؤ کو بہتر بنانے کے لیے فوری اقدامات کی ضرورت ہے، ورنہ صورتحال مزید بگڑ سکتی ہے۔

عوام نے مطالبہ کیا ہے کہ چوراہوں پر ٹریفک اہلکار تعینات کیے جائیں اور قوانین پر سختی سے عمل درآمد کرایا جائے تاکہ معمولات زندگی بحال ہو سکیں۔

میرپورماتھیلو،باغی ٹی وی (نامہ نگارمشتاق لغاری): مرتضیٰ کھوسو اغوا، بہمانہ تشدد، زندگی اور موت کی کشمکش میں مبتلا،مقدمہ درج نہ ہوسکا

تفصیل کے مطابق میرپورماتھیلوکی گل کالونی کے رہائشی مرتضی کہوسہ، جو بینک میں کام کرتے تھے، چند دن قبل ایک بااثر شخص کے ہاتھوں اغوا ہو گئے۔ اغوا کے بعد انہیں بے رحمی سے تشدد کا نشانہ بنایا گیا جس کے نتیجے میں ان کی ایک آنکھ ضائع ہوگئی اور آدھی زبان بھی کاٹ دی گئی۔

مرتضی کھوسو کو اغوا کے بعد شدید زخمی حالت میں کراچی کے آغا خان ہسپتال منتقل کیا گیا، جہاں وہ زندگی اور موت کی کشمکش میں مبتلا ہیں۔ ان کے علاج کے لئے میڈیکل لیٹر بھی فراہم کیا گیا ہے، لیکن گھوٹکی پولیس نے تاحال ان کے اغوا اور تشدد کے واقعے پر مقدمہ درج نہیں کیا۔

مقامی ذرائع کے مطابق مرتضی کھوسوپر ہونے والا یہ ظلم کسی ذاتی تنازعے یا کاروباری مخالفت کا نتیجہ ہو سکتا ہے، تاہم پولیس کی جانب سے مقدمہ درج نہ کرنا سوالات اٹھا رہا ہے۔

مرتضی کے اہل خانہ اور مقامی افراد نےاحتجاج کرتے ہوئے پولیس سے مطالبہ کیا ہے کہ فوری طور پر مقدمہ درج کیا جائے اور ملزمان کے خلاف سخت کارروائی کی جائے۔ اس واقعے نے علاقے میں خوف و ہراس پھیلا دیا ہے اور شہریوں کا کہنا ہے کہ ایسے واقعات میں انصاف کا حصول مشکل بن رہا ہے، خاص طور پر جب بااثر افراد اس طرح کے جرائم میں ملوث ہوں۔

مرتضی کھوسو کےلواحقین نے وزیراعلیٰ سندھ مراد علی شاہاور دیگر اعلیٰ حکام سے مطالبہ کیا ہے کہ اس سنگین واقعے کا فوری نوٹس لیا جائے اور متاثرہ شخص کو انصاف دلایا جائے۔

میرپورماتھیلو،باغی ٹی وی (نامہ نگارمشتاق علی لغاری)ڈی آئی جی سکھر کا فیری ہوم کا دورہ: ننھی پریوں کے ساتھ وقت گزارا، تحائف تقسیم کیے

نئے سال کے آغاز پر ڈی آئی جی سکھر کیپٹن (ر) فیصل عبداللہ چاچڑ نے فیری ہوم سکھر کا دورہ کیا۔ بے سہارا یتیم بچیوں کے لیے قائم آشیانہ فرزانہ ویلفیئر ارگنائزیشن میں چائلڈ پروٹیکشن سیل کے عملے کے ہمراہ پہنچ کر بچیوں سے ملاقات کی اور ان کے ساتھ وقت گزارا۔

ڈی آئی جی سکھر نے ننھی بچیوں کے ساتھ نئے سال کا کیک کاٹا اور تحائف تقسیم کیے۔ اس موقع پر انہوں نے فیری ہوم میں دی جانے والی سہولیات کا جائزہ لیا اور انچارج فرزانہ کھوسو کے کام کو سراہتے ہوئے کہا کہ یہ بچیاں ہماری فیملی کا حصہ ہیں اور ان کی بہترین پرورش و تربیت کے لیے ہم سب کو کردار ادا کرنا ہوگا۔ انہوں نے معاشرے میں عدم برداشت کے خاتمے اور مثبت تبدیلی کے لیے ایسی تقریبات کی اہمیت پر زور دیا۔

فیری ہوم انچارج فرزانہ کھوسو نے ڈی آئی جی کی آمد کو بچیوں کے لیے خوش آئند قرار دیتے ہوئے شکریہ ادا کیا۔ انہوں نے کہا کہ ان کے تعاون اور حوصلہ افزائی سے بچیوں کو بہتر تعلیم و تربیت کے مواقع ملیں گے تاکہ یہ معصوم بچیاں مستقبل میں ملک کا نام روشن کر سکیں۔

میرپور ماتھیلو (باغی ٹی وی، نامہ نگار مشتاق علی لغاری)ڈی آئی جی سکھر کیپٹن (ر) فیصل عبداللہ چاچڑ کی زیر نگرانی رینج آفس میں ریٹائر ہونے والے پولیس کانسٹیبلز کے اعزاز میں ایک پروقار الوداعی تقریب منعقد کی گئی۔

ریٹائرڈ ہونے والے پولیس کانسٹیبل محمد ایوب مہر اور غلام سرور سومرو کے لیے منعقدہ تقریب میں پولیس افسران، اہلکاروں، اور ریٹائرڈ کانسٹیبلز کے اہل خانہ نے شرکت کی۔ ڈی آئی جی سکھر نے ریٹائرڈ کانسٹیبلز کی خدمات کو سراہتے ہوئے انہیں خراج تحسین پیش کیا اور ان کے لیے نیک خواہشات کا اظہار کیا۔

ریٹائرڈ ہونے والے اہلکاروں کو ڈی آئی جی کی جانب سے روایتی چادر، شیلڈ، پھولوں کے تحائف، اور ریفریشمنٹ پیش کی گئی۔ ڈی آئی جی نے کہا کہ ان کانسٹیبلز کی خدمات محکمہ پولیس کے لیے قابل فخر ہیں اور ان کے کردار کو ہمیشہ یاد رکھا جائے گا۔

ریٹائرڈ کانسٹیبلز نے اس عزت افزائی پر شکریہ ادا کرتے ہوئے کہا کہ محکمہ پولیس میں ان کا سفر یادگار رہا۔ تقریب کے اختتام پر ڈی آئی جی سکھر نے ریٹائرڈ کانسٹیبلز، ان کے اہل خانہ، اور دیگر اسٹاف کے ساتھ مل کر کیک کاٹا۔

اس موقع پر ڈی آئی جی نے کہا کہ پولیس اہلکاروں کی ریٹائرمنٹ ان کی زندگی کا ایک نیا باب ہے، اور محکمہ پولیس ان کے تعاون اور خدمات کو ہمیشہ یاد رکھے گا۔

میرپور ماتھیلو ،باغی ٹی وی( نامہ نگار مشتاق علی لغاری)گھوٹکی میں ساتویں قومی زرعی شماری کا آغاز ہو گیا۔ یکم جنوری سے 10 فروری 2025 تک جاری رہنے والی اس مہم کا افتتاح ڈپٹی کمشنر گھوٹکی ڈاکٹر سید محمد علی نے کیا۔ مہم کے دوران ضلع میں 73 دیہی اور 25 شہری بلاکوں پر مشتمل 98 بلاکس میں 60 ورکرز فیلڈ آپریشنز انجام دیں گے۔

افتتاحی تقریب میں ڈپٹی کمشنر کا کہنا تھا کہ زرعی شماری کا بنیادی مقصد زرعی شعبے کے لیے مؤثر پالیسی سازی اور خوراک کی قلت جیسے مسائل کو حل کرنا ہے۔ انہوں نے کہا کہ یہ مہم نہ صرف زرعی پیداوار بڑھانے میں معاون ثابت ہوگی بلکہ مستقبل میں غذائی قلت کے خاتمے کا ذریعہ بھی بنے گی۔ فیلڈ اسٹاف کو مخاطب کرتے ہوئے انہوں نے اسے قومی فریضہ قرار دیا اور تمام دستیاب وسائل بروئے کار لانے کی ہدایت کی۔

ڈسٹرکٹ کوآرڈینیٹر سینسز درشن لعل نے بتایا کہ یہ مہم پاکستان کی ساتویں زرعی شماری کے تحت ہو رہی ہے، جس کے دوران پہلی بار زرعی مشینری اور مال مویشی کو بھی شمار کیا جائے گا۔ یہ ایک Integrated Digital Count ہوگا، جو اپنی نوعیت کی پہلی شماری ہے۔ انہوں نے مزید کہا کہ اس سے قبل آخری زرعی شماری 2010 میں ہوئی تھی۔

محکمہ شماریات حکومت پاکستان کے مرتب کردہ بلاکوں کے مطابق، ضلع گھوٹکی میں یہ مہم پورے نظم و ضبط کے ساتھ جاری رہے گی۔ امید ظاہر کی جا رہی ہے کہ یہ اقدام زرعی شعبے میں ترقی اور خوراک کی قلت کے خاتمے کے لیے ایک اہم سنگ میل ثابت ہوگا۔

میرپورماتھیلو (باغی ٹی وی، نامہ نگار مشتاق علی لغاری) واپڈا کی ظالمانہ بجلی کی لوڈ شیڈنگ، 18 گھنٹے کی بندش سے عوام پریشان

ضلع گھوٹکی کی تحصیل میرپور ماتھیلو کے شہر جروار میں واپڈا کی جانب سے 15 سے 18 گھنٹے کی لوڈ شیڈنگ کا سلسلہ جاری ہے، جس سے عوام کی زندگی اجیرن ہو گئی ہے۔ لوڈ شیڈنگ کے اس ظلم کا شکار شہری شدید مشکلات کا سامنا کر رہے ہیں، پانی کی شدید قلت کا سامنا ہے، کاروبار اور دیگر ضروریات زندگی میں مشکلات بڑھ گئیں ہیں۔

شہریوں کا کہنا ہے کہ واپڈا کی جانب سے کی جانے والی اس طویل لوڈ شیڈنگ سے کاروبار کا بھی نقصان ہو رہا ہے جبکہ عوام کو روزمرہ کی زندگی میں مشکلات کا سامنا ہے۔ ان کا کہنا ہے کہ واپڈا کی غیر ذمہ داری اور عدم توجہی کی وجہ سے علاقے کے لوگ انتہائی پریشانی کا شکار ہیں۔

عوام نے اعلیٰ حکام سے مطالبہ کیا ہے کہ وہ فوری طور پر اس مسئلے کا نوٹس لیں اور واپڈا کے خلاف سخت کارروائی کریں تاکہ لوڈ شیڈنگ کے اس عذاب سے نجات مل سکے۔

یہ صورت حال شہر کے شہریوں کے لیے انتہائی نازک اور پریشان کن ہے اور یہ امید کی جا رہی ہے کہ حکام جلد اس پر توجہ دیں گے اور عوام کو ریلیف فراہم کریں گے۔